ನೆತನ್ಯಾಹುಗೆ ಅಧಿಕಾರ ಕಳೆದುಕೊಳ್ಳುವ ಭೀತಿ: ಐಸೆನ್‌ಕೋಟ್‌ಗೆ 67 ಸಂಸದರ ಬೆಂಬಲ, ಯಾರಾಗ್ತಾರೆ ಇಸ್ರೇಲ್ ಪ್ರಧಾನಿ?
ಇಸ್ರೇಲ್‌ನಲ್ಲಿ ಸರ್ಕಾರ ರಚನೆಗೆ ಹಾಲಿ ಪ್ರಧಾನಿ ನೆತನ್ಯಾಹು ಹಾಗೂ ಗಡಿ ಐಸೆನ್ಕೋಟ್ ನಡುವೆ ಪೈಪೋಟಿ ನಡೆದಿದೆ. 67 ಸಂಸದರ ಬೆಂಬಲದೊಂದಿಗೆ ಐಸೆನ್ಕೋಟ್ ಮುನ್ನಡೆ ಸಾಧಿಸಿದ್ದು, ನೆತನ್ಯಾಹುಗೆ 46 ಮಂದಿ ಬೆಂಬಲಿಸಿದ್ದಾರೆ. ಆದರೆ, ಐಸೆನ್‌ಕೋಟ್‌ಗೆ ಅರಬ್ ಪಕ್ಷಗಳ ಬೆಂಬಲದೊಂದಿಗೆ ಮೈತ್ರಿ ಸರ್ಕಾರ ರಚಿಸುವುದು ಸವಾಲಾಗಿದೆ. ಅಧ್ಯಕ್ಷರ ನಿರ್ಧಾರದ ಬಳಿಕ ಮುಂದಿನ ರಾಜಕೀಯ ಚಿತ್ರಣ ಸ್ಪಷ್ಟವಾಗಲಿದೆ.
Updated on: Nov 06, 2026 | 7:51 AM
ಜೆರುಸಲೇಮ್, ನವೆಂಬರ್ 06: ಇಸ್ರೇಲ್‌ನಲ್ಲಿ ಹೊಸ ಸರ್ಕಾರ ರಚಿಸುವ ಹೊಣೆ ಯಾರಿಗೆ ಸಿಗಲಿದೆ ಎಂಬ ಕುತೂಹಲ ಹೆಚ್ಚಾಗಿದೆ. ಹಾಲಿ ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಮತ್ತು ಮಾಜಿ ಸೇನಾ ಮುಖ್ಯಸ್ಥ ಗಡಿ ಐಸೆನ್ಕೋಟ್ ನಡುವೆ ಅಧಿಕಾರಕ್ಕಾಗಿ ಪೈಪೋಟಿ ನಡೆಯುತ್ತಿದೆ. ಚುನಾವಣೆಯಲ್ಲಿ ಯಾರಿಗೂ ಸ್ಪಷ್ಟ ಬಹುಮತ ಸಿಗದ ಹಿನ್ನೆಲೆಯಲ್ಲಿ, ಅಧ್ಯಕ್ಷ ಐಸಾಕ್ ಹೆರ್ಜಾಗ್ ಅವರು ಭಾನುವಾರ ಸರ್ಕಾರ ರಚಿಸಲು ಒಬ್ಬರನ್ನು ಆಯ್ಕೆ ಮಾಡುವುದಾಗಿ ತಿಳಿಸಿದ್ದಾರೆ.
