ಯುವ ನಟಿ ಜೊತೆ ದೈಹಿಕ ಸಂಬಂಧಕ್ಕೆ ಬೇಡಿಕೆ ಇಟ್ಟ ದಕ್ಷಿಣದ ಹಿರಿಯ ನಿರ್ದೇಶಕ

ಕಿರುತೆರೆಯ ಜನಪ್ರಿಯ ನಟಿ ನೀತಿ ಟೇಲರ್ ದಕ್ಷಿಣ ಭಾರತದ ಚಿತ್ರರಂಗದ ಕುರಿತು ಆಘಾತಕಾರಿ ವಿಚಾರವೊಂದನ್ನು ಬಿಚ್ಚಿಟ್ಟಿದ್ದಾರೆ. ಸಿನಿಮಾದಲ್ಲಿ ನಟಿಸಲು ಅವಕಾಶ ನೀಡುವುದಾಗಿ ಹೇಳಿದ ನಿರ್ದೇಶಕರೊಬ್ಬರು ನನ್ನೊಂದಿಗೆ ಅಸಭ್ಯವಾಗಿ ವರ್ತಿಸಿದ್ದರು ಎಂದು ಅವರು ಗಂಭೀರ ಆರೋಪ ಮಾಡಿದ್ದಾರೆ. ಆ ವ್ಯಕ್ತಿ ನನ್ನ ಬಳಿ ದೈಹಿಕ ಸಂಬಂಧಕ್ಕೆ ಬೇಡಿಕೆ ಇಟ್ಟಿದ್ದ. ಈ ಕಹಿ ಘಟನೆಯಿಂದ ಆಘಾತಕ್ಕೊಳಗಾದ ನಾನು ತಕ್ಷಣ ಅವರ ನಂಬರ್ ಬ್ಲಾಕ್ ಮಾಡಿ ನಂತರ ತಾಯಿಗೆ ಸಂಪೂರ್ಣ ವಿಷಯವನ್ನು ವಿವರವಾಗಿ ತಿಳಿಸಿದೆ ಎಂದಿದ್ದಾರೆ.

ಸಂದರ್ಶನದಲ್ಲಿ ಮಾತನಾಡಿದ ನೀತಿ ತಮ್ಮ ಕಹಿ ಅನುಭವ ಹಂಚಿಕೊಂಡಿದ್ದಾರೆ. ‘ಮೊದಲ ಚಿತ್ರದ ನಂತರ ಅದೇ ನಿರ್ದೇಶಕರು ಮತ್ತೊಂದು ಸಿನಿಮಾಗಾಗಿ ಕರೆ ಮಾಡಿದ್ದರು. ಆ ಸಂದರ್ಭದಲ್ಲಿ ಅವರು ಅಸಭ್ಯ ಪ್ರಸ್ತಾಪ ಮುಂದಿಟ್ಟರು. ನೀನು ನನ್ನೊಂದಿಗೆ ಮಲಗಬೇಕು ಎಂದು ನೇರವಾಗಿ ಕೇಳಿದರು. ಇದರಿಂದ ನಾನು ಸಂಪೂರ್ಣವಾಗಿ ದಿಗ್ಭ್ರಮೆಗೊಂಡೆ. ತಕ್ಷಣ ಫೋನ್ ಕಟ್ ಮಾಡಿ ಆ ವ್ಯಕ್ತಿಯ ನಂಬರ್ ಬ್ಲಾಕ್ ಮಾಡಿದೆ’ ಎಂದು ವಿವರಿಸಿದರು.

ಆ ನಿರ್ದೇಶಕರ ಹೆಸರು ಹೇಳಲು ನಟಿ ಇಷ್ಟಪಟ್ಟಿಲ್ಲ. ಆದರೆ ಅವರ ವಯಸ್ಸಿನ ಬಗ್ಗೆಯೂ ನಟಿ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. ‘ಆ ವೃದ್ಧ ವ್ಯಕ್ತಿ ಇತರ ಯುವತಿಯರ ಜೊತೆ ವರ್ತಿಸುವುದನ್ನು ತಾನು ನೋಡಿದ್ದೆ. ಈ ರೀತಿಯ ಘಟನೆಗಳು ಮರುಕಳಿಸಬಾರದು ಎಂದುಕೊಂಡೆ. ಅಂದೇ ನಾನು ಇನ್ನು ಮುಂದೆ ಯಾವ ಸಿನಿಮಾವನ್ನೂ ಮಾಡುವುದಿಲ್ಲ ಎಂದು ನಿರ್ಧರಿಸಿದೆ’ ಎಂಬುದು ಅವರ ಮಾತು.

ನೀತಿ ಟೇಲರ್ ಅವರ ಈ ಹೇಳಿಕೆ ಹೊರಬರುತ್ತಿದ್ದಂತೆ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ಚರ್ಚೆ ಆರಂಭವಾಗಿದೆ. ನೆಟಿಗರು ಆ ನಿರ್ದೇಶಕ ತ್ರಿನಾಥ ರಾವ್ ನಕ್ಕಿನಾ ಇರಬಹುದು ಎಂದು ಶಂಕಿಸುತ್ತಿದ್ದಾರೆ. ನೀತಿ 2012ರಲ್ಲಿ ತೆರೆಕಂಡ ಮೆಮ್ ವಯಸಕು ವಚಮ್ ಚಿತ್ರದ ಮೂಲಕ ತೆಲುಗಿಗೆ ಕಾಲಿಟ್ಟಿದ್ದರು. ಈ ಚಿತ್ರವನ್ನು ತ್ರಿನಾಥ ರಾವ್ ನಿರ್ದೇಶನ ಮಾಡಿದ್ದರು.

ಇದನ್ನೂ ಓದಿ: ಕಿರುತೆರೆ ನಟಿ ಐಶ್ವರ್ಯಾ ಪಿಸ್ಸೆ ದಾಂಪತ್ಯದಲ್ಲಿ ಬಿರುಕು: ವಿಚ್ಛೇದನದ ಸುದ್ದಿ ಖಚಿತ

ದಕ್ಷಿಣ ಭಾರತದ ಚಿತ್ರರಂಗದಲ್ಲಿ ಕಾಸ್ಟಿಂಗ್ ಕೌಚ್ ದೊಡ್ಡ ಮಟ್ಟದಲ್ಲಿದೆ ಎಂದು ಅನೇಕರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಇತ್ತೀಚಿನ ದಿನಗಳಲ್ಲಿ ದಕ್ಷಿಣ ಸಿನಿಮಾಗಳಲ್ಲಿ ಮಹಿಳೆಯರನ್ನು ತಪ್ಪಾಗಿ ಚಿತ್ರಿಸುತ್ತಿದ್ದಾರೆ ಎಂಬ ಆರೋಪಗಳು ಕೇಳಿಬರುತ್ತಿವೆ. ಜಾನ್ವಿ ಕಪೂರ್ ಅವರ ‘ಪೆದ್ದಿ’ ಚಿತ್ರದಲ್ಲಿನ ಪಾತ್ರದ ನಿರ್ವಹಣೆ ಹಾಗೂ ವಿವಾದದ ಬಗ್ಗೆಯೂ ಸಾಕಷ್ಟು ಚರ್ಚೆಗಳು ನಡೆದಿವೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.