ಪಂಜಾಬ್ ಕಿಂಗ್ಸ್​ ಡೀಲ್​ಗೆ​​ ರಾಜಸ್ಥಾನ್ ರಾಯಲ್ಸ್ ಕೊಕ್ಕೆ!

ಇಂಡಿಯನ್ ಪ್ರೀಮಿಯರ್ ಲೀಗ್​ನಲ್ಲಿ ಹಿಂದೆಂದೂ ಕಾಣದ ಮೆಗಾ ಟ್ರೇಡಿಂಗ್‌ಗೆ ವೇದಿಕೆ ಸಿದ್ಧವಾಗುತ್ತಿದೆ. ಮುಂಬೈ ಇಂಡಿಯನ್ಸ್ ಹಾಗೂ ಪಂಜಾಬ್ ಕಿಂಗ್ಸ್ ನಡುವೆ ನಡೆಯುತ್ತಿದ್ದ ಈ ಹೈ-ಪ್ರೊಫೈಲ್ ಡೀಲಿಂಗ್‌ಗೆ ಇದೀಗ ರಾಜಸ್ಥಾನ್ ರಾಯಲ್ಸ್ ಕೂಡ ಎಂಟ್ರಿ ಕೊಟ್ಟಿದೆ. ಅದು ಸಹ ಎಲ್ಲರ ಹುಬ್ಬೇರಿಸುವಂತಹ ‘ಬಿಗ್ ಆಫರ್’ ಮುಂದಿಡುವ ಮೂಲಕ ಎಂಬುದು ವಿಶೇಷ.

ಮುಂಬೈ ಇಂಡಿಯನ್ಸ್ ನಾಯಕ ಹಾರ್ದಿಕ್ ಪಾಂಡ್ಯ ಅವರನ್ನು ತನ್ನ ತೆಕ್ಕೆಗೆ ತೆಗೆದುಕೊಳ್ಳಲು ಪಂಜಾಬ್ ಕಿಂಗ್ಸ್ ಬಹುತೇಕ ಎಲ್ಲಾ ಸಿದ್ಧತೆ ನಡೆಸಿತ್ತು. ಹಾರ್ದಿಕ್ ಬದಲಿಗೆ ತನ್ನ ಸ್ಟಾರ್ ವೇಗಿ ಅರ್ಷದೀಪ್ ಸಿಂಗ್ ಹಾಗೂ ವಿಷ್ಣು ವಿನೋದ್ ಅವರನ್ನು ಮುಂಬೈಗೆ ಬಿಟ್ಟುಕೊಡಲು ಪಂಜಾಬ್ ಒಪ್ಪಿಕೊಂಡಿತ್ತು. ಆದರೆ, ಈ ಡೀಲ್ ಅಂತಿಮ ಹಂತಕ್ಕೆ ತಲುಪುವಷ್ಟರಲ್ಲಿ ರಾಜಸ್ಥಾನ್ ರಾಯಲ್ಸ್ ತನ್ನ ‘ಮಾಸ್ಟರ್ ಸ್ಟ್ರೋಕ್’ ಆಫರ್ ಮೂಲಕ ಪಂಜಾಬ್‌ ಕಿಂಗ್ಸ್​ ಪ್ಲ್ಯಾನ್​ಗೆ ಕೊಕ್ಕೆ ಹಾಕಿದೆ!

ರಾಜಸ್ಥಾನ್ ರಾಯಲ್ಸ್ ನೀಡಿದ ‘ಬಿಗ್ ಆಫರ್’ ಏನು?

ಹಾರ್ದಿಕ್ ಪಾಂಡ್ಯ ಅವರನ್ನು ಯಾವುದೇ ಬೆಲೆ ತೆತ್ತಾದರೂ ತಂಡಕ್ಕೆ ತರಲು ಮುಂದಾಗಿರುವ ರಾಜಸ್ಥಾನ್ ರಾಯಲ್ಸ್, ಮುಂಬೈ ಇಂಡಿಯನ್ಸ್​ಗೆ ಬಿಗ್ ಆಫರ್ ನೀಡಿದೆ. ಅದು ಸಹ ಯುವ ಸ್ಫೋಟಕ ದಾಂಡಿಗ ಯಶಸ್ವಿ ಜೈಸ್ವಾಲ್ ಹಾಗೂ ಸ್ಟಾರ್ ಲೆಗ್ ಸ್ಪಿನ್ನರ್ ರವಿ ಬಿಷ್ಣೋಯ್ ಬಿಟ್ಟುಕೊಡಲು ಸಿದ್ಧ ಎನ್ನುವ ಮೂಲಕ. ಅಂದರೆ ಹಾರ್ದಿಕ್ ಪಾಂಡ್ಯರನ್ನು ನೀಡುವುದಾದರೆ ಜೈಸ್ವಾಲ್ ಹಾಗೂ ಬಿಷ್ಣೋಯ್​ನ ಮುಂಬೈ ಇಂಡಿಯನ್ಸ್​ಗೆ ನೀಡುತ್ತೇವೆ ಎಂದು ರಾಜಸ್ಥಾನ್ ರಾಯಲ್ಸ್ ಆಫರ್ ನೀಡಿದೆ.

