Video: ದಿನಸಿ ಅಂಗಡಿಯಲ್ಲಿ ಸಾಮಗ್ರಿ ಖರೀದಿಸಿ ವಿಶಿಷ್ಟ ಅನುಭವ ತೆರೆದಿಟ್ಟ ಅಮೆರಿಕನ್ ಮಹಿಳೆ

ಇತ್ತೀಚೆಗಿನ ದಿನಗಳಲ್ಲಿ ಆನ್ಲೈನ್ ಶಾಪಿಂಗ್ (Online shopping) ಮಾಡುವವರ ಸಂಖ್ಯೆ ಹೆಚ್ಚಾಗಿದೆ. ಹೌದು, ಬ್ಲಿಂಕ್‌ಇಟ್ ಅಥವಾ ಇನ್‌ಸ್ಟಾಮಾರ್ಟ್‌ನಂತಹ ತ್ವರಿತ ವಾಣಿಜ್ಯದ ಈ ಯುಗದಲ್ಲಿ ನಾವಿದ್ದೇವೆ. ಆದರೆ ಅಮೆರಿಕದಿಂದ ಬಂದು ದೆಹಲಿಯಲ್ಲಿ ನೆಲೆಸಿರುವ ವಿದೇಶಿ ಮಹಿಳೆ ದಿನಬಳಕೆಯ ವಸ್ತುಗಳನ್ನು ಕಿರಾಣಿ ಅಂಗಡಿಯಲ್ಲಿ ಖರೀದಿ ಮಾಡಿದ್ದಾರೆ. ರಸ್ತೆ ಬದಿಯಲ್ಲಿ ಕಾಣಸಿಗುವ ಭಾರತೀಯ ದಿನಸಿ ಅಂಗಡಿಗಳನ್ನು ಹಾಡಿ ಹೊಗಳಿದ್ದಾರೆ. ಈ ವಿಡಿಯೋ ಸದ್ಯ ಸೋಶಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿದೆ.

ದಿನಸಿ ವಸ್ತುಗಳನ್ನು ಖರೀದಿಸಿದ ವಿದೇಶಿ ಮಹಿಳೆ

ಅಮೇರಿಕನ್ ಕಂಟೆಂಟ್ ಕ್ರಿಯೇಟರ್ ಕ್ರಿಸ್ಟನ್ ಫಿಶರ್ (Kristen Fischer) ತಮ್ಮ ಇನ್ಸ್ಟಾಗ್ರಾಮ್ ಖಾತೆಯಲ್ಲಿ ವಿಡಿಯೋ ಹಂಚಿಕೊಂಡಿದ್ದಾರೆ. ಈ ಕ್ಲಿಪಿಂಗ್ ನಲ್ಲಿ ವಿದೇಶಿ ಮಹಿಳೆ ಮನೆಯಿಂದ ಸ್ವಲ್ಪವೇ ದೂರದಲ್ಲಿರುವ ದಿನಸಿ ಅಂಗಡಿಗೆ ಬೆಳಗ್ಗಿನ ಜಾವ ನಡೆದುಕೊಂಡು ಹೋಗಿದ್ದಾರೆ. ಹಾಲು ಸೇರಿದಂತೆ ಮನೆಗೆ ಬೇಕಾದ ದಿನಸಿ ಸಾಮಗ್ರಿಗಳನ್ನು ಖರೀದಿಸಿ ಅಂಗಡಿ ಮಾಲೀಕನಿಗೆ ಹಣ ಕೊಟ್ಟು ನಗುತ್ತಾ ಮನೆಗೆ ಹಿಂತಿರುಗುವುದನ್ನು ಇಲ್ಲಿ ಕಾಣಬಹುದು.

