ಕಾರು ಚಾಲನೆಗೂ ಮುನ್ನವೇ ವಿಮಾನ ಹಾರಾಟದ ಲೈಸೆನ್ಸ್​ ಪಡೆದಿದ್ದ ಯುವತಿ: ಫ್ಲೋರಿಡಾ ವಿಮಾನ ದುರಂತದಲ್ಲಿ ಯುವ ಪೈಲಟ್ ಸಾವು

ಫ್ಲೋರಿಡಾ, ನವೆಂಬರ್ 03: ವಿಮಾನ ಹಾರಾಟವೇ ಕನಸು. ಚಿಕ್ಕ ವಯಸ್ಸಿನಲ್ಲೇ ಆ ಕನಸನ್ನು ನನಸಾಗಿಸಿಕೊಂಡಿದ್ದ ಯುವತಿ. ಕಾರು ಚಾಲನೆ ಮಾಡುವ ಪರವಾನಗಿ ಪಡೆಯುವ ಮೊದಲೇ ವಿಮಾನ ಹಾರಿಸುವ ಪರವಾನಗಿ ಪಡೆದಿದ್ದಳು. ಆದರೆ ಕೇವಲ 20ನೇ ವಯಸ್ಸಿನಲ್ಲಿ ಆಕೆಯ ಬದುಕು ವಿಮಾನ ದುರಂತದಲ್ಲಿ ಅಂತ್ಯಗೊಂಡಿದೆ. ಅಮೆರಿಕದ ಫ್ಲೋರಿಡಾದಲ್ಲಿ ಪತನಗೊಂಡ ಲಿಯರ್‌ಜೆಟ್ 60 ವಿಮಾನದ ಕೋ-ಪೈಲಟ್ ನಥಾಲಿಯಾ ಗಡೆಲ್ಹಾ ಫಿಲ್ಗುಯಿರಾಸ್ ಅವರ ಕಥೆ ಎಲ್ಲರ ಕಣ್ಣಂಚಲ್ಲೂ ನೀರು ತರಿಸಿದೆ.

ಟೆಕ್ಸಾಸ್‌ನ ಆಸ್ಟಿನ್‌ನಿಂದ ಬಹಾಮಾಸ್‌ಗೆ ತೆರಳುತ್ತಿದ್ದ ಖಾಸಗಿ ಲಿಯರ್‌ಜೆಟ್ ವಿಮಾನ ನವೆಂಬರ್ 1ರಂದು ದಕ್ಷಿಣ ಫ್ಲೋರಿಡಾದ ಗ್ರೀನ್‌ಏಕರ್ಸ್ ಪ್ರದೇಶದಲ್ಲಿ ಪತನಗೊಂಡು ಬೆಂಕಿಗೆ ಆಹುತಿಯಾಗಿತ್ತು. ಈ ಅಪಘಾತದಲ್ಲಿ ವಿಮಾನದಲ್ಲಿದ್ದ ಒಂಬತ್ತು ಮಂದಿ ಮೃತಪಟ್ಟಿದ್ದರು. ಅವರಲ್ಲಿ 20 ವರ್ಷದ ಸಹ-ಪೈಲಟ್ ನಥಾಲಿಯಾ ಕೂಡ ಒಬ್ಬರು.

ಪತನಕ್ಕೂ ಮುನ್ನ ‘ಮೇಡೇ, ಮೇಡೇ’ ಎಂದು ಸಹಾಯಕ್ಕಾಗಿ ಕೂಗು

ವಿಮಾನ ಪತನಕ್ಕೂ ಮುನ್ನ ವಾಯು ಸಂಚಾರ ನಿಯಂತ್ರಣ ಕೇಂದ್ರದೊಂದಿಗೆ ನಡೆದ ರೇಡಿಯೋ ಸಂಭಾಷಣೆ ಈಗ ಆತಂಕ ಮೂಡಿಸಿದೆ. ವಿಮಾನದಲ್ಲಿ ಮಂಜುಗಡ್ಡೆ ಸಂಗ್ರಹವಾಗುತ್ತಿದೆ ಮತ್ತು ಹವಾಮಾನ ಪ್ರತಿಕೂಲವಾಗಿದೆ ಎಂದು ನಥಾಲಿಯಾ ನಿಯಂತ್ರಣ ಕೇಂದ್ರಕ್ಕೆ ಮಾಹಿತಿ ನೀಡಿದ್ದರು.

