ಅಕ್ಕಿ ದರಕ್ಕೂ ತಟ್ಟಿದ ಬರಗಾಲದ ಎಫೆಕ್ಟ್; ಕ್ವಿಂಟಾಲ್‌ಗೆ 2,500 ರೂ ಹೆಚ್ಚಳ, ರೈಸ್ ಮಿಲ್​ಗಳ ಕಾರ್ಯ ಸ್ಥಗಿತ

ಕೊಪ್ಪಳ, ಅಕ್ಟೋಬರ್​​ 15: ಕರ್ನಾಟಕದಲ್ಲಿ ಭೀಕರ ಬರಗಾಲ ತಾಂಡವವಾಡುತ್ತಿದೆ. ಈ ಮಧ್ಯೆ ಅಕ್ಕಿ ದರಕ್ಕೂ ಬರಗಾಲದ ಎಫೆಕ್ಟ್ ತಟ್ಟಿದೆ. 15 ದಿನಗಳಲ್ಲಿ ಅಕ್ಕಿ ದರ ಗಗನಕ್ಕೇರಿದೆ. ಪ್ರತಿ ಕ್ವಿಂಟಾಲ್​​ಗೆ 2000 ರಿಂದ 2500 ರೂ ಬೆಲೆ ಏರಿಕೆ ಆಗಿದೆ. ಇನ್ನು ಜಿಲ್ಲೆಯ ಗಂಗಾವತಿಯಿಂದ ದೇಶ, ವಿದೇಶಕ್ಕೆ ಅಕ್ಕಿ ರಫ್ತು ಮಾಡಲಾಗುತ್ತಿದೆ. ಇತ್ತ ಅಕ್ಕಿ ದರ ಹೆಚ್ಚಳದಿಂದ ಜನಸಾಮಾನ್ಯರು ಕಂಗಾಲಾಗಿದ್ದಾರೆ.

ಯಾವ ಅಕ್ಕಿ ಬೆಲೆ ಎಷ್ಟು ಏರಿಕೆ?

• ಸೋನಾ ಮಸೂರಿ: 6000 ರೂ (15 ದಿನಗಳ ಹಿಂದೆ), ಸದ್ಯ ಹೋಲ್ ಸೇಲ್ ದರ: 7500 ರೂ.
• ಆರ್​ಎನ್​ಆರ್​​​: 6500 ರೂ, ಸದ್ಯ ಹೋಲ್​​ ಸೇಲ್ ದರ: 8500 ರೂ.
• ಸ್ಟೀಮ್ ರೈಸ್: 6500 ರೂ, ಸದ್ಯ ಹೋಲ್ ಸೇಲ್ ದರ: 8500 ರೂ.
• ಕೋಲಂ ರೈಸ್: 7500 ರೂ, ಸದ್ಯ ಹೋಲ್ ಸೇಲ್ ದರ: 10,000 ರೂ.

ಇಷ್ಟೊಂದು ದರ ಏರಿಕೆ ಕಂಡಿರಲಿಲ್ಲ ಎಂದ ವ್ಯಾಪಾರಸ್ಥರು

ಈ ಭಾರೀ ಮುಂಗಾರು ಬೆಳೆ ಬರುವುದು ಅನುಮಾನ ಎನ್ನಲಾಗುತ್ತಿದೆ. ಹೀಗಾಗಿ 15 ದಿನಗಳಲ್ಲಿ ಅಕ್ಕಿ ದರದಲ್ಲಿ ಭಾರೀ ಏರಿಕೆ ಆಗಿದೆ. ಅಕ್ಕಿ ಹೋಲ್​ ಸೇಲ್​ ದರದಲ್ಲೂ ಹೆಚ್ಚಳವಾಗಿದೆ. ಕಳೆದ ಎರಡು ಮೂರು ವರ್ಷಗಳಿಂದ ಹಿಂಗಾರು ಬೆಳೆ ಬೆಳೆಯದೇ ನೆಲ್ಲು ಸಿಗದೆ ಮಿಲ್​ಗಳಲ್ಲೂ​​​ ಅಕ್ಕಿ ಸ್ಟಾಕ್ ಇಲ್ಲ. ಹಾಗಾಗಿ ವ್ಯಾಪಾರಸ್ಥರಿಗೂ ತೊಂದರೆ ಉಂಟಾಗಿದೆ. ‘35 ವರ್ಷದ ಅಕ್ಕಿ ಮಾರಾಟದ ಅನುಭವದಲ್ಲಿ ಇಷ್ಟೊಂದು ದರ ಏರಿಕೆ ಆಗಿದ್ದು, ನೋಡಿರಲಿಲ್ಲ’ ಎಂದು ವ್ಯಾಪಾರಸ್ಥರು ಹೇಳಿದ್ದಾರೆ.

ಇದ್ದಕ್ಕಿದ್ದಂತೆ ಕೆಲಸ ನಿಲ್ಲಿಸಿದ ರೈಸ್ ಮಿಲ್​ಗಳು 

ದಾವಣಗೆರೆಯಲ್ಲೂ ದಿಢೀರ್ ಹೆಚ್ಚಾದ ಅಕ್ಕಿ ಬೆಲೆಯಿಂದ ಗ್ರಾಹಕರು ಶಾಕ್ ಆಗಿದ್ದಾರೆ. ಕೆ.ಜಿಗೆ 45 ರೂಪಾಯಿಗೆ ಇದ್ದ ಅಕ್ಕಿ 75 ರೂ.ಗೆ ಹೆಚ್ಚಳವಾಗಿದೆ. ಬರೋಬ್ಬರಿ 30 ರೂ ಹೆಚ್ಚಳವಾಗಿದೆ. ಹೀಗಾಗಿ ಇದ್ದಕ್ಕಿದ್ದಂತೆ ರೈಸ್ ಮಿಲ್​ಗಳು ಕೆಲಸ ನಿಲ್ಲಿಸಿವೆ. ಜಿಲ್ಲೆಯಲ್ಲಿ ಇರುವ 60 ರೈಸ್​ ಮಿಲ್​ಗಳಲ್ಲಿ ಕೇವಲ 10 ರೈಸ್ ಮಿಲ್​​ಗಳು ಮಾತ್ರ ಕಾರ್ಯ ನಿರ್ವಹಿಸುತ್ತಿವೆ.

ಇದನ್ನೂ ಓದಿ: ಕರ್ನಾಟಕದಲ್ಲಿ ಮಳೆ ಕೊರತೆ ಎಫೆಕ್ಟ್​: ಮತ್ತೆ ಅಕ್ಕಿ ದರ ಏರಿಕೆ ಶಾಕ್, ಇಲ್ಲಿದೆ ದರ ವಿವರ

ಸಕಾಲಕ್ಕೆ ಮಳೆಯಾಗದ ಹಿನ್ನೆಲೆ ಡ್ಯಾಂನಿಂದ ಭತ್ತದ ಬೆಳೆಗೆ ನೀರು ಬಿಡದ ಹಿನ್ನೆಲೆ ರೈತರು ಭತ್ತ ನಾಟಿ ಮಾಡುತ್ತಿಲ್ಲ. ಹೀಗಾಗಿ ದಾವಣಗೆರೆ ಜಿಲ್ಲೆಯ ಬಹುತೇಕ ರೈಸ್ ಮಿಲ್​​ಗಳಲ್ಲಿನ ದಾಸ್ತಾನು ಇನ್ನೊಂದು ವಾರದಲ್ಲಿ ಖಾಲಿಯಾಗಲಿದೆ.

ಕೃಷ್ಣಾ ನದಿ ಪಾತ್ರದ ಭತ್ತ ಬಂದರೆ ಮಾತ್ರ ರೈಸ್ ಮಿಲ್ ನಡೆಸಬಹುದು. ಅಕ್ಕಿ ದರ ಈ ವರ್ಷ ಕಡಿಮೆ ಆಗುವ ಸಾಧ್ಯತೆ ಕಡಿಮೆ ಇದೆ. ಆಂಧ್ರಪ್ರದೇಶ ಹಾಗೂ ತೆಲಂಗಾಣದಲ್ಲೂ ಅಷ್ಟಾಗಿ ಭತ್ತ ಬೆಳೆದಿಲ್ಲ.

ಕರ್ನಾಟಕದ ಮತ್ತಷ್ಟು ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ.

Published On - 3:28 pm, Thu, 15 October 26