PLI: ಆಟೊಮೊಬೈಲ್ ಪಿಎಲ್ಐ ಸ್ಕೀಮ್ನ ಡೆಡ್ಲೈನ್ ಒಂದು ವರ್ಷ ಮುಂದಕ್ಕೆ
Government Extends Last Date For PLI-Auto: 2022ರ ಏಪ್ರಿಲ್ 1ರಿಂದ ಜಾರಿಯಲ್ಲಿರುವ ವಾಹನ ಕ್ಷೇತ್ರದ 25,938 ಕೋಟಿ ರೂ ಮೊತ್ತದ ಪಿಎಲ್ಐ ಸ್ಕೀಮ್ನ ಗಡುವನ್ನು ಒಂದು ವರ್ಷ ಮುಂದಕ್ಕೆ ಹಾಕಲಾಗಿದೆ. 2027-28ರವರೆಗೂ ಈ ಯೋಜನೆ ಜಾರಿಯಲ್ಲಿರುತ್ತದೆ. ಇಲ್ಲಿಯವರೆಗೆ 95 ಕಂಪನಿಗಳು ಆಟೊ ಪಿಎಲ್ಐ ಸ್ಕೀಮ್ಗೆ ಜೋಡಿತವಾಗಿವೆ. ಅವಧಿ ವಿಸ್ತರಣೆ ಮಾತ್ರವಲ್ಲದೇ, ಪ್ರೋತ್ಸಾಹಕ ಧನ ವಿತರಿಸುವ ಸಮಯಾವಧಿಯನ್ನೂ ಕಡಿಮೆ ಮಾಡಲಾಗಿದೆ.
Updated on: Aug 31, 2023 | 3:34 PM
ನವದೆಹಲಿ, ಆಗಸ್ಟ್ 31: ವಾಹನ ತಯಾರಿಕೆಗೆ ಉತ್ತೇಜನ ಕೊಡುವ ಉದ್ದೇಶದಿಂದ ಆ ಕ್ಷೇತ್ರಕ್ಕೂ ಸರ್ಕಾರ ಪಿಎಲ್ಐ ಸ್ಕೀಮ್ (PLI- Production linked incentive) ಅನ್ನು ಕಳೆದ ವರ್ಷ ಜಾರಿಗೊಳಿಸಿತ್ತು. ವಾಹನ ಕ್ಷೇತ್ರಕ್ಕೆ ಉತ್ಪಾದನೆ ಆಧಾರಿತ ಪ್ರೋತ್ಸಾಹಕ ಯೋಜನೆಯಾದ 25,938 ಕೋಟಿ ರೂ ಮೊತ್ತದ ಈ ಪಿಎಲ್ಐ ಸ್ಕೀಮ್ ಅನ್ನು ಒಂದು ವರ್ಷ ಹೆಚ್ಚಿಸಲಾಗಿದೆ. 2026-27ಕ್ಕೆ ಇದ್ದ ಡೆಡ್ಲೈನ್ ಅನ್ನು 2027-28ಕ್ಕೆ ವಿಸ್ತರಿಸಲಾಗಿದೆ. ಇನ್ನೂ ಐದು ವರ್ಷ ಆಟೊಮೊಬೈಲ್ ಸೆಕ್ಟರ್ನಲ್ಲಿ ಪಿಎಲ್ಐ ಸ್ಕೀಮ್ ಜಾರಿಯಲ್ಲಿರುತ್ತದೆ. ಕೇಂದ್ರ ಬೃಹತ್ ಕೈಗಾರಿಕೆಗಳ ಸಚಿವ ಮಹೇಂದ್ರನಾಥ್ ಪಾಂಡೆ (Mahendra Nath Pandey) ಅವರು ಪಿಎಲ್ಐ-ಆಟೊ ಸ್ಕೀಮ್ನ ಪರಮಾರ್ಶೆ ಸಭೆಯಲ್ಲಿ ಮಾತನಾಡುತ್ತಾ ಈ ವಿಚಾರ ತಿಳಿಸಿದ್ದಾರೆ.
ಆಟೊ-ಪಿಎಲ್ಐ ಸ್ಕೀಮ್ನ ಅವಧಿಯನ್ನು ಹೆಚ್ಚಿಸಿರುವುದಷ್ಟೇ ಅಲ್ಲ, ಈ ಸ್ಕೀಮ್ನ ಫಲಾನುಭವಿ ಸಂಸ್ಥೆಗಳಿಗೆ ವರ್ಷಕ್ಕೊಮ್ಮೆ ಬದಲು ಪ್ರತೀ ಕ್ವಾರ್ಟರ್ಗೆ ಧನ ಸಹಾಯ ಬಿಡುಗಡೆ ಮಾಡಲು ಸರ್ಕಾರ ನಿರ್ಧರಿಸಿದೆ.
‘ಪಿಎಲ್ಐ ಸ್ಕೀಮ್ನ ಅವಧಿಯನ್ನು ಒಂದು ವರ್ಷ ಹೆಚ್ಚಿಸಲು ಮತ್ತು ಪ್ರೋತ್ಸಾಹಕ ಧನವನ್ನು ಮೂರು ತಿಂಗಳಿಗೊಮ್ಮೆ ವಿತರಿಸಲು ಉದ್ಯಮದಿಂದ ಕೆಲ ಮನವಿಗಳು ಬಂದಿದ್ದವು ಎಂದು ಮಹೇಂದ್ರ ನಾಥ್ ಪಾಂಡೆ ಹೇಳಿದ್ದಾರೆ.
