ಪರಭಾಷೆಗೂ ಕಾಲಿಟ್ಟ ಸ್ಯಾಂಡಲ್​ವುಡ್​ನ ಅದೃಷ್ಟ ದೇವತೆ, ಕಲ್ಯಾಣ್ ದೇವ್ ಬಾಲಣ್ಣ ಜೊತೆ ಡಿಂಪಲ್ ಕ್ವೀನ್

ಬೆಂಗಳೂರು: ಕನ್ನಡದ ಡಿಂಪಲ್​ ಕ್ವೀನ್​ಗೆ ಡಿಮ್ಯಾಂಡೋ, ಡಿಮ್ಯಾಂಡು. ಸ್ಯಾಂಡಲ್​ವುಡ್​ ಲಕ್ಕಿ ಕ್ವೀನ್ ನಟಿ ರಚಿತಾರಾಮ್​ ತಮ್ಮ ಅದೃಷ್ಟವನ್ನ ಟಾಲಿವುಡ್​ನಲ್ಲಿ ಪರೀಕ್ಷೆ ಮಾಡ್ತಿದ್ದಾರೆ. ರಚ್ಚು ಈಗ ಪರಭಾಷೆ ಸಿನಿಮಾಗಳಿಗೂ ಬಣ್ಣ ಹಚ್ಚೋಕೆ ಸಿದ್ದವಾಗಿದ್ದು, ಸದ್ಯ ತೆಲುಗು ಸಿನಿಮಾದಲ್ಲಿ ರಚಿತಾ ಕಾಣಿಸಿಕೊಳ್ತಿದ್ದಾರೆ.

ಡಿಂಪಲ್​ ಕ್ವೀನ್​ ರಚಿತಾ ರಾಮ್​ ಸ್ಯಾಂಡಲ್​ವುಡ್​ನ ಅದೃಷ್ಟ ದೇವತೆ. ಯಾಕಂದ್ರೆ ರಚ್ಚು ಮಾಡಿರೋ ಸಿನಿಮಾಗಳು ಸೋತ ಉದಾಹರಣೆಗಳೇ ಕಡಿಮೆ. ಈಕೆ ಲಕ್ಕಿ ಗರ್ಲ್​ ಅಂತಲೇ ಅದೆಷ್ಟೋ ಸ್ಟಾರ್​ ನಟರು, ನಿರ್ದೇಶಕರು ಈಕೆಯ ಕಾಲ್​ಶೀಟ್​ಗಾಗಿ ಬೇಡಿಕೆ ಇಟ್ಟಿದ್ದೂ ಇದೆ. ಇಷ್ಟು ದಿನ ಕನ್ನಡದಲ್ಲಿ ಮಾತ್ರ ಮೋಡಿ ಮಾಡಿದ್ದ ರಚ್ಚು, ಈಗ ಪರ ಭಾಷೆಗಳಲ್ಲೂ ತಮ್ಮ ಅದೃಷ್ಟವನ್ನ ತೆಗೆದುಕೊಂಡು ಹೋಗ್ತಿದ್ದಾರೆ.

ಮೆಗಾ ಕುಟುಂಬದ ಕುಡಿಯೊಂದಿಗೆ ಮೊದಲ ಚಿತ್ರ: ಬುಲ್​ ಬುಲ್​ ಸಿನಿಮಾದ ಮೂಲಕ ಬಿಗ್​ ಸ್ಕ್ರೀನ್​ಗೆ ಎಂಟ್ರಿಕೊಟ್ಟ ನಟಿ ರಚಿತಾ ರಾಮ್​, ಈಗ ಸ್ಯಾಂಡಲ್ವುಡ್​ನ ಟಾಪ್​ ನಟಿ. ಜೊತೆಗೆ ರಚ್ಚು ಇದ್ರೆ ಸಿನಿಮಾ ಗೆಲ್ಲೋದು ಪಕ್ಕಾ ಅನ್ನೋ ನಂಬಿಕೆ ಇದೆ. ಸದ್ಯ ರಚಿತಾರಾಮ್​ಗೆ ಟಾಲಿವುಡ್​ನಲ್ಲಿ ಡಿಮ್ಯಾಂಡ್​ ಹೆಚ್ಚಾಗಿದೆ. ಸಾಲು ಸಾಲು ಸಿನಿಮಾಗಳು ರಚಿತಾಳನ್ನ ಅರಸಿ ಬರ್ತಿವೆ. ಅದ್ರಲ್ಲಿ, ಸದ್ಯಕ್ಕೆ ಮೆಗಾ ಕುಟುಂಬದ ಕುಡಿಯೊಂದಿಗೆ ರಚ್ಚು ಅಭಿನಯಿಸ್ತಿರೋ ಸುದ್ದಿ ರಿವೀಲ್​ ಆಗಿದೆ.

ಮೆಘಾ ಸ್ಟಾರ್​ ಚಿರಂಜೀವಿ ಅಳಿಯ ಕಲ್ಯಾಣ್​ ದೇವ್​ ಹೊಸ ಸಿನಿಮಾ ಸೂಪರ್​ ಮಚ್ಚಿ ಸಿನಿಮಾದಲ್ಲಿ ರಚ್ಚು ಕಲ್ಯಾಣ್​ ದೇವ್​ ಜೊತೆಗೆ ಬಣ್ಣ ಹಚ್ತಿದ್ದಾರೆ. ಇದು ಕಲ್ಯಾಣ್ ದೇವ್​ ಅಭಿನಯದ ಎರಡನೇ ಸಿನಿಮಾ. ವಿಜೇತ ಸಿನಿಮಾ ಮೂಲಕ ಕಲ್ಯಾಣ್​ ಬಣ್ಣದ ಲೋಕಕ್ಕೆ ಎಂಟ್ರಿ ಕೊಟ್ರು. ಆದ್ರೆ, ಅಷ್ಟೇನೂ ಸಕ್ಸಸ್​ ಕಾಣಲಿಲ್ಲ. ಈಗ ರಚ್ಚು ಜೊತೆಗೆ ಲಕ್​ ಟೆಸ್ಟ್ ಮಾಡ್ತಿದ್ದಾರೆ.

ಇದೊಂದೇ ಸಿನಿಮಾ ಅಲ್ಲ. ನಂದಮುರಿ ಬಾಲಕೃಷ್ಣ ಜೊತೆಗೂ ರಚಿತಾರಾಮ್​ ಸಿನಿಮಾ ಮಾಡಲಿದ್ದಾರಂತೆ. ಜೊತೆಗೆ ಟಾಲಿವುಡ್​ನಿಂದ ಇನ್ನಷ್ಟು ಆಫರ್ಸ್​ಗಳು ರಚ್ಚು ಲಿಸ್ಟ್​ನಲ್ಲಿವೆ. ಸದ್ಯಕ್ಕೆ ನವೆಂಬರ್​ 22ರಿಂದ ಸೂಪರ್​ ಮಚ್ಚಿ ಸಿನಿಮಾದಲ್ಲಿ ರಚ್ಚು ಬ್ಯೂಸಿಯಾಗಲಿದ್ದಾರೆ.

Published On - 8:13 am, Mon, 18 November 19