ಭಾರತದ ಜಿಡಿಪಿ ಬೆಳವಣಿಗೆ ಬಗ್ಗೆ ಹೆಚ್ಚಿದ ಭರವಸೆ; ಫಿಚ್ ಶೇ. 6.9, ಎಸ್&ಪಿ ಶೇ 7, ಒಇಸಿಡಿ ಶೇ. 7.1 ವೃದ್ಧಿಯ ಅಂದಾಜು

ನವದೆಹಲಿ, ಸೆಪ್ಟೆಂಬರ್ 23: ಜಾಗತಿಕ ಆರ್ಥಿಕ ಹಿಂಜರಿತ ಹಾಗೂ ಅಂತಾರಾಷ್ಟ್ರೀಯ ರಾಜಕೀಯ ಬಿಕ್ಕಟ್ಟುಗಳ ನಡುವೆಯೂ ಭಾರತದ ಆರ್ಥಿಕತೆಯು ಬಲವಾದ ಚೇತರಿಕೆ ಮತ್ತು ಸುಸ್ಥಿರತೆಯನ್ನು ಪ್ರದರ್ಶಿಸುತ್ತಿದೆ. ಪ್ರಮುಖ ಜಾಗತಿಕ ಆರ್ಥಿಕ ವಿಶ್ಲೇಷಣಾ ಸಂಸ್ಥೆಗಳಾದ ಒಇಸಿಡಿ, ಎಸ್&ಪಿ ಗ್ಲೋಬಲ್ ಮತ್ತು ಫಿಚ್ ರೇಟಿಂಗ್ಸ್ ಭಾರತದ 2026-27ರ ಸಾಲಿನ (FY27) ಜಿಡಿಪಿ (GDP) ಬೆಳವಣಿಗೆಯ ದರದ ಮುನ್ಸೂಚನೆಯನ್ನು ಹೆಚ್ಚಿಸಿವೆ. ಶೇ. 6.3ರಿಂದ 6.6ರವರೆಗೆ ಬೆಳವಣಿಗೆ ಆಗಬಹುದು ಎಂದು ನಿರೀಕ್ಷಿಸಿದ್ದ ಈ ಮೂರು ರೇಟಿಂಗ್ಸ್ ಸಂಸ್ಥೆಗಳು ತಮ್ಮ ಅಭಿಪ್ರಾಯ ಬದಲಿಸಿದ್ದು, ಜಿಡಿಪಿ ಬೆಳವಣಿಗೆ ಶೇ. 6.9ರಿಂದ ಶೇ. 7.1ರಷ್ಟಿರಬಹುದು ಎನ್ನುತ್ತಿವೆ.

ಪ್ರಬಲ ಆಂತರಿಕ ಅನುಭೋಗ (Domestic Consumption), ಮೂಲಸೌಕರ್ಯ ವಲಯದಲ್ಲಿ ಸರ್ಕಾರದ ಬೃಹತ್ ಹೂಡಿಕೆ ಹಾಗೂ ಖಾಸಗಿ ವಲಯದ ಸಕ್ರಿಯ ಪಾಲ್ಗೊಳ್ಳುವಿಕೆ ಈ ಅಂಶಗಳು ಆರ್ಥಿಕ ಪ್ರಗತಿಗೆ ಪ್ರಮುಖ ಕಾರಣ ಎಂದು ಸಂಸ್ಥೆಗಳು ವಿಶ್ಲೇಷಿಸಿವೆ.

