AFG vs ZIM: 11 ವಿಕೆಟ್ ಉರುಳಿಸಿದ ರಶೀದ್ ಖಾನ್; 5 ವರ್ಷಗಳ ಬಳಿಕ ಟೆಸ್ಟ್ ಸರಣಿ ಗೆದ್ದ ಅಫ್ಘಾನಿಸ್ತಾನ
AFG vs ZIM: ಅಫ್ಘಾನಿಸ್ತಾನ ತಂಡವು ಜಿಂಬಾಬ್ವೆ ವಿರುದ್ಧದ ಎರಡು ಪಂದ್ಯಗಳ ಟೆಸ್ಟ್ ಸರಣಿಯನ್ನು 1-0 ಅಂತರದಿಂದ ಗೆದ್ದು 4 ವರ್ಷಗಳ ಬರವನ್ನು ನೀಗಿಸಿಕೊಂಡಿದೆ. ರಶೀದ್ ಖಾನ್ ಅವರ ಅದ್ಭುತ ಬೌಲಿಂಗ್ ಮತ್ತು ರಹಮತ್ ಶಾ ಹಾಗೂ ಇಸ್ಮತ್ ಅಲಂ ಅವರ ಶತಕಗದ ಇನ್ನಿಂಗ್ಸ್ನಿಂದಾಗಿ ಅಫ್ಘಾನಿಸ್ತಾನಕ್ಕೆ ಸ್ಮರಣೀಯ ಈ ಗೆಲುವು ಸಿಕ್ಕಿದೆ. ರಶೀದ್ ಖಾನ್ ಪಂದ್ಯಶ್ರೇಷ್ಠ ಪ್ರಶಸ್ತಿ ಪಡೆದರೆ, ರಹಮತ್ ಶಾ ಸರಣಿಶ್ರೇಷ್ಠ ಪ್ರಶಸ್ತಿ ಪಡೆದರು.
Updated on:Jan 06, 2025 | 6:25 PM
ಅಫ್ಘಾನಿಸ್ತಾನ ಹಾಗೂ ಜಿಂಬಾಬ್ವೆ ನಡುವೆ ನಡೆದ ಎರಡು ಪಂದ್ಯಗಳ ಟೆಸ್ಟ್ ಸರಣಿಯನ್ನು 1-0 ಅಂತರದಿಂದ ಗೆದ್ದುಕೊಳ್ಳುವಲ್ಲಿ ಅಫ್ಘಾನಿಸ್ತಾನ ತಂಡ ಯಶಸ್ವಿಯಾಗಿದೆ. ಈ ಮೂಲಕ ಅಫ್ಘಾನಿಸ್ತಾನ ತಂಡ ಬರೋಬ್ಬರಿ 5 ವರ್ಷಗಳ ಬಳಿಕ ಟೆಸ್ಟ್ ಸರಣಿ ಗೆದ್ದ ಸಾಧನೆ ಮಾಡಿದೆ. ಇದಕ್ಕೂ ಮುನ್ನ 2019 ರಲ್ಲಿ ನಡೆದಿದ್ದ ಬಾಂಗ್ಲಾದೇಶ ವಿರುದ್ಧದ ಏಕೈಕ ಟೆಸ್ಟ್ ಪಂದ್ಯದಲ್ಲಿ ಗೆಲುವು ಸಾಧಿಸುವ ಮೂಲಕ ಅಫ್ಘಾನಿಸ್ತಾನ ಸರಣಿಯನ್ನು ತನ್ನದಾಗಿಸಿಕೊಂಡಿತ್ತು. ಆ ಬಳಿಕ ಅಫ್ಘಾನಿಸ್ತಾನ 5 ದೇಶಗಳ ವಿರುದ್ಧ ಟೆಸ್ಟ್ ಸರಣಿಯನ್ನು ಆಡಿತ್ತಾದರೂ ಸರಣಿ ಗೆಲ್ಲಲು ಸಾಧ್ಯವಾಗಿರಲಿಲ್ಲ. ಇದೀಗ ಅದರ ಬರವನ್ನು ಅಫ್ಘನ್ ಪಡೆ ನೀಗಿಸಿಕೊಂಡಿದೆ.
72 ರನ್ಗಳ ಸೋಲು
ಪಂದ್ಯದಲ್ಲಿ ಮೊದಲು ಬ್ಯಾಟ್ ಮಾಡಿದ ಅಫ್ಘಾನಿಸ್ತಾನ ತಂಡ ಮೊದಲ ಇನ್ನಿಂಗ್ಸ್ನಲ್ಲಿ 157 ರನ್ಗಳಿಗೆ ಆಲೌಟ್ ಆಗಿತ್ತು. ಈ ಗುರಿ ಬೆನ್ನಟ್ಟಿದ ಜಿಂಬಾಬ್ವೆ ಕೂಡ ಮೊದಲ ಇನ್ನಿಂಗ್ಸ್ನಲ್ಲಿ ಪ್ರಬಲ ಹೋರಾಟ ನೀಡಿ 243 ರನ್ ಕಲೆಹಾಕಿತು. ಇತ್ತ ಇನ್ನಿಂಗ್ಸ್ ಹಿನ್ನಡೆಯೊಂದಿಗೆ ಎರಡನೇ ಇನ್ನಿಂಗ್ಸ್ ಆರಂಭಿಸಿದ ಅಫ್ಘನ್ ತಂಡ 363 ರನ್ಗಳಿಗೆ ಆಲೌಟ್ ಆಯಿತು. ಹೀಗಾಗಿ ಗೆಲುವಿಗೆ 278 ರನ್ ಗುರಿ ಪಡೆದ ಜಿಂಬಾಬ್ವೆ ತಂಡ ಕೇವಲ 205 ರನ್ಗಳಿಗೆ ಆಲೌಟ್ ಆಗಿ 72 ರನ್ಗಳಿಂದ ಸೊಲೊಪ್ಪಿಕೊಂಡಿತು.
