ʻಗಾಂಧಿ ಹತ್ಯೆಯ ಸತ್ಯʼ ವಿವಾದ: ಸುಚಿತ್ರ ಅಕಾಡೆಮಿಯಲ್ಲಿ ನಾಟಕಗಳ ಪ್ರದರ್ಶನಕ್ಕೆ ತಾತ್ಕಾಲಿಕ ತಡೆ; ವಿವಾದಕ್ಕೆ ಕಾರಣವಾದ ಪೊಲೀಸರ ಆದೇಶ

ಬೆಂಗಳೂರು, ಅಕ್ಟೋಬರ್​​ 02: ಬನಶಂಕರಿಯ ಸುಚಿತ್ರ ಸಿನಿಮಾ ಮತ್ತು ಸಾಂಸ್ಕೃತಿಕ ಅಕಾಡೆಮಿಯಲ್ಲಿ ʻಗಾಂಧಿ ಹತ್ಯೆಯ ಸತ್ಯʼ ನಾಟಕ ಪ್ರದರ್ಶನದ ವೇಳೆ ನಡೆದ ಗಲಾಟೆ ಸಂಬಂಧ ಆರೋಪ-ಪ್ರತ್ಯಾರೋಪಗಳು ಕೇಳಿಬಂದ ಹಿನ್ನೆಲೆ ಬನಶಂಕರಿ ಪೊಲೀಸರು ಮಾಡಿರುವ ಆದೇಶವೀಗ ವಿವಾದಕ್ಕೆ ಕಾರಣವಾಗಿದೆ. ಮುಂದಿನ ಆದೇಶದವರೆಗೂ ಸುಚಿತ್ರ ಸಿನಿಮಾ ಮತ್ತು ಸಾಂಸ್ಕೃತಿಕ ಅಕಾಡೆಮಿಯಲ್ಲಿ ಯಾವುದೇ ನಾಟಕ ಪ್ರದರ್ಶನ ಮಾಡದಂತೆ ಸೂಚನೆ ನೀಡಲಾಗಿದ್ದು, ಪೊಲೀಸರ ಈ ನಡೆಗೆ ಸಾಮಾಜಿಕ ಜಾಲತಾಣಗಳಲ್ಲಿ ತೀವ್ರ ಆಕ್ರೋಶ ವ್ಯಕ್ತವಾಗಿದೆ.

ಪೊಲೀಸರ ಆದೇಶದಲ್ಲಿ ಏನಿದೆ?

ಸುಚಿತ್ರ ಸಿನಿಮಾ ಮತ್ತು ಸಾಂಸ್ಕೃತಿಕ ಅಕಾಡೆಮಿಯಲ್ಲಿ ಅಕ್ಟೋಬರ್​​ 31ರಂದು ನಡೆದಿದ್ದ ಗಾಂಧಿ ಹತ್ಯೆಯ ಸತ್ಯ ನಾಟಕ ಪ್ರದರ್ಶನ ಸಂಬಂಧ ದೂರು ಪ್ರತಿದೂರುಗಳು ಬನಶಂಕರಿ ಪೊಲೀಸ್ ಠಾಣೆಯಲ್ಲಿ ದಾಖಲಾಗಿದ್ದು, ಆ ಬಗ್ಗೆ ತನಿಖೆ ನಡೆಯುತ್ತಿದೆ. ಆದ್ದರಿಂದ ಅಕಾಡೆಮಿಯಲ್ಲಿ ನಾಟಕಗಳ ಪ್ರದರ್ಶನವನ್ನು ಮುಂದಿನ ಆದೇಶದವರೆಗೂ ಮುಂದೂಡುವಂತೆ ಆದೇಶದಲ್ಲಿ ಸೂಚಿಸಲಾಗಿದೆ. ಒಂದು ವೇಳೆ ಯಾವುದೇ ನಾಟಕ ಪ್ರದರ್ಶನಗಳು ನಡೆದು ಕಾನೂನು ಸುವ್ಯವಸ್ಥೆಗೆ ತೊಂದರೆಯಾದಲ್ಲಿ ಕಾನೂನು ಕ್ರಮ ಜರುಗಿಸುವ ಎಚ್ಚರಿಕೆ ನೀಡಲಾಗಿದೆ.

ಇದನ್ನೂ ಓದಿ: ʻಗಾಂಧಿ ಹತ್ಯೆಯ ಸತ್ಯʼ ನಾಟಕ ಪ್ರದರ್ಶನದ ವೇಳೆ ಅಡ್ಡಂಡ ಕಾರ್ಯಪ್ಪ ಮುಖಕ್ಕೆ ಮಸಿ: ದೂರು-ಪ್ರತಿದೂರು ದಾಖಲು

