ಪಶ್ಚಿಮ ಏಷ್ಯಾ ಸಂಘರ್ಷದ ಎಫೆಕ್ಟ್: ಡ್ರೈಫ್ರೂಟ್ಸ್​​ಗಳ ದರದಲ್ಲಿ ಗಣನೀಯ ಏರಿಕೆ

ಬೆಂಗಳೂರು, ಅಕ್ಟೋಬರ್​​ 25: ಸೌದಿ ಅರೇಬಿಯಾದ ಮೇಲಿನ ದಾಳಿಗಳು ಮತ್ತು ಪಶ್ಚಿಮ ಏಷ್ಯಾದಲ್ಲಿ ಹೆಚ್ಚುತ್ತಿರುವ ಉದ್ವಿಗ್ನತೆ ಬೆಂಗಳೂರಿನ ವ್ಯಾಪಾರದ ಮೇಲೆ ಅನಿಶ್ಚಿತತೆ ಹೆಚ್ಚಿಸಿವೆ. ಆಮದು ಮತ್ತು ರಫ್ತು ವೆಚ್ಚ ಏರಿಕೆ, ಸರಕುಗಳ ತಲುಪುವಿಕೆಯಲ್ಲಿ ವಿಳಂಬ ಹಾಗೂ ಪೂರೈಕೆ ಸರಪಳಿಯಲ್ಲಿ ವ್ಯತ್ಯಯ ಕಂಡುಬಂದಿದೆ. ಸೌದಿ ಅರೇಬಿಯಾದಿಂದ ಆಮದಾಗುವ ಖರ್ಜೂರ ಮತ್ತು ಝಮ್ ಝಮ್ ನೀರಿನ (ಇಸ್ಲಾಂ ಧರ್ಮದಲ್ಲಿ ಅತ್ಯಂತ ಪವಿತ್ರ ಮತ್ತು ಆಶೀರ್ವದಿಸಲ್ಪಟ್ಟ ನೀರು ಎಂದು ಪರಿಗಣಿಸಿರುವ ಮೆಕ್ಕಾದ ನೀರು) ಬೆಲೆ ಈಗಾಗಲೇ ಏರಿಕೆಯಾಗಲು ಆರಂಭಿಸಿದೆ ಎಂದು ನಗರದ ವ್ಯಾಪಾರಿಗಳು ತಿಳಿಸಿದ್ದಾರೆ.

ಹಲವು ವಸ್ತುಗಳ ದರ ಏರಿಕೆ

ಸಂಘರ್ಷದ ನೇರ ಪರಿಣಾಮ ಸರಕು ಸಾಗಣೆ ವೆಚ್ಚದ ಮೇಲೆ ಕಾಣಿಸುತ್ತಿದೆ. ಭಾರತದಲ್ಲಿ ಬೇಡಿಕೆಯಿರುವ ಕಿಮಿಯಾ, ಕಲ್ಮಿ ಮತ್ತು ಅಜ್ವಾ ಸೇರಿದಂತೆ ಸೌದಿ ಅರೇಬಿಯಾದ ಕೆಲವು ವಿಶೇಷ ತಳಿಯ ಖರ್ಜೂರಗಳ ಬೆಲೆ ಕೆಜಿಗೆ ಸುಮಾರು 100 ರೂಪಾಯಿ ಹೆಚ್ಚಾಗಿದೆ. ಪ್ರಸ್ತುತ ಅಜ್ವಾ ಖರ್ಜೂರ ಕೆಜಿಗೆ ಸುಮಾರು 900 ರೂಪಾಯಿ ಹಾಗೂ ಕಲ್ಮಿ ಖರ್ಜೂರ ಕೆಜಿಗೆ 650 ರೂಪಾಯಿಯಂತೆ ಮಾರಾಟವಾಗುತ್ತಿದೆ ಎಂದು ಅವರು ಹೇಳಿದ್ದಾರೆ. ಖರ್ಜೂರದ ಜೊತೆಗೆ, ಧಾರ್ಮಿಕ ಉದ್ದೇಶಗಳಿಗಾಗಿ ನಿಯಂತ್ರಿತ ಮಾರ್ಗಗಳ ಮೂಲಕ ಭಾರತಕ್ಕೆ ಆಮದು ಮಾಡಿಕೊಳ್ಳುವ ಜಮ್‌ಜಮ್ ನೀರಿನ ಮೇಲೂ ಸಾಗಣೆ ಸಂಬಂಧಿತ ಸಮಸ್ಯೆಗಳು ಪರಿಣಾಮ ಬೀರಿವೆ. ಈ ಹಿಂದೆ 1,500 ರೂಪಾಯಿಗೆ ಮಾರಾಟವಾಗುತ್ತಿದ್ದ ಐದು ಲೀಟರ್ ಜಮ್‌ಜಮ್ ನೀರಿನ ಕ್ಯಾನ್ ಈಗ 2,200 ರೂಪಾಯಿಗೆ ಮಾರಾಟವಾಗುತ್ತಿದೆ.

