ನಿರ್ದೇಶಕ ಸಂಜಯ್ ಗುಪ್ತಾ ನಿಧನ: ‘ಕಾಬಿಲ್’ ಸಿನಿಮಾ ನೆನೆದು ಹೃತಿಕ್ ರೋಷನ್ ಶ್ರದ್ಧಾಂಜಲಿ

ಬಾಲಿವುಡ್‌ನ ಖ್ಯಾತ ನಿರ್ದೇಶಕ ಸಂಜಯ್ ಗುಪ್ತಾ ಶನಿವಾರ (ಅಕ್ಟೋಬರ್ 31) ತಮ್ಮ ಮುಂಬೈನ ನಿವಾಸದಲ್ಲಿ ಆಕಸ್ಮಿಕವಾಗಿ ಬಿದ್ದು ನಿಧನರಾಗಿದ್ದಾರೆ. ಅವರಿಗೆ 59 ವರ್ಷ ವಯಸ್ಸಾಗಿತ್ತು. ತಮ್ಮ ನಿವಾಸದಲ್ಲಿ ಆಕಸ್ಮಿಕವಾಗಿ ಕಾಲು ಜಾರಿ ಬಿದ್ದು ತಲೆಗೆ ಬಲವಾದ ಪೆಟ್ಟು ಬಿದ್ದ ಪರಿಣಾಮ ಅವರು ಕೊನೆಯುಸಿರೆಳೆದಿದ್ದಾರೆ ಎಂದು ತಿಳಿದುಬಂದಿದೆ. ಅವರ ಹಠಾತ್ ನಿಧನಕ್ಕೆ ಇಡೀ ಹಿಂದಿ ಚಿತ್ರರಂಗ ಕಂಬನಿ ಮಿಡಿದಿದೆ. 2017ರಲ್ಲಿ ತೆರೆಕಂಡಿದ್ದ ಹಿಟ್ ಸಿನಿಮಾ ‘ಕಾಬಿಲ್’ ಚಿತ್ರದಲ್ಲಿ ಸಂಜಯ್ ಗುಪ್ತಾ ಅವರೊಂದಿಗೆ ಕೆಲಸ ಮಾಡಿದ್ದ ನಟ ಹೃತಿಕ್ ರೋಷನ್ ಅವರು ಎಕ್ಸ್ (ಟ್ವಿಟರ್) ಖಾತೆಯಲ್ಲಿ ಭಾವನಾತ್ಮಕ ಪೋಸ್ಟ್ ಹಂಚಿಕೊಳ್ಳುವ ಮೂಲಕ ಅಂತಿಮ ನಮನ ಸಲ್ಲಿಸಿದ್ದಾರೆ.

ನಿರ್ದೇಶಕ ಸಂಜಯ್ ಗುಪ್ತಾ ಅವರೊಂದಿಗಿನ ಫೋಟೋ ಹಂಚಿಕೊಂಡಿರುವ ಹೃತಿಕ್ ರೋಷನ್, ‘ಸಂಜಯ್, ನಾನು ನಿಮ್ಮನ್ನು ತುಂಬಾ ಮಿಸ್ ಮಾಡಿಕೊಳ್ಳುತ್ತೇನೆ. ನಿಮ್ಮೊಂದಿಗೆ ಒಂದೇ ಒಂದು ಸಿನಿಮಾ ಮಾಡಿದ್ದು ಸಾಕಾಗಲಿಲ್ಲ… ನಿಮ್ಮೊಂದಿಗಿನ ಸಮಯವನ್ನು ನಾನು ಯಾವಾಗಲೂ ಪ್ರೀತಿಯಿಂದ ನೆನಪಿಸಿಕೊಳ್ಳುತ್ತೇನೆ. ನಿಮ್ಮ ನಗು, ನಿಮ್ಮ ಉತ್ಸಾಹ ಮತ್ತು ಪ್ರತಿಯೊಂದು ಉತ್ತಮ ಕಲ್ಪನೆ ಮೂಡಿದಾಗಲೂ ನಿಮ್ಮಲ್ಲಿದ್ದ ಮಗುವಿನಂತಹ ಉತ್ಸಾಹ ಬೆಳಗುತ್ತಿತ್ತು. ನಾವು ಒಟ್ಟಿಗೆ ಮಾಡಬೇಕಾದ ಕೆಲಸಗಳು ಇನ್ನೂ ಸಾಕಷ್ಟು ಇದ್ದವು, ಇದು ತುಂಬಾ ಬೇಗ ಮುಗಿದುಹೋಯಿತು’ ಎಂದು ಬರೆದುಕೊಂಡಿದ್ದಾರೆ.

