‘ನೀನು ನನ್ನ ಪಾಲಿಗೆ ಸತ್ತು ಹೋಗಿದ್ದೀಯಾ’; ಧನುಷ್​​ಗೆ ನೇರವಾಗಿ ಹೇಳಿದ ಸೌಂದರ್ಯಾ

ಬಿಗ್ ಬಾಸ್ ಮನೆಯಲ್ಲಿ ನಾಮಿನೇಷನ್ ಪ್ರಕ್ರಿಯೆ ಶುರುವಾಯಿತೆಂದರೆ ಸಾಕು, ಸ್ಪರ್ಧಿಗಳ ನಡುವಿನ ಕಿತ್ತಾಟ ಹಾಗೂ ವೈಯಕ್ತಿಕ ವೈಮನಸ್ಸುಗಳು ಹೊರಬರಲು ತೊಡಗುತ್ತವೆ. ಈ ವಾರದ ನಾಮಿನೇಷನ್ ಜಟಾಪಟಿ ಕೂಡ ಅದಕ್ಕೆ ಹೊರತಾಗಿರಲಿಲ್ಲ. ಪ್ರತಿಯೊಬ್ಬ ಸ್ಪರ್ಧಿಗೂ ಇಬ್ಬರನ್ನು ನಾಮಿನೇಟ್ ಮಾಡುವ ವಿಶೇಷ ಅಧಿಕಾರವನ್ನು ಬಿಗ್ ಬಾಸ್ ನೀಡಿದ್ದರು. ಈ ಪ್ರಕ್ರಿಯೆ ಆರಂಭವಾಗುತ್ತಿದ್ದಂತೆಯೇ ಮನೆಯಲ್ಲಿ ಗಂಭೀರ ವಾತಾವರಣ ನಿರ್ಮಾಣವಾಯಿತು.

ನಾಮಿನೇಷನ್ ವೇಳೆ ಕಣಕ್ಕಿಳಿದ ಧನುಷ್, ಸೌಂದರ್ಯಾ ಶೆಟ್ಟಿ ಅವರ ಹೆಸರನ್ನು ನಾಮಿನೇಷನ್‌ಗೆ ಸೂಚಿಸಿದರು. ಸೌಂದರ್ಯಾ ಬಿಗ್ ಬಾಸ್ ಮನೆಯಲ್ಲಿ ಸರಿಯಾಗಿ ಆಟ ಆಡುತ್ತಿಲ್ಲ, ಪ್ರದರ್ಶನ ಕಡಿಮೆ ಆಗಿದೆ ಎಂಬ ಕಾರಣ ನೀಡಿ ಧನುಷ್ ಅವರನ್ನು ನಾಮಿನೇಟ್ ಮಾಡಿದರು. ಧನುಷ್ ನೀಡಿದ ಈ ಕಾರಣ ಸೌಂದರ್ಯಾ ಅವರ ಅಸಮಾಧಾನಕ್ಕೆ ಕಾರಣವಾಯಿತು. ಧನುಷ್ ಮಾತಿನಿಂದ ಬೇಸತ್ತ ಸೌಂದರ್ಯಾ, ಆರಂಭದಲ್ಲಿ ಯಾವುದೇ ಪ್ರತಿಕ್ರಿಯೆ ನೀಡದೆ ಸುಮ್ಮನೆ ಕುಳಿತರು.

