36 ಎಸೆತಗಳಲ್ಲಿ 154 ರನ್ ಚಚ್ಚಿದ ಪಾಕಿಸ್ತಾನ್: ವಿಶ್ವ ದಾಖಲೆ ಜಸ್ಟ್ ಮಿಸ್!

ಹಾಂಗ್ ಕಾಂಗ್ ಸಿಕ್ಸಸ್ ಟೂರ್ನಿಯ ಪ್ಲೇಟ್ ಫೈನಲ್ ಪಂದ್ಯದಲ್ಲಿ ಪಾಕಿಸ್ತಾನ್ ತಂಡದ ಪ್ರಚಂಡ ಬ್ಯಾಟಿಂಗ್ ಪ್ರದರ್ಶಿಸಿದೆ. ಮೌಂಗ್ ಕಾಕ್‌ನ ಮಿಷನ್ ರೋಡ್ ಗ್ರೌಂಡ್​ನಲ್ಲಿ ನಡೆದ ಈ ನಿರ್ಣಾಯಕ ಪಂದ್ಯದಲ್ಲಿ ಟಾಸ್ ಗೆದ್ದ ಒಮಾನ್ ತಂಡದ ನಾಯಕ ಅಮೀರ್ ಖಲೀಮ್ ಬೌಲಿಂಗ್ ಆಯ್ದುಕೊಂಡಿದ್ದರು.

ಸಿಕ್ಸರ್‌ಗಳ ಸುರಿಮಳೆ:

ಟಾಸ್ ಸೋತು ಮೊದಲು ಬ್ಯಾಟಿಂಗ್ ಮಾಡಿದ ಪಾಕಿಸ್ತಾನ್ ತಂಡಕ್ಕೆ ನಾಯಕ ಅಬ್ಬಾಸ್ ಅಫ್ರಿದಿ ಸಿಡಿಲಬ್ಬರದ ಆರಂಭ ಒದಗಿಸಿದರು. ಮೊದಲ ಓವರ್​ನಿಂದಲೇ ಹೊಡಿಬಡಿ ಆಟವಾಡಿದ ಅಫ್ರಿದಿ 16 ಎಸೆತಗಳಲ್ಲಿ ಚಚ್ಚಿದ್ದು ಬರೋಬ್ಬರಿ 73 ರನ್​ಗಳು. ಈ 73 ರನ್​ಗಳಲ್ಲಿ 11 ಸಿಕ್ಸ್​ ಹಾಗೂ 1 ಫೋರ್ ಒಳಗೊಂಡಿತ್ತು.

ಅಬ್ಬಾಸ್ ಅಫ್ರಿದಿಗೆ ಉತ್ತಮ ಸಾಥ್ ನೀಡಿದ ಅಬ್ದುಲ್ ಸಮದ್ ಕೇವಲ 7 ಎಸೆತಗಳಲ್ಲಿ 32 ರನ್ (2 ಫೋರ್, 4 ಸಿಕ್ಸರ್) ಹಾಗೂ ಅಹ್ಮದ್ ದಾನಿಯಾಲ್ 5 ಎಸೆತಗಳಲ್ಲಿ 25 ರನ್ (4 ಸಿಕ್ಸರ್) ಬಾರಿಸಿ ಒಮಾನ್ ಬೌಲಿಂಗ್ ಪಡೆಯನ್ನು ಧ್ವಂಸಗೊಳಿಸಿದರು. ಈ ಮೂಲಕ ಪಾಕಿಸ್ತಾನ್ ತಂಡ 6 ಓವರ್​ಗಳಲ್ಲಿ ಬರೋಬ್ಬರಿ 154 ರನ್​ ಕಲೆಹಾಕಿತು.

