NEET PG Exam 2026: ಇಂದೇ ನೀಟ್-ಪಿಜಿ 2026 ಪರೀಕ್ಷೆ: ಹಾಲ್ ಟಿಕೆಟ್ ಜೊತೆ ಆಧಾರ್ ದೃಢೀಕರಣ ಕಡ್ಡಾಯ, 8.30ಕ್ಕೆ ಗೇಟ್ ಕ್ಲೋಸ್
ನೀಟ್ ಪಿಜಿ ಪರೀಕ್ಷೆ ಇಂದು ನಡೆಯಲಿದ್ದು, ಪ್ರವೇಶಕ್ಕೆ ಆಧಾರ್ ದೃಢೀಕರಣ ಕಡ್ಡಾಯ. ಬೆಳಗ್ಗೆ 8:30ರ ಒಳಗೆ ಕೇಂದ್ರಕ್ಕೆ ಹಾಜರಾಗಬೇಕು; ನಂತರ ಪ್ರವೇಶವಿಲ್ಲ. ಎಲೆಕ್ಟ್ರಾನಿಕ್ ವಸ್ತುಗಳು ಹಾಗೂ ನಿರ್ದಿಷ್ಟ ಡ್ರೆಸ್ ಕೋಡ್ ಪಾಲಿಸುವುದು ಅಗತ್ಯ. ಅಭ್ಯರ್ಥಿಗಳು ತಮ್ಮ ಪ್ರವೇಶ ಪತ್ರದೊಂದಿಗೆ ಮೂಲ ಆಧಾರ್ ಕಾರ್ಡ್ ಕಡ್ಡಾಯವಾಗಿ ತರಬೇಕು. ಪರೀಕ್ಷಾ ಅಕ್ರಮ ತಡೆಗಟ್ಟಲು ಕಟ್ಟುನಿಟ್ಟಿನ ನಿಯಮ ಜಾರಿ.
Updated on: Aug 30, 2026 | 8:24 AM
ನವದೆಹಲಿ, ಆಗಸ್ಟ್ 30: ದೇಶಾದ್ಯಂತ ಸ್ನಾತಕೋತ್ತರ ವೈದ್ಯಕೀಯ ಕೋರ್ಸ್‌ಗಳ ಪ್ರವೇಶಕ್ಕಾಗಿ ನಡೆಯುವ ರಾಷ್ಟ್ರೀಯ ಅರ್ಹತಾ ಮತ್ತು ಪ್ರವೇಶ ಪರೀಕ್ಷೆ (NEET-PG 2026) ಇಂದು ಒಂದೇ ಪಾಳಿಯಲ್ಲಿ ನಡೆಯಲಿದೆ. ಒಟ್ಟು 2,73,183 ಅಭ್ಯರ್ಥಿಗಳು ಪರೀಕ್ಷೆಗೆ ಹಾಜರಾಗಲಿದ್ದು, ಪರೀಕ್ಷಾ ಅಕ್ರಮಗಳನ್ನು ತಡೆಗಟ್ಟಲು ರಾಷ್ಟ್ರೀಯ ವೈದ್ಯಕೀಯ ವಿಜ್ಞಾನಗಳ ಪರೀಕ್ಷಾ ಮಂಡಳಿ (NBEMS) ಕಟ್ಟುನಿಟ್ಟಿನ ಮಾರ್ಗಸೂಚಿಗಳನ್ನು ಜಾರಿಗೊಳಿಸಿದೆ.
ಪರೀಕ್ಷಾ ಸಮಯ ಮತ್ತು ವರದಿ ಮಾಡುವ ನಿಯಮಗಳು
ಪರೀಕ್ಷಾ ಅವಧಿ: ಬೆಳಗ್ಗೆ 9 ರಿಂದ ಮಧ್ಯಾಹ್ನ 12.30 ರವರೆಗೆ ನಡೆಯಲಿದೆ.ಅಭ್ಯರ್ಥಿಗಳು ಬೆಳಗ್ಗೆ 8.30 ರ ಒಳಗೆ ಕೇಂದ್ರದಲ್ಲಿ ಹಾಜರಿರಬೇಕು. ಬೆಳಗ್ಗೆ 8.30 ಕ್ಕೆ ಪರೀಕ್ಷಾ ಕೇಂದ್ರದ ಮುಖ್ಯ ದ್ವಾರವನ್ನು (Gate) ಮುಚ್ಚಲಾಗುವುದು, ನಂತರ ಬರುವವರಿಗೆ ಪ್ರವೇಶವಿರುವುದಿಲ್ಲ.
ಕಡ್ಡಾಯ ದಾಖಲೆಗಳು ಮತ್ತು ಪ್ರವೇಶ ನಿಯಮಗಳು
ಆಧಾರ್ ದೃಢೀಕರಣ ಕಡ್ಡಾಯ: ಪರೀಕ್ಷಾ ಕೇಂದ್ರದಲ್ಲಿ ಬಯೋಮೆಟ್ರಿಕ್/ಆಧಾರ್ ಆಧಾರಿತ ಪರಿಶೀಲನೆ ನಡೆಯುವುದರಿಂದ ಅಭ್ಯರ್ಥಿಗಳು ತಮ್ಮ ಪ್ರವೇಶ ಪತ್ರದೊಂದಿಗೆ ಮೂಲ ಆಧಾರ್ ಕಾರ್ಡ್ ಕೊಂಡೊಯ್ಯುವುದು ಕಡ್ಡಾಯವಾಗಿದೆ.
