ಲಂಡನ್‌ನಲ್ಲಿ ಬಿಎಪಿಎಸ್ ಸ್ವಾಮಿನಾರಾಯಣ ಸಂಸ್ಥೆಯಿಂದ ಸಂಸ್ಕೃತ ಪಾಠಶಾಲೆ ಆರಂಭ; ಮಹಂತ್ ಸ್ವಾಮಿ ಮಹಾರಾಜ್ ಕನಸು ಸಾಕಾರ

ಲಂಡನ್, ಅಕ್ಟೋಬರ್ 13: ಯುಕೆ ರಾಜಧಾನಿ ಲಂಡನ್‌ನ ಪ್ರಸಿದ್ಧ ನೀಸ್‌ಡೆನ್ ಸ್ವಾಮಿನಾರಾಯಣ ಮಂದಿರದಲ್ಲಿ ಬಿಎಪಿಎಸ್ ಸಂಸ್ಥೆಯು ನೂತನ ‘ಅಕ್ಷರ-ಪುರುಷೋತ್ತಮ ಸಂಸ್ಕೃತ ಪಾಠಶಾಲೆ’ಯನ್ನು ಅಧಿಕೃತವಾಗಿ ಆರಂಭಿಸಿದೆ. ಈ ಸಂಸ್ಥೆಯ ಪ್ರಸ್ತುತ ಆಧ್ಯಾತ್ಮಿಕ ಗುರುಗಳಾದ ಪರಮ ಪೂಜ್ಯ ಮಹಂತ್ ಸ್ವಾಮಿ ಮಹಾರಾಜ್ ಅವರ ದಿವ್ಯ ದೂರದೃಷ್ಟಿ ಮತ್ತು ಇಚ್ಛೆಯಂತೆ ಈ ಸಂಸ್ಕೃತ ಶಾಲೆಯನ್ನು ಸ್ಥಾಪಿಸಲಾಗಿದೆ.

ಬಿಎಪಿಎಸ್ ಸಂಸ್ಥೆಯ ಹಿರಿಯ ವಿದ್ವಾಂಸರಾದ ಮಹಾಮಹೋಪಾಧ್ಯಾಯ ಭದ್ರೇಶದಾಸ ಸ್ವಾಮಿ ಈ ನೂತನ ಪಾಠಶಾಲೆಯ ಚಾಲನೆಯನ್ನು ಘೋಷಿಸಿದ್ದು, ಇದು ಯುಕೆಯಲ್ಲಿ ಭಾರತೀಯ ಸನಾತನ ಸಂಸ್ಕೃತಿ ಮತ್ತು ಸಂಸ್ಕೃತ ಭಾಷೆಯ ಅಧ್ಯಯನಕ್ಕೆ ಹೊಸ ಮೈಲಿಗಲ್ಲಾಗಲಿದೆ ಎಂದು ತಿಳಿಸಿದ್ದಾರೆ.

ಮಹಂತ್ ಸ್ವಾಮಿ ಮಹಾರಾಜ್ ಅವರ ಕನಸಿನ ಯೋಜನೆ:

ಕಳೆದ ತಿಂಗಳು ನಡೆದ ಸತ್ಸಂಗ ದೀಕ್ಷಾ ಸನ್ಮಾನ ಮಹೋತ್ಸವದ ಸಂದರ್ಭದಲ್ಲಿ, ಲಂಡನ್ ಭೇಟಿಯ ವೇಳೆ ಮಂದಿರದಲ್ಲಿ ಸಂಸ್ಕೃತ ಪಾಠಶಾಲೆಯನ್ನು ಆರಂಭಿಸಬೇಕೆಂದು ಮಹಂತ್ ಸ್ವಾಮಿ ಮಹಾರಾಜ್ ಆಶಯ ವ್ಯಕ್ತಪಡಿಸಿದ್ದರು. ಈ ನೂತನ ಸಂಸ್ಥೆಗೆ ಅವರೇ ‘ಅಕ್ಷರ-ಪುರುಷೋತ್ತಮ ಸಂಸ್ಕೃತ ಪಾಠಶಾಲೆ’ ಎಂದು ನಾಮಕರಣ ಮಾಡಿದ್ದಾರೆ.

