ಅಭಿಮಾನಿಗಳ ದರ್ಶನಕ್ಕಾಗಿ ಶಾರುಖ್ ಖಾನ್ ಮನೆ ಮುಂದೆ ನಿರ್ಮಾಣವಾಗುತ್ತಿದೆ ಹೊಸ ಗ್ಯಾಲರಿ

ಬಾಲಿವುಡ್ ಬಾದ್‌ಶಾ ಶಾರುಖ್ ಖಾನ್ ಅವರ ಮುಂಬೈನ ಐಷಾರಾಮಿ ಬಂಗಲೆ ‘ಮನ್ನತ್’ ಪ್ರಸ್ತುತ ನವೀಕರಣಗೊಳ್ಳುತ್ತಿದೆ. ಸುಮಾರು 300 ಕೋಟಿ ರೂಪಾಯಿ ಮೌಲ್ಯದ ಈ ಪ್ರಸಿದ್ಧ ನಿವಾಸದಲ್ಲಿ ಭಾರಿ ದುರಸ್ತಿ ಮತ್ತು ವಿಸ್ತರಣೆ ಕಾಮಗಾರಿಗಳು ನಡೆಯುತ್ತಿವೆ. ಈ ಕಾರಣಕ್ಕಾಗಿ ಶಾರುಖ್ ತಮ್ಮ ಕುಟುಂಬದೊಂದಿಗೆ ತಾತ್ಕಾಲಿಕವಾಗಿ ಬೇರೆ ಮನೆಗೆ ವಾಸ್ತವ್ಯ ಬದಲಾಯಿಸಿದ್ದಾರೆ. ಅಭಿಮಾನಿಗಳ ನೆಚ್ಚಿನ ಮನ್ನತ್ ಶೀಘ್ರದಲ್ಲೇ ಹೊಸ ರೂಪದಲ್ಲಿ ಕಂಗೊಳಿಸಲಿದೆ.

ಇತ್ತೀಚೆಗೆ ನಡೆದ ‘#AskSRK’ ಸಂವಾದದಲ್ಲಿ ಅಭಿಮಾನಿಯೊಬ್ಬರು ಮನ್ನತ್ ಬಾಲ್ಕನಿ ಕುರಿತು ಶಾರುಖ್ ಅವರನ್ನು ಪ್ರಶ್ನಿಸಿದ್ದರು. ಅದಕ್ಕೆ ತಮ್ಮದೇ ಶೈಲಿಯಲ್ಲಿ ಉತ್ತರಿಸಿದ ನಟ, ‘ಈಗ ಹೊಸ ಗ್ಯಾಲರಿ ನಿರ್ಮಾಣವಾಗುತ್ತಿದೆ’ ಎಂದು ತಿಳಿಸಿದ್ದಾರೆ. ಹೊಸ ಗ್ಯಾಲರಿಯಿಂದ ಮತ್ತಷ್ಟು ಪ್ರಕಾಶಮಾನವಾಗಿ ಕಾಣಿಸಿಕೊಳ್ಳುವುದಾಗಿ ಅವರು ತಮಾಷೆಯಾಗಿ ಹೇಳಿದ್ದಾರೆ. ಭವಿಷ್ಯದಲ್ಲಿ ಅಭಿಮಾನಿಗಳನ್ನು ಭೇಟಿಯಾಗಲು ಈ ಹೊಸ ಗ್ಯಾಲರಿಯನ್ನು ಬಳಸುವ ಸುಳಿವು ನೀಡಿದ್ದಾರೆ.

ಮನ್ನತ್ ಬಂಗಲೆಯ ಹಿಂಭಾಗದ ಕಟ್ಟಡಕ್ಕೆ ಹೊಸದಾಗಿ ಎರಡು ಮಹಡಿಗಳನ್ನು ಸೇರಿಸಲಾಗುತ್ತಿದೆ. ಈ ಮೂಲಕ ಕಟ್ಟಡದ ವಿಸ್ತೀರ್ಣವು ಮತ್ತಷ್ಟು ಹೆಚ್ಚಾಗಲಿದೆ. ಆದರೆ ಪಾರಂಪರಿಕ ಕಟ್ಟಡವಾಗಿರುವ ಪ್ರಮುಖ ಬಂಗಲೆಗೆ ಯಾವುದೇ ಬದಲಾವಣೆ ಮಾಡುತ್ತಿಲ್ಲ. ಕರಾವಳಿ ನಿಯಂತ್ರಣ ವಲಯದ ನಿಯಮಗಳ ಪ್ರಕಾರವೇ ಈ ಕಾಮಗಾರಿಗಳು ನಡೆಯುತ್ತಿವೆ. ಮೂಲ ಕಟ್ಟಡದ ಸೌಂದರ್ಯಕ್ಕೆ ಧಕ್ಕೆ ಬಾರದಂತೆ ದುರಸ್ತಿ ಕೈಗೊಳ್ಳಲಾಗಿದೆ.

ಸದ್ಯ ಶಾರುಖ್ ಖಾನ್ ಕುಟುಂಬವು ಬಾಂದ್ರಾ ಬಳಿಯ ಪಾಲಹಿಲ್‌ನಲ್ಲಿರುವ ಐಷಾರಾಮಿ ಅಪಾರ್ಟ್‌ಮೆಂಟ್‌ನಲ್ಲಿ ವಾಸಿಸುತ್ತಿದೆ. ಮೂರು ವರ್ಷಗಳ ಗುತ್ತಿಗೆ ಆಧಾರದ ಮೇಲೆ ಈ ತಾತ್ಕಾಲಿಕ ನಿವಾಸಕ್ಕೆ ಅವರು ತೆರಳಿದ್ದಾರೆ. ಮನ್ನತ್ ನವೀಕರಣಕ್ಕಾಗಿ ಸುಮಾರು 25 ಕೋಟಿ ರೂಪಾಯಿ ವೆಚ್ಚ ಮಾಡಲಾಗುತ್ತಿದೆ. ಎಲ್ಲ ಕಾಮಗಾರಿಗಳು ಶೀಘ್ರದಲ್ಲೇ ಪೂರ್ಣಗೊಳ್ಳುವ ನಿರೀಕ್ಷೆಯಿದೆ.

ಇದನ್ನೂ ಓದಿ: ಶಾರುಖ್ ಖಾನ್‌ಗೆ ಇರುವ ಒಂದೇ ಒಂದು ಲೋಪ ಏನೆಂದು ಬಹಿರಂಗಪಡಿಸಿದ ಪಲಾಶ್ ಸೇನ್

ಮನ್ನತ್ ನವೀಕರಣ ಕಾಮಗಾರಿಯು 2026ರ ಅಂತ್ಯದ ವೇಳೆಗೆ ಸಂಪೂರ್ಣವಾಗಿ ಮುಗಿಯುವ ಸಾಧ್ಯತೆಯಿದೆ. ಕಾಮಗಾರಿ ಮುಗಿದ ತಕ್ಷಣ ಶಾರುಖ್ ಕುಟುಂಬವು ಮತ್ತೆ ಮನ್ನತ್‌ಗೆ ಹಿಂತಿರುಗಲಿದೆ. 2001ರಲ್ಲಿ ಶಾರುಖ್ ಈ ಆಸ್ತಿಯನ್ನು ಖರೀದಿಸಿದ್ದರು. ಮೊದಲು ‘ಜನ್ನತ್’ ಎಂದು ಹೆಸರಿಟ್ಟಿದ್ದ ಈ ಬಂಗಲೆಗೆ, ನಂತರ ‘ಮನ್ನತ್’ ಎಂದು ಮರುನಾಮಕರಣ ಮಾಡಲಾಗಿತ್ತು.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.