Pooja Hegde: ಪೂಜಾ ಹೆಗ್ಡೆಗೆ ನಿರ್ಮಾಪಕರು ಕಾರು ಕೊಡಿಸಿದ್ದು ನಿಜವೇ? ಮೌನ ಮುರಿದ ಬಹುಬೇಡಿಕೆಯ ನಟಿ
Kisi Ka Bhai Kisi Ki Jaan: ಬಾಲಿವುಡ್ ಮತ್ತು ದಕ್ಷಿಣ ಭಾರತದಲ್ಲಿ ಪೂಜಾ ಹೆಗ್ಡೆ ಅವರಿಗೆ ಸಖತ್ ಬೇಡಿಕೆ ಇದೆ. ಅವರ ಬಗ್ಗೆ ಹಲವಾರು ಗಾಸಿಪ್ಗಳು ಪ್ರಕಟ ಆಗುತ್ತಿವೆ.
Updated on: Apr 16, 2023 | 7:56 AM
ಮುಖ್ಯಾಂಶಗಳು
- ಬಹುಭಾಷಾ ನಟಿ ಪೂಜಾ ಹೆಗ್ಡೆ ಬಗ್ಗೆ ಹಬ್ಬಿದೆ ಹಲವಾರು ಗಾಸಿಪ್
- ನಿರ್ಮಾಪಕರು ಕಾರು ಕೊಡಿಸಿದ್ದಾರೆ ಎಂಬ ಮಾತಿಗೆ ನಟಿಯ ಪ್ರತಿಕ್ರಿಯೆ
- ತಮ್ಮ ಬಗ್ಗೆ ಹರಡಿರುವ ಗಾಸಿಪ್ ಕೇಳಿ ಕೇಳಿ ಸುಸ್ತಾಗಿರುವ ಪೂಜಾ ಹೆಗ್ಡೆ
ಪ್ರಚಲಿತದಲ್ಲಿ ಇರುವ ಹೀರೋಯಿನ್ಗಳ ಬಗ್ಗೆ ಒಂದಿಲ್ಲ ಒಂದು ಗಾಸಿಪ್ ಕೇಳಿಬರುತ್ತಲೇ ಇರುತ್ತದೆ. ಲವ್, ಡೇಟಿಂಗ್, ಸಂಭಾವನೆ ಇತ್ಯಾದಿ ವಿಷಯಗಳ ಬಗ್ಗೆ ಅಂತೆ-ಕಂತೆಗಳು ಹಬ್ಬಿರುತ್ತವೆ. ನಟಿ ಪೂಜಾ ಹೆಗ್ಡೆ (Pooja Hegde) ವಿಚಾರದಲ್ಲೂ ಹಾಗೆಯೇ ಆಗಿದೆ. ಬ್ಯಾಕ್ ಟು ಬ್ಯಾಕ್ ಸಿನಿಮಾಗಳಲ್ಲಿ ಬ್ಯುಸಿ ಆಗಿರುವ ಅವರ ಬಗ್ಗೆ ಇಲ್ಲಸಲ್ಲದ ಗಾಸಿಪ್ಗಳನ್ನು ಹಬ್ಬಿಸಲಾಗಿದೆ. ಈಗ ಅವುಗಳಿಗೆಲ್ಲ ಅವರು ಸ್ಪಷ್ಟನೆ ನೀಡುತ್ತಿದ್ದಾರೆ. ಪೂಜಾ ಹೆಗ್ಡೆ ಮತ್ತು ಸಲ್ಮಾನ್ ಖಾನ್ ಜೊತೆಯಾಗಿ ನಟಿಸಿದ ‘ಕಿಸಿ ಕ ಭಾಯ್ ಕಿಸಿ ಕಿ ಜಾನ್’ (Kisi Ka Bhai Kisi Ki Jaan) ಸಿನಿಮಾ ಬಿಡುಗಡೆಗೆ ಸಜ್ಜಾಗಿದೆ. ಈದ್ ಪ್ರಯುಕ್ತ ಏಪ್ರಿಲ್ 21ರಂದು ಈ ಚಿತ್ರ ತೆರೆಕಾಣಲಿದೆ. ಆ ಸಲುವಾಗಿ ಅನೇಕ ಮಾಧ್ಯಮಗಳಿಗೆ ಪೂಜಾ ಹೆಗ್ಡೆ ಸಂದರ್ಶನ ನೀಡಿದ್ದಾರೆ. ತಮಗೆ ನಿರ್ಮಾಪಕರೊಬ್ಬರಿಂದ ಕಾರು ಉಡುಗೊರೆಯಾಗಿ ಸಿಕ್ಕಿದೆ ಎಂಬ ಗಾಸಿಪ್ (Gossip) ಬಗ್ಗೆಯೂ ಅವರು ಪ್ರತಿಕ್ರಿಯೆ ನೀಡಿದ್ದಾರೆ.
