ಬಾಲಿವುಡ್​​ ನಟನಿಗೆ ಬೆದರಿಕೆ ಕರೆ, ಐದು ಕೋಟಿ ಹಣಕ್ಕೆ ಬೇಡಿಕೆ

ಬಾಲಿವುಡ್​​ ಮೇಲೆ ಮಾಫಿಯಾ ಕಣ್ಣು ಬಿದ್ದಿದೆ. 80-90ರ ದಶದಲ್ಲಿ ಬಾಲಿವುಡ್​​ ಮೇಲೆ ದೊಡ್ಡ ಮಟ್ಟದಲ್ಲಿ ಮಾಫಿಯಾ ಕರಿನೆರಳು ಬಿದ್ದಿತ್ತು. ಅದಾದ ಬಳಿಕ ಬಾಲಿವುಡ್​​ ಬಹುತೇಕ ನೆಮ್ಮದಿಯಿಂದ ಇತ್ತು. ಆದರೆ ಇತ್ತೀಚೆಗೆ ಮತ್ತೆ ಈ ಮಾಫಿಯಾ ಗ್ಯಾಂಗಿನವರು ಬಾಲಿವುಡ್​​ ಮೇಲೆ ಕಣ್ಣು ಹಾಕಿದ್ದಾರೆ. ವಿಶೇಷವಾಗಿ ಬಿಷ್ಣೋಯಿ ಗ್ಯಾಂಗ್, ಗೋಲ್ಡಿ ಬ್ರಾರ್ ಗ್ಯಾಂಗ್​​ ಇನ್ನೂ ಕೆಲವರು ವಿದೇಶದಲ್ಲಿ ಇದ್ದುಕೊಂಡು ಬಾಲಿವುಡ್​ ನಟರಿಗೆ ಬೆದರಿಕೆಗಳನ್ನು ಹಾಕುತ್ತಿದ್ದಾರೆ. ಕೆಲವರ ಮೇಲೆ ದಾಳಿಗಳು ಸಹ ನಡೆದಿವೆ. ಇದೀಗ ಮತ್ತೊಬ್ಬ ಬಾಲಿವುಡ್​ ನಟನಿಗೆ ಗ್ಯಾಂಗ್​ನಿಂದ ಬೆದರಿಕೆ ಬಂದಿದ್ದು ಐದು ಕೋಟಿ ಹಣಕ್ಕೆ ಬೇಡಿಕೆ ಇಡಲಾಗಿದೆ.

ಬಾಲಿವುಡ್ ನಟ, ನಿರ್ಮಾಪಕ ತುಷಾರ್ ಕಪೂರ್ ಅವರಿಗೆ ಲಾರೆನ್ಸ್ ಬಿಷ್ಣೋಯ್ ಗ್ಯಾಂಗ್‌ನ ಸದಸ್ಯನೆಂದು ಹೇಳಿಕೊಂಡ ವ್ಯಕ್ತಿಯೊಬ್ಬರಿಂದ 5 ಕೋಟಿ ರೂ.ಗಳ ಸುಲಿಗೆ ಬೆದರಿಕೆ ಕರೆ ಬಂದಿದೆ. ಹ್ಯಾರಿ ಬಕ್ಸರ್ ಎಂಬ ಹೆಸರಿನಲ್ಲಿ ಈ ಕರೆ ಮಾಡಲಾಗಿದ್ದು, ಹಣ ಕೊಡುವಂತೆ ಬೆದರಿಕೆ ಹಾಕಲಾಗಿದ್ದು, ಹಣ ಕೊಡದಿದ್ದಲ್ಲಿ ಜೀವ ತೆಗೆಯುವುದಾಗಿ ಬೆದರಿಕೆ ಹಾಕಿದ್ದಾರೆ. ನಟ ತುಷಾರ್ ಕಪೂರ್ ಈ ಬಗ್ಗೆ ಮುಂಬೈ ಪೊಲೀಸರಿಗೆ ಮಾಹಿತಿ ತಲುಪಿಸಿದ್ದಾರೆ.

ಮುಂಬೈ ಅಪರಾಧ ವಿಭಾಗ ನಡೆಸಿದ ಪ್ರಾಥಮಿಕ ತನಿಖೆಯು ಈ ಬೆದರಿಕೆ ಕರೆಯಲ್ಲಿ ಬಿಷ್ಣೋಯ್ ಗ್ಯಾಂಗ್‌ನ ನೇರ ಭಾಗಿಯಾಗಿರುವ ಸಾಧ್ಯತೆಯನ್ನು ತಳ್ಳಿಹಾಕಿದೆ. ಈ ಬೆದರಿಕೆ ಕುರಿತು ತುಷಾರ್ ಕಪೂರ್ ಅವರು ಮುಂಬೈ ಪೊಲೀಸರಿಗೆ ಅನಧಿಕೃತವಾಗಿ ಮಾಹಿತಿ ನೀಡಿದ್ದು, ಇದರ ಬೆನ್ನಲ್ಲೇ ಅವರ ಭದ್ರತೆಯನ್ನು ಹೆಚ್ಚಿಸಲಾಗಿದೆ. ಈ ಪ್ರಕರಣದ ತನಿಖೆಯನ್ನು ಅಪರಾಧ ವಿಭಾಗ ಹಾಗೂ ಅದರ ಸುಲಿಗೆ ವಿರೋಧಿ ವಿಭಾಗಕ್ಕೆ ವಹಿಸಲಾಗಿದೆ.

ಇದನ್ನೂ ಓದಿ:ಬಾಲಿವುಡ್​​ಗೆ ಹಾರಲಿರುವ ಮಂಗಳೂರು ಮೂಲದ ನಟಿ ಕೃತಿ ಶೆಟ್ಟಿ

ಪೊಲೀಸ್ ಮೂಲಗಳ ಪ್ರಕಾರ, ಅಪರಾಧ ವಿಭಾಗದ ತಾಂತ್ರಿಕ ತಂಡವು ಬೆದರಿಕೆ ಕರೆಯ ಆಡಿಯೋ ರೆಕಾರ್ಡಿಂಗ್ ಅನ್ನು ಪರಿಶೀಲಿಸಿದ್ದು, ಕಳುಹಿಸಿದವರ ಧ್ವನಿಯನ್ನು ತಮ್ಮ ಡೇಟಾಬೇಸ್‌ನಲ್ಲಿರುವ ಹ್ಯಾರಿ ಬಕ್ಸರ್‌ನ ಅಧಿಕೃತ ಆಡಿಯೋ ಮಾದರಿಗಳೊಂದಿಗೆ ಹೋಲಿಸಿ ನೋಡಿದೆ. ಈ ವಿಶ್ಲೇಷಣೆಯಲ್ಲಿ ಎರಡೂ ರೆಕಾರ್ಡಿಂಗ್‌ಗಳು ತಾಳೆಯಾಗುತ್ತಿಲ್ಲ ಎಂಬುದು ತಿಳಿದುಬಂದಿದೆ. ನಟನನ್ನು ಬೆದರಿಸಿ ಹಣ ವಸೂಲಿ ಮಾಡಲು ಅಪರಿಚಿತ ವ್ಯಕ್ತಿಯೊಬ್ಬ ಬಿಷ್ಣೋಯ್ ಗ್ಯಾಂಗ್‌ನ ಸದಸ್ಯನಂತೆ ನಟಿಸಿರಬಹುದು ಎಂದು ಪೊಲೀಸರು ಶಂಕಿಸಿದ್ದಾರೆ. ಈ ಕುರಿತು ಧ್ವನಿ ರೆಕಾರ್ಡಿಂಗ್‌ನ ಮೂಲವನ್ನು ಪತ್ತೆಹಚ್ಚಲು ಮತ್ತು ಕರೆ ಮಾಡಿದವರನ್ನು ಗುರುತಿಸಲು ಪೊಲೀಸರು ತನಿಖೆಯನ್ನು ಮುಂದುವರಿಸಿರುವ ಕಾರಣ, ಇಲ್ಲಿಯವರೆಗೆ ಯಾವುದೇ ಪ್ರಥಮ ವರ್ತಮಾನ ವರದಿ ದಾಖಲಾಗಿಲ್ಲ.

ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