ಸಿಗರೇಟ್ ಶೇರಿಂಗ್ ಮಾಡುವ ಮುನ್ನ ಎಚ್ಚರ.. ಈ ರೋಗ ಕೂಡ ಶೇರ್​​​ ಆಗುತ್ತೆ!

ಸಿಗರೇಟು ಸೇದುವುದು ಆರೋಗ್ಯಕ್ಕೆ ಹಾನಿಕರ ಎಂಬುದು ಎಲ್ಲರಿಗೂ ಗೊತ್ತಿದೆ. ಆದರೆ ದಿನ ಕಳೆದಂತೆ ಸಿಗರೇಟ್ ಚಟಕ್ಕೆ ದಾಸರಾಗುತ್ತಿರುವವರ ಸಂಖ್ಯೆಯು ಏರಿಕೆಯಾಗುತ್ತಲೇ ಇದೆ. ಮೊದ ಮೊದಲು ಶಾಲಾ ಕಾಲೇಜಿನಲ್ಲಿ ಗೆಳೆಯರು ಸೇದುತ್ತಾರೆ, ಒಂದು ಧಮ್ ಹೊಡೆಯೋಣ ಎಂದು ಆರಂಭವಾಗುವ ಈ ಅಭ್ಯಾಸವು ಬರುಬರುತ್ತಾ ಸಿಗರೇಟ್ ಸೇದದೇ ಇರಲು ಆಗುವುದೇ ಇಲ್ಲ ಎನ್ನುವ ಹಂತಕ್ಕೆ ಬಂದು ತಲುಪುತ್ತದೆ. ಅದರಲ್ಲಿ ಒಬ್ಬರು ಸೇದಿದ ಸಿಗರೇಟನ್ನೇ ಮತ್ತೊಬ್ಬರು ಸೇದುವುದರಿಂದ ಅನೇಕ ಆರೋಗ್ಯ ಸಮಸ್ಯೆಗಳು ಕಾಡಬಹುದು. ಈ ದುರಾಭ್ಯಾಸವು ಗಂಭೀರ ಸಮಸ್ಯೆಗಳಿಗೂ ದಾರಿ ಮಾಡಿಕೊಡುತ್ತದೆ.

* ಬಾಯಿಯ ಸೋಂಕುಗಳು ಹರಡುವ ಸಾಧ್ಯತೆ: ಸಿಗರೇಟ್ ಶೇರ್ ಮಾಡುವ ಅಭ್ಯಾಸವಿದ್ದರೆ, ಒಬ್ಬರಿಗೆ ಬಾಯಿಯಲ್ಲಿ ಸೋಂಕುಗಳಿದ್ದರೆ ಅದು ಇನ್ನೊಬ್ಬ ವ್ಯಕ್ತಿಗೆ ಹರಡುವ ಸಾಧ್ಯತೆಯೂ ಹೆಚ್ಚಾಗಿರುತ್ತದೆ.

* ಮೆನಿಂಜೈಟಿಸ್ ಕಾಯಿಲೆ ಬರುವ ಅಪಾಯವು ಹೆಚ್ಚು : ಮೆನಿಂಜೈಟಿಸ್ ಕಾಯಿಲೆಯಿರುವ ವ್ಯಕ್ತಿಯು ಸೇದಿದ ಸಿಗರೇಟ್ ಅನ್ನು ಮತ್ತೊಬ್ಬರು ಸೇದುವುದರಿಂದ ಈ ಕಾಯಿಲೆ ಬರುವ ಸಂಭವವು ಹೆಚ್ಚು. ಈ ಕಾಯಿಲೆಯು ಮೆದುಳಿನ ಮೇಲೆ ಪರಿಣಾಮ ಬೀರುತ್ತದೆ. ಮೆದುಳು ಮತ್ತು ಬೆನ್ನುಹುರಿಯಲ್ಲಿ ದ್ರವ ಮತ್ತು ಪೊರೆಗಳಿದ್ದು, ಇದು ಊತಕ್ಕೆ ಕಾರಣವಾಗಬಹುದು. ಈ ಉರಿಯೂತವು ಹೆಚ್ಚಾದರೆ ತಲೆನೋವು, ಜ್ವರ ಮತ್ತು ಕುತ್ತಿಗೆ ಭಾಗದಲ್ಲಿ ನೋವು ಕಾಣಿಸಿಕೊಳ್ಳಬಹುದು.

* ಬಾಯಿಯ ಆರೋಗ್ಯವು ಹಾಳಾಗುತ್ತದೆ : ಧೂಮಪಾನ ಅಥವಾ ತಂಬಾಕು ಸೇವನೆಯಿಂದ ಹಲ್ಲುಗಳ ಆರೋಗ್ಯವು ಹಾಳಾಗುತ್ತದೆ. ಹಲ್ಲುಗಳ ಬಣ್ಣ ಮಾಸುವುದು, ಹಲ್ಲು ಉದುರುವುದು ಹಾಗೂ ವಸಡಿನ ಸಮಸ್ಯೆಗಳೂ ಕಾಣಿಸಿಕೊಳ್ಳಬಹುದು.