ಒಮಾನ್ ದಿಟ್ಟ ಹೋರಾಟ ವ್ಯರ್ಥ:

155 ರನ್‌ಗಳ ಅಸಾಧ್ಯ ಗುರಿಯನ್ನು ಬೆನ್ನಟ್ಟಿದ ಒಮಾನ್ ತಂಡ ಕೂಡ ಅತ್ಯುತ್ತಮ ಬ್ಯಾಟಿಂಗ್ ಪ್ರದರ್ಶಿಸಿತು. ಉಸ್ಮಾನ್ ಅಲಿ 17 ಎಸೆತಗಳಲ್ಲಿ 67 ರನ್ (4 ಫೋರ್, 8 ಸಿಕ್ಸರ್) ಮತ್ತು ಝೊಹೈಬ್ ಅಮಾನತ್ 18 ಎಸೆತಗಳಲ್ಲಿ 61 ರನ್ (3 ಫೋರ್, 8 ಸಿಕ್ಸರ್) ಚಚ್ಚುವ ಮೂಲಕ ಪಾಕಿಸ್ತಾನಕ್ಕೆ ತಕ್ಕ ತಿರುಗೇಟು ನೀಡಿದರು. ಆದರೆ, ನಿಗದಿತ 6 ಓವರ್‌ಗಳಲ್ಲಿ 4 ವಿಕೆಟ್ ಕಳೆದುಕೊಂಡು 136 ರನ್‌ಗಳಷ್ಟೇ ಗಳಿಸಲು ಶಕ್ತವಾಗಿ, 18 ರನ್‌ಗಳ ಸೋಲೊಪ್ಪಿಕೊಂಡಿತು. ಈ ಗೆಲುವಿನೊಂದಿಗೆ ಪಾಕಿಸ್ತಾನ್ ತಂಡ ಹಾಂಗ್ ಕಾಂಗ್ ಸಿಕ್ಸಸ್ ಟೂರ್ನಿಯ ಪ್ಲೇಟ್ ಫೈನಲ್​ನಲ್ಲಿ ಚಾಂಪಿಯನ್ ಪಟ್ಟ ಅಲಂಕರಿಸಿದೆ.

ವಿಶ್ವ ದಾಖಲೆಯಲ್ಲ!

ಪಾಕಿಸ್ತಾನ್ ತಂಡ 6 ಓವರ್​ಗಳಲ್ಲಿ 154 ರನ್ ಚಚ್ಚಿದರೂ ಇದು ವಿಶ್ವ ದಾಖಲೆಯಾಗಲು ಸಾಧ್ಯವಾಗಲಿಲ್ಲ. ಏಕೆಂದರೆ ಈ ಬಾರಿಯ ಟೂರ್ನಿಯಲ್ಲೇ ಆಸ್ಟ್ರೇಲಿಯಾ ತಂಡ ಇಂಗ್ಲೆಂಡ್ ವಿರುದ್ಧ 6 ಓವರ್​ಗಳಲ್ಲಿ ಬರೋಬ್ಬರಿ 159 ರನ್ ಸಿಡಿಸಿತ್ತು. ಈ ಮೂಲಕ ಹಾಂಗ್ ಕಾಂಗ್ ಸಿಕ್ಸಸ್ ಟೂರ್ನಿಯ ಇತಿಹಾಸದಲ್ಲೇ ಗರಿಷ್ಠ ಮೊತ್ತ ಕಲೆಹಾಕಿದ ಸರ್ವಕಾಲಿಕ ದಾಖಲೆಯನ್ನು ಆಸ್ಟ್ರೇಲಿಯಾ ತನ್ನ ಹೆಸರಿಗೆ ಬರೆದುಕೊಂಡಿತ್ತು.

ಇದನ್ನೂ ಓದಿ: ಪಾಕಿಸ್ತಾನ್ ತಂಡದ ವಿಶ್ವ ದಾಖಲೆಯ ಚೇಸಿಂಗ್

ಇದೀಗ ಪಾಕಿಸ್ತಾನ ತಂಡ ಒಮಾನ್ ವಿರುದ್ಧ ಈ ಬೃಹತ್ ದಾಖಲೆಯ ಸಮೀಪಕ್ಕೆ ತಲುಪಿದರೂ, ಕೇವಲ 6 ರನ್​ಗಳ ಕೊರತೆಯಿಂದಾಗಿ ಹೊಸ ವಿಶ್ವ ದಾಖಲೆ ನಿರ್ಮಿಸುವ ಸುವರ್ಣ ಅವಕಾಶವನ್ನು ಕೈಚೆಲ್ಲಿಕೊಂಡಿದೆ.

Published On - 9:09 am, Mon, 2 November 26