OECD ಪ್ರಕಾರ 2026-27ರಲ್ಲಿ ಶೇ. 7.1 ಜಿಡಿಪಿ ವೃದ್ಧಿ

ಜಾಗತಿಕ ಆರ್ಥಿಕ ಸವಾಲುಗಳ ನಡುವೆಯೂ ಭಾರತದ ನೈಜ ಜಿಡಿಪಿ ಬೆಳವಣಿಗೆಯು ಸ್ಥಿರವಾಗಿರಲಿದೆ ಎಂದು ಒಇಸಿಡಿ (ಆರ್ಥಿಕ ಸಹಕಾರ ಮತ್ತು ಅಭಿವೃದ್ಧಿ ಸಂಸ್ಥೆ) ತಿಳಿಸಿದೆ. ಭಾರತದ ಆಂತರಿಕ ಮಾರುಕಟ್ಟೆ ಬೇಡಿಕೆ ಮತ್ತು ಸೇವಾ ವಲಯದ ಬಲವಾದ ಬೆಳವಣಿಗೆಯನ್ನು ಆಧರಿಸಿ ಈ ಹಿಂದೆ ನೀಡಿದ್ದ ಅಂದಾಜನ್ನು ಪರಿಷ್ಕರಿಸಿ ಹೆಚ್ಚಿಸಿದೆ. ಈ ಮೊದಲು ಅದು ಜಿಡಿಪಿ ಶೇ. 6.3ರಷ್ಟು ವೃದ್ಧಿಸಬಹುದು ಎಂದಿತ್ತು. ಈಗ ಶೇ. 7.1 ಪ್ರಗತಿ ಆಗಬಹುದು ಎಂದು ಹೇಳುತ್ತಿದೆ.

ಇದನ್ನೂ ಓದಿ: ಎಟಿಎಂನಿಂದ ಹಣ ಬಂದಿಲ್ಲ, ಆದರೆ ಅಕೌಂಟ್​ನಿಂದ ಹಣ ಕಡಿತವಾಗಿದೆಯಾ? ಆರ್​ಬಿಐ ನಿಯಮಗಳನ್ನು ತಿಳಿದಿರಿ

ಎಸ್&ಪಿ ಗ್ಲೋಬಲ್ ಶೇ. 6.6ರಿಂದ ಶೇ. 7

ಎಸ್&ಪಿ ಸಂಸ್ಥೆಯು ಭಾರತದ ನಿರೀಕ್ಷಿತ ಆರ್ಥಿಕ ಬೆಳವಣಿಗೆಯ ದರವನ್ನು ಏರಿಕೆ ಮಾಡಿದ್ದು, ಜಾಗತಿಕ ಪೂರೈಕೆ ಸರಪಳಿಯಲ್ಲಿ (Global Supply Chain) ಭಾರತದ ಪಾತ್ರ ಹಿರಿದಾಗುತ್ತಿರುವುದು ಮತ್ತು ಉತ್ಪಾದನಾ (Manufacturing) ವಲಯದ ಉತ್ತೇಜನವು ದೇಶದ ಜಿಡಿಪಿಗೆ ದೊಡ್ಡ ಬಲ ತಂದಿದೆ ಎಂದು ಅಭಿಪ್ರಾಯಪಟ್ಟಿದೆ. ಈ ಮೊದಲು ಅದು ಶೇ. 6.6ರಷ್ಟು ಜಿಡಿಪಿ ವೃದ್ಧಿಸಬಹುದು ಎಂದಿತ್ತು. ಈಗ ನಿರೀಕ್ಷೆಯನ್ನು ಶೇ. 7ಕ್ಕೆ ಹೆಚ್ಚಿಸಿದೆ.

ಫಿಚ್ ರೇಟಿಂಗ್ಸ್ ಪ್ರಕಾರ ಶೇ. 6.9 ಬೆಳವಣಿಗೆ

ಫಿಚ್ (Fitch Ratings) ತನ್ನ ಇತ್ತೀಚಿನ ಜಾಗತಿಕ ಆರ್ಥಿಕ ಮುನ್ಸೂಚನೆಯಲ್ಲಿ ಭಾರತದ ಜಿಡಿಪಿ ದರದ ನಿರೀಕ್ಷೆಯನ್ನು ಶೇ. 6.4ರಿಂದ ಶೇ. 6.9ಕ್ಕೆ ಹೆಚ್ಚಿಸಿದೆ. ಭಾರತದಲ್ಲಿ ಚಿಲ್ಲರೆ ಹಣದುಬ್ಬರ (Inflation) ನಿಯಂತ್ರಣಕ್ಕೆ ಬರುತ್ತಿರುವುದು ಹಾಗೂ ಭಾರತೀಯ ರಿಸರ್ವ್ ಬ್ಯಾಂಕ್ (RBI) ಹಣಕಾಸು ನೀತಿಯಲ್ಲಿ ಕಾಯ್ದುಕೊಂಡಿರುವ ಸ್ಥಿರತೆಯು ಆರ್ಥಿಕತೆಗೆ ಪೂರಕವಾಗಿದೆ ಎಂದು ಹೇಳಿದೆ.

