Finn Allen: ಅಲೆನ್ ಅಬ್ಬರ: ಎದುರಾಳಿ ತಂಡ ತತ್ತರ

ನ್ಯೂಝಿಲೆಂಡ್​ನಲ್ಲಿ ನಡೆಯುತ್ತಿರುವ ಸೂಪರ್ ಸ್ಮ್ಯಾಶ್ (Super Smash 2024) ಟಿ20 ಲೀಗ್​ನಲ್ಲಿ ಫಿನ್ ಅಲೆನ್ (Finn Allen) ಸಿಡಿಲಬ್ಬರದ ಬ್ಯಾಟಿಂಗ್ ಪ್ರದರ್ಶಿಸಿದ್ದಾರೆ. ಕ್ರೈಸ್ಟ್‌ಚರ್ಚ್​ನ ಹ್ಯಾಗ್ಲಿ ಓವಲ್​ ಮೈದಾನದಲ್ಲಿ ನಡೆದ ಕ್ಯಾಂಟರ್ಬರಿ ವಿರುದ್ಧದ ಈ ಪಂದ್ಯದಲ್ಲಿ ಟಾಸ್ ಗೆದ್ದ ಆಕ್ಲೆಂಡ್ ಬೌಲಿಂಗ್ ಆಯ್ದುಕೊಂಡಿತು. ಅದರಂತೆ ಮೊದಲು ಬ್ಯಾಟ್ ಮಾಡಿದ ಕ್ಯಾಂಟರ್ಬರಿ ತಂಡದ ಬ್ಯಾಟರ್​ಗಳು ರನ್​ಗಳಿಸಲು ಪರದಾಡಿದರು. ಅದರಲ್ಲೂ ಸ್ಟಾರ್ ಆಟಗಾರ ಡೇರಿಲ್ ಮಿಚೆಲ್ ನಿಧಾನಗತಿಯ ಬ್ಯಾಟಿಂಗ್ ಪ್ರದರ್ಶಿಸಿದರು.

ನಾಲ್ಕನೇ ಕ್ರಮಾಂಕದಲ್ಲಿ ಬ್ಯಾಟ್ ಬೀಸಿದ ಮಿಚೆಲ್ 50 ಎಸೆತಗಳನ್ನು ಎದುರಿಸಿ 2 ಸಿಕ್ಸ್ ಹಾಗೂ 3 ಫೋರ್​ಗಳೊಂದಿಗೆ ಬಾರಿಸಿದ್ದು ಕೇವಲ 57 ರನ್​ಗಳು ಮಾತ್ರ. ಪರಿಣಾಮ ನಿಗದಿತ 20 ಓವರ್​ಗಳಲ್ಲಿ 5 ವಿಕೆಟ್ ಕಳೆದುಕೊಂಡು ಕ್ಯಾಂಟರ್ಬರಿ ತಂಡ 140 ರನ್​ಗಳಿಸಲಷ್ಟೇ ಶಕ್ತರಾದರು.

141 ರನ್​ಗಳ ಸುಲಭ ಗುರಿಯನ್ನು ಬೆನ್ನತ್ತಿದ ಆಕ್ಲೆಂಡ್ ತಂಡಕ್ಕೆ ಯುವ ಆರಂಭಿಕ ಆಟಗಾರ ಫಿನ್ ಅಲೆನ್ ಸ್ಪೋಟಕ ಆರಂಭ ಒದಗಿಸಿದ್ದರು. ಮೊದಲ ಓವರ್​ನಿಂದಲೇ ಬಿರುಸಿನ ಬ್ಯಾಟಿಂಗ್ ಪ್ರದರ್ಶಿಸಿದ ಅಲೆನ್ ಸಿಕ್ಸ್​-ಫೋರ್​ಗಳ ಸುರಿಮಳೆಗೈದರು. ಮತ್ತೊಂದೆಡೆ ಮಾರ್ಕ್​ ಚಾಪ್ಮನ್ 38 ರನ್​ಗಳ ಕೊಡುಗೆಯೊಂದಿಗೆ ಅಲೆನ್​ಗೆ ಉತ್ತಮ ಸಾಥ್ ನೀಡಿದರು.

ಕ್ಯಾಂಟರ್ಬರಿ ಬೌಲರ್​ಗಳ ಮನಸೋ ಇಚ್ಛೆ ದಂಡಿಸಿದ ಫಿನ್ ಅಲೆನ್ 46 ಎಸೆತಗಳಲ್ಲಿ 6 ಭರ್ಜರಿ ಸಿಕ್ಸ್​ ಹಾಗೂ 5 ಫೋರ್​ಗಳೊಂದಿಗೆ ಅಜೇಯ 78 ರನ್ ಬಾರಿಸಿದರು. ಈ ಮೂಲಕ 15.2 ಓವರ್​ಗಳಲ್ಲಿ 2 ವಿಕೆಟ್ ಕಳೆದುಕೊಂಡು 141 ರನ್ ಬಾರಿಸಿ ಆಕ್ಲೆಂಡ್ ತಂಡ 8 ವಿಕೆಟ್​ಗಳ ಭರ್ಜರಿ ಜಯ ಸಾಧಿಸಿದೆ.

ಕ್ಯಾಂಟರ್ಬರಿ ಪ್ಲೇಯಿಂಗ್ 11: ಚಾಡ್ ಬೋವ್ಸ್ , ಟಾಮ್ ಲ್ಯಾಥಮ್ (ವಿಕೆಟ್ ಕೀಪರ್) , ಹೆನ್ರಿ ನಿಕೋಲ್ಸ್ , ಡೇರಿಲ್ ಮಿಚೆಲ್ , ಕೋಲ್ ಮೆಕಾಂಚಿ (ನಾಯಕ) , ಮೈಕೆಲ್ ರಿಪ್ಪನ್ , ಜಕಾರಿ ಫೌಲ್ಕ್ಸ್ , ಇಶ್ ಸೋಧಿ , ಮ್ಯಾಟ್ ಹೆನ್ರಿ , ಮೈಕೆಲ್ ರೇ , ವಿಲಿಯಂ ಓರ್ಕೆ.

ಇದನ್ನೂ ಓದಿ: Cheteshwar Pujara: ದಾಖಲೆಯ ದ್ವಿಶತಕ ಸಿಡಿಸಿದ ಚೇತೇಶ್ವರ ಪೂಜಾರ

ಆಕ್ಲೆಂಡ್ ಪ್ಲೇಯಿಂಗ್ 11: ಮಾರ್ಟಿನ್ ಗಪ್ಟಿಲ್ , ಫಿನ್ ಅಲೆನ್ , ಸೀನ್ ಸೋಲಿಯಾ , ರಾಬರ್ಟ್ ಓಡೊನ್ನೆಲ್ (ನಾಯಕ) , ಮಾರ್ಕ್ ಚಾಪ್ಮನ್ , ಕ್ಯಾಮ್ ಫ್ಲೆಚರ್ (ವಿಕೆಟ್ ಕೀಪರ್) , ರಿಯಾನ್ ಹ್ಯಾರಿಸನ್ , ಡ್ಯಾನ್ರು ಫರ್ನ್ಸ್ , ಲಾಕಿ ಫರ್ಗುಸನ್ , ಲೂಯಿಸ್ ಡೆಲ್ಪೋರ್ಟ್ , ಬೆನ್ ಲಿಸ್ಟರ್.