ಇದನ್ನೂ ಓದಿ: ಮಂಗಳೂರು–ಸೌದಿ ವಿಮಾನ ಸೇವೆ ವ್ಯತ್ಯಯ: ಕರಾವಳಿ ಕರ್ನಾಟಕದ ನೂರಾರು ಪ್ರಯಾಣಿಕರಿಗೆ ಸಮಸ್ಯೆ

ಸಮುದ್ರ ಮಾರ್ಗಗಳಲ್ಲಿನ ಭದ್ರತಾ ಅಪಾಯ ಹೆಚ್ಚಾದರೆ ಸರಕು ಸಾಗಣೆ ದರ ಮತ್ತು ವಿಮಾ ಪ್ರೀಮಿಯಂ ಏರಿಕೆಯಾಗಬಹುದು. ಹಡಗುಗಳನ್ನು ಪರ್ಯಾಯ ಮಾರ್ಗಗಳಿಗೆ ತಿರುಗಿಸುವುದರಿಂದ ಸರಕುಗಳ ತಲುಪುವಿಕೆಯ ಅವಧಿಯೂ ವಿಸ್ತರಿಸಬಹುದು ಎಂದು ವ್ಯಾಪಾರಿಗಳು ಎಚ್ಚರಿಸಿದ್ದಾರೆ. ಒಂದು ಸರಕು ಕಂಟೇನರ್‌ನ ಸಾಗಣೆ ವೆಚ್ಚ 1,500 ರೂಪಾಯಿಯಿಂದ 4,000 ರೂಪಾಯಿಗೆ ಏರಿಕೆಯಾಗಿದೆ. ಈ ಹೆಚ್ಚುವರಿ ವೆಚ್ಚ ಸರಕುಗಳ ಬೆಲೆಯಲ್ಲೂ ಪ್ರತಿಫಲಿಸಲಿದೆ. ಇರಾನ್ ಮತ್ತು ಅಫ್ಘಾನಿಸ್ತಾನದಿಂದ ಆಮದಾಗುವ ಕೆಲವು ಉತ್ಪನ್ನಗಳ ಬೆಲೆಯೂ ಏರಿಕೆಯಾಗುತ್ತಿದೆ. ಒಂದು ಕೆಜಿ ಮಾಮ್ರಾ ಬಾದಾಮಿಯ ಬೆಲೆ 2,500 ರೂಪಾಯಿಯಿಂದ 4,000 ರೂಪಾಯಿಗೆ ಹೆಚ್ಚಾಗಿದೆ. ಅದೇ ರೀತಿ, ಒಂದು ಕೆಜಿ ಅಂಜೂರದ ಬೆಲೆ ಈ ಹಿಂದೆ 1,200ರಿಂದ 1,400 ರೂಪಾಯಿಗಳಷ್ಟಿದ್ದದ್ದು ಈಗ 1,800 ರೂಪಾಯಿಗೆ ಏರಿಕೆಯಾಗಿದೆ ಎಂದು ವ್ಯಾಪಾರಿಗಳು ಮಾಹಿತಿ ನೀಡಿದ್ದಾರೆ.

ಮತ್ತಷ್ಟು ಸುದ್ದಿ ಓದಲು ಇಲ್ಲಿ ಕ್ಲಿಕ್​​ ಮಾಡಿ.