ಆರ್ಥಿಕ ದರ ಏರಿಕೆಗೆ ನಿರೀಕ್ಷೆ ಹೆಚ್ಚಲು ಏನು ಕಾರಣ?

• ಭಾರೀ ಸರ್ಕಾರಿ ಬಂಡವಾಳ ಹೂಡಿಕೆ (Capital Expenditure): ರಾಷ್ಟ್ರೀಯ ಹೆದ್ದಾರಿ, ರೈಲ್ವೆ, ಬಂದರುಗಳು ಹಾಗೂ ಶಕ್ತಿ ವಲಯದ ಮೂಲಸೌಕರ್ಯ ಅಭಿವೃದ್ಧಿಗೆ ಕೇಂದ್ರ ಸರ್ಕಾರ ನೀಡುತ್ತಿರುವ ಆದ್ಯತೆ.
• ಖಾಸಗಿ ವಲಯದ ಚೇತರಿಕೆ: ವಿವಿಧ ವಲಯಗಳಲ್ಲಿ ಖಾಸಗಿ ಕಂಪನಿಗಳ ಬಂಡವಾಳ ಹೂಡಿಕೆ ಹೆಚ್ಚುತ್ತಿರುವುದು.
• ಸೇವಾ ಮತ್ತು ಡಿಜಿಟಲ್ ರಫ್ತು: ಜಾಗತಿಕ ಮಟ್ಟದಲ್ಲಿ ಭಾರತದ ಐಟಿ, ಆರ್‌ಆಂಡ್‌ಡಿ (R&D) ಹಾಗೂ ತಾಂತ್ರಿಕ ಸೇವೆಗಳಿಗೆ ಮುಂದುವರಿದಿರುವ ಭಾರಿ ಬೇಡಿಕೆ.
• ಸ್ಥಿರ ಹಣದುಬ್ಬರ ಮತ್ತು ಗ್ರಾಹಕರ ಬೇಡಿಕೆ: ಹಬ್ಬಗಳ ಸಾಲು ಮತ್ತು ಗ್ರಾಮೀಣ ಆರ್ಥಿಕತೆಯ ಚೇತರಿಕೆಯಿಂದಾಗಿ ದೇಶಿಯವಾಗಿ ಸರಕುಗಳ ಮಾರಾಟದಲ್ಲಿ ಕಂಡುಬಂದಿರುವ ಪ್ರಗತಿ.

ಇದನ್ನೂ ಓದಿ: ಬ್ಯಾಂಕ್‌ಗೆ ಯಾವುದೇ ಕೆಲಸಕ್ಕೆ ಹೋದರೂ ಈ 3 ದಾಖಲೆಗಳು ನಿಮ್ಮ ಕೈಯಲ್ಲಿರಲಿ: ಕೆಲಸ ಕಾರ್ಯ ಸುಲಭ

ಈ ಮೂರೂ ಪ್ರಮುಖ ಸಂಸ್ಥೆಗಳ ಪರಿಷ್ಕೃತ ಮುನ್ಸೂಚನೆಯು, ಭಾರತವು ಜಗತ್ತಿನ ಅತಿ ವೇಗವಾಗಿ ಬೆಳೆಯುತ್ತಿರುವ ಪ್ರಮುಖ ಆರ್ಥಿಕತೆಯಾಗಿ ತನ್ನ ಸ್ಥಾನವನ್ನು ಮತ್ತಷ್ಟು ಗಟ್ಟಿಗಳಿಸಿಕೊಂಡಿರುವುದನ್ನು ಸ್ಪಷ್ಟಪಡಿಸಿದೆ. ಇದಕ್ಕೆ ಇಂಬು ಕೊಡುವಂತೆ, ಭಾರತದ ಆರ್ಥಿಕ ಬೆಳವಣಿಗೆಯು ಎಲ್ಲರ ನಿರೀಕ್ಷೆಗಳನ್ನು ಮೀರಿ ಆಗುತ್ತಿದೆ. ಶೇ. 7ರ ಆಸುಪಾಸಿನ ದರದಲ್ಲಿ ಜಿಡಿಪಿ ವೃದ್ಧಿಸುತ್ತಾ ಬರುತ್ತಿದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