ಲಿವ್ ಇನ್ ಸಂಬಂಧಗಳನ್ನು ಮದುವೆ ಎಂದು ಕಾನೂನು ಗುರುತಿಸುವುದಿಲ್ಲ: ಕೇರಳ ಹೈಕೋರ್ಟ್

ಕೊಚ್ಚಿ: ಕಾನೂನು ಲಿವ್-ಇನ್ ಸಂಬಂಧಗಳನ್ನು(Live-In Relationships) ಮದುವೆ (Marriage) ಎಂದು ಗುರುತಿಸುವುದಿಲ್ಲ ಎಂದು ಕೇರಳ ಹೈಕೋರ್ಟ್ (Kerala High Court )ಅಭಿಪ್ರಾಯಪಟ್ಟಿದೆ. ಆದ್ದರಿಂದ, ಒಪ್ಪಂದದ ಆಧಾರದ ಮೇಲೆ ಒಟ್ಟಿಗೆ ವಾಸಿಸುವ ದಂಪತಿಗಳು ಅದನ್ನು ಮದುವೆ ಎಂದು ಹೇಳುವಂತಿಲ್ಲ ಅಥವಾ ಅದರ ಆಧಾರದ ಮೇಲೆ ವಿಚ್ಛೇದನವನ್ನು ಕೋರುವಂತಿಲ್ಲ ಎಂದು ಹೈಕೋರ್ಟ್ ಹೇಳಿದೆ. ವಿಶೇಷ ವಿವಾಹ ಕಾಯಿದೆಯಡಿ ತಮ್ಮ ವಿವಾಹವನ್ನು ಶಾಸ್ತ್ರೋಕ್ತವಾಗಿ ನಡೆಸಿಲ್ಲ ಎಂಬ ಕಾರಣಕ್ಕಾಗಿ ವಿಚ್ಛೇದನದ ಅರ್ಜಿಯನ್ನು ವಜಾಗೊಳಿಸಿದ ಕೌಟುಂಬಿಕ ನ್ಯಾಯಾಲಯದ ಆದೇಶದ ವಿರುದ್ಧ ಅಂತರ್ಧರ್ಮೀಯ ದಂಪತಿಗಳ ಮೇಲ್ಮನವಿಯ ವಿಚಾರಣೆ ನಡೆಸಿದ ನ್ಯಾಯಮೂರ್ತಿಗಳಾದ ಎ ಮುಹಮ್ಮದ್ ಮುಸ್ತಾಕ್ ಮತ್ತು ಸೋಫಿ ಥಾಮಸ್ ಅವರ ಪೀಠವು ಈ ತೀರ್ಪು ನೀಡಿದೆ.

ದಂಪತಿಗಳಲ್ಲಿ ಒಬ್ಬರು ಹಿಂದೂ ಮತ್ತು ಇನ್ನೊಬ್ಬ ಕ್ರಿಶ್ಚಿಯನ್. ಒಪ್ಪಂದದ ಅಡಿಯಲ್ಲಿ 2006ರಿಂದ ಒಟ್ಟಿಗೆ ವಾಸಿಸುತ್ತಿದ್ದು ಇವರಿಗೆ 16 ವರ್ಷದ ಮಗು ಇದೆ. ಇನ್ನು ತಮ್ಮ ಸಂಬಂಧವನ್ನು ಮುಂದುವರಿಸಲು ಇಚ್ಛಿಸದ ಅವರು ವಿಚ್ಛೇದನಕ್ಕಾಗಿ ಕೌಟುಂಬಿಕ ನ್ಯಾಯಾಲಯದ ಮೊರೆ ಹೋಗಿದ್ದರು.

ಅವರ ಮೇಲ್ಮನವಿಯನ್ನು ಇತ್ಯರ್ಥಪಡಿಸಿದ ಹೈಕೋರ್ಟ್, ಕಾನೂನು ಇನ್ನೂ ಲಿವ್-ಇನ್ ಸಂಬಂಧವನ್ನು ಮದುವೆ ಎಂದು ಗುರುತಿಸಿಲ್ಲ, ವೈಯಕ್ತಿಕ ಕಾನೂನು ಅಥವಾ ವಿಶೇಷ ವಿವಾಹ ಕಾಯ್ದೆಯಡಿ ಜಾತ್ಯತೀತ ಕಾನೂನಿನ ಪ್ರಕಾರ ವಿವಾಹವನ್ನು ನಡೆಸಿದರೆ ಮಾತ್ರ ಕಾನೂನು ಮಾನ್ಯತೆ ನೀಡುತ್ತದೆ ಎಂದು ಹೇಳಿದೆ.

ಒಂದು ಒಪ್ಪಂದದ ಮೂಲಕ ಇಬ್ಬರು ಒಟ್ಟಿಗೆ ವಾಸಿಸಲು ನಿರ್ಧರಿಸಿದರೆ, ಅದು ಮದುವೆ ಎಂದು ಹೇಳಿಕೊಳ್ಳಲು ಮತ್ತು ವಿಚ್ಛೇದನವನ್ನು ಪಡೆಯಲು ಅರ್ಹತೆ ನೀಡುವುದಿಲ್ಲ. ಅಂತಹ ಸಂಬಂಧವು ಬೇರೆಡೆ ಪರಸ್ಪರ ಬಾಧ್ಯತೆ ಅಥವಾ ಕರ್ತವ್ಯಗಳನ್ನು ಸೃಷ್ಟಿಸಲು ಅರ್ಹತೆ ಪಡೆಯುವ ಸನ್ನಿವೇಶವಿದ್ದರೂ, ವಿಚ್ಛೇದನದ ಉದ್ದೇಶಕ್ಕಾಗಿ ಅದನ್ನು ಗುರುತಿಸಬಹುದು ಎಂದು ಅರ್ಥವಲ್ಲ ಎಂದು ಹೈಕೋರ್ಟ್ ಹೇಳಿದೆ.

ವಿಚ್ಛೇದನಕ್ಕೆ ಸಂಬಂಧಿಸಿದ ಕಾನೂನು ನಮ್ಮ ದೇಶದಲ್ಲಿ ವಿಶಿಷ್ಟವಾಗಿದೆ ಮತ್ತು ಕಾನೂನಿನ ಮೂಲಕ ಕಸ್ಟಮೈಸ್ ಮಾಡಲಾಗಿದೆ ಎಂದು ಪೀಠವು ಹೇಳಿದೆ.

ಇದನ್ನೂ ಓದಿ: ಕುಟುಂಬದ ಕಿರಿಕಿರಿ, ಜಂಜಾಟವಿಲ್ಲ; ಬದುಕಿನ ಖುಷಿಗಾಗಿ ರೆಪ್ಲಿಕಾ AI ಚಾಟ್​​ಬೋಟ್​​ನ್ನು ಮದುವೆಯಾದ ಯುವತಿ

ಕೆಲವು ಸಮುದಾಯಗಳಲ್ಲಿ ಅನುಸರಿಸಲಾದ ಹೆಚ್ಚುವರಿ ನ್ಯಾಯಾಂಗ ವಿಚ್ಛೇದನವು ಶಾಸನಬದ್ಧ ಕಾನೂನುಗಳ ಮೂಲಕ ಮಾನ್ಯತೆಯನ್ನು ಪಡೆದುಕೊಂಡಿದೆ. ವಿಚ್ಛೇದನದ ಎಲ್ಲಾ ಇತರ ಪ್ರಕಾರಗಳು ಶಾಸನಬದ್ಧ ಸ್ವರೂಪವನ್ನು ಹೊಂದಿವೆ. ವೈಯಕ್ತಿಕ ಕಾನೂನು ಅಥವಾ ಜಾತ್ಯತೀತ ಕಾನೂನಿನ ಪ್ರಕಾರ ಅನ್ವಯವಾಗುವ ಮಾನ್ಯತೆ ಪಡೆದ ಮದುವೆಯ ಪ್ರಕಾರಕ್ಕೆ ಅನುಗುಣವಾಗಿ ವಿವಾಹವಾದರೆ ಮಾತ್ರ ಶಾಸನವು ಅದನ್ನು ಗುರುತಿಸುತ್ತದೆ ಅಥವಾ ವಿಚ್ಛೇದನಕ್ಕೆ ಅನುಮತಿಸುತ್ತದೆ ಎಂದು ನ್ಯಾಯಾಲಯ ಜೂನ್ 8 ರಂದು ತನ್ನ ಆದೇಶದಲ್ಲಿ ತಿಳಿಸಿದೆ.

