ಮಳೆ ಕೊರತೆಯಿಂದ ಹಿಂಗಾರು ಬಿತ್ತನೆಗೆ ಆತಂಕ: ಬೆಳಗಾವಿಯಲ್ಲಿ ಬೆಳೆ ಆಯ್ಕೆ ಬಗ್ಗೆ ರೈತರಲ್ಲಿ ಗೊಂದಲ
ಬೆಳಗಾವಿ ಜಿಲ್ಲೆಯಲ್ಲಿ ಮಳೆಯ ಕೊರತೆ ಮತ್ತು ತೇವಾಂಶದ ಅಭಾವದಿಂದಾಗಿ ಹಿಂಗಾರು ಬಿತ್ತನೆ ಕಾರ್ಯ ವಿಳಂಬವಾಗಿದ್ದು, ಯಾವ ಬೆಳೆ ಬೆಳೆಯಬೇಕು ಎಂಬ ಗೊಂದಲದಲ್ಲಿರುವ ರೈತರು ಮಳೆಯ ನಿರೀಕ್ಷೆಯಲ್ಲಿದ್ದಾರೆ. ಕೃಷಿ ಇಲಾಖೆಯ ಅಧಿಕಾರಿಗಳ ಪ್ರಕಾರ, ಜಿಲ್ಲೆಯಲ್ಲಿ ಬೀಜ ಮತ್ತು ರಸಗೊಬ್ಬರಗಳ ಕೊರತೆಯಿಲ್ಲ. ಆದರೆ ಜೋಳದ ಬಿತ್ತನೆಗೆ ಅಕ್ಟೋಬರ್ 20ರೊಳಗೆ ಮಳೆಯಾಗುವುದು ಅತ್ಯಂತ ಮುಖ್ಯವಾಗಿದೆ. ಮತ್ತಷ್ಟು ವಿಳಂಬವಾದರೆ ಇಳುವರಿ ಕುಸಿಯುವ ಜತೆಗೆ ಜೋಳದ ಬಿತ್ತನೆ ಪ್ರದೇಶವೂ ಕಡಿಮೆಯಾಗುವ ಸಾಧ್ಯತೆಯಿದೆ ಎನ್ನಲಾಗಿದೆ.
Updated on: Oct 13, 2026 | 3:58 PM
ಬೆಳಗಾವಿ, ಅಕ್ಟೋಬರ್ 13: ಜಿಲ್ಲೆಯಲ್ಲಿ ತೀವ್ರ ಮಳೆ ಕೊರತೆ ಮತ್ತು ಮಣ್ಣಿನಲ್ಲಿ ತೇವಾಂಶದ ಅಭಾವದಿಂದ ಹಿಂಗಾರು ಬಿತ್ತನೆಗೆ ತೊಂದರೆಯಾಗುವ ಆತಂಕ ಎದುರಾಗಿದೆ. ಅಕ್ಟೋಬರ್‌ನಲ್ಲಿ ಹಿಂಗಾರು ಹಂಗಾಮು ಆರಂಭವಾಗಿದ್ದರೂ, ಮಳೆ ಇಲ್ಲದ ಕಾರಣ ರೈತರು ಇನ್ನೂ ಬಿತ್ತನೆ ಕಾರ್ಯ ಆರಂಭಿಸಿಲ್ಲ. ಅಕ್ಟೋಬರ್ 1ರಿಂದ 12ರವರೆಗೆ ಜಿಲ್ಲೆಯಲ್ಲಿ ಕೇವಲ 4.8 ಮಿ.ಮೀ. ಮಳೆಯಾಗಿದೆ. ಈ ಅವಧಿಯಲ್ಲಿ ವಾಡಿಕೆಯಂತೆ 58.2 ಮಿ.ಮೀ. ಮಳೆಯಾಗಬೇಕಿತ್ತು. ಅಂದರೆ, ಶೇ. 92ರಷ್ಟು ಮಳೆ ಕೊರತೆ ದಾಖಲಾಗಿದೆ. ಜಿಲ್ಲೆಯಲ್ಲಿ 4.1 ಲಕ್ಷ ಹೆಕ್ಟೇರ್ ಪ್ರದೇಶದಲ್ಲಿ ಹಿಂಗಾರು ಬೆಳೆ ಬೆಳೆಯುವ ಗುರಿ ಹೊಂದಲಾಗಿದ್ದು, ದೀರ್ಘಕಾಲದ ಒಣ ಹವಾಮಾನವು ಸಕಾಲದಲ್ಲಿ ಬಿತ್ತನೆ ಮತ್ತು ಇಳುವರಿ ಕುರಿತು ಆತಂಕ ಮೂಡಿಸಿದೆ.
ಜಿಲ್ಲೆಯ ಹಿಂಗಾರು ಬಿತ್ತನೆ ಗುರಿ
ಜಿಲ್ಲೆಯ ಹಿಂಗಾರು ಬಿತ್ತನೆ ಗುರಿಯಲ್ಲಿ ಜೋಳಕ್ಕೆ 1.43 ಲಕ್ಷ ಹೆಕ್ಟೇರ್, ಕಡಲೆಗೆ 1.08 ಲಕ್ಷ ಹೆಕ್ಟೇರ್, ಮೆಕ್ಕೆಜೋಳಕ್ಕೆ 59 ಸಾವಿರ ಹೆಕ್ಟೇರ್, ಗೋಧಿಗೆ 53 ಸಾವಿರ ಹೆಕ್ಟೇರ್, ಕಬ್ಬಿಗೆ 23 ಸಾವಿರ ಹೆಕ್ಟೇರ್, ಸೂರ್ಯಕಾಂತಿಗೆ 13 ಸಾವಿರ ಹೆಕ್ಟೇರ್ ಹಾಗೂ ಶೇಂಗಾಕ್ಕೆ 5 ಸಾವಿರ ಹೆಕ್ಟೇರ್ ನಿಗದಿಪಡಿಸಲಾಗಿದೆ. ಹತ್ತಿ, ಹುರುಳಿ ಮತ್ತು ಇತರ ಬೆಳೆಗಳಿಗೆ ಒಟ್ಟು 3 ಸಾವಿರ ಹೆಕ್ಟೇರ್ ಗುರಿ ಹೊಂದಲಾಗಿದೆ. ಜೋಳ, ಗೋಧಿ ಮತ್ತು ಕಡಲೆ ಜಿಲ್ಲೆಯಲ್ಲಿ ಪ್ರಮುಖ ಹಿಂಗಾರು ಬೆಳೆಗಳಾಗಿವೆ.