ಪಂಜಾಬ್ ಡೀಲ್‌ಗೆ ಬಿದ್ದ ಕೊಕ್ಕೆ ಹೇಗೆ?

ಮುಂಬೈ ಇಂಡಿಯನ್ಸ್ ಪಂಜಾಬ್ ಕಿಂಗ್ಸ್‌ನೊಂದಿಗೆ ಡೀಲ್ ಮುಗಿಸಲು ಉತ್ಸುಕವಾಗಿತ್ತು, ಏಕೆಂದರೆ ಅವರಿಗೆ ಜಸ್​ಪ್ರೀತ್ ಬುಮ್ರಾ ಜೊತೆಗೆ ಅರ್ಷದೀಪ್ ಸಿಂಗ್ ಅವರಂತಹ ವಿಶ್ವದರ್ಜೆಯ ಎಡಗೈ ವೇಗಿಯ ಅಗತ್ಯವಿತ್ತು. ಆದರೆ ರಾಜಸ್ಥಾನ್ ರಾಯಲ್ಸ್ ನೀಡಿದ ಆಫರ್​ನಿಂದ ಮುಂಬೈ ಇಂಡಿಯನ್ಸ್ ಮ್ಯಾನೇಜ್‌ಮೆಂಟ್‌ ಮತ್ತೊಮ್ಮೆ ಸಭೆ ಸೇರಲು ಮುಂದಾಗಿದೆ ಎಂದು ವರದಿಯಾಗಿದೆ.

ರೋಹಿತ್ ಶರ್ಮಾ ನಂತರ ಮುಂಬೈ ಇಂಡಿಯನ್ಸ್‌ಗೆ ಒಬ್ಬ ಬಲಿಷ್ಠ ಭಾರತೀಯ ಓಪನರ್‌ನ ಅಗತ್ಯವಿದ್ದು, ಆ ಜಾಗಕ್ಕೆ ಯಶಸ್ವಿ ಜೈಸ್ವಾಲ್ ಅತ್ಯಂತ ಸೂಕ್ತ ಆಯ್ಕೆಯಾಗಿದ್ದಾರೆ. ಹೀಗಾಗಿ, ಪಂಜಾಬ್‌ ಕಿಂಗ್ಸ್‌ ಜೊತೆ ಬಹುತೇಕ ಅಂತಿಮಗೊಳ್ಳಬೇಕಿದ್ದ ಹಾರ್ದಿಕ್ ಪಾಂಡ್ಯ ಅವರ ಟ್ರೇಡ್ ಡೀಲ್ ಅನ್ನು ಸದ್ಯಕ್ಕೆ ತಡೆಹಿಡಿಯಲಾಗಿದೆ. ರಾಜಸ್ಥಾನ್ ರಾಯಲ್ಸ್ ನೀಡಿರುವ ಈ ಆಫರ್ ಅತ್ಯುತ್ತಮವಾಗಿದ್ದು, ಮುಂಬೈ ಇಂಡಿಯನ್ಸ್ ಮ್ಯಾನೇಜ್ಮೆಂಟ್ ಇದರ ಸಾಧಕ-ಬಾಧಕಗಳನ್ನು ಚರ್ಚಿಸಿ ಶೀಘ್ರದಲ್ಲೇ ಅಂತಿಮ ತೀರ್ಮಾನ ತೆಗೆದುಕೊಳ್ಳುವ ಸಾಧ್ಯತೆಯಿದೆ.

ಆರ್​ಆರ್​ ದೊಡ್ಡ ರಿಸ್ಕ್ ತೆಗೆದುಕೊಳ್ಳುತ್ತಿರುವುದು ಯಾಕೆ?