ಮುಂದುವರಿದು, ‘ನನ್ನ ಸ್ನೇಹಿತನೇ, ನಿಮ್ಮನ್ನು ಸದಾ ಕೃತಜ್ಞತೆಯಿಂದ ನೆನಪಿಸಿಕೊಳ್ಳುತ್ತೇನೆ. ಕಾಬಿಲ್ ಚಿತ್ರದ ಮೂಲಕ ನನಗೆ ನನ್ನ ಜೀವನದ ಅತ್ಯುತ್ತಮ ಅನುಭವ ನೀಡಿದ್ದಕ್ಕಾಗಿ ನಿಮ್ಮನ್ನು ಮತ್ತಷ್ಟು ಗಟ್ಟಿಯಾಗಿ ಅಪ್ಪಿಕೊಂಡು ಧನ್ಯವಾದ ಹೇಳಬೇಕಿತ್ತು. ಆ ಚಿತ್ರಕ್ಕಾಗಿ ನೀವು ಎಷ್ಟು ಶ್ರಮಿಸಿದ್ದೀರಿ ಎಂಬುದು ಯಾರಿಗೂ ಪೂರ್ಣವಾಗಿ ತಿಳಿಯಲು ಸಾಧ್ಯವಿಲ್ಲ. ನನ್ನ ಹೃದಯ ಒಡೆದುಹೋಗಿದೆ. ನಿಮ್ಮ ಕುಟುಂಬಕ್ಕೆ ಈ ದುಃಖ ಭರಿಸುವ ಶಕ್ತಿ ಸಿಗಲಿ. ಓ ಮೈ ಫ್ರೆಂಡ್, ನಿಮ್ಮ ಆತ್ಮಕ್ಕೆ ಶಾಂತಿ ಸಿಗಲಿ’ ಎಂದು ಹೃತಿಕ್ ಕಂಬನಿ ಮಿಡಿದಿದ್ದಾರೆ.

Sanjay , I’m gonna miss you man. One film with you wasn’t enough … I will always remember our time together with so much love for you .. your laughter, your passion , that child in you that lit up with every good idea , there was so much more we needed to do together man , this is way too soon 💔

Im gonna remember you with so much gratitude my friend , I wish I had hugged you harder and thanked you for giving me the best experience of my life with kaabil. Nobody will fully know how much you gave that film. I’m heartbroken , this was too soon.

Strength to the family … Rest in peace my friend …

— Hrithik Roshan (@iHrithik) October 31, 2026

ಘಟನೆಗೆ ಸಂಬಂಧಿಸಿದಂತೆ ವರ್ಸೋವಾ ಪೊಲೀಸರು ಆಕಸ್ಮಿಕ ಸಾವು ಎಂದು ಪ್ರಕರಣ ದಾಖಲಿಸಿಕೊಂಡು ತನಿಖೆ ನಡೆಸುತ್ತಿದ್ದಾರೆ. ಶನಿವಾರ ಮುಂಜಾನೆ ಪೊಲೀಸರಿಗೆ ಸಂಜಯ್ ಗುಪ್ತಾ ಅವರ ನಿಧನದ ಮಾಹಿತಿ ಸಿಕ್ಕಿತ್ತು. ಮನೆಯ ಸಿಸಿಟಿವಿ ದೃಶ್ಯ ಪರಿಶೀಲಿಸಿದಾಗ, ರಾತ್ರಿ ಸುಮಾರು 2 ಗಂಟೆಗೆ ಡ್ರಾಯಿಂಗ್ ರೂಮ್‌ನಲ್ಲಿ ಕುಳಿತಿದ್ದ ಸಂಜಯ್ ಗುಪ್ತಾ ಅವರು ಅಡುಗೆಮನೆಗೆ ತೆರಳುವಾಗ ನಿಯಂತ್ರಣ ತಪ್ಪಿ ಗೋಡೆಗೆ ಬಿದ್ದಿರುವುದು ಕಂಡುಬಂದಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಇದನ್ನೂ ಓದಿ: ಹೃತಿಕ್ ರೋಷನ್ ಸಿನಿಮಾ ನಿರ್ದೇಶಿಸಲಿರುವ ದಕ್ಷಿಣದ ನಿರ್ದೇಶಕ

1967ರಲ್ಲಿ ಮುಂಬೈನಲ್ಲಿ ಜನಿಸಿದ ಸಂಜಯ್ ಗುಪ್ತಾ, 1994ರಲ್ಲಿ ಸಂಜಯ್ ದತ್, ರವೀನಾ ಟಂಡನ್, ಕರಿಷ್ಮಾ ಕಪೂರ್ ಅಭಿನಯದ ‘ಆತಿಶ್: ಫೀಲ್ ದಿ ಫೈರ್’ ಚಿತ್ರದ ಮೂಲಕ ತಮ್ಮ 26ನೇ ವಯಸ್ಸಿನಲ್ಲಿ ನಿರ್ದೇಶಕನಾಗಿ ಚಿತ್ರರಂಗ ಪ್ರವೇಶಿಸಿದರು. ತರುವಾಯ ಗ್ಯಾಂಗ್‌ಸ್ಟರ್ ಕಥಾಹಂದರದ ಸಿನಿಮಾಗಳನ್ನು ನಿರ್ಮಿಸುವಲ್ಲಿ ಅವರು ಸಿದ್ಧಹಸ್ತರೆನಿಸಿಕೊಂಡರು. ‘ಕಾಂಟೇ’, ‘ಜಿಂದಾ’, ‘ಕಾಬಿಲ್’ ಮುಂತಾದ ಸಿನಿಮಾಗಳ ಮೂಲಕ ಅವರು ಗಮನ ಸೆಳೆದಿದ್ದರು.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.