ಪ್ರಸ್ತುತ ಪ್ರಕರಣದಲ್ಲಿ, ಕುಟುಂಬ ನ್ಯಾಯಾಲಯವು ಅಂತಹ ವಿಚ್ಛೇದನ ವಾದವನ್ನು ಪರಿಗಣಿಸುವ ಅಧಿಕಾರವನ್ನು ಹೊಂದಿಲ್ಲ. ದಂಪತಿಗಳ ಮನವಿಯನ್ನು ವಜಾಗೊಳಿಸುವ ಬದಲು, ಅದನ್ನು ನಿರ್ವಹಿಸಲಾಗುವುದಿಲ್ಲ ಎಂದು ಹೇಳುವ ಮೂಲಕ ಅರ್ಜಿಯನ್ನು ಹಿಂತಿರುಗಿಸಬೇಕಿತ್ತು ಎಂದು ಹೈಕೋರ್ಟ್ ಅಭಿಪ್ರಾಯಪಟ್ಟಿದೆ.

ವಿವಾಹ ಮತ್ತು ಕೌಟುಂಬಿಕ ವ್ಯವಹಾರಗಳಿಗೆ ಸಂಬಂಧಿಸಿದ ಎಲ್ಲಾ ವಿವಾದಗಳನ್ನು ಪರಿಹರಿಸಲು ಕೌಟುಂಬಿಕ ನ್ಯಾಯಾಲಯದ ಶಾಸನವನ್ನು ಮಾಡಲಾಗಿದೆ. ಕೌಟುಂಬಿಕ ನ್ಯಾಯಾಲಯದ ಕಾಯಿದೆಯ ಪೀಠಿಕೆಯಲ್ಲಿ ಉಲ್ಲೇಖಿಸಲಾದ ಮದುವೆಯು ಕಾನೂನಿನಿಂದ ಗುರುತಿಸಲ್ಪಟ್ಟಿರುವ ಮದುವೆಯನ್ನು ಮಾತ್ರ ಸೂಚಿಸುತ್ತದೆ. ಒಪ್ಪಂದದ ಮೂಲಕ ಇಬ್ಬರ ನಡುವಿನ ಸಂಬಂಧ ಅಥವಾ ಯಾವುದೇ ವಿವಾಹವು ವಿಚ್ಛೇದನ ನೀಡುವ ಉದ್ದೇಶಕ್ಕಾಗಿ ಕಾನೂನಿನ ಅಡಿಯಲ್ಲಿ ಮಾನ್ಯತೆಯನ್ನು ಪಡೆದಿಲ್ಲ. ಅಂತಹ ಸಂದರ್ಭಗಳಲ್ಲಿ, ವಿಚ್ಛೇದನಕ್ಕಾಗಿ ಅಂತಹ ಹಕ್ಕನ್ನು ಸ್ವೀಕರಿಸಲು ಕೌಟುಂಬಿಕ ನ್ಯಾಯಾಲಯವು ಅಧಿಕಾರವನ್ನು ಹೊಂದಿಲ್ಲ ಪೀಠ ಹೇಳಿದೆ.

ಮತ್ತಷ್ಟು ರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