ಇದನ್ನೂ ಓದಿ: ಪಿಎಲ್ಐ ಸ್ಕೀಮ್ ಅಡಿಯಲ್ಲಿ ಐಟಿ ಹಾರ್ಡ್ವೇರ್ ತಯಾರಿಕೆಗೆ 40 ಕಂಪನಿಗಳಿಂದ ಅರ್ಜಿ, 75 ಸಾವಿರ ಉದ್ಯೋಗಸೃಷ್ಟಿ ಸಾಧ್ಯತೆ
ವಾಹನಗಳು ಮತ್ತು ಬಿಡಿಭಾಗಗಳ ಪರೀಕ್ಷೆ ನಡೆಸಲು ಇನ್ನೂ ಎರಡು ಏಜೆನ್ಸಿಗಳನ್ನು ಸೇರಿಸಲು ಸರ್ಕಾರ ನಿರ್ಧರಿಸಿರುವುದು ತಿಳಿದುಬಂದಿದೆ. ಮಧ್ಯಪ್ರದೇಶದಲ್ಲಿ ಗ್ಲೋಬಲ್ ಆಟೊಮೋಟಿವ್ ರಿಸರ್ಚ್ ಸೆಂಟರ್ (ಜಿಎಆರ್ಸಿ) ಮತ್ತು ಚೆನ್ನೈ ಅಂಡ್ ನ್ಯಾಷನಲ್ ಆಟೊಮೋಟಿವ್ ಟೆಸ್ಟ್ ಟ್ರ್ಯಾಕ್ಸ್ (ನಾಟ್ರಾಕ್ಸ್) ಸಂಸ್ಥೆಗಳು ಆ ಎರಡು ಕಂಪನಿಗಳಾಗಿವೆ.
ಈ ಪಿಎಲ್ಐ ಆಟೊ ಸ್ಕೀಮ್ ಅಡಿಯಲ್ಲಿ, 2022ರ ಏಪ್ರಿಲ್ 1ರಿಂದ ಭಾರತದಲ್ಲಿ ತಯಾರಾದ ಅಡ್ವಾನ್ಸ್ಡ್ ಆಟೊಮೋಟಿವ್ ಟೆಕ್ನಾಲಜಿ (ಎಎಟಿ) ಉತ್ಪನ್ನಗಳ ಮಾರಾಟಕ್ಕೆ ಪ್ರೋತ್ಸಾಹಕ ಧನ ಅನ್ವಯ ಆಗುತ್ತದೆ. ಯಾವ ಎಎಟಿ ಉತ್ಪನ್ನಗಳಿಗೆ ಪ್ರೋತ್ಸಾಹಕ ಕೊಡಬೇಕೆಂಬುದನ್ನು ಟೆಸ್ಟಿಂಗ್ ಏಜೆನ್ಸಿಗಳು ನಿರ್ಧರಿಸುತ್ತವೆ. ಶೇ. 50ಕ್ಕಿಂತಲೂ ಹೆಚ್ಚು ದೇಶೀಯ ಮೌಲ್ಯ ವರ್ಧಿತ (ಡೊಮೆಸ್ಟಿಕ್ ವ್ಯಾಲ್ಯೂ ಅಡಿಶನ್) ಎಎಟಿ ಉತ್ಪನ್ನಗಳು ಈ ಸ್ಕೀಮ್ಗೆ ಅರ್ಹವಾಗಿರುತ್ತವೆ.
ಇದನ್ನೂ ಓದಿ: ಮೊದಲ ತ್ರೈಮಾಸಿಕದಲ್ಲಿ ಶೇ. 8ಕ್ಕಿಂತ ಹೆಚ್ಚು ಆರ್ಥಿಕವೃದ್ಧಿ ಸಾಧ್ಯತೆ; ಆರ್ಥಿಕತಜ್ಞರ ಸರಾಸರಿ ಲೆಕ್ಕಾಚಾರ
ಕಳೆದ ಒಂದು ವರ್ಷದಿಂದ ಜಾರಿಯಲ್ಲಿರುವ ವಾಹನ ಕ್ಷೇತ್ರದ ಪಿಎಲ್ಐ ಸ್ಕೀಮ್ನಲ್ಲಿ ಈವರೆಗೂ 95 ಕಂಪನಿಗಳು ಜೋಡಿತವಾಗಿವೆ. ಈ ಕಂಪನಿಗಳಿಂದ ಒಟ್ಟು 10,755 ಕೋಟಿ ರೂ ಬಂಡವಾಳ ಹೂಡಿಕೆಯಾಗಿದೆ. ಡಿವಿಎ ಸರ್ಟಿಫಿಕೇಶನ್ ಕೊಡಲು ಎಸ್ಒಪಿ ಕೂಡ ಜಾರಿಯಲ್ಲಿದೆ.
ಹೊಸ ತಂತ್ರಜ್ಞಾನ ಉತ್ಪನ್ನಗಳನ್ನು ಸ್ಥಳೀಯವಾಗಿ ತಯಾರಿಸಲು ಉತ್ತೇಜಿಸಲು ಪಿಎಲ್ಐ ಸ್ಕೀಮ್ ಅನ್ನು ಸರ್ಕಾರ ಜಾರಿಗೆ ತಂದಿದೆ. ಎಲೆಕ್ಟ್ರಾನಿಕ್ಸ್, ವಾಹನ, ಸೆಮಿಕಂಡಕ್ಟರ್ ಇತ್ಯಾದಿ ಕ್ಷೇತ್ರವಾರು ಪ್ರತ್ಯೇಕವಾಗಿ ಪಿಎಲ್ಐ ಸ್ಕೀಮ್ ಅನ್ನು ಸರ್ಕಾರ ನಡೆಸುತ್ತಿದೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
