CWG 2026: ಒಂದೇ ದಿನ 6 ಪದಕಗಳನ್ನು ಗೆದ್ದ ಭಾರತೀಯರು!
Commonwealth Games 2026: ಕಾಮನ್ವೆಲ್ತ್ ಗೇಮ್ಸ್ನಲ್ಲಿ ಭಾರತೀಯರ ಪರಾಕ್ರಮ ಮುಂದುವರೆದಿದೆ. ಅದರಲ್ಲೂ ಶುಕ್ರವಾರ 6 ಪದಕಗಳನ್ನು ಗೆದ್ದು ಹೊಸ ಇತಿಹಾಸ ನಿರ್ಮಿಸಿದ್ದಾರೆ. ಈ ಪದಕಗಳೊಂದಿಗೆ ಕಾಮನ್ವೆಲ್ತ್ ಗೇಮ್ಸ್ ಮೆಡಲ್ ಲಿಸ್ಟ್ನಲ್ಲಿ ಭಾರತ 10ನೇ ಸ್ಥಾನವನ್ನು ಅಲಂಕರಿಸಿದ್ದು, ಮುಂಬರುವ ಸ್ಪರ್ಧೆಗಳ ಮೂಲಕ ಟಾಪ್-10ನಲ್ಲೇ ಉಳಿಯುವ ಭರವಸೆ ಮೂಡಿಸಿದೆ.
Updated on: Aug 01, 2026 | 7:51 AM
ಸ್ಕಾಟ್ಲ್ಯಾಂಡ್ನಲ್ಲಿ ನಡೆಯುತ್ತಿರುವ ಕಾಮನ್ವೆಲ್ತ್ ಗೇಮ್ಸ್ 2026 ರ ಕ್ರೀಡಾಕೂಟದಲ್ಲಿ ಭಾರತದ ಕ್ರೀಡಾಪಟುಗಳು ಅಭೂತಪೂರ್ವ ಪ್ರದರ್ಶನ ಮುಂದುವರೆಸಿದ್ದಾರೆ. ಜುಲೈ 31ರ ಶುಕ್ರವಾರದ ದಿನವು ಭಾರತೀಯ ಕ್ರೀಡಾ ಇತಿಹಾಸದಲ್ಲೇ ಅತ್ಯಂತ ಯಶಸ್ವಿ ದಿನಗಳಲ್ಲಿ ಒಂದಾಗಿ ದಾಖಲಾಗಿದೆ. ಜೂಡೋ ಮತ್ತು ಅಥ್ಲೆಟಿಕ್ಸ್ನಲ್ಲಿ ಕಮಾಲ್ ಮಾಡಿದ ಭಾರತೀಯರು , ಒಂದೇ ದಿನ 2 ಚಿನ್ನ, 2 ಬೆಳ್ಳಿ ಮತ್ತು 2 ಕಂಚು ಸೇರಿದಂತೆ ಒಟ್ಟು 6 ಪದಕಗಳನ್ನು ಗೆದ್ದು ಐತಿಹಾಸಿಕ ಸಾಧನೆ ಮಾಡಿದ್ದಾರೆ. ಈ ಪದಕಗಳ ವಿವರ ಈ ಕೆಳಗಿನಂತಿದೆ…
ಅಸ್ಮಿತಾ ಡೇ (ಚಿನ್ನ – ಜೂಡೋ): ಮಹಿಳೆಯರ 48 ಕೆಜಿ ವಿಭಾಗದ ಫೈನಲ್ನಲ್ಲಿ ಕೆನಡಾದ ಹೆಡಿ ಕ್ವಾಚ್ ಅವರನ್ನು ಸೋಲಿಸಿ ಅಸ್ಮಿತಾ ಡೇ ಕಾಮನ್ವೆಲ್ತ್ ಗೇಮ್ಸ್ ಜೂಡೋದಲ್ಲಿ ಭಾರತಕ್ಕೆ ಮೊದಲ ಚಿನ್ನ ತಂದುಕೊಟ್ಟಿದ್ದಾರೆ.
