ಒಂದೇ ಒಂದು ಗೆಲುವಿಗಾಗಿ ಹವಣಿಸುತ್ತಿರುವ ಅಫ್ಘಾನ್ ಪಡೆ!
ವಿಶ್ವ ಕ್ರಿಕೆಟ್ನಲ್ಲಿ ಅಫ್ಘಾನಿಸ್ತಾನ್ ತಂಡದ ಬೆಳವಣಿಗೆಯ ಇತಿಹಾಸವೇ ಒಂದು ರೋಮಾಂಚನಕಾರಿ ಕಥೆ. ಆಸ್ಟ್ರೇಲಿಯಾ, ಇಂಗ್ಲೆಂಡ್, ಪಾಕಿಸ್ತಾನ್ ಮತ್ತು ನ್ಯೂಝಿಲೆಂಡ್ನಂತಹ ಜಗತ್ತಿನ ದಿಗ್ಗಜ ತಂಡಗಳನ್ನೇ ಧೂಳೀಪಟ ಮಾಡಿರುವ ಅಫ್ಘಾನ್ ಪಡೆ, ವಿಶ್ವದ ಯಾವುದೇ ಬಲಿಷ್ಠ ತಂಡಕ್ಕೆ ಶಾಕ್ ನೀಡಬಲ್ಲ ಕ್ರಿಕೆಟ್ ಶಕ್ತಿಯಾಗಿ ರೂಪಾಂತರಗೊಂಡಿದೆ.
Updated on: Sep 13, 2026 | 8:36 AM
ವಿಶ್ವ ಕ್ರಿಕೆಟ್ನಲ್ಲಿ ಅಫ್ಘಾನಿಸ್ತಾನ್ ತಂಡವು ಇಂದು ಸಾಮಾನ್ಯ ತಂಡವಾಗಿ ಉಳಿದಿಲ್ಲ. ಆಸ್ಟ್ರೇಲಿಯಾ, ಇಂಗ್ಲೆಂಡ್, ಪಾಕಿಸ್ತಾನ್ ಮತ್ತು ನ್ಯೂಝಿಲೆಂಡ್ನಂತಹ ಜಗತ್ತಿನ ದಿಗ್ಗಜ ತಂಡಗಳನ್ನೇ ಧೂಳೀಪಟ ಮಾಡಿರುವ ಅಫ್ಘಾನ್ ಪಡೆ, ಇಂದು ಕ್ರಿಕೆಟ್ ಜಗತ್ತಿನ ಹೊಸ ‘ಜೈಂಟ್ ಕಿಲ್ಲರ್’ ಆಗಿ ಹೊರಹೊಮ್ಮಿದೆ. ಆದರೆ, ಇಷ್ಟೆಲ್ಲಾ ಸಾಧನೆ ಮಾಡಿರುವ ಅಫ್ಘಾನಿಸ್ತಾನಕ್ಕೆ ಅಂತರರಾಷ್ಟ್ರೀಯ ಕ್ರಿಕೆಟ್ನಲ್ಲಿ ಇಂದಿಗೂ ಮಣಿಸಲು ಸಾಧ್ಯವಾಗದ ಏಕೈಕ ಜಾಗತಿಕ ಸೂಪರ್ ಪವರ್ ಎಂದರೆ ಅದು ಭಾರತ ಮಾತ್ರ! ಟೆಸ್ಟ್, ಏಕದಿನ ಅಥವಾ ಟಿ20 ಯಾವುದೇ ಇರಲಿ, ಟೀಮ್ ಇಂಡಿಯಾ ಎದುರು ಬಂದರೆ ಅಫ್ಘಾನ್ ಹುಲಿಗಳ ಅಬ್ಬರ ಸದ್ದಡಗಿ ಹೋಗುತ್ತದೆ.
ಅಂತರರಾಷ್ಟ್ರೀಯ ಕ್ರಿಕೆಟ್ನ ಎಲ್ಲಾ ಮಾದರಿಗಳನ್ನು ಒಳಗೊಂಡಂತೆ, ಭಾರತವು ಅಫ್ಘಾನಿಸ್ತಾನದ ವಿರುದ್ಧ ತನ್ನ ಅಜೇಯ ದಾಖಲೆಯನ್ನು ಕಾಯ್ದುಕೊಂಡಿದೆ. ಎರಡು ತಂಡಗಳ ನಡುವಿನ ಮುಖಾಮುಖಿ ದಾಖಲೆಗಳ ಸಂಪೂರ್ಣ ಮಾಹಿತಿ ಇಲ್ಲಿದೆ.
ಟೆಸ್ಟ್ ಕ್ರಿಕೆಟ್: ಅಫ್ಘಾನಿಸ್ತಾನ್ ತಂಡವು ಟೆಸ್ಟ್ ಕ್ರಿಕೆಟ್ ಮಾನ್ಯತೆ ಪಡೆದ ನಂತರ ಭಾರತದ ವಿರುದ್ಧ ಇದುವರೆಗೆ 2 ಟೆಸ್ಟ್ ಪಂದ್ಯಗಳನ್ನು ಆಡಿದೆ. 2018 ರಲ್ಲಿ ಬೆಂಗಳೂರಿನಲ್ಲಿ ನಡೆದ ಚೊಚ್ಚಲ ಟೆಸ್ಟ್ ಪಂದ್ಯದಲ್ಲಿ ಭಾರತ ಇನಿಂಗ್ಸ್ ಮತ್ತು 262 ರನ್ಗಳ ಭರ್ಜರಿ ಜಯ ಗಳಿಸಿತ್ತು. ತೀರಾ ಇತ್ತೀಚೆಗೆ 2026ರ ಜೂನ್ನಲ್ಲಿ ನಡೆದ ಏಕೈಕ ಟೆಸ್ಟ್ ಪಂದ್ಯದಲ್ಲೂ ಭಾರತ ಇನಿಂಗ್ಸ್ ಮತ್ತು 300 ರನ್ಗಳ ಬೃಹತ್ ಗೆಲುವು ದಾಖಲಿಸಿದೆ
ಏಕದಿನ ಕ್ರಿಕೆಟ್: ಏಕದಿನ ಕ್ರಿಕೆಟ್ನಲ್ಲಿ ಉಭಯ ತಂಡಗಳು 7 ಬಾರಿ ಮುಖಾಮುಖಿಯಾಗಿವೆ. ಇದರಲ್ಲಿ 6 ಪಂದ್ಯಗಳನ್ನು ಭಾರತ ಗೆದ್ದುಕೊಂಡಿದ್ದರೆ, 2018ರ ಏಷ್ಯಾ ಕಪ್ನಲ್ಲಿ ನಡೆದ ಪಂದ್ಯವೊಂದು ಅತ್ಯಂತ ರೋಚಕವಾಗಿ ‘ಟೈ’ ಆಗಿ ಮುಕ್ತಾಯಗೊಂಡಿತ್ತು. ಇದು ಬಿಟ್ಟರೆ 2019ರ ವಿಶ್ವಕಪ್ನಲ್ಲಿ ಅಫ್ಘಾನಿಸ್ತಾನ ಭಾರತಕ್ಕೆ ಪ್ರಬಲ ಪೈಪೋಟಿ ನೀಡಿ ಕೇವಲ 11 ರನ್ಗಳಿಂದ ಸೋತಿತ್ತು. ಇತ್ತೀಚೆಗೆ 2026ರ ಜೂನ್ನಲ್ಲಿ ನಡೆದ 3 ಪಂದ್ಯಗಳ ಒನ್ಡೇ ಸರಣಿಯನ್ನು ಭಾರತ 3-0 ಇಂದ ಕ್ಲೀನ್ ಸ್ವೀಪ್ ಮಾಡಿದೆ
ಟಿ20 ಕ್ರಿಕೆಟ್: ಚುಟುಕು ಕ್ರಿಕೆಟ್ ಮಾದರಿಯಲ್ಲಿ ಉಭಯ ತಂಡಗಳು 9 ಬಾರಿ ಎದುರಾಗಿವೆ. ಇದರಲ್ಲಿ ಭಾರತ 8 ಪಂದ್ಯಗಳನ್ನು ಗೆದ್ದಿದ್ದರೆ, 2023ರ ಏಷ್ಯನ್ ಗೇಮ್ಸ್ ಫೈನಲ್ ಪಂದ್ಯವು ಮಳೆಯಿಂದಾಗಿ ಯಾವುದೇ ಫಲಿತಾಂಶವಿಲ್ಲದೆ ರದ್ದಾಗಿತ್ತು. ಇದೀಗ ಉಭಯ ತಂಡಗಳು ಮತ್ತೆ ಮೂರು ಪಂದ್ಯಗಳ ಟಿ20 ಸರಣಿಯಲ್ಲಿ ಮುಖಾಮುಖಿಯಾಗಲು ಸಜ್ಜಾಗಿ ನಿಂತಿದೆ.
ಇದನ್ನೂ ಓದಿ: ಪಾಕ್ ತಂಡದ್ದು ಬರೀ ಸೋಲಲ್ಲ… 72 ವರ್ಷಗಳಲ್ಲೇ ಕಂಡ ಅತ್ಯಂತ ಹೀನಾಯ ಸೋಲು!
ಪ್ರಸ್ತುತ ಅಫ್ಘಾನಿಸ್ತಾನ್ ತಂಡವು ರಶೀದ್ ಖಾನ್, ರಹಮಾನುಲ್ಲಾ ಗುರ್ಬಾಜ್, ಅಝ್ಮತುಲ್ಲಾ ಒಮರ್ಝಾಹಿ ಮತ್ತು ಮೊಹಮ್ಮದ್ ನಬಿಯಂತಹ ವಿಶ್ವದರ್ಜೆಯ ಆಟಗಾರರನ್ನು ಒಳಗೊಂಡ ಬಲಿಷ್ಠ ಪಡೆಯನ್ನು ಹೊಂದಿದೆ. ಹೀಗಾಗಿ, ಈ ಸರಣಿಯಲ್ಲಾದರೂ ಭಾರತದ ವಿರುದ್ಧ ಚೊಚ್ಚಲ ಗೆಲುವು ದಾಖಲಿಸಬೇಕೆಂಬ ಅಫ್ಘಾನ್ ಪಡೆಯ ದಶಕಗಳ ಕನಸು ಈಡೇರಲಿದೆಯಾ ಎಂಬುದನ್ನು ಕಾದು ನೋಡಬೇಕಿದೆ.
