ತಮ್ಮ ಸಂಭಾವನೆ ಬಗ್ಗೆ ಬಹಿರಂಗವಾಗಿ ಮಾತನಾಡಿದ ಮಲಯಾಳಂ ಸ್ಟಾರ್ ನಟ

ಕೋವಿಡ್​ ಬಳಿಕ ಮಲಯಾಳಂ (Malayalam) ಚಿತ್ರರಂಗಕ್ಕೆ ದೊಡ್ಡ ಮುನ್ನಡೆ ದೊರೆತಿದೆ. ಕೋವಿಡ್ ಸಮಯದಲ್ಲಿ ಮಲಯಾಳಂ ಚಿತ್ರರಂಗ ಸಿನಿಪ್ರೇಮಿಗಳಿಗೆ ಇನ್ನಷ್ಟು-ಮತ್ತಷ್ಟು ಪರಿಚಯವಾಗಿದೆ. ಎಷ್ಟೋ ಜನಕ್ಕೆ ಮಮ್ಮುಟಿ, ಮೋಹನ್​ಲಾಲ್ ಹೊರತಾಗಿ ಇನ್ನೊಬ್ಬ ಮಲಯಾಳಂ ನಟನ ಹೆಸರು ಸಹ ಕೋವಿಡ್​ಗೆ ಮುಂಚೆ ಗೊತ್ತಿರಲಿಲ್ಲ, ಆದರೆ ಈಗ ಮಲಯಾಳಂನ ಕೆಲವು ನಟರ ಸಿನಿಮಾಗಳಿಗಾಗಿ ಕಾದು ಚಿತ್ರಮಂದಿರದಲ್ಲಿ ಮೊದಲ ದಿನ ನೋಡುವಂತೆ ಪರಿಸ್ಥಿತಿ ಬದಲಾಗಿದೆ. ದುಲ್ಕರ್ ಸಲ್ಮಾನ್, ಫಹಾದ್ ಫಾಸಿಲ್, ನಿವಿನ್ ಪೌಲಿ, ಬಿಜು ಇನ್ನೂ ಕೆಲವರು ಮಲಯಾಳಂ ಚಿತ್ರರಂಗದ ಹೊರಗೂ ಸ್ಟಾರ್​ಗಳಾಗಿದ್ದಾರೆ. ಇದೇ ಸ್ಟಾರ್ ಮಲಯಾಳಂ ನಟರ ಪಟ್ಟಿಗೆ ಸೇರುವ ಮತ್ತೊಂದು ಹೆಸರು ಟೊವಿನೊ ಥಾಮಸ್.

ಫಹಾದ್ ಫಾಸಿಲ್​ ರೀತಿಯಲ್ಲಿ, ಟೊವಿನೊ ಥಾಮಸ್ ಸಹ ಸ್ಟಾರ್​ ಗಿರಿ, ಹೀರೋಗಿರಿಯ ಸಿನಿಮಾಗಳಿಗೆ ಕಟ್ಟು ಬೀಳದೆ ತಮ್ಮದೇ ಆದ ಮಾದರಿಯಲ್ಲಿ ಸಿನಿಮಾಗಳನ್ನು ಮಾಡುತ್ತಿದ್ದಾರೆ. ಆ ಮೂಲಕ ಒಂದರ ಮೇಲೊಂದು ಹಿಟ್ ಸಿನಿಮಾ ನೀಡುವ ಜೊತೆಗೆ ಅಭಿಮಾನಿಗಳನ್ನೂ ಸಹ ಸಂಪಾದಿಸುತ್ತಾ ಸಾಗುತ್ತಿದ್ದಾರೆ. ಮಲಯಾಳಂ ಚಿತ್ರರಂಗದ ಮಾರುಕಟ್ಟೆಯನ್ನು ಹಿರಿದು ಮಾಡುವ ಬಗ್ಗೆ, ತಮ್ಮ ಚಿತ್ರರಂಗದಲ್ಲಿ ವಿಶ್ವಮಟ್ಟದ ಗುಣಮಟ್ಟದ ಸಿನಿಮಾಗಳನ್ನು ನಿರ್ಮಿಸಬೇಕೆಂಬ ಕನಸು ಹೊಂದಿರುವ ಟೊವಿನೋ ಥಾಮಸ್, ಇತ್ತೀಚೆಗಿನ ಸಂದರ್ಶನವೊಂದರಲ್ಲಿ ತಮ್ಮ ಸಂಭಾವನೆ ಬಗ್ಗೆ ಬಹಿರಂಗವಾಗಿ ಮಾತನಾಡಿದ್ದಾರೆ.

