ವಿದೇಶಗಳಲ್ಲಿ 7 ಲಕ್ಷಕ್ಕೂ ಹೆಚ್ಚು ಕ್ರೆಡಿಟ್ ಕಾರ್ಡ್ ವೆಚ್ಚಕ್ಕೆ ಶೇ. 20 ಟಿಸಿಎಸ್; ಬಜೆಟ್​ನಲ್ಲಿ ಘೋಷಣೆ ಸಾಧ್ಯತೆ

ನವದೆಹಲಿ, ಜುಲೈ 15: ವಿದೇಶಗಳಲ್ಲಿ ಭಾರತೀಯರು ಕ್ರೆಡಿಟ್ ಕಾರ್ಡ್ ಬಳಸಿ ಮಾಡುವ ವೆಚ್ಚಕ್ಕೆ ತೆರಿಗೆ ಏರಿಸುವ ಇರಾದೆಯಲ್ಲಿ ಸರ್ಕಾರ ಇದೆ. ವಿದೇಶಗಳಲ್ಲಿ ಭಾರತೀಯರು ಮಾಡುತ್ತಿರುವ ಖರ್ಚು ದಿನೇ ದಿನೇ ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ ಅದಕ್ಕೆ ಕಡಿವಾಣ ಹಾಕಲು ಸರ್ಕಾರ ಆಲೋಚಿಸುತ್ತಿದೆ. ವರ್ಷಕ್ಕೆ ಏಳು ಲಕ್ಷ ರೂಗೂ ಹೆಚ್ಚು ವೆಚ್ಚವನ್ನು ಎಲ್ಆರ್​ಎಸ್ ಸ್ಕೀಮ್ ವ್ಯಾಪ್ತಿಗೆ ತರಬಹುದು. ಮುಂಬರುವ ಬಜೆಟ್​ನಲ್ಲಿ ಈ ಬಗ್ಗೆ ವಿತ್ತ ಸಚಿವೆ ನಿರ್ಮಲಾ ಸೀತಾರಾಮನ್ ಘೋಷೆ ಮಾಡಬಹುದು ಎನ್ನಲಾಗಿದೆ. ವರದಿ ಪ್ರಕಾರ ಭಾರತೀಯರು ವಿದೇಶಕ್ಕೆ ಹೋದಾಗ ಕ್ರೆಡಿಟ್ ಕಾರ್ಡ್ ಬಳಸಿ ಒಂದು ವರ್ಷದಲ್ಲಿ ಏಳು ಲಕ್ಷ ರೂಗಿಂತ ಹೆಚ್ಚಿನ ಹಣ ವೆಚ್ಚ ಮಾಡಿದಾಗ ಅದಕ್ಕೆ ಶೇ. 20ರಷ್ಟು ಟಿಸಿಎಸ್ ವಿಧಿಸಬಹುದು. ಟಿಸಿಎಸ್ ಎಂದರೆ ಮೂಲದಲ್ಲೇ ಸಂಗ್ರಹಿಸಲಾಗುವ ತೆರಿಗೆ.

ಆರ್​ಬಿಐನ ಎಲ್​ಆರ್​ಎಸ್ ಸ್ಕೀಮ್ ಪ್ರಕಾರ ಭಾರತದ ನಿವಾಸಿಯೊಬ್ಬರು ಒಂದು ಹಣಕಾಸು ವರ್ಷದಲ್ಲಿ ವಿದೇಶಗಳಿಗೆ 2,50,000 ಡಾಲರ್​ವರೆಗೂ ಹಣ ವರ್ಗಾವಣೆ ಮಾಡಬಹುದು. ಅಂದರೆ ಒಂದು ವರ್ಷದಲ್ಲಿ ಗರಿಷ್ಠ ಎರಡು ಕೋಟಿ ರೂವರೆಗೆ ಹಣವನ್ನು ವಿದೇಶಗಳಿಗೆ ಕಳುಹಿಸಲು ಅವಕಾಶ ಇದೆ. ಆದರೆ, ವರ್ಷದಲ್ಲಿ ಏಳು ಲಕ್ಷ ರೂಗಿಂತ ಹೆಚ್ಚು ಹಣ ವಹಿವಾಟು ನಡೆದರೆ ಅದಕ್ಕೆ 20 ಪ್ರತಿಶತದಷ್ಟು ಟಿಸಿಎಸ್ ತೆರಿಗೆ ಮುರಿದುಕೊಳ್ಳಲಾಗುತ್ತದೆ. ಈ ಎಲ್​ಆರ್​ಎಸ್ ಅಥವಾ ಲಿಬಲರಲೈಸ್ಡ್ ರೆಮಿಟೆನ್ಸ್ ಸ್ಕೀಮ್​ನ ವ್ಯಾಪ್ತಿಗೆ ಕ್ರೆಡಿಟ್ ಕಾರ್ಡ್ ಅನ್ನೂ ಒಳಗೊಳ್ಳಲು ಸರ್ಕಾರ ಮುಂದಾಗಿದೆ.

