Avatar: ಮತ್ತೆ ರಿಲೀಸ್ ಆಗುತ್ತಿದೆ ‘ಅವತಾರ್’ ಸಿನಿಮಾ; ಈ ಬಾರಿ 2 ವಾರ ಮಾತ್ರ ಪ್ರದರ್ಶನ

Avatar movie re release: ಸೆಪ್ಟೆಂಬರ್ 23ರಂದು ‘ಅವತಾರ್’ ರಿ-ರಿಲೀಸ್ ಆಗುತ್ತದೆ. ಆದರೆ ಒಂದು ಷರತ್ತು ಕೂಡ ಇದೆ. ಈ ಬಾರಿ ಈ ಸಿನಿಮಾ ಚಿತ್ರಮಂದಿರದಲ್ಲಿ ಪ್ರದರ್ಶನ ಕಾಣುವುದು ಕೇವಲ 2 ವಾರ ಮಾತ್ರ!

‘ಅವತಾರ್’ ಪೋಸ್ಟರ್

TV9 Web | Edited By: ಮದನ್ ಕುಮಾರ್|
Updated on:Aug 24, 2022 | 11:57 AM

2009ರಲ್ಲಿ ಬಂದ ‘ಅವತಾರ್’ (Avatar) ಸಿನಿಮಾ ವಿಶ್ವಾದ್ಯಂತ ಧೂಳೆಬ್ಬಿಸಿತ್ತು. ಪ್ರತಿ ಬಾರಿ ಮರು ಬಿಡುಗಡೆ ಆದಾಗಲೂ ಈ ಹಾಲಿವುಡ್ (Hollywood News) ಸಿನಿಮಾವನ್ನು ಜನರು ಮುಗಿಬಿದ್ದು ನೋಡಿದ ಉದಾಹರಣೆ ಇದೆ. ಈಗ ಮತ್ತೊಮ್ಮೆ ಈ ಚಿತ್ರವನ್ನು ಥಿಯೇಟರ್ನಲ್ಲಿ ಕಣ್ತುಂಬಿಕೊಳ್ಳುವ ಅವಕಾಶ ಸಿಗುತ್ತಿದೆ. ಸೆಪ್ಟೆಂಬರ್ 23ರಂದು ರೀ-ರಿಲೀಸ್ ಮಾಡಲು ಪ್ಲ್ಯಾನ್ ಮಾಡಿಕೊಳ್ಳಲಾಗಿದೆ. ಜೇಮ್ಸ್ ಕ್ಯಾಮೆರಾನ್ (James Cameron) ನಿರ್ದೇಶನದ ‘ಅವತಾರ್’ ಸಿನಿಮಾದ ಪ್ರತಿ ದೃಶ್ಯ ಕೂಡ ಬೇರೆ ಲೋಕಕ್ಕೆ ಕರೆದುಕೊಂಡು ಹೋಗುತ್ತದೆ. ಎಲ್ಲ ವಯೋಮಾನದ ಪ್ರೇಕ್ಷಕರೂ ಈ ಚಿತ್ರವನ್ನು ನೋಡಿ ಮೆಚ್ಚಿಕೊಂಡಿದ್ದಾರೆ. ಈಗ ಇನ್ನೊಮ್ಮೆ ಚಿತ್ರಮಂದಿರದಲ್ಲಿ ಈ ಸಿನಿಮಾ ರಾರಾಜಿಸಲಿದೆ. ಜಗತ್ತಿನಾದ್ಯಂತ ಇರುವ ಸಿನಿಪ್ರಿಯರು ಸೆಪ್ಟೆಂಬರ್ 23ಕ್ಕಾಗಿ ಕಾಯುತ್ತಿದ್ದಾರೆ. ಅಷ್ಟಕ್ಕೂ ಈಗ ಈ ಸಿನಿಮಾವನ್ನು ಮರು ಬಿಡುಗಡೆ ಮಾಡುತ್ತಿರುವುದು ಯಾಕೆ? ಅದಕ್ಕೂ ಮುಖ್ಯವಾದ ಕಾರಣ ಇದೆ. ಆ ಕುರಿತು ಇಲ್ಲಿದೆ ವಿವರ..

