ಕೇವಲ 3.3 ಓವರ್​ಗಳಲ್ಲಿ ಪಂದ್ಯ ಮುಗಿಸಿದ ಕುವೈತ್!

ಅಂತರರಾಷ್ಟ್ರೀಯ ಟಿ20 ಕ್ರಿಕೆಟ್ ಇತಿಹಾಸದಲ್ಲೇ ಅತ್ಯಂತ ಏಕಪಕ್ಷೀಯ ಪಂದ್ಯವೊಂದಕ್ಕೆ ಕೌಲಾಲಂಪುರ್ ಸಾಕ್ಷಿಯಾಗಿದೆ. ಐಸಿಸಿ ಪುರುಷರ ಟಿ20 ವಿಶ್ವಕಪ್ ಏಷ್ಯಾ ಸಬ್ ರೀಜನಲ್ ಕ್ವಾಲಿಫೈಯರ್ ಎ ಟೂರ್ನಿಯ 6ನೇ ಪಂದ್ಯದಲ್ಲಿ ಮಂಗೋಲಿಯಾ ವಿರುದ್ಧ ಕುವೈತ್ ತಂಡ ಅಮೋಘ ಜಯ ಸಾಧಿಸಿದೆ. ಅದು ಕೂಡ ಕೇವಲ 3.3 ಓವರ್​ಗಳಲ್ಲಿ ಪಂದ್ಯ ಮುಗಿಸುವ ಮೂಲಕ ಎಂಬುದು ವಿಶೇಷ.

ಕೌಲಾಲಂಪುರ್​ನ ಬೇಯುಮಾಸ್ ಓವಲ್ ಮೈದಾನದಲ್ಲಿ ನಡೆದ ಈ ಪಂದ್ಯದಲ್ಲಿ ಟಾಸ್ ಗೆದ್ದು ಮೊದಲು ಬ್ಯಾಟಿಂಗ್ ಆಯ್ದುಕೊಂಡ ಮಂಗೋಲಿಯಾ ತಂಡದ ನಿರ್ಧಾರ ಸಂಪೂರ್ಣ ತಲೆಕೆಳಗಾಯಿತು. ಕುವೈತ್ ಬೌಲರ್‌ಗಳ ಶಿಸ್ತುಬದ್ಧ ಮತ್ತು ಮಾರಕ ದಾಳಿಗೆ ತತ್ತರಿಸಿದ ಮಂಗೋಲಿಯಾ ಬ್ಯಾಟರ್‌ಗಳು ಪೆವಿಲಿಯರ್ ಪರೇಡ್ ನಡೆಸಿದರು.

ಇದರ ನಡುವೆ ಗಂಡೆಂಬರೆಲ್ ಗನ್‌ಬೋಲ್ಡ್ 21 ರನ್​ಗಳಿಸುವಲ್ಲಿ ಯಶಸ್ವಿಯಾದರು. ಈ ಇಪ್ಪತ್ತೊಂದು ರನ್​ಗಳ ನೆರವಿನೊಂದಿಗೆ ಮಂಗೋಲಿಯಾ ತಂಡ 14.5 ಓವರ್‌ಗಳಲ್ಲಿ ಕಲೆಹಾಕಿದ್ದು ಕೇವಲ 42 ರನ್‌ಗಳು ಮಾತ್ರ.

ಕುವೈತ್ ಪರ ಅತ್ಯುತ್ತಮ ದಾಳಿ ಸಂಘಟಿಸಿದ ನಾಯಕ ಮೊಹಮ್ಮದ್ ಅಸ್ಲಂ 4 ಓವರ್​ಗಳಲ್ಲಿ ಕೇವಲ 19 ರನ್ ನೀಡಿ 5 ಪ್ರಮುಖ ವಿಕೆಟ್‌ಗಳನ್ನು ಕಬಳಿಸಿದರು. ಇವರಿಗೆ ಉತ್ತಮ ಸಾಥ್ ನೀಡಿದ ಶಿರಾಜ್ ಖಾನ್ 2 ವಿಕೆಟ್ ಪಡೆದು ಮಿಂಚಿದರು.

3.3 ಓವರ್​ಗಳಲ್ಲಿ ಮ್ಯಾಚ್ ಫಿನಿಶ್!