ಇಸ್ರೇಲ್ ಅಧ್ಯಕ್ಷ ಐಸಾಕ್ ಹೆರ್ಜಾಗ್ ಅವರು ನವೆಂಬರ್ 8ರ ಭಾನುವಾರ ಹೊಸ ಸರ್ಕಾರ ರಚಿಸುವ ಜವಾಬ್ದಾರಿಯನ್ನು ಯಾವ ಸಂಸದರಿಗೆ ನೀಡಬೇಕು ಎಂಬುದನ್ನು ಘೋಷಿಸಲಿದ್ದಾರೆ. ಗುರುವಾರ ನಡೆದ ರಾಜಕೀಯ ಪಕ್ಷಗಳ ಸಮಾಲೋಚನೆಯಲ್ಲಿ ಮಾಜಿ ಸೇನಾ ಮುಖ್ಯಸ್ಥ ಹಾಗೂ ಯಶಾರ್ ಪಕ್ಷದ ನಾಯಕ ಗಡಿ ಐಸೆನ್ಕೋಟ್ ಅವರಿಗೆ 67 ಸಂಸದರ ಬೆಂಬಲ ವ್ಯಕ್ತವಾಗಿದೆ. ಹಾಲಿ ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಅವರಿಗೆ 46 ಸಂಸದರ ಬೆಂಬಲ ದೊರೆತಿದೆ. ಉಳಿದ ಏಳು ಸಂಸದರು ಯಾರನ್ನೂ ಬೆಂಬಲಿಸಿಲ್ಲ.
ಅಧ್ಯಕ್ಷರ ಈ ನಿರ್ಧಾರದಿಂದ ಇಸ್ರೇಲ್‌ನ ಮುಂದಿನ ರಾಜಕೀಯ ದಿಕ್ಕು ನಿರ್ಧಾರವಾಗಲಿದೆ. ಆದರೆ ಹೆಚ್ಚು ಸಂಸದರ ಬೆಂಬಲ ಪಡೆದ ಮಾತ್ರಕ್ಕೆ ಐಸೆನ್‌ಕೋಟ್‌ಗೆ ಸರ್ಕಾರ ರಚಿಸುವುದು ಖಚಿತವಲ್ಲ. ವಿವಿಧ ಪಕ್ಷಗಳ ನಡುವೆ ಹೊಂದಾಣಿಕೆ ಇಲ್ಲದಿರುವುದರಿಂದ ಹೊಸ ಮೈತ್ರಿ ಸರ್ಕಾರ ರಚಿಸುವುದು ಸವಾಲಿನ ಕೆಲಸವಾಗಿದೆ ಎಂದು ಅಧ್ಯಕ್ಷ ಹೆರ್ಜಾಗ್ ಹೇಳಿದ್ದಾರೆ.
ಇದನ್ನೂ ಓದಿ: ಇಸ್ರೇಲ್ ಚುನಾವಣೆ: ಮತ ಖರೀದಿ, ಬೆದರಿಕೆ ಆರೋಪ: ಅರಬ್ ಪಕ್ಷಗಳ ವಿರುದ್ಧ ತನಿಖೆಗೆ ಲಿಕುಡ್ ಆಗ್ರಹ
ಚುನಾವಣೆಯಲ್ಲಿ ಯಾರಿಗೆ ಎಷ್ಟು ಸ್ಥಾನ? ಅಕ್ಟೋಬರ್ 27ರಂದು ನಡೆದ ಇಸ್ರೇಲ್ ಸಂಸತ್ ಚುನಾವಣೆಯಲ್ಲಿ ಯಾವುದೇ ಪಕ್ಷ ಅಥವಾ ಮೈತ್ರಿಕೂಟಕ್ಕೆ ಸ್ಪಷ್ಟ ಬಹುಮತ ಸಿಗಲಿಲ್ಲ. ಇಸ್ರೇಲ್ ಸಂಸತ್ತನ್ನು ನೆಸ್ಸೆಟ್ ಎಂದು ಕರೆಯಲಾಗುತ್ತದೆ. ಇಲ್ಲಿ ಒಟ್ಟು 120 ಸ್ಥಾನಗಳಿದ್ದು, ಸರ್ಕಾರ ರಚಿಸಲು ಕನಿಷ್ಠ 61 ಸದಸ್ಯರ ಬೆಂಬಲ ಅಗತ್ಯ.
– ನೆತನ್ಯಾಹು ನೇತೃತ್ವದ ಮೈತ್ರಿಕೂಟ – 53 ಸ್ಥಾನಗಳು
– ಐಸೆನ್ಕೋಟ್ ನೇತೃತ್ವದ ವಿರೋಧಿ ಮೈತ್ರಿಕೂಟ – 48 ಸ್ಥಾನಗಳು
– ಅರಬ್ ಪಕ್ಷಗಳು – 19 ಸ್ಥಾನಗಳು
ಈ ಫಲಿತಾಂಶದಿಂದ ಅರಬ್ ಪಕ್ಷಗಳು ಸರ್ಕಾರ ರಚನೆಯ ಪ್ರಕ್ರಿಯೆಯಲ್ಲಿ ನಿರ್ಣಾಯಕ ಪಾತ್ರ ವಹಿಸುವ ಸಾಧ್ಯತೆ ಎದುರಾಗಿದೆ. ಈ ಪಕ್ಷಗಳು ಐಸೆನ್ಕೋಟ್ ಅವರಿಗೆ ಬೆಂಬಲ ಸೂಚಿಸಿರುವುದರಿಂದ ಅವರ ಬಲ ಹೆಚ್ಚಾಗಿದೆ.
ಐಸೆನ್‌ಕೋಟ್‌ಗೆ ಎದುರಾಗಿರುವ ಸವಾಲು ಏನು? ಐಸೆನ್ಕೋಟ್ ಅವರಿಗೆ 67 ಸಂಸದರ ಶಿಫಾರಸು ದೊರೆತಿದ್ದರೂ, ಸರ್ಕಾರ ರಚಿಸಲು ಎಲ್ಲ ಪಕ್ಷಗಳೂ ಒಂದೇ ನಿಲುವಿಗೆ ಬರಬೇಕಿದೆ. ಅರಬ್ ಪಕ್ಷಗಳ ಬೆಂಬಲವನ್ನು ಸ್ವೀಕರಿಸುವ ವಿಚಾರದಲ್ಲಿ ವಿರೋಧಿ ಮೈತ್ರಿಕೂಟದೊಳಗೇ ಭಿನ್ನಾಭಿಪ್ರಾಯಗಳಿವೆ. ಹೀಗಾಗಿ ಈ ಬೆಂಬಲವನ್ನು ನಿಜವಾದ ಬಹುಮತವಾಗಿ ಪರಿವರ್ತಿಸುವುದು ಐಸೆನ್ಕೋಟ್ ಮುಂದಿರುವ ದೊಡ್ಡ ಸವಾಲು.
ಅಧ್ಯಕ್ಷ ಹೆರ್ಜಾಗ್ ಕೂಡ ಪಕ್ಷಗಳ ನಡುವಿನ ಪರಸ್ಪರ ವಿರೋಧ ಮತ್ತು ಭಿನ್ನಾಭಿಪ್ರಾಯಗಳ ಕಾರಣದಿಂದ ಯಾರಿಗೆ ಸರ್ಕಾರ ರಚಿಸುವ ಸಾಮರ್ಥ್ಯವಿದೆ ಎಂಬುದು ಇನ್ನೂ ಸ್ಪಷ್ಟವಾಗಿಲ್ಲ ಎಂದು ಹೇಳಿದ್ದಾರೆ. ಈ ಹಿನ್ನೆಲೆಯಲ್ಲಿ ಅವರು ಕೆಲವು ಪಕ್ಷಗಳ ನಾಯಕರೊಂದಿಗೆ ಪ್ರತ್ಯೇಕ ಮಾತುಕತೆ ನಡೆಸಲಿದ್ದಾರೆ.
ನೆತನ್ಯಾಹುಗೆ ಮತ್ತೊಂದು ಹಿನ್ನಡೆ ನೆತನ್ಯಾಹು ಅವರ ಲಿಕುಡ್ ಪಕ್ಷ ಚುನಾವಣೆಯಲ್ಲಿ 27 ಸ್ಥಾನಗಳನ್ನು ಪಡೆದು ಅತಿದೊಡ್ಡ ಏಕೈಕ ಪಕ್ಷವಾಗಿ ಹೊರಹೊಮ್ಮಿದೆ. ಆದರೆ ಅವರ ಮೈತ್ರಿಕೂಟಕ್ಕೆ ಬಹುಮತ ಸಿಗದಿರುವುದು ಹಿನ್ನಡೆಯಾಗಿದೆ. ಇನ್ನು ಅವರ ದೀರ್ಘಕಾಲದ ಮಿತ್ರ ಪಕ್ಷವಾದ ಯುನೈಟೆಡ್ ತೋರಾ ಜುದಾಯಿಸಂ ಯಾವುದೇ ಅಭ್ಯರ್ಥಿಯನ್ನು ಬೆಂಬಲಿಸದಿರಲು ನಿರ್ಧರಿಸಿರುವುದು ಕೂಡ ನೆತನ್ಯಾಹು ಅವರಿಗೆ ಹಿನ್ನಡೆಯಾಗಿದೆ.
ಇನ್ನೊಂದೆಡೆ, ಚುನಾವಣೆಯಲ್ಲಿ ಅಕ್ರಮ ನಡೆದಿದೆ ಎಂದು ನೆತನ್ಯಾಹು ಆರೋಪಿಸಿದ್ದಾರೆ. ಆದರೆ ಇಸ್ರೇಲ್‌ನ ಕೇಂದ್ರ ಚುನಾವಣಾ ಸಮಿತಿಯು ಚುನಾವಣೆಯ ವಿಶ್ವಾಸಾರ್ಹತೆಗೆ ಧಕ್ಕೆಯಾಗಿಲ್ಲ ಎಂದು ತಿಳಿಸಿದೆ. ಚುನಾವಣಾ ಅಕ್ರಮದ ಆರೋಪಗಳಿಗೆ ಸಂಬಂಧಿಸಿದಂತೆ ನೆತನ್ಯಾಹು ಯಾವುದೇ ದೃಢವಾದ ಸಾಕ್ಷ್ಯ ಒದಗಿಸಿಲ್ಲ ಎಂದು ರಾಯಿಟರ್ಸ್ ವರದಿ ಮಾಡಿದೆ.
ಮುಂದೆ ಏನಾಗಲಿದೆ? ನವೆಂಬರ್ 8ರಂದು ಅಧ್ಯಕ್ಷರು ಆಯ್ಕೆ ಮಾಡುವ ಅಭ್ಯರ್ಥಿಗೆ ಸರ್ಕಾರ ರಚಿಸಲು ಆರಂಭದಲ್ಲಿ 28 ದಿನಗಳ ಕಾಲಾವಕಾಶ ಸಿಗುತ್ತದೆ. ಅಗತ್ಯವಿದ್ದರೆ ಇನ್ನೂ 14 ದಿನಗಳ ವಿಸ್ತರಣೆ ನೀಡಬಹುದು. ಈ ಅವಧಿಯಲ್ಲಿ ಅಭ್ಯರ್ಥಿಯು ಕನಿಷ್ಠ 61 ಸಂಸದರ ಬೆಂಬಲ ಪಡೆದು ಸರ್ಕಾರ ರಚಿಸಬೇಕು. ವಿಫಲವಾದರೆ ಮತ್ತೊಬ್ಬರಿಗೆ ಅವಕಾಶ ನೀಡಬಹುದು. ಅಂತಿಮವಾಗಿ ಯಾರಿಂದಲೂ ಸರ್ಕಾರ ರಚಿಸಲು ಸಾಧ್ಯವಾಗದಿದ್ದರೆ ಇಸ್ರೇಲ್‌ನಲ್ಲಿ ಮತ್ತೊಂದು ಚುನಾವಣೆ ನಡೆಯುವ ಸಾಧ್ಯತೆಯಿದೆ. ಅಷ್ಟರ ತನಕ ನೆತನ್ಯಾಹು ಹಂಗಾಮಿ ಪ್ರಧಾನಿಯಾಗಿ ಮುಂದುವರಿಯಲಿದ್ದಾರೆ.
ಒಟ್ಟಿನಲ್ಲಿ, 67 ಸಂಸದರ ಬೆಂಬಲದೊಂದಿಗೆ ಐಸೆನ್ಕೋಟ್ ಮುನ್ನಡೆ ಸಾಧಿಸಿದ್ದಾರೆ. ಆದರೆ ಇಸ್ರೇಲ್‌ನ ಮುಂದಿನ ಪ್ರಧಾನಿ ಯಾರು ಎಂಬುದನ್ನು ನಿರ್ಧರಿಸುವಲ್ಲಿ ಭಾನುವಾರದ ಅಧ್ಯಕ್ಷರ ಘೋಷಣೆ ಮತ್ತು ನಂತರದ ಮೈತ್ರಿ ಮಾತುಕತೆಗಳು ನಿರ್ಣಾಯಕವಾಗಲಿವೆ.
ಅಂತಾರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ
