ನೀರಿನಂತೆ ದುಡ್ಡು ಖರ್ಚು ಮಾಡಿ 10 ನಟಿಯರನ್ನು ಕರೆಸಿಕೊಂಡ ‘ಡೇಂಜರಸ್’ ವಿಜ್ಞಾನಿ’ ಸರವಣನ್
The Legend Movie: ಸ್ಟಾರ್ ನಟರೂ ಕೂಡ ಮಾಡದ ರೀತಿಯಲ್ಲಿ ಸರವಣನ್ ಅವರು ಪ್ರಚಾರ ಮಾಡುತ್ತಿದ್ದಾರೆ. ಬಾಕ್ಸ್ ಆಫೀಸ್ನಲ್ಲಿ ಈ ಚಿತ್ರ ಎಷ್ಟು ಕಲೆಕ್ಷನ್ ಮಾಡಬಹುದು ಎಂಬ ಕೌತುಕ ಮೂಡಿದೆ.
Updated on:May 30, 2022 | 9:36 AM
ಚಿತ್ರರಂಗ ಎಂಬುದು ಮಾಯಾ ಲೋಕ. ಇಲ್ಲಿ ಏನು ಬೇಕಾದರೂ ಆಗಬಹುದು. ಅಂಥದ್ದೆಲ್ಲ ಆಗಬೇಕು ಎಂದರೆ ಹಣವನ್ನು ನೀರಿನಂತೆ ಖರ್ಚು ಮಾಡಬೇಕು. ಈ ಕಾರಣಕ್ಕಾಗಿ ಉದ್ಯಮಿ ಕಮ್ ನಟ ಸರವಣನ್ ಅರುಲ್ (Saravanan Arul) ಅವರು ಸುದ್ದಿ ಆಗುತ್ತಿದ್ದಾರೆ. ಅವರು ನಟಿಸಿರುವ ‘ದಿ ಲೆಜೆಂಡ್’ ಸಿನಿಮಾ ಬಿಡುಗಡೆಗೆ ಸಜ್ಜಾಗಿದೆ. ಸಿಕ್ಕಾಪಟ್ಟೆ ಅದ್ದೂರಿಯಾಗಿ ಈ ಚಿತ್ರದ ಆಡಿಯೋ ಮತ್ತು ಟ್ರೇಲರ್ ರಿಲೀಸ್ ಮಾಡಲಾಗಿದೆ. ಸರಣವನ್ ಅವರು ಸೌಂಡು ಮಾಡುತ್ತಿರುವುದು ನೋಡಿ ಕಾಲಿವುಡ್ (Kollywood) ಮಂದಿ ದಂಗಾಗಿದ್ದಾರೆ. ಹೌದು, ತುಂಬ ಅದ್ದೂರಿಯಾಗಿ ಈ ಸಿನಿಮಾದ ಪ್ರಚಾರ ಮಾಡಲಾಗುತ್ತಿದೆ. ‘ದಿ ಲೆಜೆಂಡ್’ (The Legend Movie) ಸಿನಿಮಾದಲ್ಲಿ ಸರವಣನ್ ಅವರು ವಿಜ್ಞಾನಿ ಮತ್ತು ಗ್ಯಾಂಗ್ಸ್ಟರ್ ಪಾತ್ರ ಮಾಡಿದ್ದಾರೆ. ಆ ಪಾತ್ರವನ್ನು ಮೋಸ್ಟ್ ಡೇಂಜರಸ್ ವಿಜ್ಞಾನಿ ಎಂದು ಟ್ರೇಲರ್ನಲ್ಲಿ ಬಣ್ಣಿಸಲಾಗಿದೆ. ಟ್ರೇಲರ್ ಲಾಂಚ್ ಸಲುವಾಗಿ ಅವರು ಬರೋಬ್ಬರಿ 10 ಟಾಪ್ ನಾಯಕಿಯರನ್ನು ವೇದಿಕೆಗೆ ಆಹ್ವಾನಿಸಿರುವುದು ಸುದ್ದಿ ಆಗಿದೆ. ಇದಕ್ಕಾಗಿ ಅವರು ಹಣವನ್ನು ನೀರಿನಂತೆ ಖರ್ಚು ಮಾಡಿದ್ದಾರೆ ಎಂದು ಹೇಳಲಾಗುತ್ತಿದೆ. ಇಂಥ ಹಲವು ಕಾರಣಗಳಿಂದಾಗಿ ಈ ಸಿನಿಮಾ ಗಮನ ಸೆಳೆಯುತ್ತಿದೆ.