ಹರ್ಷ್ ಸಿಂಗ್ (ಚಿನ್ನ – ಜೂಡೋ): ಪುರುಷರ 60 ಕೆಜಿ ವಿಭಾಗದಲ್ಲಿ ಆಸ್ಟ್ರೇಲಿಯಾದ ಜೋಶುವಾ ಕಾಟ್ಜ್ ಅವರನ್ನು ಸೋಲಿಸಿ ಹರ್ಷ್ ಸಿಂಗ್ ಕಾಮನ್ವೆಲ್ತ್ ಗೇಮ್ಸ್ನಲ್ಲಿ ಚಿನ್ನ ಗೆದ್ದ ಭಾರತದ ಮೊದಲ ಪುರುಷ ಜೂಡೋ ಆಟಗಾರ ಎನಿಸಿಕೊಂಡಿದ್ದಾರೆ.
ನೀರಜ್ ಚೋಪ್ರಾ (ಬೆಳ್ಳಿ – ಜಾವೆಲಿನ್ ಥ್ರೋ): ಪುರುಷರ ಜಾವೆಲಿನ್ ಫೈನಲ್ನಲ್ಲಿ 85.83 ಮೀಟರ್ ದೂರ ಎಸೆದು ನೀರಜ್ ಚೋಪ್ರಾ ಬೆಳ್ಳಿ ಪದಕ ಮುಡಿಗೇರಿಸಿಕೊಂಡಿದ್ದಾರೆ.
ಯಾಮಿನಿ ಮೌರ್ಯ (ಬೆಳ್ಳಿ – ಜೂಡೋ): ಮಹಿಳೆಯರ 57 ಕೆಜಿ ವಿಭಾಗದಲ್ಲಿ ಇಂಗ್ಲೆಂಡ್ನ ಅಸೆಲ್ಯಾ ಟೋಪ್ರಾಕ್ ವಿರುದ್ಧ ಕಠಿಣ ಹೋರಾಟ ನಡೆಸಿ ಬೆಳ್ಳಿ ಪದಕ ಗೆಲ್ಲುವಲ್ಲಿ ಯಾಮಿನಿ ಮೌರ್ಯ ಯಶಸ್ವಿಯಾಗಿದ್ದಾರೆ.
ಯಶ್ ವೀರ್ ಸಿಂಗ್ (ಕಂಚು – ಜಾವೆಲಿನ್ ಥ್ರೋ): ಜಾವೆಲಿನ್ ಫೈನಲ್ನಲ್ಲಿ ತಮ್ಮ ವೈಯಕ್ತಿಕ ಅತ್ಯುತ್ತಮ 85.41 ಮೀಟರ್ ಎಸೆದು ಯಶ್ ವೀರ್ ಸಿಂಗ್ ಕಂಚಿನ ಪದಕಕ್ಕೆ ಕೊರೊಳೊಡ್ಡಿದ್ದಾರೆ.
ತೇಜಸ್ವಿನ್ ಶಂಕರ್ (ಕಂಚು – ಡೆಕಾಥ್ಲಾನ್): ಡೆಕಾಥ್ಲಾನ್ ಸ್ಪರ್ಧೆಯಲ್ಲಿ 7,976 ಅಂಕಗಳನ್ನು ಗಳಿಸಿ ಕಾಮನ್ವೆಲ್ತ್ ಇತಿಹಾಸದಲ್ಲೇ ಭಾರತಕ್ಕೆ ಮೊದಲ ಡೆಕಾಥ್ಲಾನ್ ಪದಕ ತಂದುಕೊಟ್ಟ ಕೀರ್ತಿಯನ್ನು ತೇಜಸ್ವಿನ್ ಶಂಕರ್ ತಮ್ಮದಾಗಿಸಿಕೊಂಡಿದ್ದಾರೆ.
