ಕಾರುಗಳ ಸುರಕ್ಷತಾ ಪರೀಕ್ಷೆ ಮತ್ತಷ್ಟು ಕಠಿಣ; ಭಾರತ NCAP 2.0ನಲ್ಲಿ 5 ಕ್ರ್ಯಾಶ್ ಟೆಸ್ಟ್

ಕಾರು (New Car) ಖರೀದಿಸುವಾಗ ಸುರಕ್ಷತೆಗೂ ಗ್ರಾಹಕರು ಹೆಚ್ಚಿನ ಆದ್ಯತೆ ನೀಡುತ್ತಾರೆ. ಕಾರಿನ ಸುರಕ್ಷತೆಯನ್ನು ಅಳೆಯಲು ಭಾರತದಲ್ಲಿ ಜಾರಿಯಲ್ಲಿರುವ ಭಾರತ ಎನ್‌ಸಿಎಪಿ ವ್ಯವಸ್ಥೆಯಲ್ಲಿ ಮುಂದಿನ ದಿನಗಳಲ್ಲಿ ಮತ್ತಷ್ಟು ಬದಲಾವಣೆ ತರಲು ಸಿದ್ಧತೆ ನಡೆದಿದೆ. ಪ್ರಸ್ತಾವಿತ ಭಾರತ ಎನ್‌ಸಿಎಪಿ 2.0 ವ್ಯವಸ್ಥೆ 2027ರ ಅಕ್ಟೋಬರ್‌ನಿಂದ ಜಾರಿಗೆ ಬರುವ ಸಾಧ್ಯತೆಯಿದ್ದು, ಕಾರುಗಳ ಸುರಕ್ಷತಾ ಪರೀಕ್ಷೆಯ ವ್ಯಾಪ್ತಿಯನ್ನು ಮತ್ತಷ್ಟು ವಿಸ್ತರಿಸುವ ಉದ್ದೇಶ ಹೊಂದಿದೆ.

ಇನ್ನು 5 ರೀತಿಯ ಕ್ರ್ಯಾಶ್ ಟೆಸ್ಟ್

ಪ್ರಸ್ತಾವಿತ ಹೊಸ ವ್ಯವಸ್ಥೆಯಲ್ಲಿ ಕಾರುಗಳು ಐದು ಪ್ರಮುಖ ಕ್ರ್ಯಾಶ್ ಟೆಸ್ಟ್‌ಗಳನ್ನು ಎದುರಿಸಬೇಕಾಗುತ್ತದೆ. 64 ಕಿ.ಮೀ ವೇಗದಲ್ಲಿ ಆಫ್‌ಸೆಟ್ ಫ್ರಂಟಲ್ ಇಂಪ್ಯಾಕ್ಟ್ ಟೆಸ್ಟ್, 50 ಕಿ.ಮೀ ವೇಗದಲ್ಲಿ ಫುಲ್-ವಿಡ್ತ್ ರಿಜಿಡ್ ಬ್ಯಾರಿಯರ್ ಟೆಸ್ಟ್, 50 ಕಿ.ಮೀ ವೇಗದಲ್ಲಿ ಸೈಡ್ ಇಂಪ್ಯಾಕ್ಟ್ ಟೆಸ್ಟ್, 32 ಕಿ.ಮೀ ವೇಗದಲ್ಲಿ ಪೋಲ್ ಸೈಡ್ ಇಂಪ್ಯಾಕ್ಟ್ ಟೆಸ್ಟ್ ಮತ್ತು 50 ಕಿ.ಮೀ ವೇಗದಲ್ಲಿ ಹಿಂಬದಿ ಡಿಕ್ಕಿ ಪರೀಕ್ಷೆ ಇದರಲ್ಲಿ ಸೇರಿವೆ. ಇದರಿಂದ ಕಾರಿನ ಬಾಡಿ ರಚನೆ ಮತ್ತು ವಿವಿಧ ಭಾಗಗಳ ಬಲವನ್ನು ಹೆಚ್ಚು ಸಮಗ್ರವಾಗಿ ಪರಿಶೀಲಿಸಲಾಗುತ್ತದೆ.

ಅಪಘಾತಕ್ಕೂ ಮುನ್ನ ತಡೆಯುವ ತಂತ್ರಜ್ಞಾನಕ್ಕೂ ಪರೀಕ್ಷೆ

ಹೊಸ ವ್ಯವಸ್ಥೆಯಲ್ಲಿ ಅಪಘಾತವಾದಾಗ ಕಾರಿನೊಳಗಿನ ಪ್ರಯಾಣಿಕರಿಗೆ ಎಷ್ಟು ರಕ್ಷಣೆ ಸಿಗುತ್ತದೆ ಎಂಬುದಷ್ಟೇ ಪರಿಶೀಲಿಸಲಾಗುವುದಿಲ್ಲ. ಅಪಘಾತ ಸಂಭವಿಸುವ ಮುನ್ನ ಅದನ್ನು ತಪ್ಪಿಸಲು ಕಾರಿನಲ್ಲಿರುವ ಸುರಕ್ಷತಾ ತಂತ್ರಜ್ಞಾನಗಳು ಎಷ್ಟು ಪರಿಣಾಮಕಾರಿಯಾಗಿ ಕೆಲಸ ಮಾಡುತ್ತವೆ ಎಂಬುದಕ್ಕೂ ಗಮನ ನೀಡಲಾಗುತ್ತದೆ.