ಆಡಿಯೋದಲ್ಲಿ ಅವರು ತುರ್ತು ಸಹಾಯ ಕೋರಿ ‘ಮೇಡೇ, ಮೇಡೇ’ ಎಂದು ಕೂಗುವುದು ಕೇಳಿಸುತ್ತದೆ. ವಿಮಾನವು ತೀವ್ರವಾಗಿ ಕೆಳಕ್ಕೆ ಇಳಿಯುತ್ತಿದೆ, ನಿಯಂತ್ರಣ ಕಳೆದುಕೊಳ್ಳುತ್ತಿದೆ ಎಂಬ ಆತಂಕವನ್ನೂ ವ್ಯಕ್ತಪಡಿಸಿದ್ದರು. ವರದಿಗಳ ಪ್ರಕಾರ, ವಿಮಾನ ಕೆಲವೇ ಕ್ಷಣಗಳಲ್ಲಿ ಸಾವಿರಾರು ಅಡಿಗಳಷ್ಟು ಎತ್ತರ ಕಳೆದುಕೊಂಡಿತ್ತು.

Nathalia Gadelha Filgueiras (age 20) was the co-pilot of a private Learjet 60 that crashed yesterday, in a residential area of Palm Beach County, Florida, killing all nine people on board.

She earned her private pilot degree at 17

Painful loss of a very promising and talented young https://t.co/hhzBbQdNXc

— Chyydy (@Chyydylyfe) November 2, 2026

ವಿಮಾನವು ನಿಮಿಷಕ್ಕೆ 10,000 ಅಡಿ ವೇಗದಲ್ಲಿ ಕೆಳಗಿಳಿಯುತ್ತಿದೆ ಎಂದು ಆರಂಭದಲ್ಲಿ ಅವರು ತಿಳಿಸಿದ್ದಾರೆ. ನಂತರ ಇಳಿಯುವ ವೇಗ ಇನ್ನಷ್ಟು ಹೆಚ್ಚಾಗಿದೆ ಎಂದು ಆತಂಕ ವ್ಯಕ್ತಪಡಿಸಿದ್ದಾರೆ. ವಿಮಾನ ಪತನದ ನಿಖರ ಕಾರಣವನ್ನು ತನಿಖಾ ಸಂಸ್ಥೆಗಳು ಇನ್ನೂ ನಿರ್ಧರಿಸಬೇಕಿದೆ.

ಇದನ್ನೂ ಓದಿ: ಟ್ರಂಪ್ ನಿವಾಸದ ಬಳಿ ಲಘು ವಿಮಾನ ಪತನ, 9 ಮಂದಿ ಸಾವು

17ನೇ ವಯಸ್ಸಿನಲ್ಲೇ ಪೈಲಟ್ ಪರವಾನಗಿ ಪಡೆದಿದ್ದ ನಥಾಲಿಯಾ

ನಥಾಲಿಯಾ ಬ್ರೆಜಿಲಿಯನ್ ಮೂಲದವರಾಗಿದ್ದು, ಅಮೆರಿಕದ ಫ್ಲೋರಿಡಾದಲ್ಲಿ ವಾಸಿಸುತ್ತಿದ್ದರು. ವೆಸ್ಟ್ ಬೊಕಾ ರಾಟನ್ ಕಮ್ಯುನಿಟಿ ಹೈಸ್ಕೂಲ್‌ನಲ್ಲಿ ಓದುತ್ತಿದ್ದಾಗಲೇ ವಿಮಾನ ಹಾರಾಟದ ತರಬೇತಿ ಪಡೆದಿದ್ದರು. 2023ರಲ್ಲಿ ಅವರಿಗೆ 17 ವರ್ಷವಾಗಿದ್ದಾಗ ಖಾಸಗಿ ಪೈಲಟ್ ಪರವಾನಗಿ ದೊರೆತಿತ್ತು ಎಂದು ಸ್ಥಳೀಯ ಮಾಧ್ಯಮಗಳು ವರದಿ ಮಾಡಿವೆ.

