ಪ್ರವೀಣ್​ ತೇಜ್​, ವಿಜಯಶ್ರೀ ಅಭಿನಯದ ‘ಜಿಗರ್​’ ಸಿನಿಮಾ ಟ್ರೇಲರ್ ರಿಲೀಸ್​

ಸ್ಯಾಂಡಲ್​ವುಡ್​ ಹೀರೋ ಪ್ರವೀಣ್​ ತೇಜ್​ (Praveen Tej) ಅವರು ಈಗಾಗಲೇ ಅನೇಕ ಸಿನಿಮಾಗಳಲ್ಲಿ ತಮ್ಮ ಛಾಪು ಮೂಡಿಸಿದ್ದಾರೆ. ಈಗ ಅವರು ನಟಿಸಿರುವ ‘ಜಿಗರ್​’ ಸಿನಿಮಾ (Jigar Kannada Movie) ಬಿಡುಗಡೆಗೆ ಸಜ್ಜಾಗಿದೆ. ಪೂಜಾ ವಸಂತಕುಮಾರ್ ಅವರು ಈ ಸಿನಿಮಾವನ್ನು ನಿರ್ಮಿಸಿದ್ದಾರೆ. ಸೂರಿ ಕುಂದರ್ ನಿರ್ದೇಶನ ಈ ಸಿನಿಮಾಗಿದೆ. ಇತ್ತೀಚೆಗೆ ‘ಜಿಗರ್​’ ಸಿನಿಮಾದ ಟ್ರೇಲರ್ (Jigar Kannada Movie Trailer) ಬಿಡುಗಡೆ ಮಾಡಲಾಯಿತು. ಪಿ.ಆರ್.ಓ. ಸುಧೀಂದ್ರ ವೆಂಕಟೇಶ್ ಅವರು ಟ್ರೇಲರ್ ಅನಾವರಣ ಮಾಡಿ ಸಿನಿಮಾತಂಡಕ್ಕೆ ಶುಭ ಹಾರೈಸಿದರು. ಜುಲೈ 5ರಂದು ‘ಜಿಗರ್​’ ಸಿನಿಮಾ ತೆರೆಕಾಣಲಿದೆ. ಈಗ ಟ್ರೇಲರ್​ ಮೂಲಕ ಕೌತುಕ ಮೂಡಿಸಲಾಗಿದೆ.

‘ಜಿಗರ್​’ ಟ್ರೇಲರ್ ರಿಲೀಸ್​ ಮಾಡಿದ ಬಳಿಕ ಚಿತ್ರತಂಡದವರು ಕೆಲವು ಮಾಹಿತಿ ಹಂಚಿಕೊಂಡರು. ಈ ಸಿನಿಮಾದಲ್ಲಿ ಪ್ರವೀಣ್​ ತೇಜ್​ ಅವರು ಆ್ಯಕ್ಷನ್​ ಹೀರೋ ಆಗಿ ಕಾಣಿಸಿಕೊಂಡಿದ್ದಾರೆ. ‘ಲವ್​ಸ್ಟೋರಿ ಸಿನಿಮಾಗಳಿಗೆ ಸೀಮಿತ ಆಗಿದ್ದ ನನ್ನನ್ನು ನಿರ್ದೇಶಕ ಸೂರಿ ಕುಂದರ್​ ಅವರು ಈ ಸಿನಿಮಾದ ಮೂಲಕ ಆ್ಯಕ್ಷನ್ ಹೀರೋ ಮಾಡಿದ್ದಾರೆ’ ಎಂದಿದ್ದಾರೆ ಪ್ರವೀಣ್​ ತೇಜ್​.

‘ಈ ಸಿನಿಮಾದಲ್ಲಿ ಚಿತ್ರದಲ್ಲಿ ನನ್ನ ಪಾತ್ರದ ಹೆಸರು ಜೀವ. ಅವನು ಉತ್ಸಾಹಿ ಯುವಕ. ಫಿಶ್ ಟೆಂಡರ್​ನಲ್ಲಿ ಆತ ಭಾಗಿಯಾಗುತ್ತಾನೆ. ಅಲ್ಲಿಂದ ಭೂಗತ ಜಗತ್ತಿಗೂ ಕಾಲಿಡುತ್ತಾನೆ. ಅಲ್ಲಿ ಕೆಲವು ಸಂಘಗಳು ಇರುತ್ತದೆ. ಸಂಘಗಳ ನಡುವೆ ಸಂಘರ್ಷ ಕೂಡ ಇರುತ್ತದೆ. ಇದು ಸಿನಿಮಾ ಪ್ರಮುಖ ಕಥಾಹಂದರವಾಗಿದೆ. ಇದರ ಜೊತೆಗೆ ಲವ್, ಆ್ಯಕ್ಷನ್, ಕಾಮಿಡಿಯೂ ನಮ್ಮ ಸಿನಿಮಾದಲ್ಲಿದೆ’ ಎಂದು ಪ್ರವೀಣ್​ ತೇಜ್​ ತಿಳಿಸಿದ್ದಾರೆ.

ನಿರ್ದೇಶಕ ಸೂರಿ ಕುಂದರ್​ ಅವರಿಗೆ ಚಿತ್ರರಂಗದಲ್ಲಿ ಅನೇಕ ವರ್ಷಗಳ ಅನುಭವ ಇದೆ. ‘ಅಂದಾಜು 15 ವರ್ಷಗಳಿಂದ ನಾನು ಚಿತ್ರರಂಗದಲ್ಲಿದ್ದೇನೆ. ಖ್ಯಾತ ಡೈರೆಕ್ಟರ್​ಗಳ ಜತೆ ಕೆಲಸ ಮಾಡಿದ್ದೇನೆ‌. ಈಗ ಸ್ವತಂತ್ರ ನಿರ್ದೇಶಕನಾಗಿ ಇದು ನನ್ನ ಮೊದಲ ಸಿನಿಮಾ. ಜಿಗರ್ ಎಂದರೆ ಎರಡು ಗುಂಡಿಗೆ ಇರುವವನು ಅಥವಾ ಯಾವುದಕ್ಕೂ ಅಂಜದವನು ಅಂತ ಅರ್ಥ’ ಎಂದು ನಿರ್ದೇಶಕರು ಹೇಳಿದ್ದಾರೆ.

ಇದನ್ನೂ ಓದಿ: ರಿಲೀಸ್​ ಹೊಸ್ತಿಲಲ್ಲಿ ‘ಕಲ್ಕಿ 2898 ಎಡಿ’ ಸಿನಿಮಾದ ಹೊಸ ಟ್ರೇಲರ್​; ಸಖತ್​ ಮೇಕಿಂಗ್​

‘ಜಿಗರ್​’ ಸಿನಿಮಾದಲ್ಲಿ ನಾಯಕಿಯಾಗಿ ವಿಜಯಶ್ರೀ ಕಲಬುರಗಿ ಅವರು ನಟಿಸಿದ್ದಾರೆ. ನಟ ಯಶ್ ಶೆಟ್ಟಿ ಅವರು ವಿಲನ್​ ಆಗಿ ಅಬ್ಬರಿಸಿದ್ದಾರೆ. ಟ್ರೇಲರ್​ ಬಿಡುಗಡೆ ನಂತರ ಅವರು ತಮ್ಮ ಪಾತ್ರದ ಬಗ್ಗೆ ಮಾಹಿತಿ ನೀಡಿದರು. ಈ ಸಿನಿಮಾಗೆ ರಿತ್ವಿಕ್ ಮುರಳಿಧರ್ ಸಂಗೀತ ನೀಡಿದ್ದಾರೆ. ಶಿವಸೇನ ಅವರು ಛಾಯಾಗ್ರಾಹಕರಾಗಿ ಕೆಲಸ ಮಾಡಿದ್ದಾರೆ. ಉಡುಪಿ, ಮಲ್ಪೆ, ಕುಂದಾಪುರ ಸುತ್ತಮುತ್ತ ಚಿತ್ರೀಕರಣ ಮಾಡಲಾಗಿದೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.