‘ಅವತಾರ್’ ಸಿನಿಮಾದ ಮುಂದುವರಿದ ಕಥೆ ಬಗ್ಗೆ ತಿಳಿದುಕೊಳ್ಳಬೇಕು ಎಂಬುದು ಸಿನಿಪ್ರಿಯರ ಆಸೆ. ಅದಕ್ಕಾಗಿ ಈ ಚಿತ್ರದ ಸೀಕ್ವೆಲ್ ಬರಬೇಕು ಎಂದು ಎಲ್ಲರೂ ಬಯಸುತ್ತಿದ್ದರು. ನಿರ್ದೇಶಕ ಜೇಮ್ಸ್ ಕ್ಯಾಮೆರಾನ್ ಅವರು ಈ ಚಿತ್ರದ ಎರಡನೇ ಪಾರ್ಟ್ ಸಿದ್ಧ ಪಡಿಸುತ್ತಿದ್ದಾರೆ. ಅದಕ್ಕೆ ‘ಅವತಾರ್: ದಿ ವೇ ಆಫ್ ವಾಟರ್’ ಎಂದು ಹೆಸರು ಇಡಲಾಗಿದೆ. ಈ ವರ್ಷವೇ ಆ ಚಿತ್ರ ರಿಲೀಸ್ ಆಗಲಿದೆ. ಅದಕ್ಕೂ ಮುನ್ನ ಜನರನ್ನು ಮತ್ತೆ ಅವತಾರ್ ಲೋಕಕ್ಕೆ ಕೊಂಡೊಯ್ಯಲು ಮೊದಲ ಪಾರ್ಟ್ ಅನ್ನು ರೀ-ರಿಲೀಸ್ ಮಾಡಲಾಗುತ್ತಿದೆ.

ಇದನ್ನೂ ಓದಿ

‘ಅವತಾರ್’ ಸಿನಿಮಾಗೆ ಈಗ ಒಂದಷ್ಟು ಹೊಸ ತಂತ್ರಜ್ಞಾನವನ್ನು ಅಳವಡಿಸಲಾಗಿದೆ. 4ಕೆ ರೆಸಲ್ಯೂಷನ್ನಲ್ಲಿ ಸಿನಿಮಾ ಬಿತ್ತರ ಆಗಲಿದೆ. ಇದು ಪ್ರೇಕ್ಷಕರಿಗೆ ಹೊಸ ಅನುಭವ ನೀಡಲಿದೆ. ಬರೋಬ್ಬರಿ 13 ವರ್ಷಗಳ ಹಿಂದಿನ ಈ ಸಿನಿಮಾವನ್ನು ಈ ಕಾಲದ ತಂತ್ರಜ್ಞಾನಕ್ಕೆ ಅಪ್ಗ್ರೇಡ್ ಮಾಡಲು ಪ್ರಯತ್ನಿಸಲಾಗಿದೆ. ಈ ಸಿನಿಮಾದ ಗ್ರಾಫಿಕ್ಸ್ ದೃಶ್ಯಗಳನ್ನು ನೋಡುವುದೇ ಒಂದು ಅದ್ಭುತ ಅನುಭವ.

View this post on Instagram

A post shared by Avatar (@avatar)

ಸೆಪ್ಟೆಂಬರ್ 23ರಂದು ‘ಅವತಾರ್’ ರಿ-ರಿಲೀಸ್ ಆಗುತ್ತದೆ. ಹಾಗಂತ ನಿಧಾನವಾಗಿ ಯಾವಾಗ ಬೇಕಿದ್ದರೂ ನೋಡಿಕೊಳ್ಳೋಣ ಎಂದು ಆಲಸ್ಯ ತೋರಿಸುವಂತಿಲ್ಲ. ಯಾಕೆಂದರೆ ಈ ಬಾರಿ ಈ ಸಿನಿಮಾ ಚಿತ್ರಮಂದಿರದಲ್ಲಿ ಪ್ರದರ್ಶನ ಕಾಣುವುದು ಕೇವಲ 2 ವಾರ ಮಾತ್ರ! ಅಷ್ಟರೊಳಗೆ ನೋಡಬೇಕಷ್ಟೇ. ಇದನ್ನು ತಿಳಿಸುವ ಸಲುವಾಗಿ ಸೋಶಿಯಲ್ ಮೀಡಿಯಾದಲ್ಲಿ ಪೋಸ್ಟರ್ಗಳನ್ನು ಹಂಚಿಕೊಂಡಿದೆ ಚಿತ್ರತಂಡ. ಅಲ್ಲದೇ, ರೀ-ರಿಲೀಸ್ ಪ್ರಯುಕ್ತ ಹೊಸ ಟ್ರೇಲರ್ ಕೂಡ ಬಿಡುಗಡೆ ಮಾಡಲಾಗಿದೆ.

ಹೆಚ್ಚಿನ ಸಿನಿಮಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ.

Published On - 11:48 am, Wed, 24 August 22