‘ಟಾಕ್ಸಿಕ್’ ಚಿತ್ರದಲ್ಲಿ ಯಶ್ ಅಕ್ಕ ಆಗಲು ಒಪ್ಪಿದ್ದೇಕೆ? ನಯನತಾರಾ ಸ್ಪಷ್ಟನೆ

ರಾಕಿಂಗ್ ಸ್ಟಾರ್ ಯಶ್ ಅಭಿನಯದ ‘ಟಾಕ್ಸಿಕ್’ ಸಿನಿಮಾ  (Toxic Movie) ಚಿತ್ರಮಂದಿರಗಳಲ್ಲಿ ಪ್ರದರ್ಶನ ಕಾಣುತ್ತಿದೆ. ಈ ಬಹುನಿರೀಕ್ಷಿತ ಸಿನಿಮಾದಲ್ಲಿ ದಕ್ಷಿಣ ಭಾರತದ ಲೇಡಿ ಸೂಪರ್‌ಸ್ಟಾರ್ ನಯನತಾರಾ ಪ್ರಮುಖ ಪಾತ್ರದಲ್ಲಿ ಮಿಂಚಿದ್ದಾರೆ. ಚಿತ್ರದಲ್ಲಿ ತಾವು ‘ಗಂಗಾ’ ಎಂಬ ಶಕ್ತಿಶಾಲಿ ಪಾತ್ರವನ್ನು ಏಕೆ ಒಪ್ಪಿಕೊಂಡೆ ಎಂಬುದನ್ನು ನಯನತಾರಾ ಬಹಿರಂಗಪಡಿಸಿದ್ದಾರೆ. ತಮ್ಮ ಪಾತ್ರದ ಆಯ್ಕೆ ಮತ್ತು ಚಿತ್ರದ ಕಥೆಯ ಮಹತ್ವದ ಕುರಿತು ನಟಿ ಮುಕ್ತವಾಗಿ ಮಾತನಾಡಿದ್ದಾರೆ.

‘ಸಿನಿಮಾ ಆಯ್ಕೆ ಮಾಡುವಾಗ ನಾನು ಯಾವತ್ತೂ ಸ್ಕ್ರೀನ್ ಸ್ಪೇಸ್ ಲೆಕ್ಕ ಹಾಕುವುದಿಲ್ಲ. ಅದು ಸೋಲೋ ಸಿನಿಮಾನಾ ಅಥವಾ ಮಲ್ಟಿಸ್ಟಾರರ್ ಸಿನಿಮಾನಾ ಎಂದು ನೋಡುವುದಿಲ್ಲ. ಕಥೆಯಲ್ಲಿ ನನ್ನ ಪಾತ್ರಕ್ಕೆ ಏನು ಪ್ರಾಮುಖ್ಯತೆ ಇದೆ ಎಂಬುದು ನನಗೆ ಮುಖ್ಯ. ಕಥೆ ಮತ್ತು ಪಾತ್ರ ನನ್ನನ್ನು ರೋಮಾಂಚನಗೊಳಿಸಿದರೆ ತಕ್ಷಣ ಒಪ್ಪಿಕೊಳ್ಳುತ್ತೇನೆ. ಟಾಕ್ಸಿಕ್ ಸಿನಿಮಾದ ಗಂಗಾ ಪಾತ್ರವನ್ನು ನಾನು ಎಂದಿಗೂ ನಿರಾಕರಿಸಲು ಸಾಧ್ಯವಿರಲಿಲ್ಲ’ ಎಂದು ಹೇಳಿದ್ದಾರೆ ಅವರು.