ಇದನ್ನೂ ಓದಿ: ‘ಯಾರಿಗೂ ಪ್ರವೇಶ ನಿರಾಕರಿಸಿಲ್ಲ’; ಐಫೆಲ್ ಟವರ್‌ನಲ್ಲಿ ಮಹಿಳಾ ಸಿಬ್ಬಂದಿಗೆ ನಿಷೇಧದ ವಿವಾದಕ್ಕೆ ಬಿಎಪಿಎಸ್ ಸ್ಪಷ್ಟನೆ

ಈ ಪಾಠಶಾಲೆಯ ಅಧಿಕೃತ ಉದ್ಘಾಟನೆಗೂ ಮುನ್ನವೇ ಲಂಡನ್‌ನ ಸುಮಾರು 400ಕ್ಕೂ ಹೆಚ್ಚು ಯುವಕರು ಹಾಗೂ ಮಕ್ಕಳು ಸಂಸ್ಕೃತ ಕಲಿಯಲು ನೋಂದಾಯಿಸಿಕೊಂಡು ಅಧ್ಯಯನದಲ್ಲಿ ತೊಡಗಿಸಿಕೊಂಡಿದ್ದಾರೆ.

ಸಂಸ್ಕೃತದಲ್ಲೇ ಆಶೀರ್ವಚನ ನೀಡಿದ ಗುರುಗಳು:

ಉದ್ಘಾಟನಾ ಸಮಾರಂಭದಲ್ಲಿ ಸ್ವತಃ ಮಹಂತ್ ಸ್ವಾಮಿ ಮಹಾರಾಜ್ ಅವರು ಸಂಸ್ಕೃತ ಭಾಷೆಯಲ್ಲೇ ಪ್ರವಚನ ನೀಡಿ, ಯುವ ಪೀಳಿಗೆಯು ಸಂಸ್ಕೃತ ಭಾಷೆ ಮತ್ತು ಭಾರತೀಯ ಶಾಸ್ತ್ರಗಳ ಆಳವಾದ ಜ್ಞಾನವನ್ನು ಪಡೆಯಲು ಈ ಶಾಲೆಯನ್ನು ಸದುಪಯೋಗಪಡಿಸಿಕೊಳ್ಳಬೇಕೆಂದು ಆಶೀರ್ವದಿಸಿದರು.

ಇದನ್ನೂ ಓದಿ: ಅಬುಧಾಬಿಯ ಬಿಎಪಿಎಸ್ ಹಿಂದೂ ಮಂದಿರಕ್ಕೆ ಪ್ರತಿಷ್ಠಿತ ‘ಟಾಲರೆನ್ಸ್​ ಪ್ರಶಸ್ತಿ’ಯ ಗರಿ

1961ರಲ್ಲಿ ಮುಂಬೈನಲ್ಲಿ ಯೋಗಿ ಮಹಾರಾಜ್ ಹಾಗೂ 1973ರಲ್ಲಿ ಸಾರಂಗಪುರದಲ್ಲಿ ಪ್ರಮುಖ್ ಸ್ವಾಮಿ ಮಹಾರಾಜ್ ಅವರು ಆರಂಭಿಸಿದ್ದ ಸಂಸ್ಕೃತ ಪಾಠಶಾಲೆಯ ಸುದೀರ್ಘ ಆಧ್ಯಾತ್ಮಿಕ ಮತ್ತು ಶೈಕ್ಷಣಿಕ ಪರಂಪರೆಯನ್ನು ಈಗ ಲಂಡನ್‌ಗೂ ವಿಸ್ತರಿಸಲಾಗಿದೆ. ಈ ನೂತನ ಪಾಠಶಾಲೆಯು ಯುರೋಪ್‌ನಲ್ಲಿ ನೆಲೆಸಿರುವ ಭಾರತೀಯ ಮೂಲದ ಯುವಜನರಿಗೆ ಸಂಸ್ಕೃತ ಭಾಷೆ, ಶಾಸ್ತ್ರಗಳು ಹಾಗೂ ಆಧ್ಯಾತ್ಮಿಕ ತತ್ವಶಾಸ್ತ್ರವನ್ನು ಕಲಿಯಲು ಉತ್ತಮ ವೇದಿಕೆಯನ್ನು ಒದಗಿಸಲಿದೆ.

ಇನ್ನಷ್ಟು ಅಂತಾರಾಷ್ಟ್ರೀಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