ನಾನು ಜೈಲಿನಲ್ಲಿ ಇದ್ದಾಗಲೇ ಸಿಎಂ ಆಗಲು ಯೋಚಿಸಿದ್ದೆ: ಅಚ್ಚರಿ ಹೇಳಿಕೆ ನಿಡಿದ ಸಿಎಂ ಡಿಕೆ ಶಿವಕುಮಾರ್

ಮೈಸೂರು, ನ.11: “ನನ್ನ ಬದುಕು ತೆರೆದ ಪುಸ್ತಕ. ನಾನು ಜೈಲಿನಲ್ಲಿ ಕೂತಿದ್ದಾಗಲೇ ಕಾಂಗ್ರೆಸ್ ಪಕ್ಷವನ್ನು ರಾಜ್ಯದಲ್ಲಿ ಅಧಿಕಾರಕ್ಕೆ ತರುತ್ತೇನೆ ಮತ್ತು ನಾನು ಮುಖ್ಯಮಂತ್ರಿಯಾಗುತ್ತೇನೆ ಎಂದು ಯೋಚನೆ ಮಾಡಿದ್ದೆ” ಎಂದು ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ತಮ್ಮ ರಾಜಕೀಯ ಜೀವನದ ಕಠಿಣ ಹಾಗೂ ರೋಚಕ ದಿನಗಳನ್ನು ಸ್ಮರಿಸಿಕೊಂಡಿದ್ದಾರೆ. ಮೈಸೂರಿನಲ್ಲಿ ತಮ್ಮ ಕುರಿತಾದ ನೂತನ ಪುಸ್ತಕ ಬಿಡುಗಡೆ ಕಾರ್ಯಕ್ರಮದಲ್ಲಿ ಪಾಲ್ಗೊಂಡು ಅವರು ಮನಬಿಚ್ಚಿ ಮಾತನಾಡಿದರು.

“ನಾನು ಸುಮ್ಮನೆ ಬಂದು ಈ ಸಿಎಂ ಸೀಟಿನಲ್ಲಿ ಕೂತಿಲ್ಲ. 35 ವರ್ಷಗಳ ಹಿಂದೆಯೇ ನಾನು ಮುಖ್ಯಮಂತ್ರಿಯಾಗುತ್ತೇನೆ ಎಂದು ಜ್ಯೋತಿಷಿಗಳು ಹೇಳಿದ್ದರು. ಎಷ್ಟೋ ನಾಯಕರನ್ನು ಬೆಳೆಸಿ, ಶ್ರಮಪಟ್ಟು ಇಲ್ಲಿ ಬಂದು ಕುಳಿತಿದ್ದೇನೆ” ಎಂದರು. “ಎಸ್. ಬಂಗಾರಪ್ಪ, ಎಸ್.ಎಂ. ಕೃಷ್ಣ ಹಾಗೂ ಹೆಚ್.ಡಿ. ಕುಮಾರಸ್ವಾಮಿ ಅವರು ಮುಖ್ಯಮಂತ್ರಿಯಾಗುವಲ್ಲಿ ನನ್ನ ಪಾತ್ರ ಏನಿತ್ತು ಎಂಬ ಬಗ್ಗೆ ಮಾತನಾಡುವುದು ಬಹಳಷ್ಟಿದೆ. ಅದನ್ನು ಮುಂದೆ ಯಾವಾಗಲಾದರೂ ಪುಸ್ತಕದಲ್ಲಿ ದಾಖಲಿಸುತ್ತೇನೆ” ಎಂದು ರಹಸ್ಯ ಬಿಚ್ಚಿಟ್ಟರು. “ನನ್ನ 48ನೇ ವಯಸ್ಸಿನಲ್ಲಿ ಮುಕ್ತ ವಿಶ್ವವಿದ್ಯಾಲಯದಿಂದ ಪದವಿ ಪಡೆದದ್ದು ಜೀವನದ ಅತ್ಯಂತ ಸಂತೋಷದ ದಿನವಾಗಿತ್ತು. ಆದರೆ ಅಂದು ಬಿಜೆಪಿಯ ಶಂಕರಮೂರ್ತಿ ಅವರು ನನ್ನನ್ನು ವೇದಿಕೆ ಹತ್ತಿಸದೆ ಅವಮಾನ ಮಾಡಿದ್ದರು” ಎಂದು ನೆನಪಿಸಿಕೊಂಡರು.