ಅವರ ತಂದೆಯೂ ವಿಮಾನ ಹಾರಾಟದಲ್ಲಿ ಆಸಕ್ತಿ ಹೊಂದಿದ್ದರು. 2018ರಿಂದಲೇ ತಂದೆಯ ಮಾರ್ಗದರ್ಶನದಲ್ಲಿ ಹಾರಾಟದ ಬಗ್ಗೆ ಕಲಿಯಲು ಆರಂಭಿಸಿದ್ದ ನಥಾಲಿಯಾ, 2020ರಲ್ಲಿ ಅಧಿಕೃತ ಪೈಲಟ್ ತರಬೇತಿ ಪಡೆದಿದ್ದರು. ಶಾಲೆಯಲ್ಲಿದ್ದ ವಿಶೇಷ ವಾಯುಯಾನ ಅಕಾಡೆಮಿಯೂ ಅವರ ತರಬೇತಿಗೆ ನೆರವಾಗಿತ್ತು. ವಿದ್ಯಾರ್ಥಿಗಳಿಗೆ ವಿಮಾನ ಸಿಮ್ಯುಲೇಟರ್ ಮತ್ತು ಡ್ರೋನ್‌ಗಳ ಮೂಲಕ ತರಬೇತಿ ನೀಡುವ ಈ ಕಾರ್ಯಕ್ರಮದ ವೆಚ್ಚವನ್ನು ಶಾಲಾ ಜಿಲ್ಲೆ ಭರಿಸಿತ್ತು ಎಂದು ವರದಿಗಳು ತಿಳಿಸಿವೆ.

ಕಾರು ಚಾಲನೆ ಮಾಡುವ ಪರವಾನಗಿ ಪಡೆಯುವ ಮೊದಲೇ ವಿಮಾನ ಹಾರಿಸುವ ಪರವಾನಗಿ ಪಡೆದಿದ್ದ ಕಾರಣ ನಥಾಲಿಯಾ ಸ್ಥಳೀಯ ಮಾಧ್ಯಮಗಳ ಗಮನ ಸೆಳೆದಿದ್ದರು. ಒಂಬತ್ತು ತಿಂಗಳಿನಿಂದ ವಾಣಿಜ್ಯ ಪೈಲಟ್ ಆಗಿ ಕೆಲಸ ಮಾಡುತ್ತಿದ್ದರು ಎಂದು ಅವರ ತಾಯಿ ತಿಳಿಸಿದ್ದಾರೆ.

1,300 ಗಂಟೆಗಳ ಹಾರಾಟ ಅನುಭವ

ನಥಾಲಿಯಾ ಅವರ ಮಲತಂದೆ ಥಿಯಾಗೊ ಕೊರ್ಟೆಲೆಟಿ ಪ್ರಕಾರ, ಅವರಿಗೆ ಸುಮಾರು 1,300 ಗಂಟೆಗಳ ಹಾರಾಟದ ಅನುಭವವಿತ್ತು. ಅಪಘಾತಕ್ಕೂ ಸುಮಾರು 10 ನಿಮಿಷಗಳ ಮೊದಲು ಗೆಳೆಯನಿಗೆ ಸಂದೇಶ ಕಳುಹಿಸಿದ್ದ ನಥಾಲಿಯಾ, ವಿಮಾನದಲ್ಲಿ ಪ್ರಕ್ಷುಬ್ಧತೆ ಮತ್ತು ಮಂಜುಗಡ್ಡೆಯ ಸಮಸ್ಯೆ ಎದುರಾಗಿದೆ ಎಂದು ತಿಳಿಸಿದ್ದರು ಎನ್ನಲಾಗಿದೆ.