ನಟ-ನಟಿಯರ ಕೆಲಸ ಬಹಳ ಮೆಚ್ಚುಗೆ ಆದಾಗ ಅವರಿಗೆ ನಿರ್ಮಾಪಕರು ದುಬಾರಿ ಬೆಲೆಯ ಗಿಫ್ಟ್ ನೀಡುತ್ತಾರೆ. ಅದೇ ರೀತಿ ಪೂಜಾ ಹೆಗ್ಡೆ ಅವರಿಗೆ ನಿರ್ಮಾಪಕರು ಐಷಾರಾಮಿ ಕಾರನ್ನು ಉಡುಗೊರೆಯಾಗಿ ನೀಡಿದ್ದಾರೆ ಎಂದು ಗಾಸಿಪ್ ಹಬ್ಬಿತ್ತು. ಆದರೆ ಅದು ನಿಜವಲ್ಲ ಎಂದು ‘ಬಾಲಿವುಡ್ ಬಬಲ್’ಗೆ ನೀಡಿದ ಸಂದರ್ಶನದಲ್ಲಿ ಪೂಜಾ ಹೆಗ್ಡೆ ಹೇಳಿದ್ದಾರೆ.
ಇದನ್ನೂ ಓದಿ: Pooja Hegde: ‘ನಾನು ಸಿಂಗಲ್’; ಸಲ್ಮಾನ್ ಖಾನ್ ಜೊತೆಗಿನ ಡೇಟಿಂಗ್ ವಿಚಾರದಲ್ಲಿ ಸ್ಪಷ್ಟನೆ ನೀಡಿದ ಪೂಜಾ ಹೆಗ್ಡೆ
‘ನಾನು ಇಂಥ ಗಾಸಿಪ್ಗಳನ್ನೆಲ್ಲ ಓದುತ್ತಾ ಇರುತ್ತೇನೆ. ನನ್ನ ಪಾಲಕರು ಅದನ್ನು ನನಗೆ ಕಳಿಸುತ್ತಾರೆ. ಇದೆಲ್ಲ ನಿಜವೇ ಎಂದು ಪ್ರಶ್ನಿಸುತ್ತಾರೆ. ನನ್ನನ್ನು ಕಂಫರ್ಟ್ ಆಗಿಡಲು ನಿರ್ಮಾಪಕರೊಬ್ಬರು ಕಾರು ಗಿಫ್ಟ್ ನೀಡಿದ್ದಾರೆ ಎಂದು ಇತ್ತೀಚೆಗೆ ಸುದ್ದಿ ಪ್ರಕಟ ಆಗಿತ್ತು. ಅದರ ಸ್ಕ್ರೀನ್ ಶಾಟ್ ಅನ್ನು ನಾನು ನಿರ್ಮಾಪಕರಿಗೆ ಕಳಿಸಿದೆ. ನನಗೆ ನೀವು ಕೊಡಬೇಕು ಎಂದುಕೊಂಡಿದ್ದ ಸರ್ಪ್ರೈಸ್ ಹಾಳಾಗಿದೆ ಅಂತ ಅವರಿಗೆ ಹೇಳಿದೆ. ಹೀಗೆ ಅಪಪ್ರಚಾರ ಮಾಡುವುದೇ ಹೌದಾದರೆ ಕಡೇಪಕ್ಷ ನನಗೆ ಆ ಕಾರನ್ನಾದರೂ ಕೊಡಿ’ ಎಂದು ಪೂಜಾ ಹೆಗ್ಡೆ ಹೇಳಿದ್ದಾರೆ.
ಇದನ್ನೂ ಓದಿ: Pooja Hegde: ಬಹುಭಾಷಾ ನಟಿ ಪೂಜಾ ಹೆಗ್ಡೆ ಹೊಸ ಲುಕ್ ಹೇಗಿದೆ ನೋಡಿ
ಬಾಲಿವುಡ್ ಮತ್ತು ದಕ್ಷಿಣ ಭಾರತದಲ್ಲಿ ಪೂಜಾ ಹೆಗ್ಡೆ ಅವರಿಗೆ ಸಖತ್ ಬೇಡಿಕೆ ಇದೆ. ಆದರೆ ಇತ್ತೀಚೆಗೆ ಅವರು ನಟಿಸಿದ ಯಾವ ಸಿನಿಮಾಗಳೂ ಗೆಲ್ಲುತ್ತಿಲ್ಲ. ಪ್ರಭಾಸ್ ಜೊತೆ ನಟಿಸಿದ ‘ರಾಧೆ ಶ್ಯಾಮ್’, ರಣವೀರ್ ಸಿಂಗ್ ಜೊತೆ ನಟಿಸಿದ ‘ಸರ್ಕಸ್’ ಮುಂತಾದ ಚಿತ್ರಗಳು ಸೋತವು. ಹಾಗಿದ್ದರೂ ಪೂಜಾ ಹೆಗ್ಡೆಗೆ ಅವಕಾಶಗಳು ಕಡಿಮೆ ಆಗಿಲ್ಲ.
ಇದನ್ನೂ ಓದಿ: Pooja Hegde: ‘ಬಜರಂಗಿ ಭಾಯಿಜಾನ್’ ಚಿತ್ರದ ಸೀಕ್ವೆಲ್ನಲ್ಲಿ ಕರೀನಾ ಕಪೂರ್ ಖಾನ್ ಬದಲಿಗೆ ಪೂಜಾ ಹೆಗ್ಡೆ?
‘ಕಿಸಿ ಕ ಭಾಯ್ ಕಿಸಿ ಕಿ ಜಾನ್’ ಸಿನಿಮಾದಲ್ಲಿ ದಕ್ಷಿಣ ಭಾರತದ ಪ್ರೇಕ್ಷಕರನ್ನೂ ಸೆಳೆಯುವ ಪ್ರಯತ್ನ ಆಗಿದೆ. ತೆಲುಗಿನ ಸ್ಟಾರ್ ನಟ ದಗ್ಗುಬಾಟಿ ವೆಂಕಟೇಶ್ ಅವರು ಈ ಸಿನಿಮಾದಲ್ಲಿ ನಟಿಸಿದ್ದಾರೆ. ಜೊತೆಗೆ, ಜಗಪತಿ ಬಾಬು ಅವರು ಖಳನಾಯಕನಾಗಿ ಅಬ್ಬರಿಸಿದ್ದಾರೆ. ತೆಲುಗು ಹುಡುಗಿ ಪಾತ್ರದಲ್ಲಿ ಪೂಜಾ ಹೆಗ್ಡೆ ನಟಿಸಿದ್ದಾರೆ. ‘ಯೆಂಟಮ್ಮಾ..’ ಹಾಡಿನಲ್ಲಿ ರಾಮ್ ಚರಣ್ ಅವರು ಅತಿಥಿ ಪಾತ್ರ ಮಾಡಿದ್ದಾರೆ.
ಹೆಚ್ಚಿನ ಸಿನಿಮಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ.
