ಆಪರೇಷನ್ ಕಾವೇರಿ: ಸುಡಾನ್ನಿಂದ 3,000ಕ್ಕಿಂತಲೂ ಹೆಚ್ಚು ಭಾರತೀಯರನ್ನು ಕರೆ ತಂದ ಕಾರ್ಯಾಚರಣೆ ಹೇಗೆ ನಡೆದಿತ್ತು?
ಸುಡಾನ್ನಲ್ಲಿ ಸಂಘರ್ಷ ತೀವ್ರಗೊಂಡಂತೆ ವಿದ್ಯುತ್ ಕಡಿತ ಮತ್ತು ನೆಟ್ವರ್ಕ್ ಲಭ್ಯತೆಯ ಅಪಾಯಗಳ ಹೊರತಾಗಿಯೂ, ಭಾರತೀಯ ರಾಯಭಾರ ಕಚೇರಿ ಆನ್ಲೈನ್ ನೋಂದಣಿ ಪ್ರಕ್ರಿಯೆಯನ್ನು ಪ್ರಾರಂಭಿಸಿತು. ಪೋರ್ಟ್ ಸುಡಾನ್, ಜೆಡ್ಡಾ ಮತ್ತು ದೆಹಲಿಯಲ್ಲಿ ಕಾರ್ಯಾಚರಣೆಯನ್ನು ಸೂಕ್ಷ್ಮವಾಗಿ ಮೇಲ್ವಿಚಾರಣೆ ಮಾಡಲು ಮತ್ತು ಸಂಘಟಿಸಲು ಬಹು ನಿಯಂತ್ರಣ ಕೊಠಡಿಗಳನ್ನು ಸ್ಥಾಪಿಸಲಾಯಿತು.
Updated on:May 05, 2023 | 7:35 PM
ಸುಡಾನ್ನ (Sudan) ರಾಜಧಾನಿ ಖಾರ್ಟೂಮ್ನಲ್ಲಿರುವ (Khartoum) ಭಾರತೀಯ ರಾಯಭಾರ ಕಚೇರಿಯಿಂದ ಎಚ್ಚರಿಕೆ ಕರೆಗಳು ಬರುತ್ತಲೇ ಇತ್ತು. ಸಂಘರ್ಷ ಪೀಡಿತ ಪ್ರದೇಶದಲ್ಲಿ ಸಿಲುಕಿರುವ ಜನರನ್ನು ಅಲ್ಲಿಂದ ಹೊರ ತರುವುದು ಸುಲಭವಲ್ಲ.ಸುಮಾರು 850-ಕಿಮೀ ಬಸ್ ಪ್ರಯಾಣ ಬೇರೆ. ಗುರುವಾರ ತನ್ನ ಒಂಬತ್ತನೇ ದಿನಕ್ಕೆ ಪ್ರವೇಶಿಸಿದ ಆಪರೇಷನ್ ಕಾವೇರಿ (Operation Kaveri), ಇತ್ತೀಚಿನ ದಿನಗಳಲ್ಲಿ ಭಾರತವು ಕಾರ್ಯಗತಗೊಳಿಸಿದ ಅತಿದೊಡ್ಡ ಸ್ಥಳಾಂತರಿಸುವ ಕಾರ್ಯಾಚರಣೆಗಳಲ್ಲಿ ಒಂದಾಗಿದೆ. ಇಲ್ಲಿಯವರೆಗೆ, 3,000 ಕ್ಕೂ ಹೆಚ್ಚು ಭಾರತೀಯ ಪ್ರಜೆಗಳು ಅಥವಾ ಭಾರತೀಯ ಮೂಲದ ಜನರನ್ನು ಸಂಘರ್ಷಪೀಡಿತ ಆಫ್ರಿಕನ್ ರಾಷ್ಟ್ರದಿಂದ ಸ್ಥಳಾಂತರಿಸಲಾಗಿದೆ. ಈ ಕಾರ್ಯಾಚರಣೆಯ ಯೋಜನೆ ಹೇಗೆ ನಡೆದಿತ್ತು ಎಂಬುದರ ಬಗ್ಗೆ ಇಂಡಿಯನ್ ಎಕ್ಸ್ಪ್ರೆಸ್ ವರದಿ ಪ್ರಕಟಿಸಿದೆ.
ಕಾರ್ಯಾಚರಣೆಯ ಯೋಜನೆಯು ಅಪಾಯ ಮತ್ತು ಪ್ರಮುಖ ವ್ಯವಸ್ಥಾಪನಾ ಸವಾಲುಗಳಿಂದ ತುಂಬಿತ್ತು. ಅದರ ಕಾರ್ಯಗತಗೊಳಿಸುವಿಕೆಯು ಒಂದನೇ ದಿನದಿಂದಲೇ ದಿನದ 24 ಗಂಟೆಕಾಲ ಮೇಲ್ವಿಚಾರಣೆಯನ್ನು ಒಳಗೊಂಡಿರುತ್ತದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಸುಡಾನ್ ಸಶಸ್ತ್ರ ಪಡೆಗಳು ಮತ್ತು ದೇಶದ ಕ್ಷಿಪ್ರ ಬೆಂಬಲ ಪಡೆಗಳ ನಡುವೆ ಏಪ್ರಿಲ್ 15 ರಂದು ಖಾರ್ಟೂಮ್ನಲ್ಲಿ ಕಾದಾಟವು ಭುಗಿಲೆದ್ದಂತೆ, ಭಾರತೀಯ ರಾಯಭಾರ ಕಚೇರಿಯು ಸುಡಾನ್ನಲ್ಲಿರುವ ಭಾರತೀಯ ಸಮುದಾಯದೊಂದಿಗೆ ಸಂಪರ್ಕ ಸಾಧಿಸಿ ಸಲಹೆ ನೀಡತೊಡಗಿತು.
ಸುಡಾನ್ನಲ್ಲಿ ಸಂಘರ್ಷ ತೀವ್ರಗೊಂಡಂತೆ ವಿದ್ಯುತ್ ಕಡಿತ ಮತ್ತು ನೆಟ್ವರ್ಕ್ ಲಭ್ಯತೆಯ ಅಪಾಯಗಳ ಹೊರತಾಗಿಯೂ, ಭಾರತೀಯ ರಾಯಭಾರ ಕಚೇರಿ ಆನ್ಲೈನ್ ನೋಂದಣಿ ಪ್ರಕ್ರಿಯೆಯನ್ನು ಪ್ರಾರಂಭಿಸಿತು. ಪೋರ್ಟ್ ಸುಡಾನ್, ಜೆಡ್ಡಾ ಮತ್ತು ದೆಹಲಿಯಲ್ಲಿ ಕಾರ್ಯಾಚರಣೆಯನ್ನು ಸೂಕ್ಷ್ಮವಾಗಿ ಮೇಲ್ವಿಚಾರಣೆ ಮಾಡಲು ಮತ್ತು ಸಂಘಟಿಸಲು ಬಹು ನಿಯಂತ್ರಣ ಕೊಠಡಿಗಳನ್ನು ಸ್ಥಾಪಿಸಲಾಯಿತು. ಸುಡಾನ್ನಲ್ಲಿ ಭಾರತೀಯ ಪ್ರಜೆಗಳು ಮತ್ತು ಭಾರತೀಯ ಮೂಲದವರ ಜಾಸ್ತಿಯೇ ಇದ್ದರು. ಅಲ್ಲಿ ಸುಮಾರು 3,500 ಭಾರತೀಯ ಪ್ರಜೆಗಳು ಮತ್ತು 1,000 ಭಾರತೀಯ ಮೂಲದ ಜನರಿದ್ದಾರೆ, ಅವರಲ್ಲಿ ಹೆಚ್ಚಿನವರು ಖಾರ್ಟೂಮ್ ನಗರದ ಆಸುಪಾಸುಗಳಲ್ಲಿದ್ದಾರೆ. ಅಷ್ಟೇ ಅಲ್ಲದೆ ಓಮ್ದುರ್ಮನ್, ಅಲ್ ಫಾಶಿರ್, ಕಸ್ಸಾಲಾ ಮತ್ತು ಪೋರ್ಟ್ ಸುಡಾನ್ನಂತಹ ನಗರಗಳಲ್ಲಿ ಕೇಂದ್ರೀಕೃತರಾಗಿದ್ದಾರೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಅಧಿಕಾರಿಗಳ ಪ್ರಕಾರ, ಖಾರ್ಟೂಮ್ನ ವಿವಿಧ ಪ್ರದೇಶಗಳಿಂದ ಪೋರ್ಟ್ ಸುಡಾನ್ಗೆ ಭಾರತೀಯ ಪ್ರಜೆಗಳನ್ನು ಸುರಕ್ಷಿತವಾಗಿ ಸಾಗಿಸುವುದು ಪ್ರಮುಖ ಸವಾಲಾಗಿತ್ತು. ಹೋರಾಟದ ವರದಿಗಳ ಮಧ್ಯೆ, ಖಾರ್ಟೂಮ್ನಿಂದ ಈಶಾನ್ಯಕ್ಕೆ 850 ಕಿಮೀ ದೂರದಲ್ಲಿರುವ ಪೋರ್ಟ್ ಸುಡಾನ್ಗೆ ಸ್ಥಳಾಂತರಿಸುವವರನ್ನು ಕರೆದೊಯ್ಯಲು ಹೆಚ್ಚುವರಿ ಬಸ್ಗಳನ್ನು ನಿಯೋಜಿಸಲಾಯಿತು, ಈ ಪ್ರಯಾಣವು 12-18 ಗಂಟೆಗಳನ್ನು ತೆಗೆದುಕೊಂಡಿತು.
ಇದನ್ನೂ ಓದಿ: Operation Kaveri: ಆಪರೇಷನ್ ಕಾವೇರಿ ಅಡಿಯಲ್ಲಿ ಇದುವರೆಗೆ ಸುಡಾನ್ನಿಂದ 3,200 ಭಾರತೀಯರ ಸ್ಥಳಾಂತರ
ಕಳೆದ ತಿಂಗಳು ವಿದೇಶಾಂಗ ಕಾರ್ಯದರ್ಶಿ ವಿನಯ್ ಮೋಹನ್ ಕ್ವಾತ್ರಾ ಅವರು ಖಾರ್ಟೂಮ್ನಲ್ಲಿನ ಪರಿಸ್ಥಿತಿಯನ್ನು ಸೂಕ್ಷ್ಮ, ಸಂಕೀರ್ಣ ಮತ್ತು ಅನಿರೀಕ್ಷಿತ ಎಂದಿದ್ದರು. ಪೋರ್ಟ್ ಸುಡಾನ್ಗೆ ಹೋಗುವ ಬಸ್ಗಳಿಗೆ ಸಾಕಷ್ಟು ಡೀಸೆಲ್ ಲಭ್ಯತೆಯನ್ನು ಖಾತ್ರಿಪಡಿಸುವುದು ಅವರು ಪ್ರಸ್ತಾಪಿಸಿದ ಹಲವು ವ್ಯವಸ್ಥಾಪನಾ ಸವಾಲುಗಳಲ್ಲಿ ಒಂದಾಗಿದೆ. ಬೃಹತ್ ಸಮನ್ವಯ ಪ್ರಯತ್ನವು ಭಾರತೀಯ ಪ್ರಜೆಗಳನ್ನು ಸ್ಥಳಾಂತರಿಸುವ ಮೊದಲು ತಮ್ಮ ದಾಖಲಾತಿಗಳನ್ನು ಪೂರ್ಣಗೊಳಿಸಲು ಪೋರ್ಟ್ ಖಾರ್ಟೂಮ್ನಲ್ಲಿ ಸೌಲಭ್ಯ ಮತ್ತು ಜಿದ್ದಾದಲ್ಲಿ ಸಾರಿಗೆ ವಸತಿ ವ್ಯವಸ್ಥೆ ಮಾಡುವುದನ್ನು ಒಳಗೊಂಡಿತ್ತು.
ಕಾರ್ಯಾಚರಣೆಯ ಪ್ರಮುಖ ಪ್ರಮುಖ ಅಂಶವೆಂದರೆ ಐಎಎಫ್ನ C-130J ಸೂಪರ್ ಹರ್ಕ್ಯುಲಸ್ ವಿಮಾನವು ನಡೆಸಿದ ಅಪಾಯಕಾರಿ ಸ್ಥಳಾಂತರಿಸುವ ಕಾರ್ಯಾಚರಣೆಯಾಗಿದ್ದು, ಕಳೆದ ತಿಂಗಳು ಖಾರ್ಟೂಮ್ನಿಂದ 40 ಕಿಮೀ ಉತ್ತರದಲ್ಲಿರುವ ವಾಡಿ ಸೀಡ್ನಾದಲ್ಲಿನ ಸಣ್ಣ ಏರ್ಸ್ಟ್ರಿಪ್ನಿಂದ 121 ಜನರನ್ನು ರಕ್ಷಿಸಿತು. ಯಾವುದೇ ನ್ಯಾವಿಗೇಷನಲ್ ನೆರವು ಅಥವಾ ಲ್ಯಾಂಡಿಂಗ್ ಲೈಟ್ಗಳಿಲ್ಲದೆ ರಾತ್ರಿಯಲ್ಲಿ ಕಾರ್ಯಾಚರಣೆಯನ್ನು ನಡೆಸಲಾಯಿತು.
ಕಳೆದ ವಾರ, ವಿದೇಶಾಂಗ ವ್ಯವಹಾರಗಳ ರಾಜ್ಯ ಸಚಿವ ವಿ ಮುರಳೀಧರನ್ ಅವರು ಪೋರ್ಟ್ ಸುಡಾನ್ನಿಂದ ಬರುತ್ತಿರುವ ಭಾರತೀಯ ಪ್ರಜೆಗಳನ್ನು ಸ್ವೀಕರಿಸಲು ಜೆಡ್ಡಾದಲ್ಲಿದ್ದರು. ವಿದೇಶಾಂಗ ಸಚಿವ ಎಸ್ ಜೈಶಂಕರ್ ಅವರು ಯುಎಸ್, ಯುಎಇ, ಸೌದಿ ಅರೇಬಿಯಾ, ಈಜಿಪ್ಟ್ ಮತ್ತು ಯುಕೆಗಳಲ್ಲಿನ ತಮ್ಮ ಸಹವರ್ತಿಗಳೊಂದಿಗೆ ಕಾರ್ಯಾಚರಣೆಯ ಕುರಿತು ಮಾತನಾಡಿದ್ದಾರೆ.
ಗುರುವಾರ ಸುಡಾನ್ನಲ್ಲಿರುವ ಭಾರತೀಯ ರಾಯಭಾರ ಕಚೇರಿಯು ಎಲ್ ಫಾಶಿರ್ನಲ್ಲಿ ಸಿಲುಕಿರುವ ಭಾರತೀಯರನ್ನು ಕರೆತರುವ ಕಾರ್ಯವನ್ನು ಅದರ ಸಂಪನ್ಮೂಲಗಳನ್ನು ಸಜ್ಜುಗೊಳಿಸುವ ಮೂಲಕ ಮತ್ತು ಸಂಘರ್ಷ ವಲಯಗಳಲ್ಲಿ ವಿವಿಧ ಪಾಲುದಾರರೊಂದಿಗೆ ಸಮನ್ವಯ ಸಾಧಿಸುವ ಮೂಲಕ ತನ್ನ ನಾಗರಿಕರಿಗೆ 1,800 ಕಿಲೋಮೀಟರ್ಗಿಂತಲೂ ಹೆಚ್ಚು ಪ್ರಯಾಸಕರ ಪ್ರಯಾಣದಲ್ಲಿ ಸುರಕ್ಷಿತ ಪ್ರಯಾಣವನ್ನು ಖಚಿತಪಡಿಸಿಕೊಳ್ಳುವುದರ ಮೂಲಕ ಸಾಧಿಸಲಾಗಿದೆ. ಪಶ್ಚಿಮ ಸುಡಾನ್ನ ಎಲ್ ಫಾಶಿರ್ನಿಂದ 80 ಭಾರತೀಯರನ್ನು ಹೊತ್ತ ಎರಡು ಬಸ್ಗಳು 48 ಗಂಟೆಗಳಿಗೂ ಹೆಚ್ಚು ಕಾಲ ಪ್ರಯಾಣಿಸಿದ ನಂತರ ಪೋರ್ಟ್ ಸುಡಾನ್ (ಸುಡಾನ್ನ ಪೂರ್ವ) ಸುರಕ್ಷಿತವಾಗಿ ತಲುಪಿದವು” ಎಂದು ರಾಯಭಾರ ಕಚೇರಿ ಟ್ವೀಟ್ನಲ್ಲಿ ತಿಳಿಸಿದೆ.
ಮತ್ತಷ್ಟು ರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ
Published On - 7:32 pm, Fri, 5 May 23