ಯಾವುದೇ ಸಿನಿಮಾಗೆ ಪ್ರಚಾರ ಎಂಬುದು ತುಂಬ ಮುಖ್ಯ. ಕೆಲವೊಮ್ಮೆ ತಾವೇ ನಟಿಸಿದ ಸಿನಿಮಾ ಪ್ರಚಾರಕ್ಕೆ ನಟಿಯರು ಬರುವುದಿಲ್ಲ. ಆದರೆ ‘ದಿ ಲೆಜೆಂಡ್’ ಸಿನಿಮಾ ವಿಚಾರದಲ್ಲಿ ಬೇರೆಯದೇ ಆಗಿದೆ. ಚಿತ್ರಕ್ಕೆ ಸಂಬಂಧವೇ ಇಲ್ಲದ ಹಲವು ನಟಿಯರು ಆಗಮಿಸಿ ಈ ಸಿನಿಮಾದ ಪ್ರಚಾರ ಕಾರ್ಯದಲ್ಲಿ ಭಾಗವಹಿಸಿದ್ದಾರೆ. ಇದಕ್ಕಾಗಿ ಅವರೆಲ್ಲರಿಗೂ ದುಬಾರಿ ಸಂಭಾವನೆ ನೀಡಲಾಗಿದೆ. ಖಾಸಗಿ ವಿಮಾನ ಕಳಿಸಿಕೊಟ್ಟು ಎಲ್ಲರನ್ನೂ ಕರೆಸಿಕೊಳ್ಳಲಾಗಿದೆ ಎಂದು ಸುದ್ದಿ ಆಗಿದೆ.
ಚೆನ್ನೈನ ಜವಾಹರಲಾಲ್ ನೆಹರು ಒಳಾಂಗಣ ಕ್ರೀಡಾಂಗಣದಲ್ಲಿ ‘ದಿ ಲೆಜೆಂಡ್’ ಸಿನಿಮಾದ ಟ್ರೇಲರ್ ಲಾಂಚ್ ಮಾಡಲಾಗಿದೆ. ನಟಿಯರಾದ ಶ್ರದ್ಧಾ ಶ್ರೀನಾಥ್, ಪೂಜಾ ಹೆಗ್ಡೆ, ಶ್ರೀಲೀಲಾ, ತಮನ್ನಾ ಭಾಟಿಯಾ, ಊರ್ವಶಿ ರೌಟೇಲಾ, ಹನ್ಸಿಕಾ ಮೋಟ್ವಾನಿ, ಲಕ್ಷ್ಮೀ ರೈ, ಡಿಂಪಲ್ ಹಯಾತಿ, ಯಶಿಕಾ ಆನಂದ್, ನೂಪುರ್ ಸನನ್ ಅವರು ಈ ಕಾರ್ಯಕ್ರಮಕ್ಕೆ ಬಂದು ಶುಭ ಹಾರೈಸಿದ್ದಾರೆ. ಸ್ಟಾರ್ ನಟರೂ ಕೂಡ ಮಾಡದ ರೀತಿಯಲ್ಲಿ ಸರವಣನ್ ಅವರು ಪ್ರಚಾರ ಮಾಡುತ್ತಿದ್ದಾರೆ. ಬಾಕ್ಸ್ ಆಫೀಸ್ನಲ್ಲಿ ಈ ಚಿತ್ರ ಎಷ್ಟು ಕಲೆಕ್ಷನ್ ಮಾಡಬಹುದು ಎಂಬ ಕೌತುಕ ಮೂಡಿದೆ.
‘ದಿ ಲೆಜೆಂಡ್’ ಸಿನಿಮಾಗೆ ಜೆ.ಡಿ. ಜೆರ್ರಿ ಅವರು ನಿರ್ದೇಶನ ಮಾಡಿದ್ದಾರೆ. ಬಿಡುಗಡೆಯಾದ ಕೆಲವೇ ಗಂಟೆಗಳಲ್ಲಿ ಈ ಸಿನಿಮಾದ ಟ್ರೇಲರ್ 30 ಲಕ್ಷಕ್ಕೂ ಅಧಿಕ ಬಾರಿ ವೀಕ್ಷಣೆ ಕಂಡಿದೆ. ಹೀರೋ ಆಗಿ ನಟಿಸಿರುವ ಸರವಣನ್ ಅವರೇ ಈ ಚಿತ್ರಕ್ಕೆ ಬಂಡವಾಳ ಹೂಡಿದ್ದಾರೆ. ಊರ್ವಶಿ ರೌಟೇಲಾ ಅವರು ನಾಯಕಿಯಾಗಿ ನಟಿಸಿದ್ದು, ಈ ಮೂಲಕ ಇದೇ ಮೊದಲ ಬಾರಿಗೆ ಅವರು ತಮಿಳು ಚಿತ್ರರಂಗಕ್ಕೆ ಕಾಲಿಟ್ಟಿದ್ದಾರೆ. ನಾಸರ್, ಯೋಗಿ ಬಾಬು, ಗೀತಿಕಾ ಮುಂತಾದವರು ಕೂಡ ಅಭಿನಯಿಸಿದ್ದಾರೆ. ಟ್ರೇಲರ್ನಲ್ಲಿ ಆ್ಯಕ್ಷನ್ ದೃಶ್ಯಗಳು ಹೈಲೈಟ್ ಆಗಿವೆ. ಶೀಘ್ರದಲ್ಲೇ ಈ ಸಿನಿಮಾ ರಿಲೀಸ್ ಆಗಲಿದೆ.
ಹೆಚ್ಚಿನ ಸಿನಿಮಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ.
ಪ್ರಮುಖ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ.
Published On - 9:09 am, Mon, 30 May 22
