ಮತ್ತೆ ಬಂದರು ಪ್ರಚಂಡ ಜಾದೂಗಾರರು, ಹಾರ್ಸ್​ಮನ್​ಗಳ ಮುಂದಿನ ಗುರಿ ಏನು?

ಫೇಸ್​ಬುಕ್, ಯೂಟ್ಯೂಬ್, ಇನ್​ಸ್ಟಾಗ್ರಾಂ ರೀಲ್ಸ್​ಗಳಲ್ಲಿ ನಾಲ್ವರು ಜಾದೂಗಾರರ ವಿಡಿಯೋ ಒಂದು ಪದೇ ಪದೇ ಕಾಣಲು ಸಿಗುತ್ತದೆ. ಒಬ್ಬ ಮಹಿಳೆ ಮೂವರು ಪುರುಷರು ಒಂದು ಹೈ ಸೆಕ್ಯುರಿಟಿ ಇರುವ ಜಾಗಕ್ಕೆ ಹೋಗಿ ಅಲ್ಲಿಂದ ಒಂದು ಸಣ್ಣ ಚಿಪ್ ಕದಿಯುತ್ತಾರೆ. ಆ ಚಿಪ್ ಅನ್ನು ಅಲ್ಲೇ ಇರುವ ಸೈನಿಕರ ಕಣ್ಣು ತಪ್ಪಿಸಿ, ಒಬ್ಬರ ಕೈಯಿಂದ ಒಬ್ಬರಿಗೆ ದಾಟಿಸುತ್ತಾ, ಎಲ್ಲರ ಕಣ್ಣಿಗೆ ಮಣ್ಣೆರಚಿ ಹೊರಗೆ ತೆಗೆದುಕೊಂಡು ಬರುತ್ತಾರೆ. ಈ ದೃಶ್ಯ ಆಗಾಗ್ಗೆ ಟ್ರೆಂಡ್ ಆಗುತ್ತಲೇ ಇರುತ್ತದೆ. ಅಸಲಿಗೆ ಇದು ‘ನೌ ಯು ಸೀ ಮಿ’ ಸಿನಿಮಾದ ದೃಶ್ಯ. ಈ ಸಿನಿಮಾ ನಾಲ್ಕು ಜಾದೂಗಾರರ ಕತೆ ಹೊಂದಿರುವ ಸಿನಿಮಾ. ಇಡೀ ಸಿನಿಮಾದ ಕತೆಯೇ ಜಾದೂಗಾರಿಕೆ ಮೇಲೆ ಆಧರಿಸಿದ್ದಾಗಿದೆ. ಇದೀಗ ಈ ಸಿನಿಮಾದ ಮೂರನೇ ಭಾಗ ಬಿಡುಗಡೆ ಆಗಲಿದೆ.

‘ನೌ ಯು ಸಿ ಮೀ 3’ ಸಿನಿಮಾದ ಟ್ರೈಲರ್ ಈಗಾಗಲೇ ಬಿಡುಗಡೆ ಆಗಿದ್ದು, ಸಖತ್ ಥ್ರಿಲ್ಲಂಗ್ ಅನುಭವವನ್ನು ಟ್ರೈಲರ್ ನೀಡುತ್ತಿದೆ. ಸಿನಿಮಾನಲ್ಲಿ ಅದ್ಭುತ ಜಾದೂಗಾರರನ್ನು ಹಾರ್ಸ್​ಮನ್ ಎಂದು ಕರೆಯಲಾಗುತ್ತದೆ. ಈ ಹಿಂದಿನ ಸಿನಿಮಾಗಳಲ್ಲಿ ಇದ್ದ ನಾಲ್ವರು ಹಾರ್ಸ್​ಮನ್​ಗಳು ಬೇರೆ ಬೇರೆ ಆಗಿದ್ದು ಈಗ ಹೊಸ ಹಾರ್ಸ್​ಮನ್​ಗಳು ಅಂದರೆ ಜಾದೂಗಾರರು ತಂಡ ಸೇರಿಕೊಂಡಿದ್ದಾರೆ. ಈ ಹಿಂದಿನ ಸಿನಿಮಾಗಳ ರೀತಿಯೇ ಜಾದೂ ಬಳಸಿ ಇವರು ಕ್ರಿಮಿನಲ್​ಗಳ ವಿರುದ್ಧ ಹೋರಾಡುತ್ತಿದ್ದಾರೆ. ಆದರೆ ಈ ಬಾರಿ ಭಾರಿ ದೊಡ್ಡ ನಟೋರಿಯಸ್ ಗ್ಯಾಂಗ್ ಅನ್ನೇ ಎದುರು ಹಾಕಿಕೊಂಡಿದ್ದಾರೆ.

