ಕೊಹ್ಲಿ ಕಮಾಲ್… ಅತ್ಯದ್ಭುತ ಕ್ಯಾಚ್‌ಗೆ ಪ್ರೇಕ್ಷಕರು ನಿಬ್ಬೆರಗು!

ಆಕ್ಲೆಂಡ್‌ನ ಈಡನ್ ಪಾರ್ಕ್ ಮೈದಾನದಲ್ಲಿ ನಡೆಯುತ್ತಿರುವ ಭಾರತ ಮತ್ತು ನ್ಯೂಝಿಲೆಂಡ್ ನಡುವಿನ ಮೊದಲ ಏಕದಿನ ಪಂದ್ಯದಲ್ಲಿ ವಿರಾಟ್ ಕೊಹ್ಲಿ ಅತ್ಯದ್ಭುತ ಕ್ಯಾಚ್ ಹಿಡಿದು ಎಲ್ಲರನ್ನು ನಿಬ್ಬೆರಗಾಗಿಸಿದ್ದಾರೆ. ಈ ಪಂದ್ಯದಲ್ಲಿ ಟಾಸ್ ಸೋತು ಮೊದಲು ಬ್ಯಾಟ್ ಮಾಡಿದ ನ್ಯೂಝಿಲೆಂಡ್ ತಂಡ ಉತ್ತಮ ಆರಂಭ ಪಡೆದಿರಲಿಲ್ಲ.

ಟೀಮ್ ಇಂಡಿಯಾದ ಕರಾರುವಾಕ್ ಬೌಲಿಂಗ್ ದಾಳಿಗೆ ನಲುಗಿದ ಕಿವೀಸ್ ಬ್ಯಾಟರ್‌ಗಳು ರನ್ ಗಳಿಸಲು ತೀವ್ರ ಪರದಾಡಿದರು. ಭಾರತೀಯ ಬೌಲರ್‌ಗಳ ಮಾರಕ ದಾಳಿಗೆ ತತ್ತರಿಸಿ ಒಬ್ಬರ ಹಿಂದೆ ಒಬ್ಬರಂತೆ ಪೆವಿಲಿಯನ್ ಸೇರಿದ ಪರಿಣಾಮ, ನ್ಯೂಝಿಲೆಂಡ್ ತಂಡ 27ನೇ ಓವರ್ ವೇಳಗಾಗಲೇ ತನ್ನ 6ನೇ ವಿಕೆಟ್ ಕಳೆದುಕೊಂಡು ಭಾರೀ ಸಂಕಷ್ಟಕ್ಕೆ ಸಿಲುಕಿತು.

ಈ ಹಂತದಲ್ಲಿ ದಾಳಿಗಿಳಿದ ಅನ್ಶುಲ್ ಕಂಬೋಜ್ ಎಸೆದ ಎಸೆತವನ್ನು ಡಿಫೆಂಡ್ ಮಾಡಲು ಹೋದ ಕಿವೀಸ್ ಬ್ಯಾಟರ್ ನಾಥನ್ ಸ್ಮಿತ್ ಬ್ಯಾಟ್‌ನ ಹೊರ ಅಂಚಿಗೆ ತಗುಲಿ ಚೆಂಡು ಸ್ಲಿಪ್‌ನತ್ತ ವೇಗವಾಗಿ ಸಾಗಿತು.

ಕೊಹ್ಲಿ ಕಮಾಲ್:

