ಬಾಗಲಕೋಟೆಯಲ್ಲಿ ಜೋರಾದ ಕಬ್ಬಿನ ಕಿಚ್ಚು: ಪ್ರತಿ ಟನ್​ 4 ಸಾವಿರ ನೀಡುವಂತೆ ಆಗ್ರಹಿಸಿ ಪ್ರತಿಭಟನೆ

ಬಾಗಲಕೋಟೆ, ನವೆಂಬರ್​​ 11: ಕಳೆದ ಒಂದುವರೆ ತಿಂಗಳಿಂದ ಕಬ್ಬಿಗೆ ಯೋಗ್ಯ ಬೆಲೆಗಾಗಿ ಬೆಳಗಾವಿಯಲ್ಲಿ ರೈತರು ಬೃಹತ್ ಹೋರಾಟ ನಡೆಸಿದ್ದರು. ಆ ಹೋರಾಟಕ್ಕೆ ಬಾಗಲಕೋಟೆ ರೈತರು ಕೂಡ ಕೈಜೋಡಿಸಿದ್ದರು. ಆದರೆ ಬೆಳಗಾವಿ ಹೋರಾಟ ಮುಕ್ತಾಯದ ಬೆನ್ನಲ್ಲೇ, ಮುಧೋಳ ಭಾಗದ ರೈತರು ಪ್ರತಿಭಟನೆ ತೀವ್ರಗೊಳಿಸಿದ್ದಾರೆ. ಸಂಗೊಳ್ಳಿ ರಾಯಣ್ಣ ವೃತ್ತದಲ್ಲಿ ಸೇರಿದ ಸಾವಿರಾರು ರೈತರು ಟ್ರ್ಯಾಕ್ಟರ್‌, ಪಾದಯಾತ್ರೆ ಮೂಲಕ ತಹಶೀಲ್ದಾರ್ ಕಚೇರಿಗೂ ತೆರಳಿ ಮನವಿ ಸಲ್ಲಿಸಿದ್ದಾರೆ.

ಉಗ್ರ ಹೋರಾಟದ ಎಚ್ಚರಿಕೆ ನೀಡಿದ ರೈತರು 

ಬೆಳಗಾವಿ ರೈತರ ಹೋರಾಟ ಮುಕ್ತಾಯ ಬೆನ್ನಲ್ಲೇ ಮುಧೋಳ ನಗರದಲ್ಲಿ ರೈತರು ಹೋರಾಟ ಜೋರಾಗಿದೆ. ಟನ್ ಕಬ್ಬಿಗೆ 4200 ಬೆಲೆ ನೀಡಬೇಕೆಂದು ಆಗ್ರಹಿಸಿದ್ದಾರೆ. ಸಂಗೊಳ್ಳಿ ರಾಯಣ್ಣ ವೃತ್ತದಲ್ಲಿ ಸೇರಿದ ಕಬ್ಬು ಬೆಳೆಗಾರ ರೈತರು, ಕಬ್ಬು ಬೆಲೆ ಏರಿಕೆಗಾಗಿ ಘೋಷಣೆ ಕೂಗಿದರು. ನಂತರ ಸ್ಥಳದಲ್ಲೇ ಅಡುಗೆ ಮಾಡಿ ಊಟ ಮಾಡಿದರು. ತಹಶೀಲ್ದಾರ್ ಕಚೇರಿ ಎದುರು ಸೇರಿದ ರೈತರು ಡಿಸಿ ಅವರೇ ಸ್ಥಳಕ್ಕೆ ಬಂದು ನಮ್ಮ ಅಹವಾಲು ಆಲಿಸಬೇಕು. ಇಲ್ಲದಿದ್ದರೆ ಗುರುವಾರ ಹೋರಾಟ ಉಗ್ರವಾಗಿರುತ್ತದೆ ಎಂದು ಎಚ್ಚರಿಸಿದ್ದಾರೆ.

ನಮ್ಮಲ್ಲಿ ಏಕೆ ಬೆಲೆ ಘೋಷಣೆ ಮಾಡುತ್ತಿಲ್ಲ 

ಈ ವೇಳೆ ಮಾತಾಡಿದ ಕಬ್ಬು ಬೆಳೆಗಾರರ ಸಂಘದ ಬಾಗಲಕೋಟೆ ಜಿಲ್ಲಾಧ್ಯಕ್ಷ ಬಸವಂತಪ್ಪ ಕಾಂಬಳೆ, ‘ಪ್ರತಿ ಟನ್ ಕಬ್ಬಿಗೆ 3600 ಬೆಲೆ ಒಪ್ಪುವುದಿಲ್ಲ. ಬೆಳಗಾವಿ ಜಿಲ್ಲೆಯ ಎರಡು ಕಾರ್ಖಾನೆಗಳು 4200 ರೂ ಘೋಷಣೆ ಮಾಡಿವೆ. ನಮ್ಮಲ್ಲಿ ಏಕೆ ಘೋಷಣೆ ಮಾಡುತ್ತಿಲ್ಲ’ ಎಂದು ಆಕ್ರೋಶ ಹೊರಹಾಕಿದರು.

ಇದನ್ನೂ ಓದಿ: ಕಬ್ಬಿಗೆ ಸೂಕ್ತ ಬೆಲೆ ಹೋರಾಟದ ನಡುವೆಯೇ ಭಾರಿ ಅನಾಹುತ: ಬಾಗಲಕೋಟೆಯಲ್ಲಿ ಸುಟ್ಟು ಭಸ್ಮವಾಯ್ತು 3.41 ಕೋಟಿ ರೂ. ಮೌಲ್ಯದ ಕಬ್ಬು

ಮುಧೋಳ ನಗರದಲ್ಲಿ ರೈತರ ಬೃಹತ್ ಪ್ರತಿಭಟನೆ ಹಿನ್ನೆಲೆ, ನಗರದ ತುಂಬಾ ಖಾಕಿ ಸರ್ಪಗಾವಲು ಹಾಕಲಾಗಿತ್ತು. ಸಂಗೊಳ್ಳಿ ರಾಯಣ್ಣ ಸರ್ಕಲ್​ನಿಂದ ಕೆಲವೇ ಮೀಟರ್ ದೂರದಲ್ಲಿರುವ ನಿರಾಣಿ ಶುಗರ್ಸ್ ಸಕ್ಕರೆ ಕಾರ್ಖಾನೆಗೂ ಪೊಲೀಸ್ ಬಿಗಿ ಭದ್ರತೆ ಕಲ್ಪಿಸಿದ್ದರು. ರೈತರು ಕಾರ್ಖಾನೆಗಳಿಗೆ ನುಗ್ಗಿ ಯಾವುದೇ ಅನಾಹುತಕ್ಕೆ ಆಸ್ಪದವಾಗಬಾರದು ಎಂಬ ಹಿನ್ನೆಲೆ ಬಿಗಿ ಭದ್ರತೆ ಕಲ್ಪಿಸಲಾಗಿತ್ತು. ನಗರದಲ್ಲಿ ರೈತರು ರ‍್ಯಾಲಿ, ಪಾದಯಾತ್ರೆಯಲ್ಲಿ ಹಸಿರು ಟಾವೆಲ್​​ ತಿರುಗಿಸುತ್ತಾ ಸಾಗಿದರು. ನಂತರ ತಹಶೀಲ್ದಾರ್​ಗೆ ಮನವಿ ಸಲ್ಲಿಸಿದರು.

ಬಿಜೆಪಿ ರಾಜ್ಯ ಉಪಾಧ್ಯಕ್ಷ ಮುರುಗೇಶ್ ನಿರಾಣಿ ಹೇಳಿದ್ದಿಷ್ಟು 

ಇನ್ನು ಈ ಕುರಿತಾಗಿ ಮಾತನಾಡಿರುವ ಬಿಜೆಪಿ ರಾಜ್ಯ ಉಪಾಧ್ಯಕ್ಷ ಮುರುಗೇಶ್ ನಿರಾಣಿ, ‘ಟನ್ ಕಬ್ಬಿಗೆ 3600 ರೂ ಘೋಷಣೆ ಮಾಡಲಾಗಿದೆ. ಮೊದಲ ಕಂತು 3600 ಬೆಲೆ, ಅದಕ್ಕೆ ಬಹುತೇಕ ರೈತರು ಒಪ್ಪಿದ್ದಾರೆ. ಈಗಾಗಲೇ ಮುಧೋಳ್ ಭಾಗದ ಮೂರು ಸಕ್ಕರೆ ಕಾರ್ಖಾನೆಗಳನ್ನು ಹೊರತುಪಡಿಸಿ ಜಿಲ್ಲೆಯ ಉಳಿದ ಎಲ್ಲಾ ಸಕ್ಕರೆ ಕಾರ್ಖಾನೆಗಳು ಆರಂಭವಾಗಿವೆ. ಕಾರ್ಖಾನೆ ಆರಂಭಿಸುವುದಕ್ಕೆ ರೈತರು ಕಬ್ಬು ಸಾಗಿಸುವುದಕ್ಕೆ ತೊಂದರೆ ನೀಡಬಾರದು. ವಿಳಂಬವಾದಷ್ಟು ಹೊಲದಲ್ಲೇ ಕಬ್ಬು ಹಾಳಾಗುತ್ತದೆ, ಆದಷ್ಟು ಬೇಗ ಇದನ್ನು ಇತ್ಯರ್ಥ ಪಡಿಸಬೇಕು’ ಎಂದಿದ್ದಾರೆ.

ಇದನ್ನೂ ಓದಿ: ಕಬ್ಬಿಗೆ ಎಂಎಸ್​ಪಿ, ದರ ನಿಗದಿಗೆ ಆಗ್ರಹಿಸಿ ತೀವ್ರಗೊಂಡ ರೈತರ ಹೋರಾಟ: ಹಲವೆಡೆ ರಸ್ತೆ ತಡೆ, ಸಂಚಾರ ಅಸ್ತವ್ಯಸ್ತ

ಒಟ್ಟಿನಲ್ಲಿ ಕಬ್ಬಿಗೆ ಯೋಗ್ಯ ಬೆಲೆಗಾಗಿ ನಿರಂತರ ಹೋರಾಟ ಮುಂದುವರೆದಿದೆ. ಪ್ರತಿಭಟನೆ ವಿಕೋಪಕ್ಕೆ ತಿರುಗುವ ಮುನ್ನ ಅಧಿಕಾರಿಗಳು, ಜನಪ್ರತಿನಿಧಿಗಳು ಆದಷ್ಟು ಬೇಗ ರೈತರು ಹಾಗೂ ಕಾರ್ಖಾನೆ ಮಾಲೀಕರನ್ನ ವಿಶ್ವಾಸಕ್ಕೆ ತೆಗೆದುಕೊಂಡು ಯೋಗ್ಯ ಬೆಲೆ ನಿಗದಿ ಮಾಡುವ ನಿಟ್ಟಿನಲ್ಲಿ ಕ್ರಮಕೈಗೊಳ್ಳಬೇಕಿದೆ.

ಕರ್ನಾಟಕದ ಮತ್ತಷ್ಟು ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ.