‘ಆರ್ಆರ್ಆರ್’ ರೆಸ್ಟೋರೆಂಟ್ ಆರಂಭಿಸಲಿದ್ದಾರೆ ರಾಮ್ ಚರಣ್-ಜ್ಯೂ.ಎನ್ಟಿಆರ್? ಕೇಳಿಬಂತು ಹೊಸ ಗುಸುಗುಸು
‘ಆರ್ಆರ್ಆರ್’ ಹೆಸರಲ್ಲಿ ಹೋಟೆಲ್ ಉದ್ಯಮ ಆರಂಭಿಸುವಂತೆ ರಾಮ್ ಚರಣ್ ಹಾಗೂ ಜ್ಯೂ.ಎನ್ಟಿಆರ್ಗೆ ಕೆಲ ಖ್ಯಾತ ನಿರ್ಮಾಪಕರು ಕಿವಿಮಾತು ಹೇಳಿದ್ದಾರೆ ಎನ್ನಲಾಗುತ್ತಿದೆ.
‘ಆರ್ಆರ್ಆರ್’ ಸಿನಿಮಾ (RRR Movie) ಬಾಕ್ಸ್ ಆಫೀಸ್ನಲ್ಲಿ ಕಮಾಲ್ ಮಾಡಿದ ಚಿತ್ರ. ಸಾವಿರಾರು ಕೋಟಿ ರೂಪಾಯಿ ಗಳಿಸಿದ ಈ ಸಿನಿಮಾದಿಂದ ಚಿತ್ರತಂಡಕ್ಕೆ ಒಳ್ಳೆಯ ಕಮಾಯಿ ಆಗಿದೆ. ‘ಆರ್ಆರ್ಆರ್ 2’ ಬರುವ ಬಗ್ಗೆಯೂ ಕೆಲವು ಕಡೆಗಳಲ್ಲಿ ವದಂತಿಗಳು ಹುಟ್ಟಿಕೊಂಡಿದ್ದವು. ಆದರೆ, ಈ ಬಗ್ಗೆ ಯಾವುದೇ ಅಪ್ಡೇಟ್ ಸಿಕ್ಕಿಲ್ಲ. ಈಗ ಟಾಲಿವುಡ್ ಅಂಗಳದಲ್ಲಿ ಹೊಸ ಗುಸುಗುಸು ಕೇಳಿ ಬಂದಿದೆ. ‘ಆರ್ಆರ್ಆರ್’ ಹೆಸರಲ್ಲಿ ರಾಮ್ ಚರಣ್ (Ram Charan) ಹಾಗೂ ಜ್ಯೂ.ಎನ್ಟಿಆರ್ ಹೊಸ ರೆಸ್ಟೋರೆಂಟ್ ಉದ್ಯಮ ಆರಂಭಿಸಿಲಿದ್ದಾರೆ ಎನ್ನಲಾಗುತ್ತಿದೆ.
ರಾಮ್ ಚರಣ್ ಹಾಗೂ ಜ್ಯೂ.ಎನ್ಟಿಆರ್ ಫ್ಯಾನ್ಸ್ ಮಧ್ಯೆ ಎಷ್ಟೇ ವೈರತ್ವ ಬೆಳೆದಿರಬಹುದು. ಆದರೆ, ಇಬ್ಬರು ಹೀರೋಗಳ ಮಧ್ಯೆ ಒಳ್ಳೆಯ ಫ್ರೆಂಡ್ಶಿಪ್ ಇದೆ. ‘ಆರ್ಆರ್ಆರ್’ ಸಂದರ್ಭದಲ್ಲಿ ಈ ಗೆಳೆತನ ಮತ್ತಷ್ಟು ಗಟ್ಟಿ ಆಗಿದೆ. ತೆರೆಮೇಲೆ ಇಬ್ಬರೂ ಸಖತ್ ಆಗಿ ಮಿಂಚಿದ್ದಾರೆ. ಹೀಗಿರುವಾಗಲೇ ಹೊಸ ವದಂತಿ ಎಲ್ಲೆಡೆ ಹರಿದಾಡುತ್ತಿದೆ.
‘ಆರ್ಆರ್ಆರ್’ ಹೆಸರಲ್ಲಿ ಹೋಟೆಲ್ ಉದ್ಯಮ ಆರಂಭಿಸುವಂತೆ ರಾಮ್ ಚರಣ್ ಹಾಗೂ ಜ್ಯೂ.ಎನ್ಟಿಆರ್ಗೆ ಕೆಲ ಖ್ಯಾತ ನಿರ್ಮಾಪಕರು ಕಿವಿಮಾತು ಹೇಳಿದ್ದಾರೆ ಎನ್ನಲಾಗುತ್ತಿದೆ. ಜತೆಗೆ ರಾಜಮೌಳಿ ಅವರನ್ನು ಪಾರ್ಟ್ನರ್ ಆಗಿ ಸೇರಿಸಿಕೊಳ್ಳುವಂತೆ ಸೂಚಿಸಿದ್ದಾರೆ ಎಂದು ತೆಲುಗು ಮಾಧ್ಯಮಗಳು ವರದಿ ಮಾಡಿವೆ.
ಇಬ್ಬರೂ ಹೀರೋಗಳು ಹಲವು ಸಿನಿಮಾ ಕೆಲಸಗಳಲ್ಲಿ ಬ್ಯುಸಿ ಇದ್ದಾರೆ. ಹೀಗಾಗಿ, ಸದ್ಯಕ್ಕಂತೂ ಈ ಆಲೋಚನೆಗೆ ಅವರು ಸೊಪ್ಪು ಹಾಕುವುದು ಅನುಮಾನವೇ. ಇನ್ನು, ‘ಆರ್ಆರ್ಆರ್’ ಟೈಟಲ್ ಹಕ್ಕು ನಿರ್ಮಾಪಕ ಡಿವಿವಿ ದಾನಯ್ಯ ಅವರ ಬಳಿ ಇದೆ. ಈ ಹೆಸರಲ್ಲಿ ಉದ್ಯಮ ಆರಂಭಿಸಬೇಕಾದರೆ ಅವರ ಪಾರ್ಟ್ನರ್ಶಿಪ್ ಕೂಡ ಇರಬೇಕಾಗುತ್ತದೆ ಅಥವಾ ಅವರಿಂದ ಟೈಟಲ್ ಬಳಕೆಗೆ ಒಪ್ಪಿಗೆ ಪಡೆಯಬೇಕಾಗುತ್ತದೆ.
ಸದ್ಯ, ಟಾಲಿವುಡ್ ಮಾಧ್ಯಮಗಳಲ್ಲಿ ಈ ಬಗ್ಗೆ ಸುದ್ದಿ ಜೋರಾಗಿ ಹರಿದಾಡುತ್ತಿದೆ. ಆದರೆ, ಯಾರೊಬ್ಬರೂ ಈ ಕುರಿತು ಅಧಿಕೃತವಾಗಿ ಮಾಹಿತಿ ಹಂಚಿಕೊಂಡಿಲ್ಲ. ಒಂದೊಮ್ಮೆ ಈ ಹೆಸರಲ್ಲಿ ಸ್ಟಾರ್ಗಳು ರೆಸ್ಟೋರೆಂಟ್ ಆರಂಭಿಸಿದರೆ ಒಳ್ಳೆಯ ಬಿಸ್ನೆಸ್ ಆಗುವುದು ಖಚಿತ ಎನ್ನಲಾಗುತ್ತಿದೆ.
ಸಾವಿರಾರು ಕೋಟಿ ಕಲೆಕ್ಷನ್ ಮಾಡಿರುವ ‘ಆರ್ಆರ್ಆರ್’ ಸಿನಿಮಾ ಸದ್ಯ, ಒಟಿಟಿಯಲ್ಲಿ ಧೂಳೆಬ್ಬಿಸುತ್ತಿದೆ. ಮೇ ತಿಂಗಳಲ್ಲಿ ಸಿನಿಮಾ ಒಟಿಟಿಗೆ ಬಂತು. ನಿರ್ದೇಶಕ ರಾಜಮೌಳಿ ಮುಂದಿನ ಸಿನಿಮಾ ಯಾವುದು ಎಂಬುದು ಇನ್ನಷ್ಟೇ ಘೋಷಣೆ ಆಗಬೇಕಿದೆ.
ಇದನ್ನೂ ಓದಿ: RRR ಯಶಸ್ಸು; ಚಿತ್ರತಂಡಕ್ಕೆ 18 ಲಕ್ಷ ಮೌಲ್ಯದ ಚಿನ್ನದ ನಾಣ್ಯ ಉಡುಗೊರೆ ನೀಡಿದ ನಟ ರಾಮ್ ಚರಣ್