ಇದನ್ನೂ ಓದಿ: ಐಸಿಸಿ ರ್ಯಾಂಕಿಂಗ್ನಲ್ಲಿ ಟೀಮ್ ಇಂಡಿಯಾದ ನಾಲ್ವರು ನಂಬರ್ 1
ಈ ಆರು ಪದಕಗಳೊಂದಿಗೆ ಭಾರತ ಕಾಮನ್ವೆಲ್ತ್ ಗೇಮ್ಸ್ ಮೆಡಲ್ ಲಿಸ್ಟ್ನಲ್ಲಿ 10ನೇ ಸ್ಥಾನವನ್ನು ಕಾಯ್ದುಕೊಂಡಿದೆ. ಇಂದು ಮತ್ತು ನಾಳೆ ನಡೆಯಲಿರುವ ಸ್ಪರ್ಧೆಗಳ ಮೂಲಕ ಭಾರತೀಯರು ಮತ್ತಷ್ಟು ಪದಕ ಗೆಲ್ಲುವ ನಿರೀಕ್ಷೆಯಲ್ಲಿದ್ದು, ಈ ಮೂಲಕ ಟಾಪ್-10 ನಲ್ಲೇ ಉಳಿದುಕೊಳ್ಳುವ ನಿರೀಕ್ಷೆಯಿದೆ.
ಪದಕ ಗೆದ್ದ ಭಾರತೀಯರ ಸಂಪೂರ್ಣ ಪಟ್ಟಿ (ಜುಲೈ 31ರ ತನಕ):
| ಕ್ರ.ಸಂ. | ಕ್ರೀಡಾಪಟು | ಕ್ರೀಡೆ | ವಿಭಾಗ | ಪದಕ |
|---|---|---|---|---|
| 1 | ಮೀರಾಬಾಯಿ ಚಾನು | ವೇಟ್ಲಿಫ್ಟಿಂಗ್ | ಮಹಿಳೆಯರ 48 ಕೆಜಿ | 🥇 ಚಿನ್ನ |
| 2 | ಶರ್ಮಿಳಾ ಧಂಕರ್ | ಪ್ಯಾರಾ ಅಥ್ಲೆಟಿಕ್ಸ್ | ಮಹಿಳೆಯರ ಶಾಟ್ಪುಟ್ F57 | 🥇 ಚಿನ್ನ |
| 3 | ದಿಲೀಪ್ ಮಹಾದು ಗಾವಿತ್ | ಪ್ಯಾರಾ ಅಥ್ಲೆಟಿಕ್ಸ್ | ಪುರುಷರ 100 ಮೀಟರ್ T47 | 🥇 ಚಿನ್ನ |
| 4 | ಅಸ್ಮಿತಾ ಡೇ | ಜೂಡೋ | ಮಹಿಳೆಯರ 48 ಕೆಜಿ | 🥇 ಚಿನ್ನ |
| 5 | ಹರ್ಷ್ ಸಿಂಗ್ | ಜೂಡೋ | ಪುರುಷರ 60 ಕೆಜಿ | 🥇 ಚಿನ್ನ |
| 6 | ರಿಷಿಕಾಂತ ಸಿಂಗ್ | ವೇಟ್ಲಿಫ್ಟಿಂಗ್ | ಪುರುಷರ 60 ಕೆಜಿ | 🥈 ಬೆಳ್ಳಿ |
| 7 | ರಾಜಾ ಮುತ್ತುಪಾಂಡಿ | ವೇಟ್ಲಿಫ್ಟಿಂಗ್ | ಪುರುಷರ 65 ಕೆಜಿ | 🥈 ಬೆಳ್ಳಿ |
| 8 | ಜ್ಞಾನೇಶ್ವರ ಯಾದವ್ | ವೇಟ್ಲಿಫ್ಟಿಂಗ್ | ಮಹಿಳೆಯರ 53 ಕೆಜಿ | 🥈 ಬೆಳ್ಳಿ |
| 9 | ವಲ್ಲೂರಿ ಅಜಯ್ ಬಾಬು | ವೇಟ್ಲಿಫ್ಟಿಂಗ್ | ಪುರುಷರ 79 ಕೆಜಿ | 🥈 ಬೆಳ್ಳಿ |