ಮುಂದುವರಿದ ಚಾಲನಾ ಸಹಾಯ ವ್ಯವಸ್ಥೆ (ADAS), ಸ್ವಯಂಚಾಲಿತ ತುರ್ತು ಬ್ರೇಕ್ ವ್ಯವಸ್ಥೆ, ಲೇನ್‌ನಿಂದ ಕಾರು ಹೊರಹೋಗುವ ಎಚ್ಚರಿಕೆ ಮತ್ತು ಬ್ಲೈಂಡ್ ಸ್ಪಾಟ್ ಮೇಲ್ವಿಚಾರಣೆಯಂತಹ ತಂತ್ರಜ್ಞಾನಗಳ ಕಾರ್ಯಕ್ಷಮತೆಯನ್ನೂ ಮೌಲ್ಯಮಾಪನ ಮಾಡುವ ಪ್ರಸ್ತಾವನೆ ಇದೆ.

ಪಾದಚಾರಿಗಳ ಸುರಕ್ಷತೆಗೂ ಹೆಚ್ಚಿನ ಒತ್ತು

ಕಾರು ಅಪಘಾತದಲ್ಲಿ ಪ್ರಯಾಣಿಕರು ಮಾತ್ರವಲ್ಲದೆ ಪಾದಚಾರಿಗಳು, ಸೈಕಲ್ ಸವಾರರು ಮತ್ತು ದ್ವಿಚಕ್ರ ವಾಹನ ಸವಾರರೂ ಅಪಾಯಕ್ಕೆ ಒಳಗಾಗುತ್ತಾರೆ. ಹೀಗಾಗಿ ಭಾರತ ಎನ್‌ಸಿಎಪಿ 2.0ನಲ್ಲಿ ಇಂತಹ ರಸ್ತೆ ಬಳಕೆದಾರರ ಸುರಕ್ಷತೆಗೂ ಹೆಚ್ಚಿನ ಪ್ರಾಮುಖ್ಯತೆ ನೀಡುವ ಉದ್ದೇಶವಿದೆ.

Tata Aeris: ಭಾರತದಲ್ಲಿ ಟಾಟಾ ಕಂಪನಿಯ ಹೊಸ ಏರಿಸ್ ಸೆಡಾನ್ ಬಿಡುಗಡೆ; 5.29 ಲಕ್ಷದಿಂದ ಬೆಲೆ ಆರಂಭ

ಕಾರಿನ ಮುಂಭಾಗದ ವಿನ್ಯಾಸ, ಬಾನೆಟ್, ಬಂಪರ್ ಮತ್ತು ವಿಂಡ್‌ಶೀಲ್ಡ್ ಸುತ್ತಲಿನ ಭಾಗಗಳು ಪಾದಚಾರಿಗಳಿಗೆ ಉಂಟುಮಾಡಬಹುದಾದ ಗಾಯದ ಅಪಾಯವನ್ನು ಕಡಿಮೆ ಮಾಡುವ ರೀತಿಯಲ್ಲಿವೆಯೇ ಎಂಬುದನ್ನು ಪರೀಕ್ಷಿಸುವ ವ್ಯವಸ್ಥೆಯೂ ಇರಲಿದೆ.

ಅಪಘಾತದ ನಂತರದ ಸುರಕ್ಷತೆಯೂ ಮುಖ್ಯ

ಅಪಘಾತ ಸಂಭವಿಸಿದ ನಂತರ ಕಾರಿನ ಸುರಕ್ಷತಾ ವ್ಯವಸ್ಥೆಗಳು ಹೇಗೆ ಕಾರ್ಯನಿರ್ವಹಿಸುತ್ತವೆ ಎಂಬುದನ್ನೂ ಹೊಸ ವ್ಯವಸ್ಥೆಯಲ್ಲಿ ಪರಿಶೀಲಿಸುವ ಸಾಧ್ಯತೆಯಿದೆ. ಅಪಘಾತದ ಬಳಿಕ ಬಾಗಿಲುಗಳು ಸ್ವಯಂಚಾಲಿತವಾಗಿ ತೆರೆದುಕೊಳ್ಳುತ್ತವೆಯೇ, ಇಂಧನ ಪೂರೈಕೆ ಸ್ಥಗಿತಗೊಳ್ಳುತ್ತದೆಯೇ ಮತ್ತು ತುರ್ತು ಸೇವೆಗಳಿಗೆ ಅಗತ್ಯ ಮಾಹಿತಿ ತಲುಪಿಸುವ ವ್ಯವಸ್ಥೆ ಇದೆಯೇ ಎಂಬ ಅಂಶಗಳನ್ನು ಪರಿಗಣಿಸಬಹುದು.

ಹೀಗಾಗಿ ಭಾರತ ಎನ್‌ಸಿಎಪಿ 2.0 ಜಾರಿಗೆ ಬಂದರೆ ಕಾರಿನ ಸುರಕ್ಷತೆಯನ್ನು ಕೇವಲ ಅಪಘಾತದ ಸಮಯದಲ್ಲಿನ ಪ್ರಯಾಣಿಕರ ರಕ್ಷಣೆಯಿಂದ ಮಾತ್ರ ಅಳೆಯದೆ, ಅಪಘಾತಕ್ಕೂ ಮುನ್ನ ತಡೆಗಟ್ಟುವಿಕೆ, ಅಪಘಾತದ ಸಂದರ್ಭದಲ್ಲಿ ರಕ್ಷಣೆ ಮತ್ತು ಅಪಘಾತದ ನಂತರದ ಸುರಕ್ಷತೆ ಸೇರಿದಂತೆ ಹಲವು ಹಂತಗಳಲ್ಲಿ ಮೌಲ್ಯಮಾಪನ ಮಾಡುವ ವ್ಯವಸ್ಥೆ ರೂಪುಗೊಳ್ಳಲಿದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