ಭಯೋತ್ಪಾದಕರು, ಅವರಿಗೆ ದೊಡ್ಡ ಮಟ್ಟಿಗೆ ಹಣ ಸಹಾಯ ಮಾಡುತ್ತಿರುವ ಅಂತರಾಷ್ಟ್ರೀಯ ಕ್ರಿಮಿನಲ್​ಗಳ ಮೇಲೆ ಇವರ ಕಣ್ಣು ಬಿದ್ದಿದೆ. ಭಯೋತ್ಪಾದಕರಿಗೆ ಹಣ ತಲುಪುವುದನ್ನು ತಡೆಯಲು ವಿಶ್ವದ ಅತ್ಯಂತ ದುಬಾರಿ ವಜ್ರವನ್ನು ಜಾದೂ ಬಳಸಿ ಕದಿಯಲು ಈ ತಂಡ ಮುಂದಾಗಿದೆ. ಟ್ರೈಲರ್​ನ ಆರಂಭದಲ್ಲಿ ಹಳೆ ಹಾರ್ಸ್​ಮನ್​ಗಳು ತಂಡ ಬಿಟ್ಟು ಹೋಗಿದ್ದಾರೆ ಎಂದು ತೋರಿಸಲಾಗಿದೆ. ಆದರೆ ಅದೇ ಟ್ರೈಲರ್​ನಲ್ಲಿ ಹಳೆ ಹಾರ್ಸ್​ಮನ್ ತಂಡದವರು ಮತ್ತೆ ಒಟ್ಟಿಗೆ ಸೇರಿಕೊಂಡಿದ್ದು ಎಲ್ಲರೂ ಸೇರಿ ಮಿಷನ್​ ನಲ್ಲಿ ಭಾಗಿ ಆಗುತ್ತಾರೆ.

ಇದನ್ನೂ ಓದಿ:ಮತ್ತೆ ಹಾಲಿವುಡ್​ಗೆ ಹಾರಲಿರುವ ನಟಿ ಆಲಿಯಾ ಭಟ್, ಸಿನಿಮಾ ಯಾವುದು?

ರುಬೆನ್ ಫ್ಲೆಶರ್ ‘ನೌ ಯು ಸೀ ಮಿ 3’ ಸಿನಿಮಾ ನಿರ್ದೇಶನ ಮಾಡಿದ್ದಾರೆ. ಈ ಹಿಂದೆ ಇವರು ‘ವೆನಮ್’, ‘ಜಾಂಬಿಲ್ಯಾಂಡ್’, ‘ದಿ ಮೌಲ್’ ಇನ್ನೂ ಕೆಲ ಸಿನಿಮಾಗಳನ್ನು ನಿರ್ದೇಶಿಸಿದ್ದರು. ಈ ಹಿಂದಿನ ‘ನೌ ಯು ಸಿ ಮೀ’ ಸಿನಿಮಾಗಳಲ್ಲಿ ನಟಿಸಿದ್ದ ಜೆಸ್ಸಿ ಇಸನ್​ಬರ್ಗ್, ವೂಡಿ ಹಾರ್ಲ್​ಸನ್, ಡೇವ್ ಫ್ರಾಂಕೊ, ಇಶಾ ಫಿಶರ್ ಮತ್ತು ಮಾರ್ಗನ್ ಫ್ರೀಮನ್ ನಟಿಸಿದ್ದಾರೆ. ಈ ಹಿಂದಿನ ಎರಡು ಸಿನಿಮಾಗಳಲ್ಲಿ ನಟಿಸಿದ್ದ ‘ಹಲ್ಕ್’ ಖ್ಯಾತಿಯ ಮಾರ್ಕ್ ರಫೆಲೊ ಈ ಸಿನಿಮಾದಲ್ಲಿ ನಟಿಸಿಲ್ಲ. ‘ನೌ ಯು ಸಿ ಮೀ 3’ ಸಿನಿಮಾ ಭಾರತದಲ್ಲಿ ಮೇ 31 ರಂದು ಬಿಡುಗಡೆ ಆಗಲಿದೆ.

ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