| 10 | ಹರ್ಜಿಂದರ್ ಕೌರ್ | ವೇಟ್ಲಿಫ್ಟಿಂಗ್ | ಮಹಿಳೆಯರ 69 ಕೆಜಿ | 🥈 ಬೆಳ್ಳಿ |
| 11 | ಲವ್ಪ್ರೀತ್ ಸಿಂಗ್ | ವೇಟ್ಲಿಫ್ಟಿಂಗ್ | ಪುರುಷರ +110 ಕೆಜಿ | 🥈 ಬೆಳ್ಳಿ |
| 12 | ಮೊಹಮ್ಮದ್ ಬಾಸಿಲ್ | ಪ್ಯಾರಾ ಅಥ್ಲೆಟಿಕ್ಸ್ | ಪುರುಷರ 100 ಮೀಟರ್ T47 | 🥈 ಬೆಳ್ಳಿ |
| 13 | ಸರ್ವೇಶ್ ಅನಿಲ್ ಕುಶಾರೆ | ಅಥ್ಲೆಟಿಕ್ಸ್ | ಪುರುಷರ ಹೈ ಜಂಪ್ | 🥈 ಬೆಳ್ಳಿ |
| 14 | ಮುರಳಿ ಶ್ರೀಶಂಕರ್ | ಅಥ್ಲೆಟಿಕ್ಸ್ | ಪುರುಷರ ಲಾಂಗ್ ಜಂಪ್ | 🥈 ಬೆಳ್ಳಿ |
| 15 | ಗುಲ್ವೀರ್ ಸಿಂಗ್ | ಅಥ್ಲೆಟಿಕ್ಸ್ | ಪುರುಷರ 10,000 ಮೀಟರ್ ಓಟ | 🥈 ಬೆಳ್ಳಿ |
| 16 | ನೀರಜ್ ಚೋಪ್ರಾ | ಅಥ್ಲೆಟಿಕ್ಸ್ | ಪುರುಷರ ಜಾವೆಲಿನ್ ಥ್ರೋ | 🥈 ಬೆಳ್ಳಿ |
| 17 | ಯಾಮಿನಿ ಮೌರ್ಯ | ಜೂಡೋ | ಮಹಿಳೆಯರ 57 ಕೆಜಿ | 🥈 ಬೆಳ್ಳಿ |
| 18 | ಝಂಡು ಕುಮಾರ್ | ಪ್ಯಾರಾ ಪವರ್ಲಿಫ್ಟಿಂಗ್ | ಪುರುಷರ ಹೆವಿವೇಟ್ | 🥉 ಕಂಚು |
| 19 | ಬಿಂದ್ಯಾರಾಣಿ ದೇವಿ | ವೇಟ್ಲಿಫ್ಟಿಂಗ್ | ಮಹಿಳೆಯರ 58 ಕೆಜಿ | 🥉 ಕಂಚು |
| 20 | ಶಿಲ್ಪಾ ಕೆ. ಶೈಲಾ | ಪ್ಯಾರಾ ಅಥ್ಲೆಟಿಕ್ಸ್ | ಮಹಿಳೆಯರ ಶಾಟ್ಪುಟ್ F57 | 🥉 ಕಂಚು |
| 21 | ಸೀಮಾ ಕಲಿರಾಮ್ನಾ | ಅಥ್ಲೆಟಿಕ್ಸ್ | ಮಹಿಳೆಯರ ಡಿಸ್ಕಸ್ ಥ್ರೋ | 🥉 ಕಂಚು |
| 22 | ತೇಜಸ್ವಿನ್ ಶಂಕರ್ | ಅಥ್ಲೆಟಿಕ್ಸ್ | ಪುರುಷರ ಡೆಕಾಥ್ಲಾನ್ | 🥉 ಕಂಚು |
| 23 | ಯಶ್ ವೀರ್ ಸಿಂಗ್ | ಅಥ್ಲೆಟಿಕ್ಸ್ | ಪುರುಷರ ಜಾವೆಲಿನ್ ಥ್ರೋ | 🥉 ಕಂಚು |