Afghanistan Register 1-0 Test Series Victory over Zimbabwe
Kabul – January 06, 2025: The Afghanistan National Cricket Team has put on an incredible all-round display in the 2nd test match to beat the hosts by 72 runs on the final day and secure a 1-0 series victory over… pic.twitter.com/rR3d5BYeOE
— Afghanistan Cricket Board (@ACBofficials) January 6, 2025
ರಶೀದ್ ಖಾನ್ ಮ್ಯಾಜಿಕ್
ಎರಡನೇ ಇನಿಂಗ್ಸ್ನಲ್ಲಿ ಅಫ್ಘಾನಿಸ್ತಾನ ಪರ ಗೆಲುವಿನ ಪ್ರದರ್ಶನ ನೀಡಿದ್ದ ರಶೀದ್ ಖಾನ್ 27.3 ಓವರ್ ಬೌಲ್ ಮಾಡಿ 66 ರನ್ ನೀಡಿ 7 ವಿಕೆಟ್ ಪಡೆದರು. ಮೊದಲ ಇನ್ನಿಂಗ್ಸ್ನಲ್ಲಿ ಮ್ಯಾಜಿಕ್ ಮಾಡಿದ್ದ ರಶೀದ್ 4 ವಿಕೆಟ್ ಉರುಳಿಸುವಲ್ಲಿ ಯಶಸ್ವಿಯಾಗಿದ್ದರು. ಇನ್ನು ಎರಡನೇ ಇನ್ನಿಂಗ್ಸ್ನಲ್ಲಿ ರಶೀದ್ಗೆ ಸಾಥ್ ನೀಡಿದ ಜಿಯಾ-ಉರ್-ರಹಮಾನ್ ಕೂಡ 2 ವಿಕೆಟ್ ಪಡೆದರೆ, ಜಿಂಬಾಬ್ವೆಯ ಕೊನೆಯ ವಿಕೆಟ್ ರನ್ ಔಟ್ ಆಗಿ ಪತನವಾಯಿತು.
ರಹಮತ್ ಶಾ ಮತ್ತು ಇಸ್ಮತ್ ಆಲಂ ಶತಕ
ಈ ಪಂದ್ಯದಲ್ಲಿ ಅಮೋಘ ಪ್ರದರ್ಶನ ನೀಡಿದ ರಶೀದ್ ಖಾನ್ ಪಂದ್ಯದ ಆಟಗಾರ ಪ್ರಶಸ್ತಿ ಪಡೆದರಾದರೂ, ಅಫ್ಘಾನಿಸ್ತಾನದ ಗೆಲುವಿನ ಅಡಿಪಾಯವನ್ನು ರಹಮತ್ ಶಾ ಮತ್ತು ಇಸ್ಮತ್ ಆಲಂ ಅವರು ಎರಡನೇ ಇನ್ನಿಂಗ್ಸ್ನಲ್ಲಿ ಹಾಕಿದರು. ಈ ಇಬ್ಬರೂ ಬ್ಯಾಟ್ಸ್‌ಮನ್‌ಗಳು ಎರಡನೇ ಇನ್ನಿಂಗ್ಸ್ನಲ್ಲಿ ಅದ್ಭುತ ಶತಕಗಳನ್ನು ಗಳಿಸಿದರು. ರಹಮತ್ 275 ಎಸೆತಗಳಲ್ಲಿ 139 ರನ್ ಕಲೆಹಾಕಿದರೆ, 8 ನೇ ಸ್ಥಾನದಲ್ಲಿ ಬಂದ ಇಸ್ಮತ್ ಕೂಡ 101 ರನ್ಗಳ ಇನ್ನಿಂಗ್ಸ್ ಆಡಿದ್ದರು.
ರಹಮತ್ ಶಾ ಸರಣಿಶ್ರೇಷ್ಠ
ಈ ಇಬ್ಬರ ಇನ್ನಿಂಗ್ಸ್‌ಗಳ ಆಧಾರದ ಮೇಲೆ, ಅಫ್ಘಾನಿಸ್ತಾನ ಎರಡನೇ ಇನ್ನಿಂಗ್ಸ್ನಲ್ಲಿ 363 ರನ್ ಕಲೆಹಾಕಲು ಸಾಧ್ಯವಾಯಿತು. ಇತ್ತ ಜಿಂಬಾಬ್ವೆ ಮೊದಲ ಇನ್ನಿಂಗ್ಸ್ನಲ್ಲಿ ಸಿಕ್ಕಿದ್ದ ಮುನ್ನಡೆಯ ಲಾಭವನ್ನು ಪಡೆಯಲು ಸಾಧ್ಯವಾಗದೆ ಅಂತಿಮವಾಗಿ ಸೋಲನ್ನು ಎದುರಿಸಬೇಕಾಯಿತು. ಇದರೊಂದಿಗೆ ಅಫ್ಘಾನಿಸ್ತಾನ ಟೆಸ್ಟ್ ಸರಣಿಯನ್ನು 1-0ಅಂತರದಿಂದ ವಶಪಡಿಸಿಕೊಂಡರೆ ಸರಣಿಯಲ್ಲಿ ಅತ್ಯಧಿಕ 392 ರನ್ ಕಲೆಹಾಕಿದ ರಹಮತ್ ಶಾ ಸರಣಿಶ್ರೇಷ್ಠ ಪ್ರಶಸ್ತಿ ಪಡೆದರು.
ಮತ್ತಷ್ಟು ಕ್ರೀಡಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ
Published On - 6:19 pm, Mon, 6 January 25
