Shah Rukh Khan: ಶಾರುಖ್ ಖಾನ್ ಬಾಲಿವುಡ್ಗೆ ಕಾಲಿಟ್ಟು ಕಳೆಯಿತು 30 ವರ್ಷ; 14 ಬಾರಿ ‘ಫಿಲ್ಮ್ಫೇರ್’ ಪಡೆದ ಕಿಂಗ್ ಖಾನ್

30 Years of Shah Rukh Khan: ಬಾಕ್ಸ್ ಆಫೀಸ್ನಲ್ಲಿ ಶಾರುಖ್ ಖಾನ್ ಅವರ ಸಿನಿಮಾಗಳು ಲೆಕ್ಕವಿಲ್ಲದಷ್ಟು ದಾಖಲೆಗಳನ್ನು ಮಾಡಿವೆ. ಪ್ರಶಸ್ತಿಗಳಲ್ಲಿ ಬಾಚಿಕೊಳ್ಳುವಲ್ಲಿಯೂ ಅವರು ಹಿಂದೆ ಬಿದ್ದಿಲ್ಲ.

ಶಾರುಖ್ ಖಾನ್

TV9 Web | Edited By: ಮದನ್ ಕುಮಾರ್|
Updated on: Jun 25, 2022 | 11:46 AM

ನಟ ಶಾರುಖ್ ಖಾನ್ (Shah Rukh Khan) ಪಾಲಿಗೆ ಜೂನ್ 25 ವಿಶೇಷ ದಿನ. ಯಾಕೆಂದರೆ ಇದು ಅವರ ಮೊದಲ ಸಿನಿಮಾ ಬಿಡುಗಡೆ ಆದ ದಿನಾಂಕ. ಹೌದು, ಶಾರುಖ್ ಖಾನ್ ಹೀರೋ ಆಗಿ ನಟಿಸಿದ್ದ ‘ದೀವಾನ’ ಸಿನಿಮಾ 1992ರ ಜೂನ್ 25ರಂದು ಬಿಡುಗಡೆ ಆಯಿತು. ಮೊದಲ ಚಿತ್ರಕ್ಕೆ ಫಿಲ್ಮ್ಫೇರ್ (Filmfare) ಪ್ರಶಸ್ತಿ ಪಡೆಯುವಲ್ಲಿ ಅವರು ಯಶಸ್ವಿ ಆದರು. ಆ ಬಳಿಕ ಅವರಿಗೆ ಬ್ಯಾಕ್ ಟು ಬ್ಯಾಕ್ ಹಿಟ್ ಸಿಗುತ್ತಾ ಹೋಯಿತು. ಬಳಿಕ ಬಾಲಿವುಡ್ನಲ್ಲಿ (Bollywood) ಶಾರುಖ್ ಅವರು ಸ್ಟಾರ್ ನಟನಾಗಿ ಮೆರೆದರು. ಹಲವು ಸೂಪರ್ ಹಿಟ್ ಸಿನಿಮಾಗಳನ್ನು ನೀಡಿ ‘ಕಿಂಗ್ ಖಾನ್’ ಎನಿಸಿಕೊಂಡರು. ಇಷ್ಟೆಲ್ಲ ಸಾಧನೆ ಮಾಡಿದ ಶಾರುಖ್ ಖಾನ್ ಅವರು ಚಿತ್ರರಂಗಕ್ಕೆ ಕಾಲಿಟ್ಟು ಇಂದಿಗೆ 30 ವರ್ಷ ಕಳೆದಿದೆ. ಹಾಗಾಗಿ ಈ ದಿನವನ್ನು ಅಭಿಮಾನಿಗಳು ಸಂಭ್ರಮಿಸುತ್ತಿದ್ದಾರೆ.