ಇದನ್ನೂ ಓದಿ: ಎಂಎಸ್ಪಿ, ಎಫ್ಆರ್ಪಿ ಹೆಚ್ಚಳಕ್ಕೆ ಕಬ್ಬು ಬೆಳೆಗಾರರ ಪಟ್ಟು: ರಾಜ್ಯಾದ್ಯಂತ ಬೀದಿಗಿಳಿದ ರೈತರು, ಹೆದ್ದಾರಿ ತಡೆದು ಉಗ್ರ ಹೋರಾಟ
ಚಿಕ್ಕಬಾಗೇವಾಡಿ ಗ್ರಾಮದ ರೈತ ವಿನೋದ್ ಪಾಟೀಲ್ ಮಾತನಾಡಿ, ರೈತರು ಈಗಾಗಲೇ ಭೂಮಿ ಸಿದ್ಧಪಡಿಸಲು ಮತ್ತು ಬೀಜ ಖರೀದಿಸಲು ಸಾಕಷ್ಟು ಹಣ ಖರ್ಚು ಮಾಡಿದ್ದಾರೆ. ಬಿತ್ತನೆ ಮತ್ತಷ್ಟು ವಿಳಂಬವಾದರೆ ವೆಚ್ಚ ಹೆಚ್ಚಾಗುವುದರ ಜತೆಗೆ ಯಾವ ಬೆಳೆ ಬೆಳೆಯಬೇಕು ಎಂಬ ಗೊಂದಲವೂ ಉಂಟಾಗಲಿದೆ ಎಂದು ಹೇಳಿದ್ದಾರೆ. ಈಗಿನ ಪರಿಸ್ಥಿತಿಯಲ್ಲಿ ಯಾವ ಬೆಳೆ ಸೂಕ್ತ ಎಂಬುದರ ಬಗ್ಗೆ ರೈತರಿಗೆ ಮಾರ್ಗದರ್ಶನದ ಅಗತ್ಯವಿದೆ ಎಂದು ಅವರು ತಿಳಿಸಿದ್ದಾರೆ. ರೈತ ಮುಖಂಡ ಪ್ರಕಾಶ್ ನಾಯಕ್ ಮಾತನಾಡಿ, ಒಂದು ವಾರದೊಳಗೆ ಮಳೆಯಾದರೂ ಜೋಳದ ಬಿತ್ತನೆಗೆ ಅನುಕೂಲವಾಗಬಹುದು. ಇಲ್ಲದಿದ್ದರೆ ರೈತರು ಪರ್ಯಾಯ ಬೆಳೆಗಳನ್ನು ಆಯ್ಕೆ ಮಾಡಬೇಕಾಗಬಹುದು ಎಂದು ಹೇಳಿದ್ದಾರೆ.
ಅ. 20ರೊಳಗೆ ಮಳೆಯಾಗುವುದು ನಿರ್ಣಾಯಕ
ಕೃಷಿ ಇಲಾಖೆಯ ಅಧಿಕಾರಿಗಳ ಪ್ರಕಾರ, ಜಿಲ್ಲೆಯಲ್ಲಿ ಬೀಜ ಮತ್ತು ರಸಗೊಬ್ಬರಗಳ ಕೊರತೆಯಿಲ್ಲ. ಆದರೆ ಜೋಳದ ಬಿತ್ತನೆಗೆ ಅಕ್ಟೋಬರ್ 20ರೊಳಗೆ ಮಳೆಯಾಗುವುದು ಅತ್ಯಂತ ಮುಖ್ಯವಾಗಿದೆ. ಮತ್ತಷ್ಟು ವಿಳಂಬವಾದರೆ ಇಳುವರಿ ಕುಸಿಯುವ ಜತೆಗೆ ಜೋಳದ ಬಿತ್ತನೆ ಪ್ರದೇಶವೂ ಕಡಿಮೆಯಾಗುವ ಸಾಧ್ಯತೆಯಿದೆ. ಪರ್ಯಾಯ ಬೆಳೆಗಳನ್ನು ಆಯ್ಕೆ ಮಾಡುವಾಗ ಮಣ್ಣಿನ ಗುಣಲಕ್ಷಣ, ಲಭ್ಯವಿರುವ ತೇವಾಂಶ ಮತ್ತು ಬಿತ್ತನೆಗೆ ಉಳಿದಿರುವ ಸಮಯವನ್ನು ಪರಿಗಣಿಸಬೇಕು ಎಂದು ಅಧಿಕಾರಿಗಳು ಸಲಹೆ ನೀಡಿದ್ದಾರೆ ಎಂದು ದಿ ಟೈಮ್ಸ್ ಆಫ್ ಇಂಡಿಯಾ ವರದಿ ಮಾಡಿದೆ.
ಮತ್ತಷ್ಟು ಸುದ್ದಿ ಓದಲು ಇಲ್ಲಿ ಕ್ಲಿಕ್ ಮಾಡಿ.