ಮತ್ತಷ್ಟು ಓದಿ: NEET-UG Exam: ಜೆಇಇ ಮಾದರಿಯಲ್ಲಿ ನೀಟ್-ಯುಜಿ ಪರೀಕ್ಷಾ ಕ್ರಾಂತಿ:ಆನ್‌ಲೈನ್ ಕಂಪ್ಯೂಟರ್ ಪರೀಕ್ಷೆ
ಹೆಚ್ಚುವರಿ ಗುರುತಿನ ಚೀಟಿ: ಆಧಾರ್ ಜೊತೆಗೆ ಸರ್ಕಾರ ನೀಡಿದ ಮೂಲ ಫೋಟೋ ಐಡಿ (ಪ್ಯಾನ್ ಕಾರ್ಡ್, ಮತದಾರರ ಗುರುತಿನ ಚೀಟಿ ಅಥವಾ ಪಾಸ್‌ಪೋರ್ಟ್) ತರಲು ಸೂಚಿಸಲಾಗಿದೆ.
ನಿಷೇಧಿತ ವಸ್ತುಗಳು: ಸ್ಮಾರ್ಟ್‌ಫೋನ್, ಬ್ಲೂಟೂತ್ ಸಾಧನಗಳು, ಇಯರ್‌ಫೋನ್‌ಗಳು, ಸ್ಮಾರ್ಟ್‌ವಾಚ್‌ಗಳು ಸೇರಿದಂತೆ ಯಾವುದೇ ಎಲೆಕ್ಟ್ರಾನಿಕ್ ವಸ್ತುಗಳಿಗೆ ಪ್ರವೇಶವಿಲ್ಲ. ಕೇಂದ್ರದಲ್ಲಿ ವಸ್ತುಗಳನ್ನು ಇಡಲು ಪ್ರತ್ಯೇಕ ಲಾಕರ್ ವ್ಯವಸ್ಥೆ ಇರುವುದಿಲ್ಲ.
ಅಭ್ಯರ್ಥಿಗಳಿಗೆ ಡ್ರೆಸ್ ಕೋಡ್
ಪುರುಷ ಅಭ್ಯರ್ಥಿಗಳು: ಸರಳವಾದ ಕ್ಯಾಶುವಲ್ ಪ್ಯಾಂಟ್, ಜೀನ್ಸ್ ಮತ್ತು ಅರ್ಧ ತೋಳಿನ ಶರ್ಟ್/ಟಿ-ಶರ್ಟ್ ಧರಿಸಬೇಕು. ಶೂಗಳ ಬದಲಿಗೆ ತೆರೆದ ಚಪ್ಪಲಿಗಳನ್ನು ಮಾತ್ರ ಧರಿಸಲು ಸೂಚಿಸಲಾಗಿದೆ. ಟೋಪಿ, ಕ್ಯಾಪ್, ಮಫ್ಲರ್ ಧರಿಸುವಂತಿಲ್ಲ.
ಮಹಿಳಾ ಅಭ್ಯರ್ಥಿಗಳು: ಲೆಗ್ಗಿಂಗ್ಸ್ ಅಥವಾ ಸರಳ ಪ್ಯಾಂಟ್ ಹಾಗೂ ಸರಳ ಸ್ಯಾಂಡಲ್ ಧರಿಸಬೇಕು. ಪರ್ಸ್, ಹ್ಯಾಂಡ್‌ಬ್ಯಾಗ್ ಹಾಗೂ ಕೈಗಳಿಗೆ ದಪ್ಪ ಮೆಹಂದಿ ಹಾಕಿರುವುದನ್ನು ನಿಷೇಧಿಸಲಾಗಿದೆ.
ವಿದ್ಯಾರ್ಥಿಗಳಿಗೆ ಸಮಯದ ಒತ್ತಡ ಕಡಿಮೆ ಮಾಡಲು ಈ ಬಾರಿ ಪ್ರಶ್ನೆಗಳ ಸಂಖ್ಯೆಯನ್ನು 200 ರಿಂದ 180 ಕ್ಕೆ ಇಳಿಸಲಾಗಿದೆ (ಒಟ್ಟು 720 ಅಂಕಗಳು). ಪ್ರತಿ ಸರಿ ಉತ್ತರಕ್ಕೆ 4 ಅಂಕ ಮತ್ತು ತಪ್ಪು ಉತ್ತರಕ್ಕೆ 1 ನೆಗೆಟಿವ್ ಅಂಕವಿರುತ್ತದೆ.
ಆನ್ಸರ್ ಕೀ : ಪರೀಕ್ಷೆ ಮುಗಿದ ತಕ್ಷಣ ವಿವಿಧ ತರಬೇತಿ ಸಂಸ್ಥೆಗಳು ಅನಧಿಕೃತ ಕೀಲಿಗಳನ್ನು ಬಿಡುಗಡೆ ಮಾಡುತ್ತವೆ. ಅಧಿಕೃತ ಮಾಹಿತಿ ಮತ್ತು ಫಲಿತಾಂಶದ ವಿವರಗಳಿಗಾಗಿ ವಿದ್ಯಾರ್ಥಿಗಳು nbe.edu.in ವೆಬ್‌ಸೈಟ್‌ಗೆ ಭೇಟಿ ನೀಡಬಹುದು.
ರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ
