KPSC ಕರ್ಮಕಾಂಡ: ಕೇಸ್​​ನಲ್ಲಿ ಕೇಳಿಬಂತು ಹೊಸ ಹೆಸರು, ಆತ ಯಾರೆಂಬುದೇ ಇನ್ನೂ ಸಸ್ಪೆನ್ಸ್​​!

ಬೆಂಗಳೂರು, ಅಕ್ಟೋಬರ್​​ 09: KPSC ಪರೀಕ್ಷಾ ಅಕ್ರಮದಲ್ಲಿ ದುಗ್ಗಪ್ಪ ಎಂಬಾತನ ತಳುಕು ಹಾಕಿಕೊಂಡಿದ್ದು, ಮಾಜಿ ಅಧ್ಯಕ್ಷ ಶಿವಶಂಕರಪ್ಪ ಸಾಹುಕಾರ್ ಪಿಎ ಹಾಗೂ ದುಗ್ಗಪ್ಪ ನಡುವಿನ ವಾಟ್ಸಾಪ್​ ಚಾಟ್ ಬಹಿರಂಗಗೊಂಡಿದೆ. ಅಭ್ಯರ್ಥಿಗಳ ವಿವರವನ್ನು ದುಗ್ಗಪ್ಪ ಕಳುಹಿಸುತ್ತಿದ್ದ, ವಾಟ್ಸಾಪ್​ ಮೂಲಕವೇ ಸಾಹುಕಾರ್ ಪಿಎ ಹಾಗೂ ದುಗ್ಗಪ್ಪ ಡೀಲ್ ನಡೆಸುತ್ತಿದ್ದರು ಎಂಬುದು ಗೊತ್ತಾಗಿದೆ. ಹೀಗಾಗಿ ಈ ದುಗ್ಗಪ್ಪ KPSC ಮಾಜಿ ಸದಸ್ಯನಾ ಅನ್ನೋದರ ಬಗ್ಗೆ ಇಡಿಯಿಂದ ತನಿಖೆ ನಡೆಯುತ್ತಿದೆ.

ED ದಾಳಿ ವೇಳೆ ಪತ್ತೆಯಾಗಿದ್ದ ಹಲವು ದಾಖಲೆ

ಶಿವಶಂಕರಪ್ಪ ಸಾಹುಕಾ‌ರ್ ಪಿಎ ಮೋಹನ್‌ ಮನೆ ಮೇಲೆ ED ದಾಳಿ ವೇಳೆ ಹಲವು ದಾಖಲೆಗಳು ಪತ್ತೆಯಾಗಿದ್ದವು. ಮೋಹನ್​ ಮೊಬೈಲ್​ನಲ್ಲಿ ವಾಟ್ಸಾಪ್​ ಡೇಟಾ ಪರಿಶೀಲನೆ ವೇಳೆ ಪರೀಕ್ಷೆ ಬರೆದಿದ್ದ ಅಭ್ಯರ್ಥಿಗಳ ವಿವರ, ನೋಂದಣಿ ಸಂಖ್ಯೆ ಪತ್ತೆಯಾಗಿತ್ತು. ದಾವಣಗೆರೆಯ ದುಗ್ಗಪ್ಪ ಅಭ್ಯರ್ಥಿಗಳ ವಿವರ ಕಳುಹಿಸಿದ್ದು ಕೂಡ ಕಂಡುಬಂದಿತ್ತು. ಈ ದುಗ್ಗಪ್ಪ ಯಾರು?, ಸಾಹುಕಾರ್​ಗೂ ಈತನಿಗೂ ಏನು ಸಂಬಂಧ? ಎಂಬ ಬಗ್ಗೆ ಈಗ ತನಿಖೆ ನಡೆಯುತ್ತಿದೆ. ದುಗ್ಗಪ್ಪನಿಗೆ ಇಡಿ ಅಧಿಕಾರಿಗಳು ನೋಟಿಸ್ ನೀಡುವ ಸಾಧ್ಯತೆ ಇದೆ ಎನ್ನಲಾಗಿದೆ.

ಇದನ್ನೂ ಓದಿ: ಕೆಪಿಎಸ್​ಸಿ ಹಗರಣ: ಮಾಜಿ ಅಧ್ಯಕ್ಷ ಶಿವಶಂಕರಪ್ಪ ಸಾಹುಕಾರ್,ಸದಸ್ಯೆ ಗೀತಾ ಇಡಿ ಕಸ್ಟಡಿಗೆ

ಶಿವಶಂಕರಪ್ಪ-ಗೀತಾ ನಡುವಿನ ಹಣದ ವ್ಯವಹಾರ ಬಯಲು

ಮತ್ತೊಂದೆಡೆ ಕೆಪಿಎಸ್​​ಸಿ ಮಾಜಿ ಅಧ್ಯಕ್ಷ ಶಿವಶಂಕರಪ್ಪ ಮತ್ತು ಗೀತಾ ನಡುವೆ ನಡೆದಿದ್ದ ಹಣದ ವ್ಯವಹಾರದ ಬಗ್ಗೆಯೂ ಗೊತ್ತಾಗಿದೆ. ಆಗಾಗ ಗೀತಾ, ಚಂದ್ರ ಹಾಸ ಮತ್ತು ಗೀತಾ ಪುತ್ರಿಯ ಖಾತೆಗಳಿಗೆ ಶಿವಶಂಕರಪ್ಪ ಹಣ ಹಾಕುತ್ತಿದ್ದರು. 2021-22ರಲ್ಲಿ ಕೆಪಿಎಸ್ಸಿ ಸದಸ್ಯರಾದ ಬಳಿಕ ಬಿ.ವಿ ಗೀತಾ ಬೆಂಗಳೂರಿಗೆ ಆಗಮಿಸಿದ್ದರು. ಆರಂಭದಲ್ಲಿ ಆರ್ಥಿಕ ಸಂಕಷ್ಟದಲ್ಲಿದ್ದ ಈಕೆಗೆ ಶಿವಶಂಕರಪ್ಪ ಸಾಹುಕಾರ್ ಹಣದ ಸಹಾಯ ಮಾಡಿದ್ದರು. ಅಪಾರ್ಟ್ಮೆಂಟ್ ಫ್ಲಾಟ್​​ನ ಮಾಲೀಕ ಚಂದ್ರಹಾಸ ಖಾತೆಗೆ 2023ರ ಫೆಬ್ರವರಿ 23ರಂದು 22,500 ರೂ., ಅದೇ ದಿನ ಮತ್ತೆ 45,000 ಹಣ ಹಾಕಿದ್ದರು. 2022ರ ಡಿಸೆಂಬರ್​​ 06, ನವೆಂಬರ್​​ 08 ಮತ್ತು ಸೆಪ್ಟೆಂಬರ್​​ 06ರಂದು ತಲಾ 45 ಸಾವಿರ ಹಣ ವರ್ಗಾಯಿಸಿದ್ದರು. ಹಾಗೆಯೇ 2022ರ ಅಕ್ಟೋಬರ್​​ 01ರಂದು 5 ಲಕ್ಷ, ಫೆಬ್ರವರಿ 01ರಂದು 3 ಲಕ್ಷ ಹಣವನ್ನು ಗೀತಾರ ಖಾತೆಗೆ ಹಾಕಲಾಗಿತ್ತು. 2023ರ ಜೂನ್​​ 28ರಂದು 40 ಸಾವಿರ ಮತ್ತು ಮೇ 29ರಂದು 44 ಸಾವಿರ ಹಣವನ್ನು ಗೀತಾ ಪುತ್ರಿಯ ಅಕೌಂಟ್​​ಗೂ ಶಿವಶಂಕರಪ್ಪ ವರ್ಗಾಯಿಸಿರುವುದನ್ನು ಇಡಿ ಅಧಿಕಾರಿಗಳು ಪತ್ತೆ ಮಾಡಿದ್ದಾರೆ ಎನ್ನಲಾಗಿದೆ.

ಮತ್ತಷ್ಟು ಸುದ್ದಿ ಓದಲು ಇಲ್ಲಿ ಕ್ಲಿಕ್​​ ಮಾಡಿ.