Repo and Bond: ರೆಪೋ ದರ ಏರಿಕೆ ಇಲ್ಲ ಎನ್ನುತ್ತಿದ್ದಂತೆಯೇ ಸರ್ಕಾರಿ ಬಾಂಡ್ನ ಬಡ್ಡಿ ಇಳಿಕೆ; ಷೇರು ಮಾರುಕಟ್ಟೆಯಲ್ಲೂ ಸಂಚಲನ
RBI Governor Press Meet: ಆರ್ಬಿಐನ ರೆಪೋ ದರದಲ್ಲಿ ಈ ಬಾರಿ ಏರಿಕೆ ಇಲ್ಲ ಎಂದು ಘೋಷಣೆ ಆಗುತ್ತಿದ್ದಂತೆಯೇ ಷೇರುಪೇಟೆ ಪುಟಿದೆದ್ದಿದೆ. ಬ್ಯಾಂಕುಗಳ ಷೇರುಗಳಿಗೆ ಬೇಡಿಕೆ ಬಂದಿದೆ. ಹಾಗೆಯೇ, ಸರ್ಕಾರಿ ಬಾಂಡ್ಗಳಿಗೂ ಬೇಡಿಕೆ ಬಂದು, ಅದರ ಪರಿಣಾಮವಾಗಿ ಬಾಂಡ್ ಯೀಲ್ಡ್ ಕುಸಿತಗೊಂಡಿದೆ.
Updated on:Apr 06, 2023 | 1:09 PM
ಮುಖ್ಯಾಂಶಗಳು
- ಆರ್ಬಿಐ ಗವರ್ನರ್ ಶಕ್ತಿಕಾಂತ ದಾಸ್ ಪತ್ರಿಕಾಗೋಷ್ಠಿ ನಡೆಸಿ, ರೆಪೋ ದರ ಶೇ. 6.50ರಲ್ಲಿ ಮುಂದುವರಿಯುತ್ತದೆ ಎಂದು ಘೋಷಿಸಿದ್ದಾರೆ.
- 10 ವರ್ಷ ಅವಧಿಯ ಸರ್ಕಾರಿ ಬಾಂಡ್ನ ಯೀಲ್ಡ್ (ರಿಟರ್ನ್) 14 ಮೂಲಾಂಕಗಳಷ್ಟು ಕಡಿಮೆಗೊಂಡಿದೆ. ಇದು ರೆಪೋ ದರ ಯಥಾಸ್ಥಿತಿಯ ಪರಿಣಾಮ.
- ಏಪ್ರಿಲ್ 6ರಂದು ಆರ್ಬಿಐ ಗವರ್ನರ್ ಪತ್ರಿಕಾಗೋಷ್ಠಿ ಬಳಿಕ ಷೇರು ಮಾರುಕಟ್ಟೆಯಲ್ಲಿ ಬ್ಯಾಂಕುಗಳ ಷೇರುಗಳಿಗೆ ಒಳ್ಳೆಯ ಬೇಡಿಕೆ ಬಂದಿದೆ.
ನವದೆಹಲಿ: ಆರ್ಬಿಐ ತನ್ನ ರೆಪೋ ದರವನ್ನು (Repo Rate) ಶೇ. 6.50ರಲ್ಲಿ ಮುಂದುವರಿಸಲು ನಿರ್ಧಾರ ಪ್ರಕಟಿಸಿದ ಬೆನ್ನಲ್ಲೇ ಬಾಂಡ್ ಮಾರುಕಟ್ಟೆ ಮತ್ತು ಷೇರು ಮಾರುಕಟ್ಟೆಯಲ್ಲಿ ಸಂಚಲನವಾಗಿದೆ. ಸೆನ್ಸೆಕ್ಸ್, ನಿಫ್ಟಿ ಸೂಚ್ಯಂಕಗಳು ಏರಿಕೆ ಕಂಡಿವೆ. ಪಿಎನ್ಬಿ, ಎಸ್ಬಿಐ ಮೊದಲಾದ ಬ್ಯಾಂಕುಗಳ ಷೇರುಗಳು ಗಳಿಕೆ ಕಂಡಿವೆ. ಇನ್ನು, ಬಾಂಡ್ ಮಾರುಕಟ್ಟೆಯಲ್ಲೂ ವ್ಯತ್ಯಯಗಳಾಗಿವೆ. ಸರ್ಕಾರಿ ಬಾಂಡ್ನ ಯೀಲ್ಡ್ (ಬಡ್ಡಿ ದರ) ಕಡಿಮೆ ಆಗಿದೆ. ಶೇ. 