“ನಾನು ಸಿದ್ದರಾಮಯ್ಯನವರಿಗೆ ಎಂದಿಗೂ ಕೇಡು ಬಯಸಿಲ್ಲ, ಮುಂದೆಯೂ ಬಯಸುವುದಿಲ್ಲ. ಹೆಚ್.ಡಿ. ಕುಮಾರಸ್ವಾಮಿ ಜೊತೆ ಸರ್ಕಾರ ನಡೆಸುವಾಗಲೂ ಅವರಿಗೆ ಕೆಡಕನ್ನು ಬಯಸಲಿಲ್ಲ. ಆದರೆ ಈಗ ಕುಮಾರಸ್ವಾಮಿಗೆ ನನ್ನನ್ನು ನೋಡಿ ಸಹಿಸಲು ಸಾಧ್ಯವಾಗುತ್ತಿಲ್ಲ. ನಾನು ಸಿಎಂ ಆಗಿರುವುದು ವಿಪಕ್ಷಗಳಿಗೆ ಸಹಿಸಲು ಆಗುತ್ತಿಲ್ಲ. ದಿನವೂ ನನ್ನ ಬಗ್ಗೆ ನೆಗೆಟಿವ್ ಹುಡುಕುತ್ತಾರೆ. ‘ಅಯ್ಯೋ ಡಿಕೆ ಸಿಎಂ ಆಗಿಬಿಟ್ಟ’ ಎಂದು ಕೆಲವರು ಕೊರಗುತ್ತಿದ್ದಾರೆ. ಆದರೆ ನಾನು ತಾಳ್ಮೆಯಿಂದ ಇದ್ದೇನೆ, ಯಾರಿಗೂ ಮೋಸ ಮಾಡುವ ಮನಸ್ಸು ನನಗಿಲ್ಲ. ನಾನು ಸಿಎಂ ಆದರೂ ತನ್ವೀರ್ ಸೇಠ್ ಅವರನ್ನು ಮಂತ್ರಿ ಮಂಡಲಕ್ಕೆ ಸೇರಿಸಿಕೊಳ್ಳಲು ಆಗಲಿಲ್ಲ ಎಂಬ ದೊಡ್ಡ ನೋವು ನನಗಿದೆ” ಎಂದು ಹೇಳಿದರು.

ಇದನ್ನೂ ಓದಿ: DC ಕಚೇರಿ ಮುಂದೆ ರೈತನ ಭಾರಿ ಹೈಡ್ರಾಮಾ: 25 ಲಕ್ಷ ರೂ. ಲಂಚ ಪಡೆದು ತಹಸೀಲ್ದಾರ್ ವಂಚಿಸಿದ ಆರೋಪ; 4 ಗಂಟೆ ಮರವೇರಿ ಪ್ರತಿಭಟಿಸಿದ ರೈತ

ತಮ್ಮ ವಿರುದ್ಧ ಕೇಳಿಬಂದ ಹಳೆಯ ಆರೋಪಗಳಿಗೆ ಸಿಎಂ ಡಿಕೆಶಿ ಪ್ರತಿಕ್ರಿಯಿಸಿದ್ದಾರೆ. “ನಾನು ಥಿಯೇಟರ್ ನಡೆಸುತ್ತಿದ್ದಾಗ ಕೆಲವರು ಅದರಲ್ಲಿ ಬ್ಲೂಫಿಲ್ಮ್ ಪ್ರದರ್ಶಿಸುತ್ತಿದ್ದೆ ಎಂದು ಸುಳ್ಳು ಹರಡಿದ್ದರು. ಇಂದಿರಾ ಗಾಂಧಿಯವರ ಹೆಸರಿಟ್ಟಿದ್ದ ಥಿಯೇಟರ್‌ನಲ್ಲಿ ಯಾರಾದರೂ ಆ ರೀತಿ ಮಾಡಲು ಸಾಧ್ಯವೇ? ಎಲ್ಲಾದರೂ ಉಂಟಾ ಹೇಳಿ? ನನ್ನನ್ನು ಬಂಡೆ ಎಂದರು, ರೌಡಿ, ಚಾಕು-ಚೂರಿ ಎಂದೆಲ್ಲಾ ಹೆಸರಿಟ್ಟು ಕರೆದರು. ಆದರೆ ಈಗ ಏನು ಕರೆಯುತ್ತಾರೆ ಹೇಳಿ? ನಾನು ಎಂದಿಗೂ ಡಿ.ಕೆ. ಶಿವಕುಮಾರ್ ಅಷ್ಟೇ” ಎಂದು ಹೇಳಿದರು.

ರಾಜ್ಯದ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