ಒನ್ ಸೈಡ್ ಪ್ರೇಮಿಗಳು ನೋಡ್ಲೇಬೇಕಾದ ಟ್ರೇಲರ್ ಇದು; ಇಲ್ಲಿ ಒಳ್ಳೆಯವರು ಯಾರು? ಕೆಟ್ಟವರು ಯಾರು?
Ek Villain Returns Trailer: ಜುಲೈ 29ರಂದು ‘ಏಕ್ ವಿಲನ್ ರಿಟರ್ನ್ಸ್’ ಸಿನಿಮಾ ಬಿಡುಗಡೆ ಆಗಲಿದೆ. ಈ ಚಿತ್ರದ ಕಥೆ ಏನು ಎಂಬ ಎಳೆಯನ್ನು ಟ್ರೇಲರ್ನಲ್ಲಿ ಬಿಟ್ಟುಕೊಡಲಾಗಿದೆ.
Updated on:Mar 07, 2023 | 11:23 AM
ಬ್ಯಾಕ್ ಟು ಬ್ಯಾಕ್ ಸೋಲಿನಿಂದ ಬಾಲಿವುಡ್ (Bollywood) ಮಂಕಾಗಿದೆ. ಅಕ್ಷಯ್ ಕುಮಾರ್ ಅವರಂತಹ ಸ್ಟಾರ್ ನಟರ ಸಿನಿಮಾಗಳು ಕೂಡ ಫ್ಲಾಪ್ ಆಗಿವೆ. ಇತ್ತೀಚಿನ ದಿನಗಳಲ್ಲಿ ಹಿಂದಿ ಚಿತ್ರರಂಗದಲ್ಲಿ ಭರ್ಜರಿ ಗೆಲುವು ಕಂಡಿದ್ದು ‘ಭೂಲ್ ಭುಲಯ್ಯ 2’ ಸಿನಿಮಾ ಮಾತ್ರ. ಈಗ ಮತ್ತೊಂದು ಸಿನಿಮಾ ಗೆಲ್ಲುವ ಭರವಸೆಯೊಂದಿಗೆ ಥಿಯೇಟರ್ ಬಾಗಿಲು ತಟ್ಟುತ್ತಿದೆ. ಹೌದು, ಬಹುನಿರೀಕ್ಷಿತ ‘ಏಕ್ ವಿಲನ್ ರಿಟರ್ನ್ಸ್’ (Ek Villain 2) ಚಿತ್ರದ ಟ್ರೇಲರ್ ಬಿಡುಗಡೆ ಆಗಿದ್ದು, ಪ್ರೇಕ್ಷಕರಲ್ಲಿ ಭರವಸೆ ಮೂಡಿಸುವಲ್ಲಿ ಯಶಸ್ವಿ ಆಗಿದೆ. ಬಿಡುಗಡೆಯಾಗ ಕೆಲವೇ ಗಂಟೆಗಳಲ್ಲಿ ಈ ಟ್ರೇಲರ್ (Ek Villain Returns Trailer) 18 ಮಿಲಿಯನ್ ಬಾರಿ ವೀಕ್ಷಣೆ ಕಂಡಿದೆ. ಇದರಿಂದ ಚಿತ್ರತಂಡದ ಬಲ ಹೆಚ್ಚಿದಂತಾಗಿದೆ. ಜಾನ್ ಅಬ್ರಾಹಂ, ಅರ್ಜುನ್ ಕಪೂರ್, ತಾರಾ ಸುತಾರಿಯಾ, ದಿಶಾ ಪಟಾನಿ ಅವರು ಈ ಚಿತ್ರದಲ್ಲಿ ಪ್ರಮುಖ ಪಾತ್ರಗಳನ್ನು ಮಾಡಿದ್ದಾರೆ.
ಜುಲೈ 29ರಂದು ‘ಏಕ್ ವಿಲನ್ ರಿಟರ್ನ್ಸ್’ ಸಿನಿಮಾ ಬಿಡುಗಡೆ ಆಗಲಿದೆ. ಮೋಹಿತ್ ಸೂರಿ ಅವರು ಈ ಚಿತ್ರಕ್ಕೆ ನಿರ್ದೇಶನ ಮಾಡಿದ್ದಾರೆ. ಈ ಚಿತ್ರದ ಕಥೆ ಏನು ಎಂಬ ಎಳೆಯನ್ನು ಟ್ರೇಲರ್ನಲ್ಲಿ ಬಿಟ್ಟುಕೊಡಲಾಗಿದೆ. ಒಬ್ಬ ವಿಲನ್ ಇದ್ದಾನೆ. ಅವನು ಒನ್ ಸೈಡ್ ಲವ್ ಮಾಡುವ ಪ್ರೇಮಿಗಳನ್ನೇ ಟಾರ್ಗೆಟ್ ಮಾಡುತ್ತಾನೆ ಮತ್ತು ಭೀಕರವಾಗಿ ಕೊಲ್ಲುತ್ತಾನೆ! ಈ ಟ್ರೇಲರ್ ನೋಡಿದ ಬಳಿಕ ಎಲ್ಲ ಒನ್ ಸೈಡ್ ಪ್ರೇಮಿಗಳಿಗೆ ಕೌತುಕ ಮೂಡಿದೆ.
ಅರ್ಜುನ್ ಕಪೂರ್ ಮತ್ತು ಜಾನ್ ಅಬ್ರಾಹಂ ಅವರು ಮಾಡಿರುವ ಪಾತ್ರಗಳಿಗೆ ಎರಡು ಶೇಡ್ ಇರುವಂತಿದೆ. ಒಮ್ಮೆ ಹೀರೋ ರೀತಿ ಕಾಣುವ ಪಾತ್ರ, ನಂತರದಲ್ಲಿ ವಿಲನ್ ಆಗತ್ತದೆ. ಅಷ್ಟೇ ಅಲ್ಲ, ನಾಯಕಿಯರ ಪಾತ್ರಗಳು ಕೂಡ ಹಾಗೆಯೇ ಇದೆ ಎಂಬ ಸುಳಿವು ಟ್ರೇಲರ್ನಲ್ಲಿ ಸಿಕ್ಕಿದೆ. ಒಟ್ಟಿನಲ್ಲಿ ಒಳ್ಳೆಯವರು ಯಾರು? ಕೆಟ್ಟವರು ಯಾರು ಎಂಬುದನ್ನು ಸಿನಿಮಾ ನೋಡಿಯೇ ತಿಳಿಯಬೇಕಿದೆ.
‘ಏಕ್ ವಿಲನ್’ ಚಿತ್ರ 2014ರಲ್ಲಿ ಬಿಡುಗಡೆಯಾಗಿ ಗೆಲುವು ಕಂಡಿತ್ತು ಈಗ ಅದರ ಪಾರ್ಟ್ 2 ಬರುತ್ತಿದೆ. ಹಳೇ ಕಥೆಗೂ ಹೊಸ ಕಥೆಗೂ ಏನು ಲಿಂಕ್ ಇದೆ ಎಂಬುದನ್ನು ತಿಳಿಯುವ ಕುತೂಹಲ ಪ್ರೇಕ್ಷಕರಲ್ಲಿ ಸೃಷ್ಟಿ ಆಗಿದೆ. ಜಾನ್ ಅಬ್ರಾಹಂ ನಟನೆಯ ‘ಅಟ್ಯಾಕ್’ ಸಿನಿಮಾ ಈ ವರ್ಷ ಏಪ್ರಿಲ್ 1ರಂದು ತೆರೆಕಂಡು ಸೋಲುಂಡಿತು. ಹಾಗಾಗಿ ‘ಏಕ್ ವಿಲನ್ ರಿಟರ್ನ್ಸ್’ ಮೂಲಕ ಗೆಲ್ಲಲೇಬೇಕಾದ ಅನಿವಾರ್ಯತೆ ಅವರಿಗೆ ಇದೆ.
Published On - 7:10 am, Fri, 1 July 22