* ಶ್ವಾಸಕೋಶಕ್ಕೆ ತೊಂದರೆ : ಧೂಮಪಾನದಂತಹ ಕೆಟ್ಟ ಚಟವು ಶ್ವಾಸಕೋಶದ ಆರೋಗ್ಯವನ್ನು ಕುಂಠಿತಗೊಳಿಸುತ್ತದೆ. ಶ್ವಾಸಕೋಶದಲ್ಲಿನ ಸಣ್ಣ ಗಾಳಿ ಚೀಲಗಳಿಗೆ ಹಾನಿಯನ್ನುಂಟು ಮಾಡುತ್ತದೆ. ಆಸ್ತಮಾ ರೋಗಿಗಳು ಈ ಸಿಗರೇಟ್ ಸೇದುವ ಅಭ್ಯಾಸ ಹೊಂದಿದ್ದರೆ ಅಂತಹವರುವರು ಈ ಕೆಟ್ಟ ಅಭ್ಯಾಸದಿಂದ ಉಸಿರಾಟದ ಸಮಸ್ಯೆಯು ಉಲ್ಬಣವಾಗಬಹುದು.

* ದೇಹದಲ್ಲಿ ಉರಿಯೂತಕ್ಕೂ ಕಾರಣವಾಗಿದೆ : ಧೂಮಪಾನವು ದೇಹದಲ್ಲಿ ಉರಿಯೂತವನ್ನು ಉಂಟುಮಾಡುತ್ತದೆ. ಹೀಗಾಗಿ ರುಚಿ ಮತ್ತು ವಾಸನೆ ಗ್ರಾಹಕಗಳ ಊತವು ಕಂಡು ಬರುತ್ತದೆ. ಹೀಗಾಗಿ ವಾಸನೆಯ ಗ್ರಹಿಕೆಯು ಕಡಿಮೆಯಾಗಿ ಯಾವುದೇ ಆಹಾರ ಪದಾರ್ಥಗಳ ಪರಿಮಳವನ್ನು ಗ್ರಹಿಸಲು ಕಷ್ಟವಾಗುತ್ತದೆ.

ಇದನ್ನೂ ಓದಿ: ನೊಣಗಳ ಕಾಟದಿಂದ ಬೇಸತ್ತಿದ್ದೀರಾ?; ಹೀಗೆ ಮಾಡಿ ನೋಡಿ

* ದೈಹಿಕ ಚಟುವಟಿಕೆಗಳಿಗೂ ತೊಡಕು : ದೀರ್ಘಕಾಲದಿಂದ ಸಿಗರೇಟ್ ಸೇದುವ ಪ್ರವೃತ್ತಿಯನ್ನು ಬೆಳೆಸಿಕೊಂಡಿದ್ದರೆ, ಹೃದಯ, ಶ್ವಾಸಕೋಶ ಮತ್ತು ಸ್ನಾಯುಗಳಿಗೆ ಆಮ್ಲಜನಕವು ರವಾನೆಯಾಗುವುದು ಕಡಿಮೆಯಾಗುತ್ತದೆ. ಹೀಗಾಗಿ ದೈಹಿಕ ಸಾಮರ್ಥ್ಯವು ಕುಂಠಿತವಾಗಿ ದೈಹಿಕ ಚಟುವಟಿಕೆಗಳಿಗೂ ತೊಡಕು ಉಂಟಾಗಬಹುದು.

ಧೂಮಪಾನ ಸೇವನೆಯಿಂದ ದೂರವಿರಲು ಈ ಟಿಪ್ಸ್ ಫಾಲೋ ಮಾಡಿ:

* ನಿಮ್ಮ ಸ್ನೇಹಿತರು ಧೂಮಪಾನ ವ್ಯಸನಿಗಳಾಗಿದ್ದರೆ ಆದಷ್ಟು ಅಂತಹವರಿಗೆ ದೂರವಿರಿ.

* ಸಿಗರೇಟ್ ಸೇದಬೇಕು ಎಂದೆನಿಸಿದರೆ ಮನಸ್ಸನ್ನು ಬೇರೆ ಕಡೆಗೆ ವರ್ಗಾಯಿಸಿ ಕೆಲಸದಲ್ಲಿ ಬ್ಯುಸಿಯಾಗಿ.

* ಧೂಮಪಾನ ಚಟವನ್ನು ಬಿಡಬೇಕು ಎನ್ನುವವರು ಕೌನ್ಸಿಲರ್ ನೆರವನ್ನು ಪಡೆಯಬಹುದು.

* ಅಗತ್ಯವೆನಿಸಿದರೆ ನಿಕೋಟಿನ್ ಬಳಕೆಯ ಚಿಕಿತ್ಸೆಯನ್ನು ಪಡೆಯಿರಿ.

ಇನ್ನಷ್ಟು ಜೀವನಶೈಲಿಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