ಸಾಲ ರೈಟ್ ಆಫ್ ಆಗಿದೆ ಎಂದು ನಿರಾಳರಾಗಬೇಡಿ; ಬ್ಯಾಂಕ್ಗಳು ಮತ್ತೆಯೂ ಮನೆ ಬಾಗಿಲಿಗೆ ಬರಬಹುದು!
ಸಾಲ ಮನ್ನಾ ಮತ್ತು ಸಾಲದ ರೈಟ್ ಆಫ್ ಎಂಬುದು ಸರ್ಕಾರದ ಮಟ್ಟದಲ್ಲಿ ಕೈಗೊಳ್ಳುವ ಮಹತ್ವದ ತೀರ್ಮಾನಗಳಾಗಿವೆ. ಆದರೆ, ಇವೆರಡರ ನಡುವೆ ವ್ಯತ್ಯಾಸವಿದೆ. ಸಾಲ ಮನ್ನಾ ಮತ್ತು ಸಾಲದ ರೈಟ್ ಆಫ್ ನಡುವಣ ಪ್ರಮುಖ ವ್ಯತ್ಯಾಸವನ್ನು ಇಲ್ಲಿ ನೀಡಲಾಗಿದೆ.
ಸಾಮಾನ್ಯವಾಗಿ ಚುನಾವಣೆ ಸಮೀಪಿಸಿದಾಗ ರಾಜಕಾರಣಿಗಳಿಂದ ಸಾಲ ಮನ್ನಾ ಭರವಸೆಗಳ ಮಹಾಪೂರವೇ ಹರಿದು ಬರುತ್ತದೆ. ಅದೇ ರೀತಿ, ಸಂಸತ್ ಅಧಿವೇಶನಗಳ ಸಂದರ್ಭದಲ್ಲಿ ನಿರ್ದಿಷ್ಟ ಮೊತ್ತದ ಸಾಲವನ್ನು ರೈಟ್ ಆಫರ್ (ಬರ್ಖಾಸ್ತು) ಮಾಡಲಾಗಿದೆ ಎಂಬ ಮಾಹಿತಿಯನ್ನು ಸರ್ಕಾರ ನೀಡುವುದು ವರದಿಯಾಗುತ್ತಿರುತ್ತದೆ.
1 / 8
ಕಳೆದ ಐದು ವರ್ಷಗಳಲ್ಲಿ 10,09,511 ಕೋಟಿ ರೂ. ಮೌಲ್ಯದ ಸಾಲವನ್ನು ದೇಶದ ಪ್ರಮುಖ ಬ್ಯಾಂಕ್ಗಳು ರೈಟ್ ಆಫ್ ಮಾಡಿವೆ ಎಂದು ಕೇಂದ್ರ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಇತ್ತೀಚೆಗೆ ಸಂಸತ್ ಅಧಿವೇಶನದಲ್ಲಿ ತಿಳಿಸಿದ್ದರು.
2 / 8
ಆದರೆ, ಸಾಲ ಮನ್ನಾ ಮತ್ತು ಸಾಲದ ರೈಟ್ ಆಫ್ ಮಾಡುವುದಕ್ಕೆ ವ್ಯತ್ಯಾಸವಿದೆ. ಸಾಲ ಮನ್ನಾ ಎಂದರೆ ಸಾಲ ಪಡೆದ ವ್ಯಕ್ತಿಯೊಬ್ಬ ಅದನ್ನು ಕಟ್ಟಬೇಕಾದ ಅಗತ್ಯವಿಲ್ಲ. ಮನ್ನಾ ಆದ ಸಾಲಕ್ಕೆ ಸಾಲಗಾರ ನಂತರ ಜವಾಬ್ದಾರನಾಗಿರುವುದಿಲ್ಲ. ಬ್ಯಾಂಕ್ಗಳಿಗೆ ಅದು ಆರ್ಥಿಕ ಹೊರೆಯಾಗಿ ಪರಿಣಮಿಸುತ್ತದೆ.
3 / 8
ಸಾಮಾನ್ಯವಾಗಿ ಕೃಷಿ ಸಾಲಗಳನ್ನು ಮನ್ನಾ ಮಾಡಿರುವ ಹಲವು ನಿದರ್ಶನಗಳು ನಮ್ಮ ಮುಂದಿವೆ. ಸರ್ಕಾರಗಳು ಈ ವಿಚಾರವಾಗಿ ನಿರ್ಧಾರ ಕೈಗೊಂಡು ನಂತರ ಬ್ಯಾಂಕ್ಗಳಿಗೆ ಸೂಚನೆ ನೀಡುತ್ತವೆ. ಅದರಂತೆ ಬ್ಯಾಂಕ್ಗಳು ತೀರ್ಮಾನ ಕೈಗೊಳ್ಳುತ್ತವೆ. ಕೃಷಿ ಸಾಲ ಮನ್ನಾದಂಥ ಸಂದರ್ಭಗಳಲ್ಲಿ ಹಲವು ಷರತ್ತುಗಳನ್ನು ವಿಧಿಸಿರುವುದನ್ನೂ ನೀವು ಗಮನಿಸಿರಬಹುದು.
