PSL 2025: ‘ನಾನು ಎಂದಿಗೂ ಪಾಕಿಸ್ತಾನಕ್ಕೆ ಹೋಗುವುದಿಲ್ಲ’; ಮಗುವಿನಂತೆ ಕಣ್ಣೀರಿಟ್ಟ ವಿದೇಶಿ ಕ್ರಿಕೆಟಿಗರು

ಭಾರತ ಮತ್ತು ಪಾಕಿಸ್ತಾನ ನಡುವಿನ ಉದ್ವಿಗ್ನತೆಯಿಂದಾಗಿ ಉಭಯ ದೇಶಗಳ ನಡುವೆ ಯುದ್ಧದ ವಾತಾವರಣ ಸೃಷ್ಟಿಯಾಗಿದೆ. ಎರಡೂ ದೇಶಗಳು ಪರಸ್ಪರ ನಿರಂತರವಾಗಿ ಕ್ಷಿಪಣಿ ಮತ್ತು ಡ್ರೋನ್‌ಗಳ ದಾಳಿ ನಡೆಸುತ್ತಿವೆ. ಹೀಗಾಗಿ ಎರಡು ದೇಶಗಳಲ್ಲಿ ನಡೆಯುತ್ತದ್ದ ಟಿ20 ಲೀಗ್​ಗಳನ್ನು ರದ್ದುಗೊಳಿಸಲಾಗಿತ್ತು. ಭಾರತದಲ್ಲಿ ಐಪಿಎಲ್ (IPL 2025) ಅನ್ನು ಮುಂದೂಡಿದ್ದರೆ, ಅತ್ತ ಪಾಕಿಸ್ತಾನದಲ್ಲಿ ಪಾಕ್ ಸೂಪರ್ ಲೀಗ್ (PSL) ಅನ್ನು ಸ್ಥಗಿತಗೊಳಿಸಲಾಗಿತ್ತು. ಹೀಗಾಗಿ ಪಾಕ್ ಲೀಗ್​ನಲ್ಲಿ ಆಡುತ್ತಿದ್ದ ವಿದೇಶಿ ಆಟಗಾರರು ತಮ್ಮ ತಮ್ಮ ದೇಶಕ್ಕೆ ವಾಪಸ್ಸಾಗಲು ಹೆಣಗಾಡಬೇಕಾಯಿತು. ಹಾಗೋ ಹೀಗೋ ಪಾಕಿಸ್ತಾನವನ್ನು ತೊರೆದಿರುವ ವಿದೇಶಿ ಆಟಗಾರರು ಪಾಕ್ ನೆಲದಲ್ಲಿ ತಮಗಾದ ಅನುಭವವನ್ನು ಎಳೆಎಳೆಯಾಗಿ ಬಿಚ್ಚಿಟ್ಟಿದ್ದಾರೆ.

ಆಘಾತಕ್ಕೊಳಗಾಗಿದ್ದ ವಿದೇಶಿ ಆಟಗಾರರು

ಪಾಕಿಸ್ತಾನ ಸೂಪರ್ ಲೀಗ್​ನಲ್ಲಿ ಭಾಗವಹಿಸಿದ್ದ ಬಾಂಗ್ಲಾದೇಶದ ಲೆಗ್-ಸ್ಪಿನ್ನರ್ ರಿಷದ್ ಹೊಸೇನ್ ತಮಗಾದ ನೋವಿನ ಅನುಭವವನ್ನು ಹಂಚಿಕೊಂಡಿದ್ದಾರೆ. ಈ ಬಗ್ಗೆ ಹೇಳಿಕೊಂಡಿರುವ ಅವರು, ‘ಅಪಾಯಕಾರಿ ಪರಿಸ್ಥಿತಿಯಿಂದ ದೂರವಾಗಿ ದುಬೈ ತಲುಪಿದ ನಂತರ ತಮಗೆ ನಿರಾಳವಾಯಿತು. ಪಾಕಿಸ್ತಾನದ ಪರಿಸ್ಥಿತಿ ನೋಡಿ ಅನೇಕ ವಿದೇಶಿ ಆಟಗಾರರು ಬೆಚ್ಚಿಬಿದ್ದಿದ್ದರು. ಇಂಗ್ಲೆಂಡ್ ಆಟಗಾರ ಟಾಮ್ ಕರನ್ ತುಂಬಾ ಭಯಭೀತರಾಗಿ ಮಗುವಿನಂತೆ ಅಳಲು ಪ್ರಾರಂಭಿಸಿದ್ದರು. ಪಾಕಿಸ್ತಾನಕ್ಕೆ ಹೋಗಿ ಪಿಎಸ್‌ಎಲ್‌ನಲ್ಲಿ ಆಡಿದ್ದಕ್ಕೆ ವಿಷಾದಿಸಿದರು.

IPL 2025: ದಕ್ಷಿಣ ಭಾರತದ ಈ 3 ನಗರಗಳಲ್ಲಿ ನಡೆಯಲಿದೆ ಐಪಿಎಲ್ ದ್ವಿತೀಯಾರ್ಧ

ಮಗುವಿನಂತೆ ಅತ್ತ ಕರನ್

ಸ್ಯಾಮ್ ಬಿಲ್ಲಿಂಗ್ಸ್, ಡ್ಯಾರಿಲ್ ಮಿಚೆಲ್, ಕುಸಲ್ ಪೆರೆರಾ, ಡೇವಿಡ್ ವಿಜೆ ಮತ್ತು ಟಾಮ್ ಕರನ್ ಅವರಂತಹ ವಿದೇಶಿ ಆಟಗಾರರು ತುಂಬಾ ಭಯಭೀತರಾಗಿದ್ದರು. ಲಾಹೋರ್ ಖಲಂದರ್ಸ್‌ ಪರ ಆಡುತ್ತಿದ್ದ ಟಾಮ್ ಕರನ್ ಅವರ ದುಃಸ್ಥಿತಿಯನ್ನು ನೆನಪಿಸಿಕೊಂಡ ರಿಷದ್, ‘ಉದ್ವಿಗ್ನತೆ ಉಂಟಾದ ನಂತರ ಕರನ್ ತಮ್ಮ ದೇಶಕ್ಕೆ ಮರಳಲು ವಿಮಾನ ನಿಲ್ದಾಣಕ್ಕೆ ಹೋಗಿದ್ದರು. ಆದರೆ ವಿಮಾನ ನಿಲ್ದಾಣ ಮುಚ್ಚಲ್ಪಟ್ಟಿದೆ ಎಂದು ತಿಳಿದ ಬಳಿಕ ಅವರು ತುಂಬಾ ಹೆದರಿ ಚಿಕ್ಕ ಮಗುವಿನಂತೆ ಅಳಲು ಪ್ರಾರಂಭಿಸಿದರು. ಆ ನಂತರ ಎರಡು-ಮೂರು ಸಹ ಕ್ರಿಕೆಟಿಗರು ಅವರನ್ನು ಸಮಾಧಾನ ಪಡಿಸಿದರು. ನಾವು ದುಬೈಗೆ ಬಂದಿಳಿದ ತಕ್ಷಣ, ನ್ಯೂಜಿಲೆಂಡ್ ಕ್ರಿಕೆಟಿಗ ಮಿಚೆಲ್ ಅವರು ಇನ್ನು ಮುಂದೆ ಪಾಕಿಸ್ತಾನಕ್ಕೆ ಹೋಗುವುದಿಲ್ಲ ಎಂದು ಹೇಳಿದರು ಎಂದು ರಿಷದ್ ಹೊಸೇನ್ ಹೇಳಿಕೊಂಡಿದ್ದಾರೆ.

ಮತ್ತಷ್ಟು ಕ್ರೀಡಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ

Published On - 10:07 pm, Sat, 10 May 25