ಅವರ ತಾಯಿ ಕ್ಯಾಮಿಲಾ ಗಡೆಲ್ಹಾ ಕೊರ್ಟೆಲೆಟಿ, ಮಗಳು ಜವಾಬ್ದಾರಿಯುತ ಮತ್ತು ಪರಿಶ್ರಮಿಯಾಗಿದ್ದಳು ಎಂದು ನೆನಪಿಸಿಕೊಂಡಿದ್ದಾರೆ. ಸಹ-ಪೈಲಟ್ ಆಗಿದ್ದ ಆಕೆಯ ಪಾತ್ರ ಮತ್ತು ನಿರ್ಧಾರ ತೆಗೆದುಕೊಳ್ಳುವ ಅಧಿಕಾರದ ಕುರಿತು ತಾಯಿ ನೀಡಿದ ಹೇಳಿಕೆಯೂ ವರದಿಯಾಗಿದೆ. ಆದರೆ ಸಹ-ಪೈಲಟ್ ಕೂಡ ತರಬೇತಿ ಪಡೆದ ವಿಮಾನ ಸಿಬ್ಬಂದಿಯಾಗಿದ್ದು, ವಿಮಾನದ ಸುರಕ್ಷಿತ ಕಾರ್ಯಾಚರಣೆಯಲ್ಲಿ ಪ್ರಮುಖ ಜವಾಬ್ದಾರಿ ಹೊಂದಿರುತ್ತಾರೆ.

ಒಂದೇ ಕುಟುಂಬದ ನಾಲ್ವರು ಸೇರಿ ಒಂಬತ್ತು ಮಂದಿ ಸಾವು

ಈ ಭೀಕರ ಅಪಘಾತದಲ್ಲಿ ನಥಾಲಿಯಾ ಸೇರಿದಂತೆ ವಿಮಾನದಲ್ಲಿದ್ದ ಒಂಬತ್ತು ಮಂದಿ ಮೃತಪಟ್ಟಿದ್ದಾರೆ. ಮೃತರಲ್ಲಿ ಉದ್ಯಮಿ ಆಡಮ್ ರಾಬಿನ್ಸನ್, ಅವರ ಪತ್ನಿ ಹೆಲೆನ್ ಶಾರ್ಪ್, ನಾಲ್ಕು ವರ್ಷದ ಮಗಳು ಎಮ್ಮಾ ಮತ್ತು ಎರಡು ವರ್ಷದ ಮಗ ಚಾರ್ಲಿ ಸೇರಿದ್ದಾರೆ. ಮಕ್ಕಳ ಆರೈಕೆಗೆ ನೆರವಾಗುತ್ತಿದ್ದ ಅನಿತಾ ಮಾರಿಯಾ ಸೆಟಿನಾ, ರಾಚೆಲ್ ರೀಡ್ ಮತ್ತು ಚಾರ್ಮಿ ಫೆಹರ್ ಕೂಡ ಮೃತಪಟ್ಟಿದ್ದಾರೆ. ಮತ್ತೊಬ್ಬ ಪೈಲಟ್‌ನ ಗುರುತನ್ನು ಆರಂಭಿಕ ವರದಿಗಳಲ್ಲಿ ಬಹಿರಂಗಪಡಿಸಿರಲಿಲ್ಲ.

ಆಡಮ್ ರಾಬಿನ್ಸನ್ ಇ-ಕಾಮರ್ಸ್ ಕ್ಷೇತ್ರದಲ್ಲಿ ಉದ್ಯಮಿಯಾಗಿದ್ದರು. ಅವರು Retention.com ಸಂಸ್ಥೆಯ ಸ್ಥಾಪಕರಾಗಿದ್ದರು. ಕುಟುಂಬದೊಂದಿಗೆ ಕೊಲೊರಾಡೋದ ಆಸ್ಪೆನ್‌ನಲ್ಲಿ ವಾಸಿಸುತ್ತಿದ್ದ ಅವರು, ಕೆಲಸದ ಜೊತೆಗೆ ಮಕ್ಕಳೊಂದಿಗೆ ಸಮಯ ಕಳೆಯುವುದೇ ತಮ್ಮ ಕನಸು ಎಂದು ಈ ಹಿಂದೆ ಸಂದರ್ಶನವೊಂದರಲ್ಲಿ ಹೇಳಿಕೊಂಡಿದ್ದರು. ಅವರ ಕುಟುಂಬದ ನಾಲ್ವರ ಸಾವು ಉದ್ಯಮ ವಲಯದಲ್ಲೂ ತೀವ್ರ ದುಃಖ ಮೂಡಿಸಿದೆ.