ಪೊಲೀಸರ ಆದೇಶಕ್ಕೆ ತೀವ್ರ ಆಕ್ರೋಶ

ಭಾರತದಲ್ಲಿ 1975-77ರ ಅವಧಿಯಲ್ಲಿ ಎಮರ್ಜೆನ್ಸಿ ಇದ್ದಾಗ ನಾಟಕ, ಸಿನೆಮಾ ಹಾಡು, ಸಿನೆಮಾ, ಪುಸ್ತಕ ಇತ್ಯಾದಿಗಳನ್ನು ನಿಷೇಧಿಸುವ ಕ್ರಮ ಇತ್ತು. ಸರಕಾರದ ವಿರುದ್ಧ ಏನೇ ಇದ್ದರೂ ಅದನ್ನು ನಿಷೇಧಿಸಬೇಕು ಎಂಬುದು ಸರಕಾರದ ಒಂದಂಶದ ಕಾರ್ಯಕ್ರಮವಾಗಿತ್ತು. ಎಷ್ಟರಮಟ್ಟಿಗೆ ಎಂದರೆ ಪ್ರತಿ ಪತ್ರಿಕೆಯ ಪ್ರತಿ ಸುದ್ದಿತುಣುಕು ಕೂಡ ಸರಕಾರೀ ಅಧಿಕಾರಿಗಳ ಮೇಲ್ವಿಚಾರಣೆಯಲ್ಲಿ ಓಕೇ ಆಗಿ ನಂತರ ಪ್ರಕಟವಾಗಬೇಕಿತ್ತು. ಅಂಥದ್ದೇ ‘ಎಮರ್ಜೆನ್ಸಿ ಸರಕಾರ’ ಈಗ ಮತ್ತೆ ಕರ್ನಾಟಕವನ್ನು ಆಳುತ್ತಿದೆ. ಯಾಕೆಂದರೆ ಇಲ್ಲಿ ಸೃಜನಶೀಲ ಅಭಿವ್ಯಕ್ತಿಯಾದ ನಾಟಕವನ್ನು ಆಡುವುದಕ್ಕೆ ಕೂಡ ನಿಷೇಧ ಹೇರಲಾಗಿದೆ ಎಂದು ಬರಹಗಾರ ರೋಹಿತ್​​ ಚಕ್ರತೀರ್ಥ ಆರೋಪಿಸಿದ್ದಾರೆ.

ಮುಖ್ಯಮಂತ್ರಿಯವರೇ, ಇದೇನು ನಡೀತಾ ಇದೆ? ಒಂದು ನಾಟಕದ ನೆಪ ಹೇಳಿ ರಂಗಮಂದಿರದ ಮುಂದಿನ ಎಲ್ಲಾ ಇತರೆ ಪದರ್ಶನಗಳಿಗೂ ನಿಷೇಧ ಹೇರಿದ್ದೀರಲ್ಲ? ಇದೇ ನಿಮ್ಮ ಸರ್ಕಾರದ ಅಭಿವ್ಯಕ್ತಿ ಸ್ವಾತಂತ್ರ್ಯದ ನೀತಿಯಾ? ಇಂತಹ ಸರ್ವಾಧಿಕಾರಿ ಆಡಳಿತವನ್ನು ಕಣ್ಣಿಗೆ ರಾಚುವಂತೆ ನಡೆಸುತ್ತಾ ದಿಲ್ಲಿಯಲ್ಲಿ ಕೂತು ಅಘೋಷಿತ ತುರ್ತುಪರಿಸ್ಥಿತಿ ಅಂತ ಬೊಬ್ಬೆ ಇಡ್ತೀರಲ್ಲ? ಇದ್ಯಾವ ಕಪಟ ನಾಟಕ ನಿಮ್ಮು? ಕೂಡಲೇ ಈ ನಿಷೇಧವನ್ನು ಹಿಂದೆಗೆದುಕೊಳ್ಳಿ. ಪೊಲೀಸರೇ ರಂಗಮಂದಿರಕ್ಕೆ ಬೆದರಿಕೆ ಒಡ್ಡಿರುವುದು ಅತ್ಯಂತ ನೀಚ ನಡೆ ಎಂದು ಮತ್ತೋರ್ವ ಬರಹಗಾರ ಬೇಳೂರು ಸುದರ್ಶನ ಅವರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ಅಕ್ಟೋಬರ್​​ 31ರಂದು ಏನಾಗಿತ್ತು?

ಅಕ್ಟೋಬರ್​​ 31ರಂದು ಬನಶಂಕರಿಯ ಸುಚಿತ್ರ ಸಿನಿಮಾ ಮತ್ತು ಸಾಂಸ್ಕೃತಿಕ ಅಕಾಡೆಮಿಯಲ್ಲಿ ʻಗಾಂಧಿ ಹತ್ಯೆಯ ಸತ್ಯʼ ನಾಟಕ ಪ್ರದರ್ಶನ ನಡೆದಿತ್ತು. ಈ ವೇಳೆ ನಾಟಕದಲ್ಲಿ ಮಹಾತ್ಮ ಗಾಂಧೀಜಿ ವಿರುದ್ಧ ಆಕ್ಷೇಪಾರ್ಹ ಸಂಭಾಷಣೆ ಬಳಸಲಾಗಿದೆ ಎಂದು ಆರೋಪಿಸಿ ಮೈಸೂರು ರಂಗಾಯಣದ ಮಾಜಿ ನಿರ್ದೇಶಕ ಅಡ್ಡಂಡ ಕಾರ್ಯಪ್ಪ ಅವರ ಮುಖಕ್ಕೆ ಮಸಿ ಬಳಿಯಲಾಗಿತ್ತು. ಬಳಿಕ ಮಾತಿನ ಚಕಮಕಿ ನಡೆದು ಅಡ್ಡಂಡ ಕಾರ್ಯಪ್ಪ ಅವರನ್ನ ಎಳೆದಾಡಲಾಗಿತ್ತು. ಈ ಸಂಬಂಧ ಬೆಂಗಳೂರಿನ ಬನಶಂಕರಿ ಠಾಣೆಯಲ್ಲಿ ದೂರು-ಪ್ರತಿದೂರು ದಾಖಲಾಗಿದ್ದವು.

ಮತ್ತಷ್ಟು ಸುದ್ದಿ ಓದಲು ಇಲ್ಲಿ ಕ್ಲಿಕ್​​ ಮಾಡಿ.

Published On - 2:38 pm, Mon, 2 November 26