7.2857ರ ಬಡ್ಡಿ ದರದಲ್ಲಿ ರಿಟರ್ನ್ ಕೊಡುವ ನಿರೀಕ್ಷೆಯ 10 ವರ್ಷದ ಗವರ್ನ್ಮೆಂಟ್ ಬಾಂಡ್ಗಳ ಯೀಲ್ಡ್ ಈಗ ಶೇ. 7.1469ಕ್ಕೆ ಇಳಿದಿದೆ. ಅಂದರೆ ಸುಮಾರು 14 ಮೂಲಾಂಕಗಳಷ್ಟು ಬಡ್ಡಿ ಕುಸಿತವಾಗಿದೆ. 5 ವರ್ಷದ ಅವಧಿಯ ಸರ್ಕಾರಿ ಬಾಂಡ್ನ ಬಡ್ಡಿ ದರ ಕೂಡ 16 ಬೇಸಿಸ್ ಪಾಯಿಂಟ್ಗಳಷ್ಟು ಇಳಿಕೆ ಕಂಡಿದೆ. ಇದೆಲ್ಲವೂ ರೆಪೋ ದರ ವಿಚಾರದಲ್ಲಿ ಆರ್ಬಿಐ ತೆಗೆದುಕೊಂಡ ಅನಿರೀಕ್ಷಿತ ನಿರ್ಧಾರದ ಪರಿಣಾಮ.
ನಿಗದಿತ ತಾಳಿಕೆಯ ಮಟ್ಟಕ್ಕಿಂತ ಹೆಚ್ಚೇ ಇರುವ ಹಣದುಬ್ಬರಕ್ಕೆ ಕಡಿವಾಣ ಹಾಕಲು ಆರ್ಬಿಐ ಸತತವಾಗಿ ರೆಪೋ ದರ, ಅಂದರೆ ಬಡ್ಡಿ ದರಗಳನ್ನು ಹೆಚ್ಚಿಸುತ್ತಾ ಬಂದಿತ್ತು. ಫೆಬ್ರುವರಿ ತಿಂಗಳಲ್ಲಿ ಹಣದುಬ್ಬರ ತುಸು ಇಳಿಕೆ ಕಂಡರೂ ಶೇ. 6ರ ನಿಗದಿತ ಗುರಿಗಿಂತ ಆಚೆಯೇ ಇದ್ದರಿಂದ ಈ ಬಾರಿಯೂ ರೆಪೋ ದರವನ್ನು ಆರ್ಬಿಐ ಹೆಚ್ಚಿಸಬಹುದು ಎಂಬ ಅಂದಾಜಿತ್ತು. ರೆಪೋ ದರ ಹೆಚ್ಚಾಗುವ ಭೀತಿಯಲ್ಲಿ ಏಪ್ರಿಲ್ 6 ರ ಬೆಳಗಿನ ವಹಿವಾಟಿನಲ್ಲಿ ಷೇರುಪೇಟೆಗಳು ಕುಸಿತ ಕಂಡಿದ್ದವು. ಆದರೆ, ರೆಪೋ ದರ ಹೆಚ್ಚಳ ಇಲ್ಲ ಎಂಬುದು ಖಾತ್ರಿ ಆಗುತ್ತಿದ್ದಂತೆಯೇ ಸೆನ್ಸೆಕ್ಸ್ ಮತ್ತು ನಿಫ್ಟಿಯಲ್ಲಿನ ಹೂಡಿಕೆದಾರರು ಪುಟಿದೆದಿದ್ದಾರೆ. ಸೆನ್ಸೆಕ್ಸ್ 150 ಅಂಕಗಳಷ್ಟು ಹೆಚ್ಚು ಗಳಿಕೆ ಕಂಡರೆ, ನಿಫ್ಟಿ 17,600 ಅಂಕಗಳ ಮಟ್ಟಕ್ಕಿಂತ ಮೇಲೆ ಹೋಗಿದೆ.