ವೈರಲ್‌ ವಿಡಿಯೋ ಇಲ್ಲಿದೆ

View this post on Instagram

A post shared by Kristen Fischer (@kristenfischer3)

ಕಿರಾಣಿ ಅಂಗಡಿಗಳನ್ನು ಮೆಚ್ಚಿಕೊಂಡ ವಿದೇಶಿ ಮಹಿಳೆ

ಭಾರತದ ಬಗ್ಗೆ ನನಗೆ ಅತ್ಯಂತ ಇಷ್ಟವಾದ ವಿಷಯವೆಂದರೆ ರಸ್ತೆಯ ಪ್ರತಿಯೊಂದು ಮೂಲೆಯಲ್ಲಿ ಈ ರೀತಿಯ ಸಣ್ಣ ಅಂಗಡಿಗಳಿವೆ. ನಿಮಗೆ ಬೇಕಾಗಿರುವುದೆಲ್ಲವೂ ಕೆಲವೇ ಕೆಲವು ಹೆಜ್ಜೆಗಳ ದೂರದಲ್ಲಿ ಸಿಗುತ್ತದೆ. ಇದು ತುಂಬಾ ತ್ವರಿತ ಮತ್ತು ಅನುಕೂಲಕರವಾಗಿದೆ. ಈ ಸ್ಥಳೀಯ ದಿನಸಿ ಅಂಗಡಿಗಳು ಭಾರತದ ಆರ್ಥಿಕತೆಯ ಬೆನ್ನೆಲುಬು ಹಾಗೂ ದೇಶದ ಹೆಮ್ಮೆ ಎಂದು ಹಾಡಿ ಹೊಗಳಿದ್ದಾರೆ.

ಇದನ್ನೂ ಓದಿ: ಅಂಡಮಾನ್ ಸೌಂದರ್ಯಕ್ಕೆ ಮನಸೋತ ಕೊರಿಯನ್ ಮಹಿಳೆ

ನೆಟ್ಟಿಗರ ಕಾಮೆಂಟ್‌ಗಳು ಹೀಗಿವೆ

ಈ ವಿಡಿಯೋ ಅಧಿಕ ವೀಕ್ಷಣೆಗಳನ್ನು ಪಡೆದುಕೊಂಡಿವೆ. ಒಬ್ಬ ಬಳಕೆದಾರ, ನಾವು ಭಾರತೀಯರು ಸುಲಭವಾಗಿ ಸಿಗುವ ಹಾಗೂ ಸಣ್ಣ ವಿಷಯಗಳನ್ನು ಮೆಚ್ಚಿಕೊಳ್ಳಲು ಮರೆಯುತ್ತೇವೆ. ಆದರೆ, ಅಮೆರಿಕಾದಲ್ಲಿ, ನೀವು ಕಾರು ಇಲ್ಲದೆ ಎಲ್ಲಿಗೂ ಹೋಗಲು ಸಾಧ್ಯವಿಲ್ಲ; ಸಣ್ಣ ವಿಷಯಗಳಿಗೂ ನೀವು ಮೈಲುಗಟ್ಟಲೆ ಹೋಗಬೇಕು ಎಂದು ವಾಸ್ತವತೆ ಬಗ್ಗೆ ಹೇಳಿದ್ದಾರೆ. ಇನ್ನೊಬ್ಬರು, ಸಣ್ಣ ಪುಟ್ಟ ವಿಷ್ಯಗಳನ್ನು ಮೆಚ್ಚಿಕೊಳ್ಳುವ ವಿದೇಶಿಗರೇ ನಮಗೆ ಮಾದರಿ ಎಂದಿದ್ದಾರೆ. ಮತ್ತೊಬ್ಬ ಬಳಕೆದಾರ, ನಾವು ಅನಿವಾಸಿ ಭಾರತೀಯರು ಅಮೆರಿಕಕ್ಕೆ ತೆರಳಿ ಕಾಸ್ಟ್ಕೊದಂತಹ ದೊಡ್ಡ ಮಾಲ್‌ಗಳಲ್ಲಿ ಖರೀದಿ ಮಾಡುವಾಗ, ಅಮೆರಿಕದ ಮಹಿಳೆಯೊಬ್ಬರು ಭಾರತದ ಒಂದು ಸಣ್ಣ ಅಂಗಡಿಯಲ್ಲಿ ಶಾಪಿಂಗ್ ಮಾಡುವುದರಲ್ಲಿ ಖುಷಿ ಕಾಣುತ್ತಾರೆ ಎಂಬುದು ನಿಜಕ್ಕೂ ಅಚ್ಚರಿ ಎಂದು ಕಾಮೆಂಟ್ ಮಾಡಿದ್ದಾರೆ.

ಇನ್ನಷ್ಟು ವೈರಲ್ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