ಪಾಕಿಸ್ತಾನವನ್ನ ಬಗ್ಗು ಬಡಿದ ಭಾರತದ ಯುವ ಪಡೆ, ಅಂಡರ್-19 ವಿಶ್ವಕಪ್ ಫೈನಲ್​ಗೆ ಭರ್ಜರಿ ಎಂಟ್ರಿ

ನಿರೀಕ್ಷೆಯಂತೆ ಅಂಡರ್ 19 ವಿಶ್ವಕಪ್​ನ ಸೆಮಿಫೈನಲ್ ಪಂದ್ಯದಲ್ಲಿ, ಭಾರತದ ಯುವ ಪಡೆ ಬದ್ಧವೈರಿ ಪಾಕಿಸ್ತಾನದ ಹೆಡೆ ಮುರಿ ಕಟ್ಟಿ ಫೈನಲ್​ಗೆ ಭರ್ಜರಿ ಎಂಟ್ರಿ ಕೊಟ್ಟಿದೆ.

ಟಾಸ್ ಗೆದ್ದು ಮೊದಲು ಬ್ಯಾಟಿಂಗ್ ಮಾಡಿದ ಪಾಕಿಸ್ತಾನ: ಟಾಸ್ ಗೆದ್ದ ಪಾಕಿಸ್ತಾನ ತಂಡದ ನಾಯಕ ರೊಹೈಲ್ ನಜೀರ್ ಮೊದಲು ಬ್ಯಾಟಿಂಗ್ ಮಾಡೋಕೆ ಮುಂದಾಗ್ತಾನೆ. ಆದ್ರೆ ಪಾಕ್ ನಾಯಕನ ಲೆಕ್ಕಾಚಾರವನ್ನ ಭಾರತದ ಬೌಲರ್​ಗಳು ಆರಂಭದಿಂದಲೇ ಉಲ್ಟಾ ಮಾಡುತ್ತ ಮುನ್ನುಗ್ಗಿದ್ರು. ಆರಂಭಿಕ ಮೊಹಮ್ಮದ್ ಹುರೈರಾಗೆ ಸುಶಾಂತ್ ಮಿಶ್ರಾ ಗೇಟ್ ಪಾಸ್ ನೀಡಿದ್ರೆ, ಇನ್ನು ಖಾತೆ ತೆರೆಯದ ಫಹಾದ್ ಮುನೀರ್​ಗೆ ರವಿ ಪೆವಿಲಿಯನ್ ಹಾದಿ ತೊರಿಸಿದ.

ಅರ್ಧಶತಕ ಸಿಡಿಸಿದ ಹೈದರ್, ನಾಯಕ ನಜೀರ್: 34 ರನ್​ಗಳಿಗೆ 2 ವಿಕೆಟ್ ಕಳೆದುಕೊಂಡು ಸಂಕಷ್ಟಕ್ಕೆ ಸಿಲುಕಿದ್ದ ಪಾಕ್​ಗೆ ಆಸರೆಯಾಗಿದ್ದು ಆರಂಭಿಕ ಹೈದರ್ ಅಲಿ ಮತ್ತು ನಾಯಕ ರೊಹೈಲ್ ನಜೀರ್. ತಲಾ ಅರ್ಧಶತಕ ಸಿಡಿಸಿದ ಈ ಜೋಡಿ ಪಾಕ್​ ಚೇತರಿಸಿಕೊಳ್ಳೋದಕ್ಕೆ ಕಾರಣವಾದ್ರು. ಆದ್ರೆ 56 ರನ್​ಗಳಿಸಿದ್ದ ಹೈದರ್​ಗೆ ಜೈಸ್ವಾಲ್ ಗೇಟ್ ಪಾಸ್ ನೀಡಿದ್ರೆ, 62 ರನ್​ಗಳಿಸಿದ್ದ ನಾಯಕ ನಜೀರ್ ಆರ್ಭಟಕ್ಕೆ ಸುಶಾಂತ್ ಬ್ರೇಕ್ ಹಾಕಿದ. ಇವರಿಬ್ರು ಗೂಡ ಸೇರಿಕೊಂಡ ಬಳಿಕ ಬಂದ ಪಾಕ್ ಬ್ಯಾಟ್ಸ್​ಮನ್​ಗಳಿಗೆ, ಭಾರತದ ಹುಡುಗ್ರು ಅಕ್ಷರಷಃ ಕಂಟಕವಾಗಿಬಿಟ್ರು.