4 / 8
ದೇಶದಲ್ಲಿ ಉದ್ಯಮ ಚಟುವಟಿಕೆಗಳನ್ನು ಹೆಚ್ಚಿಸಲು, ಉದ್ಯೋಗಾವಕಾಶ ಸೃಷ್ಟಿ ದೃಷ್ಟಿಯನ್ನು ಗಮನದಲ್ಲಿಟ್ಟುಕೊಂಡು ಸರ್ಕಾರಗಳು ಕಾರ್ಪೊರೇಟ್ ಸಾಲಗಳ ಮರು ಪಾವತಿಗೆ ವಿನಾಯಿತಿ ನೀಡಿದ ಅನೇಕ ನಿದರ್ಶನಗಳೂ ನಮ್ಮ ಮುಂದಿವೆ. ಆದರೆ ಸಾಲದ ರೈಟ್ ಆಫ್ ಎಂದರೆ ಈ ರೀತಿಯದ್ದಲ್ಲ.
5 / 8
ಸಾಲದ ರೈಟ್ ಆಫ್ ಎಂಬುದು ಬ್ಯಾಂಕ್ಗಳ ಬ್ಯಾಲೆನ್ಸ್ಶೀಟ್ ಅನ್ನು ಸುಸ್ಥಿತಿಯಲ್ಲಿಡುವ ಒಂದು ವಿಧಾನವಷ್ಟೆ. ಮರುಪಾವತಿಯಾಗದ ಸಾಲಗಳ ಹೊರೆಯಿಂದ ಬ್ಯಾಂಕ್ ಬ್ಯಾಲೆನ್ಸ್ಶೀಟ್ ನಿರ್ವಹಣೆ ಕಷ್ಟಕರವಾಗಿ ಪರಿಣಮಿಸಿದಾಗ ಅವುಗಳ ಸುಗಮ ನಿರ್ವಹಣೆಗಾಗಿ ಬ್ಯಾಂಕ್ಗಳು ಸಾಲವನ್ನು ರೈಟ್ ಆಫ್ ಮಾಡುತ್ತವೆ. ಅಂದರೆ ಬ್ಯಾಲೆನ್ಸ್ಶೀಟ್ ಅನ್ನು ಕ್ಲಿಯರ್ ಮಾಡುತ್ತವೆ.
6 / 8
ಬ್ಯಾಲೆನ್ಸ್ ಶೀಟ್ ಕ್ಲಿಯರ್ ಆದ ಮಾತ್ರಕ್ಕೆ ಸಾಲ ಪಡೆದ ವ್ಯಕ್ತಿಯಿಂದ ಅದನ್ನು ವಸೂಲಿ ಮಾಡಬಾರದು ಎಂದೇನೂ ಇಲ್ಲ. ಸಾಲದ ಮೊತ್ತ ಮರು ವಸೂಲಿ, ಅದಕ್ಕೆ ಸಂಬಂಧಿಸಿದ ಕಾನೂನು ಪ್ರಕ್ರಿಯೆಗಳನ್ನು ಮುಂದುವರಿಸಲು ಬ್ಯಾಂಕ್ಗಳು ಸದಾ ಮುಕ್ತವಾಗಿರುತ್ತವೆ. ಬ್ಯಾಲೆನ್ಸ್ ಶೀಟ್ ಕ್ಲಿಯರ್ ಮಾಡಿದ್ದರಿಂದ ಬ್ಯಾಂಕ್ಗಳ ಅನುತ್ಪಾದಕ ಆಸ್ತಿಯ ಪ್ರಮಾಣದ ತೋರ್ಪಡಿಸುವಿಕೆಯಲ್ಲಿ ಮಾತ್ರ ವ್ಯತ್ಯಾಸವಾಗುತ್ತದೆ. ಇದಕ್ಕಾಗಿ ಬ್ಯಾಂಕ್ಗಳು ಈ ಕ್ರಮ ಕೈಗೊಳ್ಳುತ್ತವೆ.
7 / 8
ಸಾಲದ ರೈಟ್ ಆಫ್ನಿಂದ ಸಾಲಗಾರನಿಗೆ, ಜನಸಾಮಾನ್ಯರಿಗೆ ಯಾವುದೇ ಪ್ರಯೋಜನ ಇರುವುದಿಲ್ಲ. ಸಾಲ ಪಡೆದವರು ಅದನ್ನು ಮರು ಪಾವತಿಸುವ ಜವಾಬ್ದಾರಿಗೆ ಬದ್ಧರಾಗಿಯೇ ಇರಬೇಕಾಗುತ್ತದೆ. ಆದರೆ, ಸಾಲ ಮನ್ನಾದಲ್ಲಿ ಹೀಗಲ್ಲ. ಒಮ್ಮೆ ಮನ್ನಾ ಆಯ್ತೆಂದರೆ ಮತ್ತೆ ಮರು ಪಾವತಿಯ ಗೊಡವೆ ಇರುವುದಿಲ್ಲ.