ಆದರೆ ಸೌಂದರ್ಯಾ ಅವರ ಮೌನ ಧನುಷ್ ಅವರಿಗೆ ಸರಿ ಎನಿಸಲಿಲ್ಲ. ಸುಮ್ಮನೆ ಕುಳಿತಿದ್ದ ಸೌಂದರ್ಯಾ ಬಳಿಗೆ ತೆರಳಿದ ಧನುಷ್, ‘ಏನಾದರೂ ಮಾತನಾಡಿ, ಮೌನವಾಗಿದ್ದರೆ ಹೇಗೆ?’ ಎಂದು ಕೆಣಕಲು ಯತ್ನಿಸಿದರು. ಧನುಷ್ ಮತ್ತೆ ಮತ್ತೆ ಮಾತಿಗೆ ಎಳೆದದ್ದು ಸೌಂದರ್ಯಾ ಅವರ ತಾಳ್ಮೆ ಕಳೆದುಕೊಳ್ಳುವಂತೆ ಮಾಡಿತು. ಧನುಷ್ ನಡೆದುಕೊಂಡ ರೀತಿ ಸೌಂದರ್ಯಾ ಅವರಿಗೆ ತೀವ್ರ ಕೋಪ ತರಿಸಿತು.

ಧನುಷ್ ಕೆಣಕುತ್ತಿದ್ದಂತೆಯೇ ಕೌಂಟರ್ ನೀಡಿದ ಸೌಂದರ್ಯಾ, ‘ನಾನು ನಿನಗೆ ಯಾವುದೇ ಪ್ರತಿಕ್ರಿಯೆ ನೀಡಲ್ಲ. ನೀನು ನನ್ನ ಪಾಲಿಗೆ ಸತ್ತು ಹೋಗಿದ್ದೀಯಾ’ ಎಂದು ನೇರವಾಗಿ ಮುಖಕ್ಕೆ ಹೊಡೆದಂತೆ ಹೇಳಿದರು. ಸೌಂದರ್ಯಾ ಆಡಿದ ಈ ಮಾತು ಬಿಗ್ ಬಾಸ್ ಮನೆಯ ವಾತಾವರಣವನ್ನು ಒಮ್ಮೆಲೇ ಕಾವೇರುವಂತೆ ಮಾಡಿತು. ಆ ನಂತರವೂ ಬಿಡದ ಸೌಂದರ್ಯಾ, ಸತತವಾಗಿ ಧನುಷ್ ಜೊತೆ ಮಾತನಾಡುತ್ತಾ ಅವರಿಗೆ ತೀವ್ರ ಕಿರಿಕಿರಿ ಉಂಟು ಮಾಡಿದರು.

ಇದನ್ನೂ ಓದಿ: ಬಿಗ್ ಬಾಸ್ ಮನೆಯಲ್ಲಿ ಕೋಲಾಹಲಕ್ಕೆ ಕಾರಣವಾದ ಕ್ಯಾಪ್ಟನ್ ಜಗದೀಶ್ ನಿರ್ಧಾರ

ನಂತರ ತಮ್ಮ ಸರದಿ ಬಂದಾಗ ಸೌಂದರ್ಯಾ ಶೆಟ್ಟಿ ಸಹ ಸುಮ್ಮನೆ ಕುಳಿತುಕೊಳ್ಳಲಿಲ್ಲ. ಧನುಷ್ ನೀಡಿದ ಏಟಿಗೆ ತಕ್ಷಣವೇ ತಿರುಗೇಟು ನೀಡಿದ ಸೌಂದರ್ಯಾ, ಧನುಷ್ ಅವರ ಹೆಸರನ್ನೇ ನಾಮಿನೇಷನ್‌ಗೆ ಆಯ್ಕೆ ಮಾಡಿದರು. ಈ ಮೂಲಕ ಬಿಗ್ ಬಾಸ್ ಮನೆಯಲ್ಲಿ ಇಬ್ಬರ ನಡುವಿನ ಶೀತಲ ಸಮರ ಈಗ ನೇರ ವಾಕ್ಸಮರಕ್ಕೆ ತಿರುಗಿದ್ದು, ಮುಂದಿನ ದಿನಗಳಲ್ಲಿ ಈ ಜಟಾಪಟಿ ಎಲ್ಲಿಗೆ ಹೋಗಿ ತಲುಪಲಿದೆ ಎಂಬುದನ್ನು ಕಾದು ನೋಡಬೇಕಿದೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.