ಇದನ್ನೂ ಓದಿ: REPO Rate: ರೆಪೋ ದರ ಹೆಚ್ಚಿಸದಿರಲು ಆರ್ಬಿಐ ನಿರ್ಧಾರ; ತುಸು ನಿರಾಳರಾದ ಜನಸಾಮಾನ್ಯರು
ವಿವಿಧ ಬ್ಯಾಂಕುಗಳ ಷೇರುಗಳು ಗರಿಗೆದರಿವೆ. ಪಂಜಾಬ್ ನ್ಯಾಷನಲ್ ಬ್ಯಾಂಕ್ (PNB), ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾದ (SBI) ಷೇರುಗಳು ಅತಿ ಹೆಚ್ಚು ಗಳಿಕೆ ಕಂಡಿವೆ. ಐಡಿಎಫ್ಸಿ, ಬ್ಯಾಂಕ್ ಆಫ್ ಬರೋಡಾ, ಇಂಡಸ್ಇಂಡ್ ಬ್ಯಾಂಕ್ನ ಷೇರುಗಳೂ ಕೂಡ ಒಳ್ಳೆಯ ವೃದ್ಧಿ ಕಂಡಿವೆ. ಬ್ಯಾಂಕ್ ನಿಫ್ಟಿ ಸೂಚ್ಯಂಕ 41,200 ಅಂಕಗಳ ಮಟ್ಟ ತಲುಪಿದ್ದು ಗಮನಾರ್ಹ.
ಸರ್ಕಾರಿ ಬಾಂಡ್ನ ಯೀಲ್ಡ್ನಲ್ಲಿ ಯಾಕೆ ಕುಸಿತ ಆಗಿದೆ?
ಸರ್ಕಾರಿ ಬಾಂಡ್ ಎಂದರೆ ಅದು ಸರ್ಕಾರ ಸಾರ್ವಜನಿಕವಾಗಿ ವಿತರಿಸುವ ಸಾಲಪತ್ರ. ಹಣದ ಕೊರತೆಯಾದಾಗ ಸರ್ಕಾರ ಈ ರೀತಿ ಸಾಲಪತ್ರಗಳನ್ನು ವಿತರಿಸಿ ಹಣ ಪಡೆಯುತ್ತದೆ. ವಿವಿಧ ಅವಧಿಗೆ ನೀಡಲಾಗುವ ಈ ಬಾಂಡ್ಗಳಿಗೆ ಸರ್ಕಾರ ನಿರ್ದಿಷ್ಟ ಬಡ್ಡಿ ದರ ಪಾವತಿಸುತ್ತದೆ. ಇಂದು ಏಪ್ರಿಲ್ 6ರಂದು ಸರ್ಕಾರ 33 ಸಾವಿರ ಕೋಟಿ ರುಪಾಯಿ ಮೌಲ್ಯದಷ್ಟು ಬಾಂಡ್ಗಳನ್ನು ವಿತರಿಸುತ್ತದೆ.
ಇದನ್ನೂ ಓದಿ: Google Lawsuit: ಟ್ರೇಡ್ಮಾರ್ಕ್ ದುರುಪಯೋಗ: ಗೂಗಲ್ ಎಂಟರ್ಪ್ರೈಸಸ್ಗೆ 10 ಲಕ್ಷ ದಂಡ ವಿಧಿಸಿದ ದೆಹಲಿ ಹೈಕೋರ್ಟ್
ಈ ಸರ್ಕಾರಿ ಬಾಂಡ್ಗಳಿಗೆ ಬೇಡಿಕೆ ಹೆಚ್ಚಿದಷ್ಟೂ ಅದರ ರಿಟರ್ನ್ಸ್ ಮೌಲ್ಯ ಕಡಿಮೆ ಆಗುತ್ತದೆ. ಬ್ಯಾಂಕುಗಳ ಬಡ್ಡಿ ದರ ಹೆಚ್ಚಾದರೆ ಸರ್ಕಾರಿ ಬಾಂಡ್ಗಳಿಗೆ ಬೇಡಿಕೆ ಕಡಿಮೆ ಆಗುತ್ತದೆ. ಈಗ ಆರ್ಬಿಐ ತನ್ನ ಬಡ್ಡಿ ದರ ಹೆಚ್ಚಿಸದಿರಲು ನಿರ್ಧರಿಸಿರುವುದರಿಂದ ಬಾಂಡ್ಗೆ ಬೇಡಿಕೆ ಹೆಚ್ಚಾಗಿದೆ. ಪರಿಣಾಮವಾಗಿ ಅದರ ಯೀಲ್ಡ್, ಅಂದರೆ ಅದರ ಬಡ್ಡಿ ದರ ಕಡಿಮೆ ಆಗಿದೆ.
ಇನ್ನಷ್ಟು ವ್ಯವಹಾರ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
Published On - 1:05 pm, Thu, 6 April 23
