ಸೂಪರ್​ ಹಿಟ್ ‘96’ ಸಿನಿಮಾಗೆ ಬರಲಿದೆ ಸೀಕ್ವೆಲ್; ಗುಡ್​ ನ್ಯೂಸ್​ ನೀಡಿದ ನಿರ್ದೇಶಕ

2018ರ ಅಕ್ಟೋಬರ್​ನಲ್ಲಿ ‘96’ ಸಿನಿಮಾ ಬಿಡುಗಡೆ ಆಗಿತ್ತು. ಆ ಸಿನಿಮಾದಲ್ಲಿ ವಿಜಯ್​ ಸೇತುಪತಿ ಮತ್ತು ತ್ರಿಶಾ ಕೃಷ್ಣನ್ ಅವರು ಪ್ರಮುಖ ಪಾತ್ರ ಮಾಡಿದ್ದರು. ವಿಶೇಷವಾದ ಕಥಾಹಂದರ ಇರುವ ಆ ಚಿತ್ರವನ್ನು ಪ್ರೇಕ್ಷಕರು ಇಷ್ಟಪಟ್ಟಿದ್ದರು. ಬಾಕ್ಸ್ ಆಫೀಸ್​ನಲ್ಲಿ ‘96’ ಸಿನಿಮಾ ಭರ್ಜರಿ ಕಲೆಕ್ಷನ್​ ಮಾಡಿತ್ತು. ಬೇರೆ ಬೇರೆ ಭಾಷೆಗಳಿಗೂ ಈ ಚಿತ್ರ ರಿಮೇಕ್​ ಆಗಿತ್ತು. ಈಗ ಆ ಸಿನಿಮಾಗೆ ಸೀಕ್ವೆಲ್​ ಬರುತ್ತಿದೆ. ಈ ವಿಷಯ ಕೇಳಿ ತ್ರಿಶಾ ಕೃಷ್ಣನ್​ ಹಾಗೂ ವಿಜಯ್​ ಸೇತುಪತಿ ಅವರ ಅಭಿಮಾನಿಗಳಿಗೆ ಖುಷಿ ಆಗಿದೆ. ನಿರ್ದೇಶಕ ಪ್ರೇಮ್​ ಕುಮಾರ್​ ಅವರು ‘96’ ಸಿನಿಮಾಗೆ ಸೀಕ್ವೆಲ್​ ಘೋಷಣೆ ಮಾಡಿದ್ದಾರೆ.

ಮಾಜಿ ಪ್ರೇಮಿಗಳಿಬ್ಬರು ಹಲವು ವರ್ಷಗಳ ಬಳಿಕ ಭೇಟಿಯಾದಾಗ ನಡೆಯುವ ಎಮೋಷನಲ್​ ಸಂಗತಿಗಳನ್ನು ‘96’ ಸಿನಿಮಾ ತೆರೆದಿಡುತ್ತದೆ. ಮಾಜಿ ಪ್ರೇಮಿಗಳ ಪಾತ್ರದಲ್ಲಿ ತ್ರಿಶಾ ಕೃಷ್ಣನ್​ ಹಾಗೂ ವಿಜಯ್​ ಸೇತುಪತಿ ಅವರು ನಟಿಸಿದ್ದರು. ಈ ಸಿನಿಮಾ ನೋಡಿದ ಎಲ್ಲರಿಗೂ ತಮ್ಮ ಹಳೆಯ ದಿನಗಳ ನೆನಪಾಗಿದ್ದವು. ಆ ಸಿನಿಮಾದ ಮುಂದುವರಿದ ಕಥೆಯನ್ನು ತಿಳಿಯಲು ಈಗ ಸಿನಿಪ್ರಿಯರು ಕಾಯುತ್ತಿದ್ದಾರೆ.

‘96’ ಸಿನಿಮಾ ಬಿಡುಗಡೆಯಾಗಿ 6 ವರ್ಷಗಳು ಕಳೆದಿವೆ. ಹಾಗಿದ್ದರೂ ಕೂಡ ಜನರು ಆ ಸಿನಿಮಾ ಬಗ್ಗೆ ಈಗಲೂ ಮಾತನಾಡುತ್ತಿದ್ದಾರೆ. ಚಿತ್ರದ ಬಗ್ಗೆ ಜನರಿಗೆ ಇರುವ ಕ್ರೇಜ್ ಗಮನಿಸಿದ ನಿರ್ದೇಶಕ ಪ್ರೇಮ್​ ಕುಮಾರ್​ ಅವರು ಆ ಕಥೆಯನ್ನು ಮುಂದುವರಿಸಲು ನಿರ್ಧರಿಸಿದ್ದಾರೆ. ‘96’ ನೋಡಿ ಇಷ್ಟಪಟ್ಟಿದ್ದ ಪ್ರೇಕ್ಷಕರು ಖಂಡಿತವಾಗಿಯೂ ಸೀಕ್ವೆಲ್​ ಮೇಲೆ ನಿರೀಕ್ಷೆ ಇಟ್ಟುಕೊಂಡಿದ್ದಾರೆ.

ಇದನ್ನೂ ಓದಿ: ‘ಕ್ಷಮೆ ಕೇಳಿ, ವಿಡಿಯೋ ಡಿಲೀಟ್​ ಮಾಡಿಸಿ, ಹಣ ನೀಡಿ’: ಎವಿ ರಾಜುಗೆ ಬಿಸಿ ಮುಟ್ಟಿಸಿದ ತ್ರಿಶಾ

ನಿರ್ದೇಶಕ ಪ್ರೇಮ್​ ಅವರು ಈಗಾಗಲೇ ‘96’ ಸೀಕ್ವೆಲ್​ಗೆ ಸ್ಕ್ರಿಪ್ಟ್​ ಪೂರ್ಣಗೊಳಿಸಿದ್ದಾರೆ. ವಿಜಯ್​ ಸೇತುಪತಿ ಮತ್ತು ತ್ರಿಶಾ ಕೃಷ್ಣನ್ ಅವರನ್ನು ಭೇಟಿಯಾಗಿ ಕಥೆ ಹೇಳುವುದು ಮಾತ್ರ ಬಾಕಿ ಇದೆ. ಒಂದು ವೇಳೆ ಆ ಕಲಾವಿದರಿಬ್ಬರು ಗ್ರೀನ್​ ಸಿಗ್ನಲ್​ ನೀಡಿದರೆ ಸಿನಿಮಾ ಶೀಘ್ರದಲ್ಲೇ ಸೆಟ್ಟೇರಲಿದೆ. ತ್ರಿಶಾ ಹಾಗೂ ವಿಜಯ್ ಸೇತುಪತಿ ಅವರು ಕಥೆ ಕೇಳಿ ಯಾವ ರೀತಿ ಪ್ರತಿಕ್ರಿಯಿಸಬಹುದು ಎಂಬದನ್ನು ತಿಳಿಯುವ ಕೌತುಕ ಮೂಡಿದೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.