ಶಾರುಖ್ ಖಾನ್ ಅವರು ಸಿನಿಮಾ ಜಗತ್ತಿಗೆ ಕಾಲಿಡುವುದಕ್ಕೂ ಮುನ್ನ ಕಿರುತೆರೆಯಲ್ಲಿ ನಟಿಸುತ್ತಿದ್ದರು. ಬಳಿಕ ಅವರಿಗೆ ದೊಡ್ಡ ಪರದೆಯಲ್ಲಿ ಬ್ರೇಕ್ ಸಿಕ್ಕಿತು. 90ರ ದಶಕದಲ್ಲಿ ಶಾರುಖ್ ಖಾನ್ ಅವರು ಮೋಸ್ಟ್ ಸೆಲೆಬ್ರೇಟೆಡ್ ನಟನಾಗಿ ಮೆರೆದರು. 1993ರಲ್ಲಿ ‘ಬಾಜಿಗರ್’, ‘ಡರ್’ ಸಿನಿಮಾಗಳಲ್ಲಿನ ಅವರ ಅಭಿನಯಕ್ಕೆ ಜನರು ಫಿದಾ ಆದರು. ಈ ಎರಡೂ ಚಿತ್ರಗಳಿಗೆ ಅವರು ಫಿಲ್ಮ್ ಫೇರ್ ಪ್ರಶಸ್ತಿ ಪಡೆದುಕೊಂಡರು. ಮರುವರ್ಷ ತೆರೆಕಂಡ ‘ಕಭಿ ಹಾ ಕಭಿ ನಾ’ ಸಿನಿಮಾಗೂ ಶಾರುಖ್ ಫಿಲ್ಮ್ ಫೇರ್ ಅವಾರ್ಡ್ ಬಾಚಿಕೊಂಡರು. ಈವರೆಗೂ 14 ಬಾರಿ ಫಿಲ್ಮ್ ಫೇರ್ ಪಡೆದ ಖ್ಯಾತಿ ಅವರಿಗೆ ಸಲ್ಲುತ್ತದೆ.

ಬಾಕ್ಸ್ ಆಫೀಸ್ನಲ್ಲಿ ಶಾರುಖ್ ಖಾನ್ ಅವರ ಸಿನಿಮಾಗಳು ಲೆಕ್ಕವಿಲ್ಲದಷ್ಟು ದಾಖಲೆಗಳನ್ನು ಮಾಡಿವೆ. ವಿದೇಶದಲ್ಲಿಯೂ ಅವರಿಗೆ ಅಭಿಮಾನಿಗಳಿದ್ದಾರೆ. ವಿಶ್ವ ಬಾಕ್ಸ್ ಆಫೀಸ್ನಲ್ಲಿ ಬಾಲಿವುಡ್ ಸಿನಿಮಾಗಳು ಬಹುಕೋಟಿ ಕಮಾಯಿ ಮಾಡಲು ಕಾರಣರಾದ ಮೊದಲಿಗರಲ್ಲಿ ಶಾರುಖ್ ಕೂಡ ಪ್ರಮುಖರು. ಇತ್ತೀಚಿನ ವರ್ಷಗಳಲ್ಲಿ ಶಾರುಖ್ ಖಾನ್ ಅವರ ಅದೃಷ್ಟ ಕೊಂಚ ಕೈಕೊಟ್ಟಿದೆ. ಮಾಡಿದ ಸಿನಿಮಾಗಳು ಕೈ ಹಿಡಿಯುತ್ತಿಲ್ಲ. ಹೋದಲ್ಲೆಲ್ಲ ವಿವಾದ ಆಗುತ್ತಿದೆ. ಪುತ್ರ ಆರ್ಯನ್ ಖಾನ್ ಮೇಲಿನ ಡ್ರಗ್ಸ್ ಕೇಸ್ ಆರೋಪದಿಂದ ಒಂದಷ್ಟು ಹಿನ್ನಡೆ ಆಯಿತು. ಆದರೂ ಶಾರುಖ್ಗೆ ಇರುವ ಬೇಡಿಕೆ ಕಡಿಮೆ ಆಗಿಲ್ಲ. ಸದ್ಯ ಬ್ಯಾಕ್ ಟು ಬ್ಯಾಕ್ ಸಿನಿಮಾಗಳಲ್ಲಿ ಅವರು ಬ್ಯುಸಿ ಆಗಿದ್ದಾರೆ. ‘ಜವಾನ್’, ‘ಡಂಕಿ’, ‘ಪಠಾಣ್’ ಸಿನಿಮಾಗಳ ಕೆಲಸಗಳು ಭರದಿಂದ ಸಾಗುತ್ತಿವೆ.

ಇದನ್ನೂ ಓದಿ