ಮೈ ನವಿರೇಳಿಸೋ ಕ್ಯಾಚ್ ಹಿಡಿದ ದಿವ್ಯಾಂಶ್ ಸಕ್ಸೇನಾ: ಇನ್ನು ಅಥರ್ವ್ ಅಂಕೋಲೇಕರ್ ಬೌಲಿಂಗ್​ನಲ್ಲಿ ಪಾಕ್​ನ ಮೊಹಮ್ಮದ್ ಹ್ಯಾರಿಸ್ ನೀಡಿದ ಕ್ಯಾಚ್ ಅನ್ನ, ದಿವ್ಯಾಂಶ್ ಸಕ್ಸೇನಾ ಡೀಪ್ ಮಿಡ್ ವಿಕೆಟ್​ನಲ್ಲಿ ಮೈ ನವಿರೇಳಿಸೋ ಹಾಗೇ ಹಿಡಿದಿದ್ದು ಪಂದ್ಯದ ವಿಶೇಷವಾಗಿತ್ತು.

26 ರನ್​ಗಳಿಗೆ ಕೊನೆ 5 ವಿಕೆಟ್ ಕಳೆದುಕೊಂಡ ಪಾಕ್: ಇನ್ನು ಕೊನೆಯಲ್ಲಿ ಭಾರತೀಯ ಬೌಲರ್​ಗಳು ಎಂತಾ ಕರಾರುವಕ್ ದಾಳಿ ನಡೆಸಿದ್ರು ಅಂದ್ರೆ, ಕೇವಲ 26 ರನ್​ಗಳಿಗೆ ಪಾಕಿಸ್ತಾನದ ಕೊನೆಯ ಐದು ವಿಕೆಟ್​ಗಳನ್ನ ಪಡೆದ್ರು.

172 ರನ್​ಗಳಿಗೆ ಆಲೌಟ್ ಆದ ಪಾಕಿಸ್ತಾನ: ಪ್ರಿಯಮ್ ಪಡೆಯ ಬೊಂಬಾಟ್ ಬೌಲಿಂಗ್ ಮುಂದೆ ಪ್ರತ್ಯುತ್ತರ ನೀಡೋಕಾಗದ ಪಾಕ್ 43.1 ಓವರ್​ಗಳಿಗೆ ತನ್ನೆಲ್ಲಾ ವಿಕೆಟ್ ಕಳೆದುಕೊಂಡು 172 ರನ್​ಗಳಿಗೆ ಆಲೌಟ್ ಆಯ್ತು. ಭಾರತದ ಪರ ಸುಶಾಂತ್ ಮಿಶ್ರಾ 3 ವಿಕೆಟ್ ಪಡೆದ್ರೆ, ಕಾರ್ತಿಕ್ ತ್ಯಾಗಿ ಮತ್ತು ರವಿ ಬಿಷ್ಣೋಯಿ ತಲಾ 2 ವಿಕೆಟ್ ಪಡೆದು ಮಿಂಚಿದ್ರು.