ಇದನ್ನೂ ಓದಿ:Salman Khan: ಸಲ್ಮಾನ್ ಭೇಟಿಯಾದ ಮೇಲೆ ಅವರೆಡೆಗಿನ ದೃಷ್ಟಿಕೋನ ಬದಲಾಯಿತು; ಮಲಯಾಳಂ ನಟ ಟೊವಿನೊ

ಟೊವಿನೋ ಥಾಮಸ್ ನಟನೆಯ ‘ಅದೃಶ್ಯ ಜಲಕಂಗಲ್’ ಸಿನಿಮಾ ಇದೇ ನವೆಂಬರ್ 24ಕ್ಕೆ ತೆರೆಗೆ ಬರುತ್ತಿದೆ. ಸಿನಿಮಾದ ಪ್ರಚಾರದಲ್ಲಿ ನಿರತರಾಗಿರುವ ಟೊವಿನೋ ಥಾಮಸ್, ತಾವು ಸಿನಿಮಾಗಳಿಗೆ ಪಡೆಯುವ ಸಂಭಾವನೆ ಬಗ್ಗೆ ಮಾತನಾಡಿದ್ದಾರೆ. ”ನಾನು ಎಲ್ಲ ಸಿನಿಮಾಕ್ಕೂ ಒಂದೇ ಸಂಭಾವನೆ ಪಡೆಯುವುದಿಲ್ಲ. ಸಿನಿಮಾ ಎಷ್ಟು ದೊಡ್ಡದು, ನಿರ್ಮಾಣ ಸಂಸ್ಥೆ, ಸಿನಿಮಾಕ್ಕೆ ನಾನು ಹಾಕಬೇಕಾದ ಸಮಯ, ಶ್ರಮ, ಸಿನಿಮಾ ಯಾವ ರೀತಿಯ ಬ್ಲಾಕ್ ಬಸ್ಟರ್ ಆಗಬಹುದು ಎಂಬುದನ್ನೆಲ್ಲ ಗಮನದಲ್ಲಿಟ್ಟುಕೊಂಡು ಪ್ರತಿ ಸಿನಿಮಾಕ್ಕೂ ಬೇರೆ-ಬೇರೆ ಮೊತ್ತದ ಹಣವನ್ನು ಸಂಭಾವನೆಯಾಗಿ ಪಡೆಯುತ್ತೇನೆ” ಎಂದಿದ್ದಾರೆ.

‘ಅದೃಶ್ಯ ಜಲಕಂಗಲ್’ ಸಿನಿಮಾಕ್ಕೆ ಕಡಿಮೆ ಸಂಭಾವನೆ ಪಡೆದಿದ್ದೇನೆ. ಇದು ಹಿಟ್ ಆಗುವ ಸಿನಿಮಾ ಆಗಿದ್ದರೂ ಸಹ, ಸಾಂಪ್ರದಾಯಿಕ ಮಾದರಿ ಹಿಟ್ ಆಗುವ ಸಿನಿಮಾ ಅಲ್ಲ. ಹಾಗಾಗಿ ಈ ಸಿನಿಮಾಕ್ಕೆ ಸಂಭಾವನೆ ಕಡಿಮೆ ತೆಗೆದುಕೊಂಡಿದ್ದೇನೆ ಎಂದಿದ್ದಾರೆ. ‘ಅದೃಶ್ಯ ಜಲಕಂಗಲ್’ ಸಿನಿಮಾದಲ್ಲಿ ಸತ್ತವರೊಟ್ಟಿಗೆ ಮಾತನಾಡುವ ವಿಚಿತ್ರ ಮನಸ್ಥಿತಿಯ ವ್ಯಕ್ತಿಯ ಪಾತ್ರದಲ್ಲಿ ನಟಿಸಿದ್ದಾರೆ. ಸಿನಿಮಾದಲ್ಲಿ ಟೊವಿನೊ ಥಾಮಸ್ ಜೊತೆಗೆ ನಿಮಿಷಾ ಸಜಯನ್ ಸಹ ನಟಿಸಿದ್ದಾರೆ.

ಟೊವಿನೋ ಥಾಮಸ್, ‘ಮಿನ್ನಲ್ ಮುರಲಿ’, ‘ತಲ್ಲುಮಾಲ’ ಈ ವರ್ಷ ಆಸ್ಕರ್​ಗೆ ಅಧಿಕೃತ ಪ್ರವೇಶ ಪಡೆದಿರುವ ‘2018’ ಸಿನಿಮಾಗಳು ಮಾತ್ರವಲ್ಲದೆ ಇನ್ನೂ ಹಲವು ಸಿನಿಮಾಗಳಲ್ಲಿ ನಟಿಸಿದ್ದಾರೆ. ‘ಅದೃಶ್ಯ ಜಲಕಂಗಲ್’ ಸಿನಿಮಾದ ಜೊತೆಗೆ ಇನ್ನೂ ನಾಲ್ಕು ಸಿನಿಮಾಗಳಲ್ಲಿ ನಟಿಸುತ್ತಿದ್ದಾರೆ.

ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