ಕೇವಲ 43 ರನ್‌ಗಳ ಸುಲಭ ಗುರಿಯನ್ನು ಬೆನ್ನಟ್ಟಿದ ಕುವೈತ್ ಆರಂಭಿಕರು ಪಂದ್ಯವನ್ನು ಟಿ20 ಇನಿಂಗ್ಸ್‌ನಂತೆ ಆಡದೆ ಟಿ10 ಶೈಲಿಯಲ್ಲಿ ಮುಗಿಸಿದರು. ಆರಂಭಿಕ ಆಟಗಾರರಾದ ರವಿಜಾ ಸಂಡರುವಾನ್ 14 ಎಸೆತಗಳಲ್ಲಿ 4 ಫೋರ್ ಹಾಗೂ 2 ಭರ್ಜರಿ ಸಿಕ್ಸರ್​ಗಳೊಂದಿಗೆ 30 ರನ್ ಚಚ್ಚಿದರೆ, ಅದ್ನಾನ್ ಇದ್ರಿಸ್ 7 ಎಸೆತಗಳಲ್ಲಿ 13 ರನ್ ಬಾರಿಸಿದರು. ಈ ಮೂಲಕ ಕುವೈತ್ ತಂಡ ಕೇವಲ 3.3 ಓವರ್​ಗಳಲ್ಲಿ, ಅಂದರೆ 21 ಎಸೆತಗಳಲ್ಲಿ ಮ್ಯಾಚ್ ಮುಗಿಸಿದರು.

ಮಂಗೋಲಿಯಾ ವಿರುದ್ಧದ ಈ 10 ವಿಕೆಟ್​ಗಳ ಭರ್ಜರಿ ಜಯದೊಂದಿಗೆ  ಕುವೈತ್ ತಂಡ ತನ್ನ ನೆಟ್ ರನ್ ರೇಟ್ ಅನ್ನು ಗಣನೀಯವಾಗಿ ಹೆಚ್ಚಿಸಿಕೊಂಡಿದೆ. ಈ ಮೂಲಕ ಟೂರ್ನಿಯ ಅಂಕಪಟ್ಟಿಯಲ್ಲಿ ಅಗ್ರಸ್ಥಾನಕ್ಕೇರುವಲ್ಲಿ ಯಶಸ್ವಿಯಾಗಿದೆ.

ಇದು ವಿಶ್ವ ದಾಖಲೆಯಲ್ಲ!

ಕುವೈತ್ ತಂಡ ಕೇವಲ 3.3 ಎಸೆತಗಳಲ್ಲಿ ಮ್ಯಾಚ್ ಮುಗಿಸಿದರೂ ಅದು ವಿಶ್ವ ದಾಖಲೆಯಲ್ಲ ಎಂಬುದು ವಿಶೇಷ. ಏಕೆಂದರೆ ಟಿ20 ಕ್ರಿಕೆಟ್​ ಪಂದ್ಯವೊಂದು ಕೇವಲ 2 ಎಸೆತಗಳಲ್ಲಿ ಮುಗಿದ ಇತಿಹಾಸವಿದೆ.

• ಅತಿ ವೇಗದ ರನ್ ಚೇಸ್: ಸ್ಪೇನ್ ತಂಡವು 2023ರಲ್ಲಿ ಐಲ್ ಆಫ್ ಮ್ಯಾನ್ ವಿರುದ್ಧ ಕೇವಲ 2 ಎಸೆತಗಳಲ್ಲಿ (0.2 ಓವರ್‌ಗಳಲ್ಲಿ) 11 ರನ್‌ಗಳ ಗುರಿಯನ್ನು ಬೆನ್ನಟ್ಟಿ ಜಯಗಳಿಸಿರುವುದು ಪುರುಷರ ಅಂತರರಾಷ್ಟ್ರೀಯ ಟಿ20 ಕ್ರಿಕೆಟ್ ಇತಿಹಾಸದಲ್ಲೇ ಸಾರ್ವಕಾಲಿಕ ವಿಶ್ವ ದಾಖಲೆಯಾಗಿದೆ.

ಇದನ್ನೂ ಓದಿ: ಟೆಸ್ಟ್ ಕ್ರಿಕೆಟ್‌ಗೆ ಹೊಸ ಕಳೆ: 12 ತಂಡಗಳ ವಿಶ್ವ ಟೆಸ್ಟ್ ಚಾಂಪಿಯನ್‌ಶಿಪ್!

• ಐಸಿಸಿ ಪೂರ್ಣ ಸದಸ್ಯ ರಾಷ್ಟ್ರಗಳ ದಾಖಲೆ: 2024ರ ಟಿ20 ವಿಶ್ವಕಪ್‌ನಲ್ಲಿ ಒಮಾನ್ ವಿರುದ್ಧ ಇಂಗ್ಲೆಂಡ್ ತಂಡ ಕೇವಲ 3.1 ಓವರ್‌ಗಳಲ್ಲಿ (19 ಎಸೆತಗಳಲ್ಲಿ) 48 ರನ್‌ಗಳ ಗುರಿಯನ್ನು ಚೇಸ್ ಮಾಡಿ ಪೂರ್ಣ ಸದಸ್ಯ ರಾಷ್ಟ್ರಗಳ ಪೈಕಿ ಅತಿ ವೇಗದ ರನ್ ಚೇಸ್ ಸಾಧನೆ ಮಾಡಿದೆ.