ಪಾಕ್ ಬೌಲರ್​ಗಳನ್ನ ಚೆಂಡಾಡಿದ ಜೈಸ್ವಾಲ್, ಸಕ್ಸೇನಾ: ಪಾಕ್ ನೀಡಿದ 173 ರನ್​ಗಳ ಟಾರ್ಗೆಟ್ ಬೆನ್ನತ್ತಿದ ಭಾರತಕ್ಕೆ ಆರಂಭಿಕರಾದ ಯಶಸ್ವಿ ಜೈಸ್ವಾಲ್ ಮತ್ತು ದಿವ್ಯಾಂಶ್ ಸಕ್ಸೇನಾ ಜೋಡಿ ಈ ಟಾರ್ಗೆಟ್ ನಮಗೆ ಲೆಕ್ಕವೇ ಇಲ್ಲಾ ಅನ್ನೋ ಹಾಗೇ ಬ್ಯಾಟಿಂಗ್ ಮಾಡಿತು. ಪಾಕ್ ಬೌಲರ್​ಗಳನ್ನ ಯಾವುದೇ ಮುಲಾಜಿಲ್ಲದೇ ದಂಡಿಸಿದ ಈ ಜೋಡಿ, ರನ್ ಮಳೆ ಹರಿಸಿ ತಲಾ ಅರ್ಧಶತಕ ಸಿಡಿಸಿ ಸಂಭ್ರಮಿಸಿತು.

ಭರ್ಜರಿ ಸಿಕ್ಸರ್​ನೊಂದಿಗೆ ಚೊಚ್ಚಲ ಶತಕ ಸಿಡಿಸಿದ ಜೈಸ್ವಾಲ್: ಒಂದೆಡೆ ದಿವ್ಯಾಂಶ್ ಸಕ್ಸೆನಾ ಕೂಲ್ ಆಗಿ ಬ್ಯಾಟಿಂಗ್ ಮಾಡಿದ್ರೆ, ಮತ್ತೊಂದೆಡೆ ಪಾಕ್ ಬೌಲರ್​ಗಳ ಮೇಲೆ ಸವಾರಿ ಮಾಡಿದ್ದು ಯಶಸ್ವಿ ಜೈಸ್ವಾಲ್. ಬೊಂಬಾಟ್ ಬ್ಯಾಟಿಂಗ್ ಮಾಡಿದ ಜೈಸ್ವಾಲ್ ತನ್ನ ಅದ್ಭುತ ಶಾಟ್ ಸೆಲೆಕ್ಷನ್​ನಿಂದ ಪಾಕ್ ಬೌಲರ್​ಗಳು ಮೈ ಪರಚಿಕೊಳ್ಳೋ ಹಾಗೇ ಮಾಡಿದೆ. ಅಷ್ಟೇ ಅಲ್ಲ. ಭರ್ಜರಿ ಸಿಕ್ಸರ್​ನೊಂದಿಗೆ ಭಾರತಕ್ಕೆ ಗೆಲುವು ತಂದುಕೊಟ್ಟಿದೆ.

ಅಂತಿಮವಾಗಿ ಭಾರತ ಅಂಡರ್ ನೈಂಟೀನ್ ತಂಡ ಕೇವಲ 35. 2 ಓವರ್​ಗಳಿಗೆ ಪಾಕ್ ನೀಡಿದ ಗುರಿಯನ್ನ ಯಾವುದೇ ವಿಕೆಟ್ ನಷ್ಟವಿಲ್ಲದೇ 10 ವಿಕೆಟ್​ಗಳ ಅಂತರದಲ್ಲಿ ಭರ್ಜರಿ ಗೆಲುವು ದಾಖಲಿಸಿತು. ಇನ್ನು ಬೌಲಿಂಗ್​ನಲ್ಲಿ ಒಂದು ವಿಕೆಟ್. ಬ್ಯಾಟಿಂಗ್​ನಲ್ಲಿ ಭರ್ಜರಿ ಶತಕ ಸಿಡಿಸಿ ಗೆಲುವು ತಂದುಕೊಟ್ಟ ಜೈಸ್ವಾಲ್, ಪಂದ್ಯ ಪುರುಷ ಪ್ರಶಸ್ತಿಗೆ ಭಾಜನರಾದ್ರು. ಈ ಗೆಲುವಿನೊಂದಿಗೆ ಭಾರತ ಅಂಡರ್ ನೈಂಟೀನ್ ವಿಶ್ವಕಪ್​ನಲ್ಲಿ 7ನೇ ಬಾರಿಗೆ ಫೈನಲ್​ಗೆ ಎಂಟ್ರಿ ಕೊಟ್ಟಂತಾಗಿದೆ.