ವಿಮಾನ ಅಪಘಾತಕ್ಕೆ ಕಾರಣವೇನು?

ಅಪಘಾತಕ್ಕೂ ಮುನ್ನ ವಿಮಾನದಲ್ಲಿ ಮಂಜುಗಡ್ಡೆ ಸಂಗ್ರಹವಾಗಿರುವುದು, ತೀವ್ರ ಪ್ರಕ್ಷುಬ್ಧತೆ ಮತ್ತು ವಿಮಾನದ ವೇಗವಾಗಿ ಎತ್ತರ ಕಳೆದುಕೊಳ್ಳುತ್ತಿರುವುದು ರೇಡಿಯೋ ಸಂಭಾಷಣೆಯಲ್ಲಿ ದಾಖಲಾಗಿದೆ. ವಿಮಾನವು ಸುಮಾರು ಒಂದು ನಿಮಿಷದಲ್ಲಿ 27,000 ಅಡಿಗಳಷ್ಟು ಎತ್ತರ ಕಳೆದುಕೊಂಡಿದೆ ಎಂದು ಹಾರಾಟದ ದತ್ತಾಂಶದ ವರದಿಗಳು ತಿಳಿಸಿವೆ.

ಆದರೆ ಮಂಜುಗಡ್ಡೆಯೇ ಅಪಘಾತಕ್ಕೆ ನೇರ ಕಾರಣ ಎಂದು ಈಗಲೇ ನಿರ್ಧರಿಸಲು ಸಾಧ್ಯವಿಲ್ಲ. ವಿಮಾನದ ತಾಂತ್ರಿಕ ಸ್ಥಿತಿ, ಹವಾಮಾನ, ಪೈಲಟ್‌ಗಳ ನಿರ್ಧಾರಗಳು ಮತ್ತು ಇತರ ಅಂಶಗಳನ್ನು ಪರಿಶೀಲಿಸಿದ ನಂತರವೇ ನಿಖರ ಕಾರಣ ತಿಳಿಯಲಿದೆ. ಅಮೆರಿಕದ ಫೆಡರಲ್ ಏವಿಯೇಷನ್ ಅಡ್ಮಿನಿಸ್ಟ್ರೇಷನ್ (FAA) ಮತ್ತು ನ್ಯಾಷನಲ್ ಟ್ರಾನ್ಸ್‌ಪೋರ್ಟೇಶನ್ ಸೇಫ್ಟಿ ಬೋರ್ಡ್ ತನಿಖೆ ನಡೆಸುತ್ತಿವೆ.

ಚಿಕ್ಕ ವಯಸ್ಸಿನಲ್ಲೇ ವಿಮಾನ ಹಾರಾಟದ ಕನಸನ್ನು ನನಸಾಗಿಸಿಕೊಂಡಿದ್ದ ನಥಾಲಿಯಾ, ವೃತ್ತಿಜೀವನದ ಆರಂಭದಲ್ಲೇ ದುರಂತಕ್ಕೆ ಬಲಿಯಾಗಿದ್ದಾರೆ. ಅಪಘಾತಕ್ಕೂ ಮುನ್ನದ ಅವರ ತುರ್ತು ಕರೆಗಳು ಮತ್ತು ಹವಾಮಾನದ ಬಗ್ಗೆ ನೀಡಿದ ಎಚ್ಚರಿಕೆಗಳು ಈ ಘಟನೆಯ ಗಂಭೀರತೆಯನ್ನು ತೋರಿಸುತ್ತವೆ. ಆದರೆ ಈ ದುರಂತಕ್ಕೆ ನಿಜವಾದ ಕಾರಣವೇನು ಎಂಬುದಕ್ಕೆ ತನಿಖೆಯ ಅಂತಿಮ ವರದಿಯೇ ಉತ್ತರ ನೀಡಬೇಕಿದೆ.

ಅಂತಾರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