ನಾಥನ್ ಸ್ಮಿತ್ ಬ್ಯಾಟ್‌ನ ಹೊರ ಅಂಚಿಗೆ  ತಗುಲಿ ಚೆಂಡು ಸ್ಲಿಪ್‌ನತ್ತ ವೇಗವಾಗಿ ಧಾವಿಸುತ್ತಿದ್ದಂತೆ, ಕ್ಷಣಾರ್ಧದಲ್ಲಿ ಎಚ್ಚೆತ್ತ ವಿರಾಟ್ ಕೊಹ್ಲಿ ಬಲಗಡೆಗೆ ಗಾಳಿಯಲ್ಲಿ ಸಂಪೂರ್ಣವಾಗಿ ಜಿಗಿದು, ನೆಲಕ್ಕೆ ತಾಗುವ ಮುನ್ನವೇ ಒಂದು ಕೈಯಿಂದ ಕ್ಯಾಚ್ ಹಿಡಿದರು. ಈ ನಂಬಲಾಗದ ಕ್ಷೇತ್ರರಕ್ಷಣೆಯನ್ನು ಕಂಡು ಮೈದಾನದಲ್ಲಿದ್ದ ಸಹ ಆಟಗಾರರು ಹಾಗೂ ಕ್ರೀಡಾಂಗಣದಲ್ಲಿದ್ದ ಅಭಿಮಾನಿಗಳು ಒಂದು ಕ್ಷಣ ನಿಬ್ಬೆರಗಾದರು.

KOHLI WHATTA CATCH!! https://t.co/3OjINEdB3G

— Gaurav (@Melbourne__82) November 4, 2026

ಕ್ಯಾಚ್ ಹಿಡಿದ ತಕ್ಷಣ ವಿರಾಟ್ ಕೊಹ್ಲಿ ತಮ್ಮ ಎಂದಿನ ಆಕ್ರಮಣಕಾರಿ ಶೈಲಿಯಲ್ಲಿ, “ನನ್ನನ್ನು ತಡೆಯಲು ಸಾಧ್ಯವಿದ್ದರೆ ತಡೆಯಿರಿ” ಎಂಬಂತಹ ವಿಶಿಷ್ಟ ಹಾವಭಾವದೊಂದಿಗೆ ಸಂಭ್ರಮಿಸಿದರು. ಇದೀಗ ಈ ಅದ್ಭುತ ಕ್ಯಾಚ್ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಸಖತ್ ವೈರಲ್ ಆಗಿದೆ.

A One Handed Stunning Catch By King Kohli 😭🔥 https://t.co/zLvv0F9Qzw

— v. (@183innings2012) November 4, 2026

ಇದನ್ನೂ ಓದಿ: IPL ಟ್ರೇಡಿಂಗ್ ಅಂದರೆ ಏನು? ಇದರ ನಿಯಮಗಳೇನು? ಇಲ್ಲಿದೆ ಸಂಪೂರ್ಣ ಮಾಹಿತಿ

ಇನ್ನು ಈ ಕ್ಯಾಚ್ ಮೂಲಕ ವಿರಾಟ್ ಕೊಹ್ಲಿ ವಯಸ್ಸು ಕೇವಲ ಸಂಖ್ಯೆಯಷ್ಟೇ ಎಂಬುದನ್ನು ಮತ್ತೊಮ್ಮೆ ನಿರೂಪಿಸಿದ್ದಾರೆ. ಕಿಂಗ್ ಕೊಹ್ಲಿಯ ಈ ಕ್ಷೇತ್ರರಕ್ಷಣೆ, ಈ ಸರಣಿಯ ಅತ್ಯುತ್ತಮ ಕ್ಯಾಚ್‌ಗಳಲ್ಲಿ ಒಂದಾಗಿ ಉಳಿಯುವುದರಲ್ಲಿ ಯಾವುದೇ ಸಂಶಯವಿಲ್ಲ. ಪ್ರಸ್ತುತ ಕೊಹ್ಲಿ ಅವರ ಈ ‘ಫ್ಲೈಯಿಂಗ್ ಕ್ಯಾಚ್’ ವಿಡಿಯೋ ಇಂಟರ್ನೆಟ್‌ನಲ್ಲಿ ಸಖತ್ ವೈರಲ್ ಆಗುತ್ತಿದ್ದು, ಅಭಿಮಾನಿಗಳು ‘ಫ್ಲೈಯಿಂಗ್ ಕಿಂಗ್’ ಎಂದು ಸಾಮಾಜಿಕ ಜಾಲತಾಣಗಳಲ್ಲಿ ಸಂಭ್ರಮಿಸುತ್ತಿದ್ದಾರೆ.