ಇದನ್ನೂ ಓದಿ: ಬಜೆಟ್​ನಲ್ಲಿ ಪಿಎಂ ಕಿಸಾನ್ ಯೋಜನೆಯ 6,000 ರೂ ಮೊತ್ತ ಹೆಚ್ಚಳ ಆಗುತ್ತಾ?

ಸದ್ಯ ಎಲ್​ಆರ್​ಎಸ್ ಮಿತಿಯಲ್ಲಿ ಕ್ರೆಡಿಟ್ ಕಾರ್ಡ್ ವೆಚ್ಚ ಸೇರಿಸಲಾಗಿಲ್ಲ. ಆದರೆ, ಡೆಬಿಟ್ ಕಾರ್ಡ್, ಫೋರೆಕ್ಸ್ ಕಾರ್ಡ್ ಮತ್ತಿತರ ಪೇಮೆಂಟ್ ವಿಧಾನಗಳ ಮೂಲಕ ಭಾರತದಿಂದ ವಿದೇಶಗಳಿಗೆ ವರ್ಗಾವಣೆ ಆಗುವ ಹಣ ವರ್ಷಕ್ಕೆ ಏಳು ಲಕ್ಷ ರೂಗಿಂತ ಹೆಚ್ಚಿದ್ದರೆ ಶೇ. 20ರಷ್ಟು ಟಿಸಿಎಸ್ ಕಡಿತ ಆಗುತ್ತದೆ. ಕ್ರೆಡಿಟ್ ಕಾರ್ಡ್ ವಹಿವಾಟುಗಳಿಗೆ ವಿನಾಯಿತಿ ಕೊಡಲಾಗಿತ್ತು. ಈಗ ಅದೂ ಕೂಡ ಎಲ್​ಆರ್​ಎಸ್ ವ್ಯಾಪ್ತಿಗೆ ಬರಬಹುದು.

ಭಾರತೀಯರ ವಿದೇಶೀ ಖರ್ಚು ಎಷ್ಟಿದೆ?

ಭಾರತೀಯ ರಿಸರ್ವ್ ಬ್ಯಾಂಕ್​ನ ದತ್ತಾಂಶದ ಪ್ರಕಾರ ಎಲ್​ಆರ್​ಎಸ್ ಅಡಿಯಲ್ಲಿ 2023-24ರ ಹಣಕಾಸು ವರ್ಷದಲ್ಲಿ ಭಾರತದಿಂದ ಹೊರಹೋದ ಹಣ 31.73 ಬಿಲಿಯನ್ ಡಾಲರ್ ಇದೆ. ಹಿಂದಿನ ಹಣಕಾಸು ವರ್ಷಕ್ಕೆ ಹೋಲಿಸಿದರೆ ದು ಶೇ. 16.91ರಷ್ಟು ಹೆಚ್ಚಳವಾಗಿದೆ.

ಇದನ್ನೂ ಓದಿ: ಈ ಬಜೆಟ್ ಅಧಿವೇಶನದಲ್ಲಿ ಇನ್ಷೂರೆನ್ಸ್ ತಿದ್ದುಪಡಿ ಮಸೂದೆ ಮಂಡನೆ ಸಾಧ್ಯತೆ; ಕಾಯ್ದೆಯಲ್ಲಿ ಏನೇನು ಬದಲಾವಣೆ?

ಶಿಕ್ಷಣ ವೆಚ್ಚವೂ ಮಿತಿ ಮೀರುವಂತಿಲ್ಲವಾ?

ವಿದೇಶಗಳಲ್ಲಿ ಆಸ್ಪತ್ರೆ ಚಿಕಿತ್ಸೆಗೆ ಅಥವಾ ಶಿಕ್ಷಣಕ್ಕೆ ಹಣ ಕಳುಹಿಸುತ್ತಿದ್ದರೆ ಅದಕ್ಕೆ ತೆರಿಗೆ ರಿಯಾಯಿತಿ ಸಿಗುತ್ತದೆ. ಇವುಗಳಿಗೆ ಮಾಡುವ ವೆಚ್ಚ ವರ್ಷಕ್ಕೆ ಏಳು ಲಕ್ಷ ಮೀರಿದರೆ 20 ಪ್ರತಿಶತ ಬದಲು 5 ಪ್ರತಿಶತದಷ್ಟು ಟಿಸಿಎಸ್ ಮಾತ್ರವೇ ಮುರಿದುಕೊಳ್ಳಲಾಗುತ್ತದೆ. ಇದೇ ನೀತಿಯನ್ನು ಬಜೆಟ್​ನಲ್ಲಿ ಮುಂದುವರಿಸಬಹುದು ಎನ್ನಲಾಗಿದೆ.

ಇನ್ನಷ್ಟು ಬಜೆಟ್ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