‘ಕಾರ್ಡ್ ಪ್ರಿಂಟ್ ಮಾಡಿ ವಶಕ್ಕೆ ಪಡೆಯಲು ಇದೇನು ಮದುವೇನಾ?’: ಕುಮಾರಸ್ವಾಮಿ ಆರೋಪಕ್ಕೆ ಪ್ರಿಯಾಂಕ್​​ ಖರ್ಗೆ ಕೌಂಟರ್​​

ಬೆಂಗಳೂರು, ಅಕ್ಟೋಬರ್​​ 15: ಕೇಂದ್ರ ಸಚಿವ ಹೆಚ್​​.ಡಿ. ಕುಮಾರಸ್ವಾಮಿ ಹೇಳಿದ ಹಾಗೆ ತನಿಖೆ ಮಾಡೋಕೆ ಆಗಲ್ಲ. ಯಾರ ಮೇಲೆ ಸಂಶಯವಿದೆ ಅವರನ್ನ ಕರೆಸ್ತೀವಿ. ಅದು ನೀವೂ ಇರಬಹುದು ಅಥವಾ ಯಾರಾದರೂ ಇರಬಹುದು. ಕಾರ್ಡ್ ಪ್ರಿಂಟ್ ಮಾಡಿ ವಶಕ್ಕೆ ಪಡೆಯಲು ಇದೇನು ಮದುವೇನಾ? ಎಂದು ಹೇಳುವ ಮೂಲಕ ಹೆಚ್​​ಡಿಕೆ ಮಾಡಿದ್ದ ಆರೋಪಗಳಿಗೆ ಕರ್ನಾಟಕದ ಗೃಹ ಸಚಿವ ಪ್ರಿಯಾಂಕ್​​ ಖರ್ಗೆ ಕೌಂಟರ್​​ ಕೊಟ್ಟಿದ್ದಾರೆ. ಸ್ಟಿಂಗ್​​ ಆಪರೇಷನ್​​ ವಿಚಾರದಲ್ಲಿ ಯಾವುದೇ ಪ್ರಕರಣ ದಾಖಲಿಸದೇ ಜೆಡಿಎಸ್ ಸಾಮಾಜಿಕ ಜಾಲತಾಣ ವಿಭಾಗದಲ್ಲಿ ಕೆಲಸ ಮಾಡುತ್ತಿರುವ ಯುವಕನನ್ನು ಪೊಲೀಸರು ವಶಕ್ಕೆ ಪಡೆದಿದ್ದಾರೆ ಎಂದು ಕುಮಾರಸ್ವಾಮಿ ಆರೋಪಿಸಿದ್ದರು.

‘ಮಾಜಿ ಸಿಎಂಗೆ ಪೊಲೀಸರು ಹೇಗೆ ಕೆಲಸ ಮಾಡ್ತಾರೆಂಬುದು ಗೊತ್ತಿಲ್ವಾ?’

ಕುಮಾರಸ್ವಾಮಿ ಆರೋಪಗಳಿಗೆ ಉತ್ತರ ಕೊಡೋದಕ್ಕೆ ಆಗೋದಿಲ್ಲ. ಒಂದು ದೂರು ಬಂದಿದ್ದು, ಪ್ರಕರಣ ಸಂಬಂಧ ಯಾರ ಯಾರ ಮೇಲೆ ಸಂಶಯವಿದೆ ಅವರನ್ನು ಕರೆಸುತ್ತೇವೆ. ಪ್ರೋಟೋಕಾಲ್ ಪ್ರಕಾರವಾಗಿ ತನಿಖೆ ನಡೆಸುತ್ತಿದ್ದೇವೆ. ದಿನಾಲೂ ಮಾಧ್ಯಮ ಮುಂದೆ ತನಗೆಲ್ಲ ಮಾಹಿತಿ ಇದೆ ಎಂದು ಕೇಂದ್ರ ಸಚಿವರು ಹೇಳುತ್ತಿದ್ದಾರೆ. ಫೈವ್ ಸ್ಟಾರ್ ಹೋಟೆಲ್​​ನಲ್ಲಿ ಏನೇನು ನಡೆದಿದೆ ಎಂಬುದು ಗೊತ್ತಿದೆ ಎನ್ನುತ್ತಿದ್ದಾರೆ. ಆ ಬಗ್ಗೆ ಮಾಹಿತಿ ಕೊಟ್ಟರೂ ತನಿಖೆ ನಡೆಸುತ್ತೇವೆ. ಕುಮಾರಸ್ವಾಮಿ ಯಾವುದೇ ಸಾಕ್ಷಿ ಕೊಟ್ಟರೂ ಅದನ್ನು ಪಡೆಯುತ್ತೇವೆ. ನಮ್ಮ ಮೇಲೆ ನಂಬಿಕೆಯಿಲ್ಲ ಅಂದರೆ ಜಡ್ಜ್ ಮುಂದೆ 164 ಸ್ಟೇಟ್​​ಮೆಂಟ್ ಕೊಡಲಿ. ಮಾಜಿ ಮುಖ್ಯಮಂತ್ರಿಯಾಗಿರುವ ಅವರಿಗೆ ಕರ್ನಾಟಕ ಪೊಲೀಸರು ಹೇಗೆ ಕೆಲಸ ಮಾಡ್ತಾರೆ ಎಂಬುದು ಗೊತ್ತಿಲ್ವಾ ಎಂದು ಪ್ರಿಯಾಂಕ್​​ ಖರ್ಗೆ ಕಿಡಿ ಕಾರಿದ್ದಾರೆ.

ಇದನ್ನೂ ಓದಿ: ಸ್ಟಿಂಗ್ ಆಪರೇಷನ್: ಜೆಡಿಎಸ್ ಕಾರ್ಯಕರ್ತ ಸಿಸಿಬಿ ವಶಕ್ಕೆ, ಕುಮಾರಸ್ವಾಮಿ ಕೆಂಡಾಮಂಡಲ

‘ಹೋರಾಟಕ್ಕೆ ರೆಡಿ ಇದ್ದೀನಿ, ಬನ್ನಿ ಅಖಾಡಕ್ಕೆ’

ಪ್ರಿಯಾಂಕ್​​ ಹೇಳಿಕೆಗೆ ಕೌಂಟರ್​​ ನೀಡಿರುವ ಕುಮಾರಸ್ವಾಮಿ, ಸಂಶಯಬಂದರೆ ನನ್ನನ್ನು ವಶಕ್ಕೆ ಪಡೆಯುವುದಾಗಿ ಹೇಳಿದ್ದೀರಿ. ನನ್ನನ್ನು ಮುಟ್ಟಿ ನೋಡಿ ಎಂದು ಸವಾಲು ಹಾಕಿದ್ದಾರೆ. ತಾಕತ್‌, ಯೋಗ್ಯತೆ ಇದ್ದರೆ ಹಾಲಿ ಜಡ್ಜ್‌ ನೇತೃತ್ವದಲ್ಲಿ ತನಿಖೆ ನಡೆಸಿ. ಹೋರಾಟಕ್ಕೆ ರೆಡಿ ಇದ್ದೀನಿ, ಬನ್ನಿ ಅಖಾಡಕ್ಕೆ ಎಂದು ಪಂಥಾಹ್ವಾನವನ್ನೂ ಸಿಎಂ ಡಿಕೆಶಿ ಮತ್ತು ಗೃಹ ಸಚಿವ ಪ್ರಿಯಾಂಕ್ ಖರ್ಗೆಗೆ ನೀಡಿದ್ದಾರೆ. ನಿಮ್ಮದು ನಾನು ನೋಡದೆ ಇರುವ ಅಧಿಕಾರನಾ? ಎಂದವರು ಗುಡುಗಿದ್ದಾರೆ.

ಮತ್ತಷ್ಟು ಸುದ್ದಿ ಓದಲು ಇಲ್ಲಿ ಕ್ಲಿಕ್​​ ಮಾಡಿ.

Published On - 11:18 am, Thu, 15 October 26