‘ಚಿತ್ರರಂಗ ಎಂಬುದು ಎಲ್ಲರ ಸಹಕಾರದಿಂದ ನಡೆಯುವ ಮಾಧ್ಯಮ. ಪ್ರತಿಯೊಂದು ಪಾತ್ರವನ್ನು ಚೆನ್ನಾಗಿ ಬರೆದಾಗ ಇಡೀ ಸಿನಿಮಾಗೆ ಲಾಭವಾಗುತ್ತದೆ. ಗಂಗಾ ಪಾತ್ರಕ್ಕೆ ತನ್ನದೇ ಆದ ಧ್ವನಿ ಮತ್ತು ಭಾವನಾತ್ಮಕ ಪಯಣವಿದೆ. ಗಂಗಾ ಕೇವಲ ಮತ್ತೊಬ್ಬರ ಪಾತ್ರಕ್ಕೆ ಬೆಂಬಲವಾಗಿ ಇರುವುದಿಲ್ಲ. ಈ ಪಾತ್ರ ಇಡೀ ಕಥೆಯ ಹಾದಿಯನ್ನೇ ಬದಲಾಯಿಸುವ ಶಕ್ತಿ ಹೊಂದಿದೆ’ ಎಂದಿದ್ದಾರೆ. ಸಿನಿಮಾ ನೋಡಿದವರಿಗೆ ಇದು ಹೌದು ಎನಿಸಿದೆ. ಇಡೀ ಕಥೆಯನ್ನೇ ಗಂಗಾ ಪಾತ್ರ ಬದಲಿಸುತ್ತದೆ.

ನಯನತಾರಾ ದಕ್ಷಿಣ ಭಾರತದಲ್ಲಿ ಅತಿ ಹೆಚ್ಚು ಸಂಭಾವನೆ ಪಡೆಯುವ ನಟಿಯಾಗಿದ್ದಾರೆ. ಅವರು ಪ್ರತಿ ಸಿನಿಮಾಗೆ ಸುಮಾರು 10 ರಿಂದ 12 ಕೋಟಿ ರೂಪಾಯಿ ಪಡೆಯುತ್ತಾರೆ. ‘ಟಾಕ್ಸಿಕ್’ ಪಡೆದ ಪ್ರೀತಿಗೆ ನಯನತಾರಾ ಸಂತಸ ವ್ಯಕ್ತಪಡಿಸಿದ್ದಾರೆ.

ಇದನ್ನೂ ಓದಿ: ‘ಇರುಮುಡಿ’ಗೆ ತೆಲುಗು ನಟರ ಜೈಕಾರ; ‘ಟಾಕ್ಸಿಕ್’ ವಿಚಾರದಲ್ಲಿ ಕನ್ನಡ ಚಿತ್ರರಂಗದ ಮೌನ ಏತಕ್ಕೆ?

ಗೀತು ಮೋಹನ್‌ದಾಸ್ ನಿರ್ದೇಶನದ ಟಾಕ್ಸಿಕ್ ಎರಡು ದಿನಕ್ಕೆ 190 ಕೋಟಿಗೂ ಅಧಿಕ ಗಳಿಕೆ ಮಾಡಿದೆ. ಆದರೂ ವಿಮರ್ಶಕರಿಂದ ಈ ಚಿತ್ರಕ್ಕೆ ಮಿಶ್ರ ಪ್ರತಿಕ್ರಿಯೆ ವ್ಯಕ್ತವಾಗಿದೆ. ಕೇವಲ ಹಿಂಸೆಗೆ ಹೆಚ್ಚು ಒತ್ತು ನೀಡಲಾಗಿದೆ ಎಂಬ ಅಭಿಪ್ರಾಯ ಕೇಳಿಬಂದಿದೆ. ಕೆಲವರು ಚಿತ್ರವನ್ನು ಬೆಂಬಲಿಸಿದ್ದಾರೆ. ಚಿತ್ರದಲ್ಲಿ ಕಿಯಾರಾ ಅಡ್ವಾಣಿ ಮತ್ತು ರುಕ್ಮಿಣಿ ವಸಂತ್ ಕೂಡ ನಟಿಸಿದ್ದಾರೆ. ನಯನತಾರಾ ಅವರ ಗಂಗಾ ಪಾತ್ರ ಪ್ರೇಕ್ಷಕರ ಗಮನ ಸೆಳೆಯುವಲ್ಲಿ ಯಶಸ್ವಿಯಾಗಿದೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.

Published On - 9:02 am, Fri, 28 August 26