ಎರಡನೇ ಮಗುವಿನ ನಿರೀಕ್ಷೆಯಲ್ಲಿ ಸಿದ್ಧಾರ್ಥ್ ಮಲ್ಹೋತ್ರಾ ಮತ್ತು ಕಿಯಾರಾ ಅಡ್ವಾಣಿ?

ಬಾಲಿವುಡ್‌ನ ಖ್ಯಾತ ಜೋಡಿ ಸಿದ್ಧಾರ್ಥ್ ಮಲ್ಹೋತ್ರಾ ಮತ್ತು ಕಿಯಾರಾ ಅಡ್ವಾಣಿ ದಂಪತಿ ಶೀಘ್ರದಲ್ಲೇ ಎರಡನೇ ಮಗುವನ್ನು ಹೊಂದುತ್ತಾರಾ ಎಂಬ ಕುತೂಹಲ ಅಭಿಮಾನಿಗಳಲ್ಲಿ ಶುರುವಾಗಿದೆ. ತಮ್ಮ ಮುಂಬರುವ ಚಿತ್ರದ ಪ್ರಚಾರಕ್ಕಾಗಿ ಬಿಗ್ ಬಾಸ್ ಶೋಗೆ ಆಗಮಿಸಿದ್ದ ಸಿದ್ಧಾರ್ಥ್ ಅವರನ್ನು ಸಲ್ಮಾನ್ ಖಾನ್ ಕಾಲೆಳೆದಿದ್ದಾರೆ. ‘ಖಂಡಿತವಾಗಿಯೂ ಶೀಘ್ರದಲ್ಲೇ ಇನ್ನೊಂದು ಮಗು ಆಗಲಿದೆ’ ಎಂದು ಸಲ್ಮಾನ್ ಖಾನ್ ನೇರವಾಗಿ ಹೇಳಿ ಕುತೂಹಲಕ್ಕೆ ಕಾರಣ ಆಗಿದ್ದಾರೆ.

‘ದಿ ವಾನ್: ಫೋರ್ಸ್ ಆಫ್ ದಿ ಫಾರೆಸ್ಟ್’ ಸಿನಿಮಾದ ಪ್ರಚಾರಕ್ಕಾಗಿ ಸಿದ್ಧಾರ್ಥ್ ಮಲ್ಹೋತ್ರಾ ಮತ್ತು ತಮನ್ನಾ ಭಾಟಿಯಾ ಬಿಗ್ ಬಾಸ್ 20ರ ವೀಕೆಂಡ್ ಕಾ ವಾರ್ ವೇದಿಕೆಗೆ ಬಂದಿದ್ದರು. ಈ ವೇಳೆ ಸಲ್ಮಾನ್ ಖಾನ್ ಅವರು ಸಿದ್ಧಾರ್ಥ್ ಅವರ ಸಂಸಾರ ಮತ್ತು ತಂದೆಯಾದ ನಂತರ ಜೀವನ ಹೇಗಿದೆ ಎಂಬ ಬಗ್ಗೆ ಪ್ರಶ್ನೆ ಮಾಡಿದರು. ಅದಕ್ಕೆ ಉತ್ತರಿಸಿದ ಸಿದ್ಧಾರ್ಥ್, ‘ನನ್ನ ಸಂಸಾರ ಅತ್ಯಂತ ಸಂತೋಷದಿಂದ ಸಾಗುತ್ತಿದೆ’ ಎಂದು ಹೇಳಿದರು.

ಈ ವೇಳೆ ಹಳೆಯ ದಿನಗಳನ್ನು ನೆನಪಿಸಿಕೊಂಡ ಸಲ್ಮಾನ್ ಖಾನ್, ಸಿದ್ಧಾರ್ಥ್ ಅವರ ಕಾಲೆಳೆದರು. ‘ನಾನು ನಿನಗೆ ಮದುವೆ ಆಗು ಎಂದು ಪದೇ ಪದೇ ಹೇಳುತ್ತಿದ್ದೆ. ಆದರೆ ಆಗ ನೀನು ಸಿಕ್ಕಾಪಟ್ಟೆ ನಾಚಿಕೊಳ್ಳುತ್ತಿದ್ದೆ’ ಎಂದರು ಸಲ್ಲು. ‘ನಮ್ಮ ಪ್ರೀತಿಯ ರಹಸ್ಯವನ್ನು ನಾವು ರಹಸ್ಯವಾಗಿಯೇ ಇಟ್ಟಿದ್ದೆವು. ಸರಿಯಾದ ಸಮಯ ಬಂದಾಗ ಅದನ್ನು ಬಹಿರಂಗಪಡಿಸಿದೆವು’ ಎಂದು ನಗುತ್ತಾ ಸಲ್ಮಾನ್ ಖಾನ್‌ಗೆ ಉತ್ತರ ನೀಡಿದರು.

ಮಗಳು ಸರಾಯಾ ಮಲ್ಹೋತ್ರಾ ಬಗ್ಗೆ ಸಿದ್ಧಾರ್ಥ್ ಭಾವುಕರಾಗಿ ಮಾತನಾಡಿದರು. ‘ತಂದೆಯಾಗುವುದು ಈ ಪ್ರಪಂಚದಲ್ಲೇ ಅತ್ಯಂತ ಶ್ರೇಷ್ಠ ಪಾತ್ರ. ಮಗಳಿಗೆ ಈಗ 15 ತಿಂಗಳು. ಆಕೆ ಈಗಷ್ಟೇ ಮಾತುಗಳನ್ನು ಕಲಿಯುತ್ತಿದ್ದಾಳೆ’ ಎಂದರು. ಆಗ ಸಲ್ಲು, ‘ಶೀಘ್ರದಲ್ಲೇ ಇನ್ನೊಂದು ಮಗು ಆಗಲಿದೆ’ ಎಂದರು.

ಇದನ್ನೂ ಓದಿ: ‘ಆ ಸೋಲಿನಿಂದ ಬಚಾವ್ ಆದ್ರಿ’; ಕಿಯಾರಾಗೆ ಹೇಳಿದ ನಯನತಾರಾ ಪತಿ

ಕೊನೆಯಲ್ಲಿ ಸಿದ್ಧಾರ್ಥ್ ಮಲ್ಹೋತ್ರಾ ಅವರು ಸಲ್ಮಾನ್ ಖಾನ್ ಅವರನ್ನು ಮದುವೆ ಮತ್ತು ಮಕ್ಕಳ ಬಗ್ಗೆ ಕೇಳಿಯೇ ಬಿಟ್ಟರು. ‘ನನಗೆ ಮದುವೆ ಮತ್ತು ಮಕ್ಕಳ ಬಗ್ಗೆ ಒಳ್ಳೆಯ ಅಭಿಪ್ರಾಯ ಇದೆ. ಅದನ್ನು ನಾನು ಎಲ್ಲರೊಂದಿಗೆ ಹಂಚಿಕೊಳ್ಳಲು ಬಯಸುವುದಿಲ್ಲ’ ಎಂದು ತಮಾಷೆಯಾಗಿ ಹೇಳಿದರು.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.