• ರಾಜಸ್ಥಾನ್ ರಾಯಲ್ಸ್ ತಂಡಕ್ಕೆ ಮಧ್ಯಮ ಕ್ರಮಾಂಕದಲ್ಲಿ ಪಂದ್ಯವನ್ನು ಗೆಲ್ಲಿಸಬಲ್ಲ ಹಾಗೂ ತಂಡವನ್ನು ಮುನ್ನಡೆಸಬಲ್ಲ ಒಬ್ಬ ಅನುಭವಿ ಭಾರತೀಯ ಆಲ್ ರೌಂಡರ್ ನಾಯಕನ ಅಗತ್ಯವಿದೆ. ಗುಜರಾತ್ ಟೈಟನ್ಸ್ ತಂಡಕ್ಕೆ ಮೊದಲ ಸೀಸನ್‌ನಲ್ಲೇ ಕಪ್ ಗೆದ್ದುಕೊಟ್ಟ ಹಾರ್ದಿಕ್ ಪಾಂಡ್ಯ ಅವರ ನಾಯಕತ್ವದ ಗುಣದ ಮೇಲೆ ಆರ್​ಆರ್ ಕಣ್ಣಿಟ್ಟಿದೆ.
• ರಾಜಸ್ಥಾನ್ ರಾಯಲ್ಸ್ ತಂಡದಲ್ಲಿ ಈಗಾಗಲೇ ಸೂಪರ್ ಸ್ಟಾರ್ ಆಗಿ ವೈಭವ್ ಸೂರ್ಯವಂಶಿ ಇದ್ದು, ಹೀಗಾಗಿ ಯಶಸ್ವಿ ಜೈಸ್ವಾಲ್ ಬಿಡುಗಡೆಯು ತಂಡದ ಮೇಲೆ ದೊಡ್ಡ ಪರಿಣಾಮ ಬೀರಲ್ಲ.
• ಇತ್ತ ಯಶಸ್ವಿ ಜೈಸ್ವಾಲ್ ಮೂಲತಃ ಮುಂಬೈ ಆಟಗಾರ. ಹೀಗಾಗಿ ಮುಂಬೈ ಇಂಡಿಯನ್ಸ್ ಫ್ರಾಂಚೈಸಿಯ ಪರವೇ ಆಡಲು ಅವರೂ ಕೂಡ ಆಸಕ್ತಿ ಹೊಂದಿದ್ದಾರೆ ಎನ್ನಲಾಗಿದೆ.

ಇದನ್ನೂ ಓದಿ: ಕೊಹ್ಲಿ ಹಾಗೂ ರೋಹಿತ್ ಜೊತೆ ಕಾಣಿಸಿಕೊಂಡ ಈ ಲೆಜೆಂಡ್ ಯಾರು ಗೊತ್ತಾ?

ಒಟ್ಟಾರೆಯಾಗಿ ಹೇಳುವುದಾದರೆ, ಹಾರ್ದಿಕ್ ಪಾಂಡ್ಯ ಅವರನ್ನು ನೆಪವಾಗಿಟ್ಟುಕೊಂಡು ಐಪಿಎಲ್‌ನ ಮೂರು ಪ್ರಮುಖ ಫ್ರಾಂಚೈಸಿಗಳ ನಡುವೆ ನಡೆಯುತ್ತಿರುವ ಈ ‘ಮಹಾ ಯುದ್ಧ’ ಸದ್ಯಕ್ಕಂತೂ ಮುಗಿಯುವ ಲಕ್ಷಣ ಕಾಣುತ್ತಿಲ್ಲ. ಒಂದು ಕಡೆ ಬೌಲಿಂಗ್ ಬಲಪಡಿಸಿಕೊಳ್ಳಲು ಪಂಜಾಬ್‌ ಕಿಂಗ್ಸ್​ನ ಅರ್ಷದೀಪ್ ಸಿಂಗ್ ಆಫರ್ ಮುಂಬೈ ಇಂಡಿಯನ್ಸ್​ ಮುಂದಿದ್ದರೆ, ಮತ್ತೊಂದು ಕಡೆ ಭವಿಷ್ಯದ ಬ್ಯಾಟಿಂಗ್ ಸೂಪರ್‌ಸ್ಟಾರ್ ಯಶಸ್ವಿ ಜೈಸ್ವಾಲ್ ಅವರನ್ನು ನೀಡಲು ರಾಜಸ್ಥಾನ್ ರಾಯಲ್ಸ್​ ಸಿದ್ಧವಾಗಿದೆ.  ನವೆಂಬರ್ 17ರ ರಿಟೆನ್ಷನ್ ಗಡುವು ಹತ್ತಿರವಾಗುತ್ತಿರುವುದರಿಂದ, ಮುಂಬೈ ಇಂಡಿಯನ್ಸ್ ತೆಗೆದುಕೊಳ್ಳುವ ಆ ಒಂದು ಅಂತಿಮ ನಿರ್ಧಾರ ಇಡೀ ಐಪಿಎಲ್ ಇತಿಹಾಸದ ಚಿತ್ರಣವನ್ನೇ ಬದಲಿಸಲಿದೆ. ಈ ಮೆಗಾ ಟ್ರೇಡ್ ಅಂತಿಮವಾಗಿ ಯಾರ ಪಾಲಾಗಲಿದೆ ಎಂಬುದನ್ನು ಕಾದು ನೋಡಬೇಕಿದೆ.